Read Nalca MARKUS 2 Bible Online

MARKUS 2 - Nalca bible

MARKUS 2

¹Wera lika wen ubokaʾ ara, Yesus ara saaboka onsok Kapernaum heikek yok dara, Yesus ara anyagan ulumla an yub era oboka lelemok.

²Anasa nimi nauba gong-gong longol yeilimek dara, esindamak abaʾ ara, nim ok deknewoka hnon gloʾ orok. Dara, Yesus ara Imik Neyung yuba sikinek leb elegosuk.

³Wera Yesus ara, anam Imik Neyung yuba lel eleklesuk salek, nimi heimoknya be hnon, dombadya nang edya jaboka alak bo yek.

⁴Bo yanggan dara, bo yek bok, nimi longol yeilimekaʾ mandebnaʾ anyek, nauba adya Yesus seklemokaʾ nong ok ara bo bimenggom anasa, sikda eremaʾ gaboka, heimoknya bera ekla manaʾ eb Yesus seklemokaʾ ak doblinggemek.

⁵Yesus adya kemelemok enyek, hwebnamlaʾ anyaʾ senewoka, dib senen ganya enyek eiyisuk dara, Yesus adya nonga heimokaʾ bo yeilimeknya bek, ”Najabo, anja malya unaʾ ara, anak ab seleb meewagen,” hyok.

⁶Danyek Yahudi yuba neksin nang anyagan wene nimi yuba kero bulumek nimi edya anyek eiyiboka, sik moumen nidyaʾ ganya lomok leldalamekja,

⁷”Hekasa ban anaso wenyaro lelemla do? Ban benera Imik Neyung si malya nenelamla,” senewoka seiniwek. Onoʾ, ”Imik Neyung ak hnonok, nim adya malya unaʾ era sikenek ab soba memelesilnya anasa, nim adya dara, unuwanggunuseng,” senemek.

⁸Wera ban salek era, Yesus ara sikja anaso senemekaʾ anyek, alja ganya lomok ella ubsuk dara, alja sikenek, ”Ugunda hekasa ugunja ganya lomok ara anaso uro seinilelum do?

⁹Har nerek okna so, Anja malya unaʾ era anak ab seleb meewagen, anya nenyek gom, alda, Anda sekoka anja esonaʾ doboka bobmenekanya balalom, anya nenyek okna so gom?

¹⁰Bok wene nong anyek, nimi dibaʾ me nera mok soko me nidyaʾ amba malya unaʾ ugunuk ab memesin migib dubnya ulumnaʾ ara, ugunda ella ubnesom,” hyok.

¹¹Dara, Yesus ara heimoknya bek, ”Anda bukoka anja esonaʾ doboka bobmenekanya, anja ek bilom hegen!” hyok.

¹²Wera Yesus adya hweboknya bera, nimi nauba kemelemekaʾ hnoum, esonaʾ doboka bobookanya byuk. Dara, nimi nauba ara anyek eiyiboka lok ganya boboka Imik Neyung ak giblemek. Anya sikja dara, ”Nunda senenggom damok era anasoʾ ara hnon mekaʾ eibnenggumouba!” aboka lelemek.

¹³Yesus ara onoʾ saaboka Galilea mek gwan gemek sam byuk dara, nimi nauba alak yalamek dara, Yesus ara sikenek Imik Neyung yuba neklesuk.

¹⁴Wera Yesus ara kemero yabalamok enyek, mok soko amba leboka rupiah molowoka dolosuknya, Alfeus bedya me Lewi bera, rupiah deklemekaʾ ak bulumokaʾ ak eibuk. Dara Yesus adya benyek, ”Anda nak an dobol yanelom,” hyok dara, Lewi bera sekoka Yesus ak dobol byuk.

¹⁵Wera Yesus ara Lewi bedya ek sam bukoka denaʾ neikaʾ delemek dara, nimi nauba rupiah molowoka dolosik nang eb, heik yokaʾ nim edya malya nimi senelesik nim eb, nimi nauba Yesus ak hnonda diriga ban nang ulumekaʾ anasa, Yesus ab, alja yuba doro diriga ban nang eb, sikeneblaboka delemek.

¹⁶Wera anasa, Parisi nim edya Yesus ara rupiah mok soko amba leboka molowoka dolosik nang eb, heik yokaʾ nim edya malya nimi senelesik nim eb, neikaʾ bukoka delemekaʾ ak eiyimek dara, sikja Yesus adya yuba doro diriga ban nang ek, ”Hekasa ugunjaʾ yuba neksinya bera, mok soko amba rupiah molowoka dosin nang eb, malya nang eb neikaʾ bukoka delemak do?” aboka heibsik.

¹⁷Wera Yesus adya sikja heibsikaʾ anyek keboka, alja sikenek lebnesukaʾ ara, ”Nim eikaʾ ulumak nim edya hwesin nang ek hwebneso senenggulumak bok, alda nimi neiklemak nang edya ok hwenaʾ nang hwebneseng senelemak. Nara sokok sam yeilimsaʾ ara, pe ulumak nim ek nak yanokaʾ aboka yanggumsa, alda malya un nim enyek, nak yanokaʾ aboka yeilimsa,” hyok.

¹⁸Dara hnon sum enyek, Yohanes Pembaptis bedya yuba doro diriga ban nang eb, Parisi nim eb dara, Imik Neyung amba gwanenga loboka ulumek. Anya yok nim edya Yesus ak yeiniboka, ”Neyung o, Yohanes Pembaptis bedya yuba doro diriga ban nang eb, Parisi nang eb dara, Imik Neyung amba gwanenga loboka ulumak bok, anja yuba doro diriga ban nang era, ununaʾ orok ara hek amba do?” aboka heibek.

¹⁹Anasa Yesus ara sikinek, ”Nimi gela dobdanamnaʾ amba masa youlumakaʾ ak ara, delemnemab aboka yeilimna nim era, youmna masa era denggunuseng de? Nimi gela dobnesonya benyek, yeiliseng nim eb neikaʾ or anam uluseng bok dara, yeiliseng nim edya dara, denaʾ ara lobnenggunuseng.

²⁰Bok gela dololanya bera al nonga sikenek ab dobnamla sum enyek, wera ban sum era, sikda gwaneng ara denggulumnemak.”

²¹”Youmaʾ orowek men denewoka malya dangamso akleng ek ara, eimik perob akleng gweldekdobaʾ edya neikaʾ denewoka wibneseng dara, hyak malya ura nauba denewanamsoʾ anasa, nimi hnon youmaʾ akleng ek wenyok akleng gweldekdobaʾ eb darawoka wibnenggunuseng.

²²Anasonya neikek, nimi hnon wenyok anggur mek era, mek enedya mek hmeiya golowanamsoʾ anasa, youmaʾ mek hmeiya ak gweboka libnenggunuseng. Unuwanaseng dara, mek ara yek weininggoka, mek hmeiya eneba golowanamsoʾ anasa, boboganeseng. Wenyek gwebseng anggur mek era, al wenyek mek hmeiya ak gweboka libneseng!” hyok.

²³Wera onoʾ yok Sabat mem sum enyek, Yesus ab, alja yuba doro diriga ban nang eb dara, gandum wa pik yabalamek salek, alak diriga ban nang edya gandum hnon dakek.

²⁴Dara Parisi nim edya Yesus ak, ”Anja yuba doro diriga ban nang era, nunja yuba momnya dobokaʾ Sabat mem sum bok, hekasa sikda blekoka gandum daklamak do?” aboka heibek.

²⁵Anasa Yesus adya sikenek saaboka lebnesukaʾ ara, ”Abyatar bera Imik Neyung yuba wa gakaʾ dubnya ulumok salek, Daud bedya unumokaʾ ara, ugunda anam eininggululum de? Daud beb alab neikaʾ ulumek nang era, sikda gwaneng dengaboka, gwaneng ok ubsuk salek era, alda Imik Neyung bedyaʾ ek wakoka, Imik Neyung amba beillilemek roti gwaneng enyek delemok. Nunja yub ek sam momnya dobokaʾ ara, Imik Neyung bedyaʾ ek sam beil balamak gwaneng era, yuba wa gak nang ok delenok alalabok, Daud bera doboka deregoka, onoʾ hnon alab neikaʾ ulumek nang ek elekdangoka neikaʾ delemek,” hyok.

²⁷Dara onoʾ Yesus adya sikenek, ”Sabat mem sum alalum sum era, nim amba uyimok, dara nim ara, Sabat mem sum amba uyiwanggumok.

²⁸Anasa nimi dibaʾ me ara, ban Sabat mem sum amba anaba dubnya ulumna,” hyok.