Read Nalca MARKUS 14 Bible Online

MARKUS 14 - Nalca bible

MARKUS 14

¹Israeli nim edyaʾ eillosinaʾ amba beknaʾ sum, Paskah sum eb, welenaʾ orok roti gwanenga den suma yenewanamokaʾ ara, anam lika penya ok lobonggok. Ban salek era, yuba wa gakaʾ dub nang eb, yuba neksin nang eb dara, Yesus ak gelelenga hekaʾ uboka heng geregoka obnemab do senewoka pik elemek.

²Bok sikja lebekaʾ ara, ”Senenggom malya damoka gliboka beibibyek anasa, senenggom sum emba yokaʾ-yokaʾ meewanamak salek era, unuwanggunumab,” abdek.

³Wera Yesus ara, Betania heikek sam gororomaʾ adya malya uro delemoknya Simon bedyaʾ ek sam denaʾ dero bukek bok, gela hnon yok. Dara, gel gera alda perobaʾ gen-gen song mek, nauba rupiah deklemek anyek, gokno hmeiyek bo yeiniboka, joboka, Yesus adyaʾ huk dubuk sam yekel golulumok.

⁴Nimi wene nim anyagan ulumek nim era, anyek unulumokaʾ ak eibik dara, sikda yu ganya boboka lebekaʾ ara, ”Hekaʾ hublulaʾ aboka perobaʾ ngiknaʾ mek ara, bolol meneklamla do?

⁵Ban mek enera gibnaʾ hnonok amba deknaʾ dolomak rupiah anaso dekoka, ban rupiah era bonaʾ garan ulumak nim ek eleganeseng!” hyeekanya, sikda gel genyek an nauba wabek.

⁶Bok Yesus adya, ”Alda or unululul! Alda nak perobnya nenyek unululabok, ugunda hekasa alak ganya igina nenelelum do?

⁷Bonaʾ garan uboka araweisiseng senen nim era, ugun gangganek sam sobaʾ ulumak. Anasa ugunda arawanob senewanesom dara, sikenek arawanasusum. Bok nak dara, ugunub sobaʾ neikaʾ unggulumnemab.

⁸Ban gel genedya unuwalnya nera, alja unuweisinya senelanya nera an unuwal. Ban gel genera nak soko loknenyakaʾ amba perob song mek enera, men orowek nadya nongok yek goluwanel.

⁹Anasa, nara ugunuk hyak dib lebnesin, Mok soko me nidyaʾ Imik Neyung adyaʾ perob lero yanggan yuba lero yabalameija heikek ara, ban gel genedya nak an unuwanelaʾ anyek, alak bekoka alja si silimnemak,” hyok.

¹⁰Dara, Yesus adya yuba doro diriga ban nang, obadya nang ek ab, be hnon alja si nera Yudas Iskariot bera, yuba wa gakaʾ dub nang ek, Yesus amba, sikenek yuba diringgel byuk.

¹¹Nimi wa gak nang era, Yudas Iskariot bedya unuwanasin an yuba kebek dara, perob aboka, nauba rupiah deknenjab aboka lebek. Dara, alda pewalya sum donok, Yesus ak oblulum hununaʾ aboka, pik elemok.

¹²Wera welenggom roti gwanenga den sum, men nong sum era, nim ara giboka domba pam oro yabalamek salek, Yesus adya yuba doro diriga ban nang era alak, ”Anja dara, har sam ak Paskah sum ansamba meewoka beibneseng senelam do?” aboka heibek.

¹³Dara, Yesus ara alja yuba doro ban penya nang ek orugoka sikenek, ”Ugunda nauba heikek sam burumun dara, nimi be hnon meka gweboka bo yabalenya bek eibnerum. Dara, benyek an dobol binirumukanya,

¹⁴wekel yabelya e, e damnya bek an, Neklesilnya bedya wenyamla, nadya yuba doro diriga ban nang eb, nab dara, har ek sam Paskah sum amba neikaʾ denemab do, wenyamla, henerum.

¹⁵Dara benedya imik sam perobaʾ senenggom e nenyek, orowek pero-pero meeb loboka, yokaʾ-yokaʾ nidyaʾ ulumlyaʾ anyek lebnesil. Anasa, ugunda anyagan nunda Paskah amba denemabaʾ ara, meewanasurum,” aboka orugosuk.

¹⁶Dara, ban penya yuba doro diriga ban nang era nauba heikek biniboka, Yesus adya sikenek anaso unuwanarum amokaʾ ara, gigiwok ak eibdeekanya, Paskah sum amba sikda meewoka unuwarek.

¹⁷Wera inimnek era, Yesus ab, alja obadya yuba doro diriga ban nang eb, anyagan yek.

¹⁸Sikda anyagan bukoka dero balamek salek, Yesus ara sikenek, ”Nara ugunuk wenyhenesinaʾ ara, dib lebnesin, Ugun gangganek be hnon, nab neikaʾ delenamnya bedya, alda nak obnenokaʾ aboka yuba dil binimla,” hyok.

¹⁹Ban wenhyokaʾ kebek dara, sikja ganya hyak suguwosuukanya, sikda be hnonok-hnonok Yesus ak, ”Neyung o, ban nera nak danagom, goma?” wenyaboka heiru balamek.

²⁰Dara, alda sikenek, ”Ugun obadya nang danyek, be hnon nab neik piringik delenamnya bedya, yuba dil bininel.

²¹Anasa, aldib nimi dibaʾ me nera, bukuk sam alsamba momnya dobok sok sunuwoka unuwanamla, bok yuba dil binilanya be nong anyek, alak hyak omom nonga danamla! Anasa, alda sokok an beilinaʾ loseng dara, pemneseng!” hyok.

²²Wera sikda delemek dara, Yesus ara roti gwanenga dobookanya, perob aboka giboka, roti gwaneng en sob menegok dara, alja yuba doro diriga ban nang ek elegousuukanya, lebokaʾ ara, ”Wera nadya nong era ban, or doboka delelulum,” hyok.

²³Nen seleb dara, alda mek hmeiya doboka, perob aboka gibuk dara, sikinek elegosuk. Dara sikda nidyaʾ ara mek hmeiya enedyok doboka dero byik.

²⁴Anya alda sikenek, ”Nadya eneng era ban, Imik Neyung adya unubdanamab aboka wenyamok eneng era, nimi nauba amba yeksin.

²⁵Nara ugunuk dib lebsin, Nak dara, ban anggur mek enera, denggulumnyaʾ moruwoka, wenyoknya, Imik Neyung bedyaʾ wenesin heikek sam ab, nara denemna,” hyok.

²⁶Dara, sikda gibna bera hnon sebek dara, sikda Zaitun meinik sam byik.

²⁷Dara onoʾ Yesus ara hnon sikinek lebokaʾ ara, ”Yuba bukuk sam lero momnya dobokja, Nara sik bo ulumnesilnya benyek obnamna dara, alja bo ulusilnya domba era, doluwoka bokdanamak, hyokaʾ anasa, ugumbabya nak dib senen ganya era doboka gilib meneganamla.

²⁸Bok, nara seleb suboka embengaʾ buknya dara, nak men Galilea sam bilimnamna,”hyok.

²⁹Wenyek Petrus bedya Yesus ak, ”Yok nang ek dara, aldib ganya gilib meneganalabok, nak dara, mekaʾ unuwanggunumna,” hyok.

³⁰Anasa Yesus adya Petrus bek, ”Nara anak dib wenyhenenggen. Sumen inimnek era, ayam yub anam li penya ngoubnenggumlye salek, anda nak sondaʾ amba li winilya bobnenewoka, benera naba elnya gomaʾ henelam,” hyok.

³¹Bok Petrus bera hyak yeiriwoka, ”Nara anab neikaʾ somogananamaʾ anaba, nara anak elgom ulumna henggunumna,” hyok. Dara onoʾ yok nang eneba neikso al wenyab ligiwek.

³²Wera Yesus ab alja yuba doro diriga ban nang eb dara, balameknya nera, Getsemani alamek sokok sam byik. Dara, Yesus ara alja yuba donaʾ nang ek, ”Nara heng uboka molol bilimnya salek era, ugunda anyagan or diri bulunululum,” hyok.

³³Dara Yesus ara, Petrus beb, Yohanes beb, Yakobus beb, neikaʾ binimab aboka eboka bobsuk. Dara, alda ganya loka daboka ingmuna bere-bere balamok.

³⁴Anasa Yesus ara sikinek, ”Nara hyak ganya angoo senewanakanya, somogamen ganya beibnelaʾ anasa, ugunda anyagan uboka, kemero diri ulunululum!” hyok.

³⁵Dara Yesus ara mek mok so biniboka, sokok eilib maboka, heng uboka mololomok. ”Wera or dara, ban salek era nak ab gomowolul,” aboka mololemok.

³⁶Alja mololomokaʾ ara, ”Neyung o, wei, neyung o, anda yokaʾ-yokaʾ ak dara, unuwanasomaʾ ok. Ban mek hmeiya ara, nak anyeb dobnelam bok, nadya ganya edya anaso unuwanaso senenenya nek unuwalyek, alda anja senemenya nenyek or unuwonulul,” aboka mololomok.

³⁷Seleb dara, alda yuba doro diriga ban nang ek samawoka onok yalamok enyek, sik winilya dara, hogunga mamekaʾ ak eibsuk. Anasa Yesus ara Petrus bek, ”Simon o, anda hogung malalam de? Diri bun dara, jama hnonokaʾ anaba, okna de?

³⁸Ugunda nimi sunulyamasinaʾ lomok sam malyinggumunuk aboka, diri ubdangoka, heng uboka mololdalalulum. Ganya ak dara, pe unuwanamso bok, nong ak dara, hmeng ulumla,” hyok.

³⁹Dara onoʾ Yesus ara loboka, men molomok molonaʾ enyek, onsok saaboka molol byuk.

⁴⁰Wera onoʾ, alda onsok yalamok enyek, sikda heng igina berewosukaʾ anasa, hogung seleb mamekaʾ adya, alak hekaʾ henobaʾ gomaʾ aboka yuba sab eleganggubek.

⁴¹Wera Yesus ara, onoʾ saaboka li winilinya yeinibokaʾ sikinek, ”Or malye, hogung maboka dek-deka soblulum. Or seleb e. Kendululum! Nimi dibaʾ me nera doboka malya unaʾ nang soruk eleganamak salek era, wera seleb oka dal.

⁴²Wera binimabaʾ anasa, lanawolulum. Nak obnelum aboka yuba dil bililanya bera, seleb oka yanggalaʾ anasa, binimab!” wenyaboka eboka bobsuk.

⁴³Yesus ara anam yuba salamok sab-sab, alja obadya yuba doro diriga ban nang ek ab, ben hnon Yudas alameknya bera lanawok. Dara parang ab, doluknaʾ gamaʾ ab, bomek nang enera, sikda yuba wa gakaʾ dub nang eb, yuba neksin nang eb, Yahudi soko dub nang eb dadya, henga goubnelum aboka orugeisik nang eb, Yudas beb neikaʾ yek.

⁴⁴Wera yuba dil bilimoknya bera, orowek sikinek banyek wenyasuk, ”Nadya songa diniwoka gibnennya bera, wera alda an. Anasa, ugunda benyek henga goubnelumukanya, alda pe bo yanalum,” wenyabgogomok.

⁴⁵Anasa alda anyagan seleb yok dara, alda men Yesus ak biniboka, ”Neyung neklesilimnya o!” hyookanya, uruma meka hmobok.

⁴⁶Dara neikaʾ yeilimek nang era, Yesus ak soruka salawoka, henga goubek.

⁴⁷Bok be hnon anyagan yuba donaʾ nang olowoknya bedya, yuba wa gakaʾ dubnya alja wa wenya bek, gabo doboka o meklaʾ anyek garawok.

⁴⁸Anasa Yesus ara sikenek, ”Ugunja dara, nara yu hwam dubnya senenulumukanya, parang ab doluknaʾ gamaʾ ab, nak henga goubnenobaʾ aboka bo bo yeililum de?

⁴⁹Li sobaʾ nara ugunjaʾ hogung ak, Imik Neyung e eremek sam yuba neklesin dara, ugunda nak henga goubnenggulunulum. Bok, Imik Neyung Yuba momnya dobokaʾ anyek, gigiwanamlaʾ anasa, or malye.” hyok.

⁵⁰Dara, alja yuba doro diriga ban nanga nidyaʾ ara, alak loboka, yok-yok sen-senem abgokek.

⁵¹Alda nimi goubenenya ben hnon, wameldanaʾ adyok nonga lilibdangamoknya bek, Yesus ak dobgiga balamok. Dara sik yok nang edya, alak henga goubnobaʾ ul yabek,

⁵²bok alda lilibdangamokaʾ ara gwirib loboka, nong baneng yeiri byuk.

⁵³Dara Yesus ara yuba wa gaknya senenggomnya bek sam bo byik. Dara, yuba wa gakaʾ dub nang eb, yuba neksin nang eb, Yahudi soko dub nang eb dara, nidyaʾ anyagan longomek.

⁵⁴Bok, Petrus bera mok ab keebgiga balamokaʾ ara, yuba wa gakaʾ dubnya bedyaʾ eremek sam biniboka, yin bonaʾ nang eblaboka neikaʾ uka beiyimekaʾ ak sam lekeldalamok.

⁵⁵Wera yuba wa gakaʾ dub nang gong eb, nimi yan lelesinaʾ dub nang eb dara, Yesus adya malya ubokaʾ beknaʾ dibaʾ anyek elemek bok, unuwanasengnya hnon mekaʾ eibnenggubek.

⁵⁶Nimi nauba e yeiniboka, aldib malya ulumla aboka sonda anasa wenyalamek bok, sikja lelemeknya nidyaʾ ara, salyaʾ ourubdangoka leldalamek.

⁵⁷Dara, nimi wene nang sekoka, sondaʾ anasa bobnenewoka aldib malya ulumla aboka ban unu miniwek,

⁵⁸”Nunja kemoubaʾ ara, ban benedya wenyalamokja, Nara Imik Neyung e, ban nim adya solomeknya nera, golowanamnakanya, nimi soruk adya songgulumaknya nenyek, lika winilya ok sobnamna,” wenyalamok aboka miniwek.

⁵⁹Bok nang nenedya wenyaboka lebeknya neneba, beknaʾ dangal binggubuk.

⁶⁰Wenyek Imik Neyung yuba wa gakaʾ dubnya bedya, nimi nidyaʾ gangganek sam sekoka Yesus ak, ”Anak an nidyaʾ unulamla aboka yana kiboka lelenjaknya nera, har so do? Anda orok aboka yuba doro sanggululam de?” aboka heibuk.

⁶¹Bok alda gobdo gelegoka, yuba mekaʾ doro sabnenggumok. Wenyek Imik Neyung yuba wa gakaʾ dubnya bedya Yesus ak saaboka, ”Anda nimi blebsinaʾ dubnya, Kristus, perobaʾ ak ululul senelemaknya bedya me de?” aboka heibuk.

⁶²Wenyek Yesus adya lebokaʾ ara, ”Benera na an! Nimi dibaʾ me nera imik migibaʾ ululanya bedyaʾ sirikek sam buknamlakanya, debaʾ ganggan pik uboka yanggalya dara, anda eibnelam,” hyok.

⁶³Dara, Imik Neyung yuba wa gakaʾ dubnya bera, alja boksom gweldek menegoka lebokaʾ ara, ”Yok laga aldib unuwok an nang era, hekaʾ amba hnon ebnamab?

⁶⁴Aldamnya Imik Neyung si malya nenelamlaʾ damok ara, ugumba yok okoka keblum. Anasa, ugunja dara, hekaʾ senewolum do?” hyok. Dara sikda nidyaʾ, ”Or obnok,” hyek.

⁶⁵Dara nimi wene nim era, Yesus ak gamalaʾ solob goluwoka, alja heng ara, akleng adya norowoka soruk adya olomeekanya, lelemekaʾ ara, ”Wei, ununumnaʾ lenya o, anara heknedya olonggel do?” aboka lelemek. Anya, yin bonaʾ nang edyaʾ anaba, soruk wabnaʾ adya olomek.

⁶⁶Ban salek era, Petrus bera anam erem damumduk sam seklemok. Dara, Imik Neyung yuba wa gakaʾ dubnya bedya, alja ek wa gel ge hnon anyagan yok.

⁶⁷Yeiniboka, Petrus bera anam uka lekeldalamokaʾ ak eibuk dara, hogunga pe keeboka lebokja, ”Ambabya Nazaret mok ebnya Yesus beb, neikaʾ ulurumnya benyaʾ,” hyok.

⁶⁸Bok alda sondaʾ amba lebokaʾ ara, ”Nara ella unggulumnakanya, anja leblamnya nera, anyek leblaʾ senewanggubna,” wenhyok. Dara, Petrus bera anyaganera loboka, e sindamak pikek sam byuk. Ban salek enyek, ayam yuba ngoubuk.

⁶⁹Dara, on gel gera Petrus bek onoʾ eibuk dara, alda anyagan longomek nim ek an, ”Ban benera, sikinek abnya hnon an,” hyok.

⁷⁰Bok Petrus bera, sondaʾ amba hnon gunuwoka orok hyok. Onoʾ mandewanggonggom anyagan seklemek nim edya, Petrus bek, ”Anda Galilea mok ebnya bek anasa, al ambabya sikeneb neikaʾ ululumnya benyaʾ!” hyek.

⁷¹Dara, Petrus bera memaʾ si sibuka wenhyok, ”Ugunja lelelumnya bera, nara elgom ulunanya bek lelenulum!” hyok.

⁷²Dara al wene sab-sab, ayam yuba penenya ngoubuk. Wenyek Petrus bera, Yesus adya alak men danyek, ”Anda ayam yuba li penya ngoubnenggulyebok, anda nak sondaʾ amba lika winilya bobnenewoka sondaʾ lebnenelem,” amoknya nek seiniwok. Anasa, alda anyek seiniwoka, goukdik-goukdik aboka nauba engewok.