Read Nalca MARKUS 1 Bible Online

MARKUS 1 - Nalca bible

MARKUS 1

¹Imik Neyung bedya me Yesus Kristus amba perob lero yanggan yuba men leb einiwok yub era ban.

²Ban perobaʾ lero yanggan yub era, ununumnaʾ lenya Yesaya bedya, Imik Neyung adya lemokaʾ anyek momnya dobokaʾ ara, ”Nadya wa wenya bera, anda loboka men anja pik yarawogululaʾ aboka, alak bokol binimna.

³Nimi ben hnon hwalek sam bii aboka lelemnamlaʾ ara, Wenelesilnya bemba pik orowek yarawoka meeb loblulum. Al yibinamlya pika nidyaʾ sangawoka jongaʾ yarawanalum, wenyalamnamla aboka lemok,” hyok.

⁴Ban eini wenyaboka orowek momnya domok sok, gigiwoka Yohanes bera hwalek sam yeindeboka, Imik Neyung yuba leb elegoka nimi meka dalasuk. Anya, wenyalamokaʾ ara, ”Imik Neyung adya ugunja malya unaʾ sobaʾ meewosululaʾ aboka dara, malya unaʾ ak ab ganya dangawoka lobmun dara, meka dabnesin,” aboka lelemok.

⁵Nimi nauba Yudea moka pik eb nimi hnon, Yerusalem heikek nimi nidyaʾ hnon Yohanes bedya lelemok yub ek kel balamek. Anya sikja malya unaʾ laga lelemek dara, Yohanes bedya Yordan mek ek meka dalasuk.

⁶Wera Yohanes bera, alda akleng ak dara, unta pam hong akleng ek ongolomok. Goukwa noronaʾ ara bokaʾ adya norolomok. Denaʾ ak dara, ged-gedya kweng eb bei lusa mek ab delemok.

⁷Yuba lelemok dara, ban wenyaro lelemok, ”Nara men yasenya bera mek so bok, eimik yanalanya bera hyak senenggomnya bek yanamla. Alja yan ongonaʾ gwiriwanasinyaʾ anaba, nadya dara, unuwamenggomnya bek yanamla.

⁸Nadya dara, mek dem adya dalasin bok, alja dara, Imik Neyung Geisinya ab mek dibaʾ dabnesil,” aro lelemok.

⁹Ban salek enyek, Yesus ara Galilea moka sokok Nazaret heikek abaʾ ara, Yohanes meka dalasukaʾ ak sam yeilimok dara, Yesus anaba Yordan mek ek meka damok.

¹⁰Wera Yesus ara mek lomok abaʾ goboka welok dara, kemelemok enyek, Imik Neyung Geisinya ara im pika gaboka, bek wining enesoʾ anyek, Yesus adyaʾ nong dubuk bul yeilimok.

¹¹Danyek, imik heik ab yub era, ”Anak danyek nadyaʾ wanaʾ nong me ululam. An nong adya nadya ganya heklenel,” hyok.

¹²Dara wera, al neik salek enyek, Geisinya adya Yesus ara hwalek sam arawoka bo byuk.

¹³Wera Yesus ara lika denga hnonok uboka ebdobnya mek badya mabok sum era, bisaʾ dubnya Satan bedya sunubyaawok. Beiyik ulumlaʾ hnoum ulumok dara, lero nang edyaʾ Yesus ak arawoka bo ulumek.

¹⁴Wera Yohanes bera seleb henga gerekoka gasa ek sam beiyimek dara, Yesus ara Galilea sokok sam biniboka, Imik Neyung adyaʾ perob yuba neklesuk.

¹⁵Dara Yesus adya, ”Imik Neyung adya wenelemnesil salek era gigiwoka seleb oka dal. Ugunja malya unaʾ ak ab ganya dangawomunukanya, Imik Neyung adyaʾ perob yub enyek dib senewanalum,” aro lelemok.

¹⁶Wera Yesus ara Galilea mek gwan gem pik yabalamok salek, nimi penya nanga Simon beb alja weisa Andreas beb anyagan ulurek. Ban sik penya nang dara, sikda hadyaʾ don nang ulurekaʾ anasa, hadyaʾ oumaʾ doloklerekaʾ ak eibsuk.

¹⁷Wera Yesus adya yeiniboka, ”Nak dobol yananurum, dara ugunda nimi don nang dangiyiwanasin” hyok.

¹⁸Dara sik penya nang era men hadyaʾ oumaʾ aklenga loboka berra aboka Yesus ak dobol birik.

¹⁹Wera Yesus ara neik mok era anam dongora yabalamok dara, onoʾ yok noungusuk penya nang Zebedeus bedya mabo Yakobus beb Yohanes beb eibsuk. Sikda mek ekla bunaʾ lomok bukoka hadyaʾ oumaʾ henga weknelerekaʾ ak eibsuk.

²⁰Dara Yesus adya ugunda nak yoururum aboka, berra aboka men ebsuk. Dara sikjaʾ neyung Zebedeus beb alja wa welemek nang eb mek ekla bunaʾ ak an gobdo loboka, Yesus ak dobol birik.

²¹Wera sikda balamekaʾ ara, Kapernaum heikek lanal byik. Wera Sabat mem sum dok dara, Yesus ara Yahudi nim edya yuba don ek sam wekoka yuba nek einiwousuk.

²²Dara Yesus adya yuba neklesukaʾ anyek, sikja yuba neksin nang edya neklesik sok neknenggusuk, alda hyak migibaʾ gebman anyek ura neklesukaʾ anasa, sikda salya uru lelelanya senemek.

²³Wene salek enyek, nimi ben hnon bisaʾ gologomoknya benyek, Yahudi nim edya yuba donaʾ ek sam ab lanawoka, ebngalagoka lelemokja,

²⁴”Wei, Yesus Nazaretnya o, nuk hekaʾ hubdanamabaʾ anasa yeililam do? Anda nuk obsununaʾ aboka yeililam de? Anda heknya ululamaʾ ara, nara ella ulunggen; anda Imik Neyung bek ab geisa nongaʾ ak bokol yeilinjoknya bek ululam!” aboka lelemok.

²⁵Bok Yesus adya bisaʾ ak, ”Anda yuba sanaʾ ara hyak gelegalom! Anda ban benyek anyebaʾ ara goboka bilom,” hyok.

²⁶Dara bisaʾ era, gologomoknya bek ab hyak nauba yeiriwoka eiliwoka gweklemokaʾ ara, hyak senenggom yub edya goboka sabdongora ngeboka gobok.

²⁷Wenyek nimi nidyaʾ ara hyak lok ganya boboka sik moumen wenyaldalamekaʾ ara, ”Wei, ban era hek damok yuba do? Wenyek bo lanawak yub! Hyak senenggom lok so uboka migib edya bisaʾ goboka yabalom hen enyek, alja yuba keboka unulumak bar!” aboka lelemek.

²⁸Dara Yesus adya ban lok soʾ unulamla an yub era, Galilea moka nidyaʾ neikaʾ ok ob lelewok.

²⁹Wera Yesus ab alja yuba doro diriga ban nang eb dara, Yahudi nim edya yuba don ek ab gobek dara, Yakobus beb, Yohanes beb, sikda neikaʾ Simon Andreas, sikja ek sam byik.

³⁰Dara Simon aldogol gera poba neiknaʾ salamokaʾ ak alja eklek sam mamok. Anasa, gel gera anaso unu neiknaʾ salamla aboka, sikda Yesus ak nekek.

³¹Dara Yesus ara, Petrus aldogol gedyaʾ ekla ak sam biniboka, soruka gliboka bukiyiwok. Dara al wene salek enyek, alak salamok poba neiknaʾ era denghyok dara, gera bukoka bilimek nang emba arawoka ubsuk.

³²Wera henga wekel biniboka inil yabok dara, nimi nidyaʾ neiknaʾ salawoka, bisaʾ doboka weklesuk nim era, Yesus ak bo yeilimek.

³³Heik enyek an nimi nidyaʾ ara, Yesus bilimok ek esindamok an kiboka mamagal yeilimek.

³⁴Dara Yesus ara nimi nauba neikoka malya dangalasuk nim era hweboka, bisaʾ mandebnaʾ era, yakoka hwebsuk. Bisaʾ ganya yamaʾ dara, Yesus ara heknya ulumlaʾ ara, sikda ella ulumekaʾ anasa, yuba sanaʾ ara mem aboka yuba seksuk.

³⁵Ampum maboka gwelekok dara, gunaʾ dakoka anam beregel yabok sab-sab, Yesus ara bukoka ek ara loboka, beiyik sam heik gokgobok gakdenaʾ ak biniboka molol bilimok.

³⁶Simon beb aljaʾ hemyab eb dara, Yesus ak ebdongora bilimek.

³⁷Wera sikda Yesus ak eibek dara, ”Neyung o, nimi nidyaʾ ara anak elenjak,” hyek.

³⁸Bok Yesus adya lebnesuk dara, ”Nara ban unuwonunaʾ aboka yeilinabok anasa, anyagan heik ok berem heik pik an Imik Neyung yuba hnon leb elegousununaʾ aboka, nunda anyan heik pik an dongoro yabalanob,” hyok.

³⁹Dara, Yesus ara Galilea mok soko heik me nidyaʾ eb girigoka, Yahudi inim edya yuba don e pik wekoka Imik Neyung yuba leb elekgiga, bisaʾ goleklesuk nim, yakoka hwelesuk.

⁴⁰Nimi ben hnon gororomaʾ adya alja bokaʾ malya ura delemoknya benyek, Yesus ak yeiniboka, koma lumugoka lebokaʾ ara, ”Neyung o, anda nak hwebnamna senemen dara, wera neyung or hweiyiwanelom,” hyok.

⁴¹Dara Yesus ara benyek an hyak angoo yadyek senewookanya, alda benyek an soruka diyiboka lebokaʾ ara, ”Nadya dara, merewolul senemnaʾ anasa, or bokaʾ doblom,” hyok.

⁴²Dara al wene sab-sab enyek, alja gororomaʾ delemokaʾ ara dengaboka gobdo merewok.

⁴³Dara Yesus adya anda or bilom hyookanya, alak wenewanamokaʾ ara,

⁴⁴”Anda yok nim ek nara merewan aboka nekdo yabanaʾ ara hyak mem. Alda Imik Neyung yuba wa gak nim ek, anyaganyek hnonok or bp amaldal bilom. Dara anda merewalamaʾ nong amba ok hnonok, aldib an merewal anaʾ dibaʾ Musa bedya unululum aboka lebok sok, Imin Neyung ak sam pam oboka gibil binilam,” hyok.

⁴⁵Bok ban hwemoknya bedya dara, hyak nauba yeiriwoka yokok-yokok sam hwebnel aboka nekdo yabalamokaʾ adya, Yesus ara nauba heikek ara laga lanal yanggumok. Alda doknowoka gakdenaʾ gokgobok sam uro yabalamok. Bok anyek babya nimi nauba yok-yok mok ebaʾ ara alak yaldibilloklomek.