Read Nalca MARKUS 13 Bible Online

MARKUS 13 - Nalca bible

MARKUS 13

¹Wera Yesus ara Imik Neyung ek ab goboka yabok dara, alja yuba doro diriga bannya be hnonja Yesus ak, ”Neyung neklesilimnya o, ban weiboka sorob girik mel-mel anaʾ eb, an sorob e danyek, hyak perob nong anyek kendelom,” hyok.

²Anasa Yesus ara alak, ”Wera anda ban senenggomaʾ pero sorob e danara eiyilam goma? Wera ban denewoka sorob girik danera, hnon girik era goʾ yok girikek denewanggunumla, nidyaʾ ara golowoka denghenemlaʾ ak umla,” hyok.

³Yesus ara onoʾ Zaitun meinik sam biniboka, Imik Neyung ek sam kemero bulumok salek, Petrus beb, Yakobus beb, Yohanes beb, Andreas beb dara, sikbeyokaʾ Yesus ak heibek,

⁴”Dara nuk wenyhenesilim, hek sum ek anera unuwanamlekanya, ban nidyaʾ dengabdaknamlaʾ amba dara, beknaʾ dibaʾ ara hek damok ek lanawanamla do?” wenyaboka heibek.

⁵Anasa Yesus ara sikenek, ”Ugunuk hnon nim edya sondaʾ amba bobnenewoka lebsijek anasa, keeboka ulululum!

⁶Eimik dara, nimi gong nadya si nek sibdangoka yanamaakanya lebnemakja, Alda na an, wenyaboka nimi gong sondaʾ leboka bobnenewanamak.

⁷Anasa ugunda mal irr anaʾ gom, nimi nauba malya ura obdangdo yabalamak an yuba kebnelum dara, ganya oldanggom, mem. Ban yokaʾ-yokaʾ nidyaʾ ara men unuru yabalemnamla, bok nera anam sidyaʾanya gomaʾ.

⁸Dara yok mok soko nim edya, yok mok soko nim ek mala boboka, nauba obdangdo yabalemnemak. Mok soko me sogoumaʾ dorogoka, gwaneng okaʾ lanawanamla. Dara ban yokaʾ-yokaʾ unulumnamlaʾ nidyaʾ ara, wenyok yok un salek dorowonunaʾ aboka, anam ganya okna dabnaʾ lanab einiwanamlaʾ ara an.”

⁹”Bok ban ugun nong ara, pe keebdaboka ulumnelum! Eimik era ugunda yub amba yana lelesin nang ek dob elegoka, ugunda Yahudi nim edya yuba don e pik saboka olomnesak. Ugunda nasamba leboka, mok soko dub nang ek hnon, wenesin dub nang ek hnon, sik hougunguk laga nasamba yub enyek sikenek lelenokaʾ aboka, unulumnesak.

¹⁰Bok Imik Neyung adyaʾ perob lero yanggan yub ek dara, mok soko me nidyaʾ men leb elekdo yibinimak.

¹¹Dara ugun nong ara henga geregoka, giliwoka bo biniboka, yok nang soruk ak dob eleganasak dara, nunda hekaʾ huru yuba sabnemab senewoka ganya daldom-daldom anaʾ ara mem. Ugunja ganya doboka sabnenggunulum, alda Imik Neyung Geisinya adya sabnelabok anasa, wera ban salek enyek anak eleganenggelaʾ sunuwoka, yub enyek or wenyhenelum.

¹²Nimi be hnon aljaʾ meneng hem benyek, yok nang ek or obnelum aboka dob eleganamla. Dara neikik, be hnonja alaʾ me ak unuwanamla. Hnonda meneng mab edya, sikja genonga neyung ak obdangoka yuba dil balameija dara, hnon dibaʾ olomnemak.

¹³Ugunda nadya si nenesa leboka, nimi nidyaʾ ara ugunuk lek senelemnesak. Bok ban nidyaʾ unuldalameija hnoum an siklewoka bulumlyaʾ ara sidyaʾ daknamla dara, benyek eimik era blebnamla,” wenyaboka neksuk.

¹⁴”Ugunda eimik era, yu unaʾ hwam malyaʾ ara unuwanggunumso senemeijaʾ ak seknamlaʾ eibnelum dara, nimi Yudea sokok ulumeija nim era mok soko meinik sam men doknol balanok. Anya ugun einiwanemun nim era, pe seiniwanalum.

¹⁵Nim e dub pik buru yabalameija nim era, yokaʾ-yokaʾ e lomok ulumlyaʾ anyek hnon dobnunaʾ aboka, e lomok weknaʾ ara mem.

¹⁶Anya wak beiyik sam ulumeija nim era, ek aklenga dol yangganaʾ ara mem.

¹⁷Ban unuwanamla sum nong enyek, nimi gela me bomeija gelewa eb, me anam moma dinilemeija gelewa eb dara, hyak okna dabnamla!

¹⁸Ban nidyaʾ lebnanya danera, moka yanggan li nenyek unuwalyek aboka, ugunda heng uboka mololelulum.

¹⁹Wera ban yokaʾ-yokaʾ okna dabnesil salek yanamla sum era, Imik Neyung adya anam soko ullilimok sum enyek moruwoka, wen an ulumab salek, anya onoʾ eimik hnon sounuwoka unuwanggunumla igina kwelisinaʾ enyek, hnon mekaʾ unuwanggubukaʾ anyek lanawanamla.

²⁰Anasa Imik Neyung ara burumaʾ nenewanggunumso dara, wera soko nim era, goʾ hnon ubnenggunuseng. Bok Imik Neyung adya, alja weboka dobsuk nim emba leboka, mek burumaʾ nenewanamla.”

²¹”Ban unu malya nenewanesil sum era, yok nim edya ugunuk yeiniboka, kendululum, nimi blebsinaʾ dubnya bera anyagan ulumla goma, kendululum, alda ono sam ulumla henesak dara, dib lebsak senenggom mem.

²²Anasa wera, eimik era sondaʾ anasa nara nimi blebsinaʾ dubnya, nara ununumnaʾ lenya ulumna henemak nang era, nauba lanawoka, sikja dara, nimi hnon weboka dobsuk nim ek bobnenewoka sondaʾ lebnemeibyaʾ ak men aboka, yokaʾ-yokaʾ nauba beknaʾ eneba unuro yabalemnemak.

²³Ban yokaʾ-yokaʾ nidyaʾ anam unuwanggumlya salek, nadya men orowek nidyaʾ neksinaʾ anasa, pe keeboka ulumnelum,” hyok.

²⁴”Wera igin yakaʾ damok unubgogowanamlaʾ seleb dara, eimik era heng ara gunaʾ danamlakanya, walaʾ ara dilinaʾ yebnenggunumla.

²⁵Dara onoʾ guraʾ nidyaʾ imik ara sokok sam malyingginiboka, imik sam migib ulumlaʾ nidyaʾ ara borom-borom henemla.

²⁶Ban ane sum enyek, nimi dibaʾ me nera im pik ubok, aljaʾ senenggom migib senedyaʾ gebman si imik nenenaʾ ab, yanggalyaʾ ak eibnemak.

²⁷Dara ban salek era, alda alja lero nang ek binilum aboka oruganesilikanya, alja weboka dobsuk nim era sokok an pika dombadya, soko dakalongnaʾ ak ab ara, im dakalongnaʾ ak ab eboka bo yanalum aboka oruganesil.”

²⁸”Ara gal ek sunuwoka lebnamnaʾ damok enyek pe kebnelum! Ugunda ara gal era soruka peboka ondoka buruwoka sangal yaban dara, wera gal dok liʾ ara seleb oka dal senewoka, ugunda ella ululum.

²⁹Anasonya neikek, yokaʾ-yokaʾ nidyaʾ gigiwoka unuro yabalya dara, wera yanamla salek era seleb pik sindamak senewoka ella ubnelum.

³⁰Nara dib lebsin! Ban nidyaʾ gigiwoka unuwanamlaʾ ara, anam unuwanggumlya dara, wen an ulumak nim era nidyaʾ denghenggunumak.

³¹Im ab soko ab dara denghenelabok, nadya yub ek dara, denghenggunumla,” hyok.

³²”Ban nidyaʾ unuwanamlaʾ anaba, nimi hnon hek sum ek, hek jam ek unuwanamlaʾ ara, hyak elgom ulumak. Imik heikek sam ulumak lero nang eneba elgom ulumak, alja me neneba elgom ulumla, alda Imik Neyung ok albeyokaʾ ella ulumla.

³³Hek sum unnuwanamlaʾ ara, ugunda elgom ululum bok anasa, ugunda pe keeboka diri ulumnulum.

³⁴Sununaʾ ara, nimi be hnon yok heik binibnekanya, alja wa wen nim ek nadyaʾ ara pe diri bo ulululum aboka, anda wa nenyek welemnelam aboka wa yok-yok elege balasil. Dara pik sindamak sam welelanya bek, anda pe welsinilelom aboka oruga balamla sok, ubnamla.

³⁵Wera anasa, e damnya bera hek sum yanamlaʾ ara, ugunda elgom ululum bok anasa, wera e damnya bera, alda sinik sam gom, inimnek dukdukanek gom, gweleknek yangman gom, henga doroklamla salek yanamla gom anasa, pe diri ulululum.

³⁶Alda yanggalya salek, ugunda hogunga malamunaʾ ak eibsilyek aboka, pe diri ulululum.

³⁷Nadya ugunuk an pe diri ulululum hesinya nenera, onoʾ nimi nidyaʾ yok nim ek anaba, pe diri ulululum wenyalamna,” hyok.