Read Nalca MARKUS 7 Bible Online

MARKUS 7 - Nalca bible

MARKUS 7

¹Parisi nim eb, Yahudi yuba neksin nang eb, Yerusalem heikek abaʾ ara, Yesus ak longol yeilimek.

²Sikda Yesus adya yuba doro diriga ban nang, hnon nang era soruka mek eleknaʾ loboka, sembejaʾ gebman delemekaʾ ak eiyisik.

³Parisi nim eb, Yahudi nanga nidyaʾ ara, sikja nim ugumaʾ lelemlaʾ ak an sunuwoka yokaʾ unuwoka soruka mek eleknaʾ orok bok dara, denaʾ denggulumek.

⁴Sikja ununaʾ era, deknaʾ gasaʾ ak ab yanaʾ anaba, anam mek eleknaʾ orok bok dara, men denggulumek. Anya onoʾ, yok ununaʾ eneba gong, hnonda mek hmeiya mek eleknaʾ gom, hnonda solowak unuruwaʾ mek eleknaʾ gom, youmaʾ nim ugumaʾ enyek, geklewoka unulumek.

⁵Anasa leboka, Parisi nim eb, Yahudi yuba neksin nang eb dara, Yesus ak, ”Nunja neyung yab edya youmaʾ diligaʾ donaʾ loboka, hekasa anja yuba doro diriga ban nang era, sembejaʾ gebman denaʾ delemak do?” wenyaboka heibek.

⁶Dara Yesus adya sekenek lebsukaʾ ara, ”Ugunda hyak or-or uboka sondaʾ hwam nang husukaʾ ara Yesaya bedya aldib lebsuk. Wenyhesukaʾ ara, an wenyora momnya dobok, Ban nim era, yuba sibamaʾ adyok giblenyaakanya, sikja ganya era, nak ab mok nenebdangoka ulumak.

⁷Sikda nim adya ununaʾ enyek, nadya yub enesoʾ anyek, nekeldalamakaʾ anasa, nak ara salyaʾ lelem giblenyak an, wenyhesuk,” wenyaboka lebok.

⁸Onoʾ Yesus adya sikenek, ”Ugunda nim adya ununaʾ enyek, gasa salabmoubnekanya, Imik Neyung adya unuwolulum alalanya nera lololum,” aboka lebok.

⁹Dara onoʾ hnon sikenek lebokaʾ ara, ”Ugunja nim ugumaʾ enyek, pe salalmoublenobaʾ aboka, Imik Neyung adya oruknaʾ yub era, lunuwoka yoknya nenyek unululumnya nera, geremsenga lokja.

¹⁰Musa bedya unulululum aboka lebokaʾ ara, Ugunjaʾ genong neyung ak pe gibeldololulum; heknedya alja genonga neyung ak waboka derelesil dara, somogiyiwanok, husuk.

¹¹Wenhyok bok, ugunja dara, nimi hnon alja genonga neyung ak, Ugunuk eleganesisinenya nera, Imik Neyung ak seleb elegamna, wenyalamla dara, nera pelemla wenyaboka neklelum dara,

¹²wera nim adya sikja genonga neyung ak eleganesengnya nera, ugunja mem aboka yuba garalelum.

¹³Anasa, ugunja yok nim ek wenyaboka neklelum dara, wera anedya Imik Neyung adya unuwolulum alasil yub era orokaʾ nenelelum. Anya ban neiksonya nera, ugunda hyak nauba meknewoka unululum,” aboka lebsuk.

¹⁴Dara Yesus ara, nimi nauba longolomekaʾ ak sikenek saaboka lebokaʾ ara, ”Ugunda nidyaʾ ella danamab aboka dara, nak pe keblulum!

¹⁵Nimi malya nenelesilaʾ ara, sembejaʾ gebman denaʾ delemak adya malya nenenggulusil. Alda nimi ganya lomok sam ab goblelanya nedya, ganya malya nenelesil.

¹⁶Anasa ugunda o yakaʾ ara pe kebnelum,” wenyaboka lebok.

¹⁷Wera Yesus ara nimi gong danyek loboka ek byuk dara, alja yuba doro diriga ban nang edya, ”Ban sunuwoka lesilimaʾ ara hek damok ek lebmeisilim do?” aboka heibek.

¹⁸Dara Yesus adya sikenek, ”Ugumbabya damok ara, anam elgom ululum de? Nimi nong weilik ab uboka nongok weknanya nedya, weknanya bek ara malya nenenggulumla, senewoka elgom ululum de?

¹⁹Anasa nimi lomok weklesilnya nera, ganya seininaʾ pik weknenggululabok, alda mon lom pik weknekanya, onoʾ goblamla,” hyok. Yesus adya ban wenyaboka lebokaʾ ara, denaʾ nidyaʾ ara or denaʾ ok hyookanya lebok.

²⁰Onoʾ hnon lebokaʾ ara, ”Nimi ganya lomok ab goblelanya nedya, gobnanya bek ara malya ullilimla.

²¹Anasa, nimi ganya lomok ab goblamlaʾ ara, yok-yok malya ganya lanalamla. Ban malya lanalamlaʾ ara, gela salyaʾ salalamak, hokaʾ dolomak, nim olomak, yok nimi gel salalamak,

²²yok-yok bonaʾ uluneso ganya bolomak, yok-yok malya unaʾ ganya bolomak, nimi bobnenewoka sondaʾ lelemak, yok-yok malyinya nok unulumak, yok nim edyaʾ amba solom ganya bolomak, nimi derelemak, dengdang ganya bolomak, dongdang anaʾ ganya bolomak; ban malya unaʾ danyek lanalamla.

²³Nidyaʾ ban malya unaʾ danyek, nimi ganya lomok ab lanalamlakanya, anedya malya nenelesil,” wenhyok.

²⁴Wera Yesus ara anyaganara loboka, Tirus heik moka byuk. Dara Yesus ara e lomok wekoka, e nenyek an wekemla senewoka nim ella deijik senemok bok, alda doknewamenggoma dangamok.

²⁵Dara gela hnon alja gelma bisaʾ gologomok gel gedya, Yesus ara yeilimla an yuba kebookanya, alda Yesus ak yeiniboka koma lumugoka gibuk.

²⁶Anya bisaʾ alja gelma ek ab yaklulaʾ senewoka molowok. Ban gel gera, alda Yahudi gel gom, alda Fenesia, Siro sokok ab beiyimeekanya, Yunani yuba salamok gel. Dara, bisaʾ alja gelma ek ab yaklulaʾ aboka, Yesus ak molowok.

²⁷Yesus ara gel genyek an, ”Mek mabo denaʾ ara doboka gam ak eleklemak dara, penggulumak. Anasa memab ara men orowek denaʾ elegoka delgogolomak dara, pelemak,” hyok.

²⁸Wenyek gel genedya Yesus ak, ”Neyung o, aldib e. Bok, mek mab edya del yaben enyek, denaʾ yangawoka beilinaʾ damumduk denaʾ siknaʾ yanggalamlaʾ anaba, gam eneba doboka delemla,” hyok.

²⁹Dara Yesus adya alak, ”Wera anja wenyhelem yub enedya, bisaʾ ara, anja gelma ek ab goblaʾ anasa, wera or ek bilom!” hyok.

³⁰Wera gel gera ek balamok enyek, alja gelma era or ekla manaʾ ak mamok, bok alda bisaʾ ara seleb goboka dengamokaʾ ak eibuk.

³¹Wera Yesus ara Tirus heik mok era loboka, Sidon pik uboka, Galilea mek gemek sokok heik berem, Dekapolis mok sokok yok.

³²Dara anyaganera, nimi be hnon o ounugoka yuba pe sanggulumoknya bek bo yeekanya, soruka diyiboka hweblulaʾ aboka, molowek.

³³Dara Yesus ara benyek eboka yokok bo biniboka, o lom moumenaʾ ak sam soruka doronggoka, onoʾ Yesus adya gamalaʾ solowoka, benedya silyum ak soruka dibuk.

³⁴Anya, Yesus ara imik sam keeb weininggoka, hina doboka, o ounugumoknya bek an lebokaʾ ara, ”Efata,” nunja yub edya dara, ”Wera, pika baklul,” andanasa lebok.

³⁵Wera o pika bakoka, alja silyum domdigum dangoka yuba pe sab einiwok.

³⁶Dara Yesus adya yok nanga nauba ulumakaʾ ak anaso unuwanel aboka, nekbo-nekbo aro yabanaʾ ara mem aboka, yuba sekok. Bok Yesus adya neknaʾ mem alamokaʾ anaba, sikda eiwaawom aboka, sounuwoka nekdo yabalamek.

³⁷Anya nimi nidyaʾ unuwal an yuba kebek dara, sikda ganya nauba lokja senewek. Anya, lelemekja, ”Nidyaʾ alja unululanya nera, perob ok dangalamla! O ounugunanya beneba, yuba kenya dangallilimla, yuba gom dangananya beneba, yuba sanya dangallilimla,” alamek.