Read Nalca MARKUS 4 Bible Online

MARKUS 4 - Nalca bible

MARKUS 4

¹Wera onoʾ Yesus ara Galilea mek gwan gemek sam yuba hnon neklesuk. Dara nimi nauba aknewoka longol ganagal yeilimek. Anasa Yesus ara, mek gwan eilib ulumok mek ekla bunaʾ ak bukumok, bok nimi yok nimi nauba ara mek gemek sam longomek.

²Dara Yesus ara sikenek yok-yok yuba damoka nauba neklesuk dara, alda yokaʾ ak sunuwoka lelesuk. Hnon anaso aboka neksuknya nera an,

³”Ugunda pe kebnelum! Nimi be hnon yinaʾ yamawonunaʾ aboka wak bilimok.

⁴Wera anam yamalamok salek enyek, yinaʾ hnonda pikek sam yama yinggyuk dara, wining adya yeiniboka dengaboka demek.

⁵Yinaʾ hnonda girik lumuk, soko mekaʾ ulumokaʾ ak sam yama yinggyuk dara, yinaʾ era soko mek adya bongon dara, berra bongowok.

⁶Bok, henga welok dara, pe yarenga eleknaʾ orok adya, bongowoka welok ondok era yalawoka oluʾ obok.

⁷Yinaʾ hnonda giriknaʾ hnoum malyinggyuk. Wera yinaʾ era bongon dara bongowok bok, giriknaʾ bong adya seklama darawoka objokaʾ adya, alda doka moubnenggubuk.

⁸Bok yinaʾ hnonda hyak pero mesaʾ delemok sokok sam malyinggyuk dara, yinaʾ era bongowoka nauba dangoka, doka moulumok. Dara hnonda denga hnonok so moulumok, hnonda denga penya so moulumok, hnonda denga dombadya so moulumok,” wenhyok.

⁹Seleb sunuwoka wenyaboka yuba lebgogowok dara, onoʾ Yesus ara hnon lebokja, ”Heknyek ken damba o ulumla dara, alda pe keblul,” hyok.

¹⁰Wera onoʾ Yesus albeyok ulumok salek enyek, nimi Yesus ablaboka ulumek nim eb, alja o badya nang yuba doro diriga ban nang eb dadya, anja sunuwoka yuba lebsilimaʾ damok anyek, anasoʾ ak lemna aboka neksilom hyek.

¹¹Dara Yesus adya sikenek lebsukaʾ ara, ”Ugunuk dara, Imik Neyung adya hekaʾ huboka wenelemnesilaʾ damok ara, seleb elegousuk. Bok beiyik ulumak nim ek dara, yokaʾ-yokaʾ ara yokaʾ adya sunuwoka neksin danyek, perob.

¹²Anadya, Sikda eillilimak bok, damok ara anyek unulamlaʾ senewoka donggulumak. Sikda o ken dara kelemak bok, pe ella danganggulumak. Dara damok ara sikda eibijikanya, ella dangoka, anya sikda Imik Neyung ak yeija enyek, Imik Neyung ara sikja malya unaʾ sikenek ab meeweisilyek aboka ubok,” hyok.

¹³Dara onoʾ Yesus ara sikenek wenhyok, ”Ugunda ban sunuwoka lebnanya nenyek, damok ara anyek leblaʾ senenaʾ orok de? Dara hekaʾ adya nidyaʾ yok sunuwoka lebnesengnya nera ella danasom do?

¹⁴Yinaʾ bo yamal bilimoknya bera, nim Imik Neyung yuba bo lel balamaknya nera an.

¹⁵Alda yinaʾ pikek sam yama yinggyuk aboka sununaʾ era, nimi hnonda, yub ara kelemak, bok Satan men yeiniboka yuba sikenek ab dololanya nera an.

¹⁶Alda yinaʾ girik lumuk sokok sam yama yinggyuknya nera, nim ara anam salek era yuba keboka ganya gwelelek aboka dolomaknya nera an.

¹⁷Bok yub ara nimi ganya lomok sam yarenga eleknaʾ orokokanya, or wene salek ok ulumla. Imik Neyung yuba dobnaʾ anasa, eimik dara oboka yokaʾ-yokaʾ unul yabasin dara, sikda berra aboka malya dangalamaknya nera an.

¹⁸Giriknaʾ hnoum malyinggilimok aboka sunuwoknya nera, nimi hnon yuba kebnabok,

¹⁹sokok anyebnya nenyek hekaʾ huwanamna ganya boboka, bonaʾ mandebnaʾ adya pe ulusinya senen ganya ab, hnon yokaʾ-yokaʾ ak ganya oka denaʾ adya, sikja ganya lomok sam wekel yaban dara, yuba dobnaʾ ara, seklama denewoka bonga oldelemlaʾ adya, pe doka mounggulusil nim era an.

²⁰Perob sokok sam malyinggilimoknya nera, nimi yuba pe keboka dib dolomaakanya, yinaʾ meboka, doka moulumla nim era an. Dara, dok ara hnonda denga hnonok anaso, hnonda denga penya anaso, hnonda denga dombadya anaso moulumla,” wenyaboka neksuk.

²¹Dara onoʾ Yesus ara hnon lebokaʾ ara, ”Nim ara wesaʾ yeboka mek hmei lomok sam gom, ekla manaʾ damumduk sam hnon unu beillilimak de? Orok, wesaʾ diniwoka beillilimak oulyang ak sam beillilimak.

²²Doknololanya nera eimik era laga danamla. Dara onoʾ gunuwoka doknololanya neneba, nidyaʾ pobongganamla.

²³Anasa, heknedya ken damba o ulumla dara, alda pe keblul!” hyok.

²⁴Anya onoʾ Yesus ara hnon lebokja, ”Ugunda ban kebnelumaʾ anyek, pe seiniwanalum! Ugunja yok nim ek unululumnya nera, Imik Neyung adya dara, ugumbabya onsok lunuwoka anaso unuwanasil. Anya nene hnon bok, onoʾ nauba makoka unuwanasil.

²⁵Anasa heknyek hnon ululanya bera, onoʾ alak hnon eleganamla. Bok heknyek hnon unggulumla dara, alak hnon mekaʾ ululanya neneba, dorowanamla,” hyok.

²⁶Dara Yesus ara lebokja, ”Imik Neyung adya wenelemnesilaʾ ara, nimi be hnon wak sam doka mel balamlaʾ anasoʾ ak ulumla.

²⁷Yinaʾ memna dara, menanya bera inimnek era hogunga malamla, anya yubyek dara alda bulumla. Dara yinaʾ memnaʾ ara, bongowoka imik danggiga welelamlaʾ ara, ban unulamlaʾ damok ara, ban benera elgom ulumla.

²⁸Men dara eilya nelemla, ana berem ara nonga salalamla, dara onoʾ hyak sidyaʾ nong ara an salawanaʾ ara nonga moulumlaʾ ara, soko adya albeyok nonga eleklamla.

²⁹Wera yinaʾ weboka memnaʾ ara seleb nong uboka, hwiboka enga obna dara, menanya bera dakna salek dalaʾ anasa senewoka, daklamla,” hyok.

³⁰Dara, hnon heibsukaʾ ara, ”Imik Neyung adya wenelemnesilaʾ ara, hekaʾ ak neik digum sunuwanesibya do?” Anya, ”Hek sununaʾ ek sunuwoka neknesibya do?

³¹Imik Neyung ara dubnya dangoka wenewanasil sum emba sunun dara: Geibya yinaʾ ak nim adya doboka sokok sam doklomakaʾ anasoʾ ak ubnamla. Geibya yinaʾ dok ara, soko lomok doklemaknya nidyaʾ ara, alak hnonok hyak mekaʾ nong ak ulumla.

³²Bok seleb doka dokna dara, bongowoka welelamla dara, yok-yok masa ek ab dara, alak hyak senenggomaʾ dangalamla. Anya, soruka gekoka yangalamla dara, wining ara anyagan yeindiboka ngoklemak,” hyok.

³³Yesus adya nimi yuba leb eleganesin dara, sikda ella ulumekaʾ ak sunuwoka, anaso nauba sunuwoka yuba lelesuk.

³⁴Yesus ara yok-yok nim ek yuba leb eleganesin dara, sununaʾ adyok sunuwoka yuba lel eleklesuk. Bok alda alja yuba doro diriga ban nang ek ara, sikbeyok dara, yuba yokaʾ nong adyok, nidyaʾ laga poboka neklesuk.

³⁵Dara onoʾ ban neik sum sinik enyek, Yesus ara alja yuba doro diriga ban nang ek, ”Nunda lanawoka mek gem err sam binimab,” hyok.

³⁶Dara, alja yuba doro diriga ban nang era, nimi yok nang anyagan longomek nim era loboka, Yesus ara eboka mek ekla bunaʾ pik bo bilimek. Onoʾ yok mek ekla bunaʾ danaba alak dobol bilimek.

³⁷Wera mek hnoumunga anam balamek bok, senenggom kaboʾ dorogok. Dara kaboʾ adya mek yaknaʾ ara yeiriwoka, buka balamek mek ekla bunaʾ era, meka wekoka joboka obsununaʾ aboka, mek ekla bunaʾ ara mek adyok deknero lol yabok.

³⁸Ban salek era, Yesus ara mek ekla bunaʾ gokgobok berem, huk beilinaʾ adya eiriyiboka mamok. Alja yuba doro diriga ban nang edya Yesus ak gaawoka lebnemekaʾ ara, ”Neyung neklesilimnya o, nunda meka si denesiso dara, anda dolbalek senelam de?” wenyalamek.

³⁹Wenyek Yesus ara bukoka, kaboʾ unul yabokaʾ ak loblom aboka orugookanya, mek yaknaʾ yeiriwoka yabalamokaʾ ak lebokaʾ ara, ”Anda wera, gelegalom, namenaʾ danalam!” hyok. Danyek kaboʾ senenggomaʾ dolomokaʾ ara dengaboka, mek yaknaʾ anaba gobdo namenaʾ dok.

⁴⁰Dara Yesus ara alja yuba doro diriga ban nang ek, ”Ugunda hekasa lok ganya bololum do? Ugunda anam dib senewanggublum de?” wenyhesuk.

⁴¹Wenyek sikda hyak lok ganya boboka, sik moumen leldalamekja, ”Ban benera okoka dara heknyek ulumla do? Anedya wera kaboʾ ab, mek anaba alja yuba kelemla bar,” wenyaldalamek.