Read Nalca MARKUS 8 Bible Online

MARKUS 8 - Nalca bible

MARKUS 8

¹Dara ban salek danyek, nimi nauba onsok longol yeilimek. Wera sikda denaʾ hnon bobnenggumekaʾ anasa, Yesus ara alja yuba doro diriga ban nang ek wenhyok.

²”Ban nimi mandebnaʾ danara, nak li winilya doblenyaakanya, sikda gwaneng hnon boldonaʾ orok anasa, nara sikenek angoo yadyeka dabnel.

³Wera sikda hnon nang era, mok ab yek bok anasa, gwanenga denaʾ orok bok, or balalulum henya dara, pikek anyeb somok lobijek,” hyok.

⁴Dara alja yuba doro diriga ban nang era Yesus ak, ”Ban unu gakdenaʾ mok enera, nimi mandebnaʾ danasa dara, gwanenga pe denokaʾ aboka, siksamba har sam ab doboka deneseng do?” hyek.

⁵Dara Yesus adya sikenek, ”Ugunuk ara roti gwaneng ara hekbadya bolum do?” aboka heibsuk. Dara sikja, ”Sekbadya ulumla,” hyek.

⁶Dara Yesus ara nimi nidyaʾ ak, sokok buklulum aboka, alda sekbadya gwaneng dara doboka, Imik Neyung ak perob aboka gibuk. Seleb dara, gwaneng ara soboka, alja yuba doro diriga ban nang ek boknokaʾ aboka elegosuk dara, wera sikja doboka bokdo yibik.

⁷Dara sikda hadyaʾ anaba wenebadya bomekaʾ ara, Yesus adya Imik Neyung ak perobaʾ dolul aboka molowok dara, boklulum aboka orugosuk.

⁸Wera sikda mona bukuka jek. Anya, deregoka bok lobeknya nera, alja diriga ban nang edya serrema sekbadya mamagek.

⁹Sikda anyegan jek nang era, nengmab ok anyek, denga yubaʾ dombadya nanga jek. Debgogowek dara, Yesus ara nimi danyek, ugunja ek balalulum, hyok.

¹⁰Bok alab, alja yuba doro diriga ban nang eb dara, men mek ekla bunaʾ pik uboka Dalmanuta sokok sam buku byik.

¹¹Wera Parisi nang hnon Yesus ak yeiniboka, alab yuba sal yabeekanya, sene bobnenewoka gogobaʾ dibnobaʾ aboka, yok lok so beknaʾ hnon, imik heikek abnya nenyek, unuwalom aboka, sikda alak molowek.

¹²Anasa Yesus ara ganya hina doboka, sikenek lebsukaʾ ara, ”Nimi wenyek nang enera, hekasa yok damoka hnon meewalom alamak do? Anasa, nara ugunuk hyak dib lebsin, Wenyek nang ek ara, damoka mekaʾ hnon meeb eleganggunusak!” hyok.

¹³Dara alda sikda anyagan loboka, mek ekla bunaʾ bukoka, yok gek sam byuk.

¹⁴Yesus adya alja yuba doro diriga ban nang era, gwanenga bonaʾ hibigoka, mek ekla bunaʾ ak ara, roti gwanenga sirik hnonok bomek.

¹⁵Dara Yesus adya sikenek, ”Ugunda Parisi nang eb, Herodes beb, sikja roti gwaneng welenaʾ enyek ab, hyak pe keeboka ulululum,” hyok.

¹⁶Dara Yesus adya alja yuba doro diriga ban nang era sik moumen, alja ban wenyhesilaʾ ara, ”Nuk roti gwanenga hnon bobnenggumabnya nenesa lebsil aboka,” leldalamek.

¹⁷Yesus ara sikja an wenyaldalamekaʾ anyek ella ubsukaʾ anasa, alja sikenek lebsukaʾ ara, ”Ugunda hekasa roti gwaneng bobnenggumab an yub enyek saldalalum do? Ugunda anam eilinggululumukanya, onoʾ damok ara anam ella unggululum de? Ugunda ganya suʾ kebsuk de?

¹⁸Ugunda henga yak bok, eilinggululum de? Onoʾ o yak bok, kenggululum de? Ugunda beknenggululum de?

¹⁹Nadya nimi denga salyaʾ lambadya nang emba, roti gwaneng lambadya soboka elegeisisaʾ dara, deregoka bok lobeknya nera, serrema hekbadya ugunja liboka bobmamagolum do?” Wenhyok dara, alja yuba doro diriga ban nang edya Yesus ak, ”Serrema o badya liboka bobmamagamouba,” hyek.

²⁰”Dara onoʾ nimi denga salyaʾ hiboka dombadya nang emba, gwanenga sekbadya soboka elegeisisa dara, seleb deregoka bok lobeknya nera, serrema hekbadya liboka mamagolum do?” Wenyaboka heibsuk dara, sikda Yesus ak, ”Serrema sekbadya liboka mamagamouba,” hyek.

²¹Dara Yesus adya onoʾ hnon, ”Anasa wenebabya damok ara, ugunda anam ella unggululum de?” aboka heibsuk.

²²Wera Yesus ab, alja yuba doro diriga ban nang eb dara, Betsaida moka byik. Dara anyeganara, nimi heng umoknya ben hnon bo yeindeboka, sikda Yesus ak alja soruka diyiboka hweblulaʾ aboka, molowek.

²³Dara, Yesus ara heng lumnya bedya soruka gliboka, heik gokgobok bo biniboka, lum umok heng ek sam gamalaʾ adya ngikookanya, alak soruk diyiboka, ”Wera yokaʾ-yokaʾ hnon eiblam gom?” aboka heibuk.

²⁴Dara heng lumnya bedya, ”Yo, nimi yabalamakaʾ eibnaʾ ara, gal anasoʾ ak eibna,” hyok.

²⁵Anasa onoʾ Yesus adya soruka lum heng ak an dibuk dara, wera sum era lum henga dengaboka gobdo merewookanya, okoka hyak nidyaʾ laga eibuk.

²⁶Dara onoʾ Yesus adya benyek an, ”Anja ek or binilam, bok heik enyek an yangganaʾ ara mem,” hyok.

²⁷Wera Yesus ab, alja yuba doro diriga ban nang eb dara, Kaisarea Pilipi sokok sam, yok-yok mek heikek sam byik. Dara pik hnoumung anam balameekanya, Yesus ara alja yuba donaʾ nang ek, ”Nimi yok nang edya dara, nak dara, heknya alanyak do?” aboka heibsuk.

²⁸Dara sikda Yesus ak, ”Anda hnonda Yohanes Pembaptis alanjak, hnonda Elia benyaʾ alanjak, onoʾ hnonda ununumnaʾ lelemek nang, be hnonnya benyaʾ alanjak,” hyek.

²⁹Dara Yesus adya, ”Ugunja dara, nara heknya senelenulum do?” aboka heibsuk. Wenyek Petrus bedya, ”Neyung, anda bokal yajoknya Kristus bek ululam!” hyok.

³⁰Dara Yesus adya sikenek, ”Alda benyaʾ aboka, yok nang ek neknaʾ ara mem,” aboka yuba sekok.

³¹Nen seleb dara, Yesus ara alja yuba doro diriga ban nang ek, ”Nimi dibaʾ me nera hyak nauba oka deregoka gweknamla. Anya Yahudi dub nang eb, yuba wa gakaʾ dub nang eb, yuba neksin nang eb dadya, alak malya gebija dara, dibaʾ obnemak, bok winilinya sum era embengaʾ suboka buknamla,” aboka neksuk.

³²Yesus ara hyak laga poboka alja yuba doro diriga ban nang ek, anaso unuwanamla aboka neksuk. Wenyek Petrus bedya, Yesus nonga glib salawoka, ”Neyung, nera wenyanaʾ ara loblom,” hyok.

³³Bok Yesus ara sam-samawoka, alja yuba doro diriga ban nanga nidyaʾ kemero yibisuukanya, Petrus bek, ”Satan o, men weilik sam yibilom! Anja seiniwalam ganya era, Imik Neyung adyinya nek seiniwanggublam, alda nim adya ganya ek seiniwalam!” wenyaboka wabok.

³⁴Dara Yesus ara anyagan nauba longomek nim eb, alja yuba doro diriga ban nang eb, ”Wei, keblulum!” hyookanya sikenek, ”Nimi be hnon nak diriga yananel aboka dara, alak perob danamlyaʾ digumaʾ ara, hyak gobdo loboka, aljaʾ igin yakaʾ doboka, nak diriga yalalul.

³⁵Anasa nadya nong anyek weiningdanyek senen ganya bololanya bera, alda denghenelabok, Imik Neyung adyaʾ perob lero yanggan yub eb, nasamba hnon leboka, al weininggeldalamla dara, were alja nong era, eimik blebnamla.

³⁶Nimi be hnonda sokok ulumlaʾ nidyaʾ ara, aljaʾ ok dangamso bok, benyek alja nong unaʾ ara denghenemso dara, nera perob de?

³⁷Anasa, alja nong unaʾ amba dara, hekaʾ ak lunuwanamso do?

³⁸Yu hwam uboka malya unaʾ lomok an unulumak salek wen, na nong ab, nadya neklesin yub eb danyek, ugunda alya amba nim ak laga lel eleknenggulumun dara, alda alja neyung bedya nong unaʾ lomok senenggomaʾ ab, geisa ulumak lero nang eblaboka yanamla sum era, sik hogung ak nimi dibaʾ me ara naba alya anasa, albabya lobnamla,” hyok.