Read Nalca MARKUS 16 Bible Online

MARKUS 16 - Nalca bible

MARKUS 16

¹Wera sikja Sabat mem sum era seleb iniwok dara, Maria Magdalena geb, Yakobus eilin ge Maria geb, Salome geb dara, Yesus beʾ ngikil binimab aboka, perob song ngiknaʾ mek dekek.

²Wera minggu en men sum yenewok dara, lugunaʾ nonga henga dorogol yabok dara, gelewa dara, Yesus diyimekaʾ ak sam balamek.

³Wera gelewa dara, pikek anam balameekanya, ”Yesus diyiboka pika seregerob girik era, heknedya arawoka demeganesil do?” aboka lebdanggiga balamekaʾ ara,

⁴dilinaʾ ak sam biniboka kemelemek enyek, pik sereknaʾ girik ara, hyak senenggom bok, seleb demegemekaʾ ak eibek.

⁵Wera gelewa dara, Yesus diyimekaʾ lomok sam wekoka kemelemek enyek, nimi goubenenya be hnon, geisa akleng ongomoknya benyek, sirik sam bulumokaʾ ak eibek. Dara, sikda anyek eiyiboka loka dabsuk.

⁶Bok goubenenya benedya sikenek, ”Ugunda lok ganya bonaʾ ara mem! Ugunda Yesus ban Nazaret mok ebnya, seleb oboka galak glarobnya benyek, elelum. Alda seleb embengaʾ suboka bukumla. Alda anyagan ara unggulumla. Wera al beiyimoungaʾ ak ara, anyek kendululum.

⁷Bok ugunda wera biniboka, alja yuba doro diriga ban nang eb, Petrus beb, ban yub enyek, sikenek wenyhenelum, Alda men Galilea sokok sam bilimla. Ugunuk men orowek seleb wenyhusuk sok, ugunda anyagonob eibnelum, wenyhenelum,” hyok.

⁸Wera gelewa dara, lok adya ber-ber aboka dilinaʾ ak ab gobek dara, yeiri byik. Dara, sikda lok anasa, yok nim ek wenyanaʾ ara wenyhenggubek.

⁹Yesus ara, minggu en men sum lugunaʾ danyek, seleb embengaʾ subok dara, men dara, alda Maria Magdalena gek aabdok. Ban Maria gera, Yesus adya sekbadya bisaʾ yakamok gel.

¹⁰Dara gel gera, Yesus alja hemyab era, solom amba engero pelemek nang ek, unuwal aro nekdo byuk.

¹¹Bok, sikda Yesus ara seleb suboka embengaʾ bukumlaʾ anyek, alja eiyimla an yuba kebek dara, sikda sondaʾ lelemla senewek.

¹²Nen seleb dara, alda onoʾ yok penya yuba donaʾ nang ek, yok mek heikek balarek salek, alda yoknya gebdangoka aabdok.

¹³Dara, ban penya nang era, nunjaʾ Yesus sublaʾ ak eibnam aboka, yok yuba donaʾ nang ek nekdo yarek bok, sikjaʾ anaba, sonda lelerak senewek.

¹⁴Unubgiga balamokaʾ ara, Yesus ara alja yuba doro diriga ban nanga goklombadya nanga delemekaʾ hnoum aabdok. Dara, nimi yok nim edya Yesus ara seleb embengaʾ suboka bukumlaʾ eiyimab alamekaʾ kelemekjok, ganya gasa uboka, okoka dib senewanggumekaʾ anasa leboka, Yesus adya sikenek wabsuk.

¹⁵Onoʾ, alda sikenek wenhyok, ”Ugunda yok mok soko me nidyaʾ biniboka, perob lero yanggan yub era, nimi nidyaʾ ak leb elekdo yabalemnelum.

¹⁶Nimi nidyaʾ yuba dib senenggulumeija nim era, igina kweiyiwanesil bok, yuba dib senewoka meka dalesija nim era, blebnesil.

¹⁷Ban nim enera, yuba dib dobek beknaʾ dibaʾ ara, ban migib enyek ulumnesil, yuba dib senewoka domeija nim edya, nadya si sibuka bisaʾ yaklemnemak, sikda sikba elgom yuba, wenyok yok yuba, saro yabalemnemak,

¹⁸sikda bagaʾ soruka salawoka, nimi somoknaʾ meka delemeijaʾ anaba, somoknaʾ damoka sikenek mekaʾ yanggunumla. Sikda nimi neiklemeijaʾ ak, soruka dililemeija enyek, neiklemeija nim era, gobdo merelemnemak,” wenyaboka lebsuk.

¹⁹Wera Yesus ara, alja yuba doro diriga ban nang ek seleb wenyabgogowok dara, alda imik heikek sam welewookanya, Imik Neyung adya sirik sam bukok.

²⁰Dara, alja yuba doro diriga ban nang era, yok-yok moka biniboka, Imik Neyung ak ab perob yub era, lero yabalemek. Dara, sikja yuba lelemekaʾ ak, dib lelemak aboka, Wenelesilnya beneba neikaʾ aralasukaʾ adya, sikjaʾ yokaʾ-yokaʾ unulumekaʾ ara, beknaʾ dibaʾ ara laga dangalamok.