Read Nalca MARKUS 9 Bible Online

MARKUS 9 - Nalca bible

MARKUS 9

¹Dara onoʾ Yesus adya hnon sikenek, ”Nara ugunuk dib lebsin! Ugun anyagan weklum nang era, Imik Neyung adya wenelemnesilnya nera, hnon anam somoganggumun bok, eibnelum nang ek hnon seklum,” hyok.

²Wera lika hnabbadya maboka gwelegok dara, Yesus ara Petrus beb, Yakobus beb, Yohanes beb, sik eboka bobsuukanya, senenggom meinik sam welewek. Dara, sikbeyok ulumek salek, Yesus ara sik hogunguk ab yok so dok.

³Dara, Yesus adya boksom era, hyak geisa nongaʾ anyek dangamok. Nimi sokok an boksom mek eleklemak nang edya anaba, anaso geisa boksom hnon unu mek eleknenggulumaknya nek dok.

⁴Wera sikja kemelemek enyek, Elia beb, Musa beb, laga neneb dangoka, sikda Yesus ab neikaʾ yuba saldalamek.

⁵Wenyek Petrus bedya Yesus ak, ”Neklesilimnya o, nunda anyagan ulumabaʾ ara, hyak perob nong e. Anasa perob, nunda anyagan e lubna winilya, hnonda ansamba, hnonda Musa bemba, hnonda Elia bemba sobnemab,” hyok.

⁶Alda ban wenhyokaʾ ara, sikda hyak loka dabsukaʾ anasa, hekaʾ hununaʾ gomaʾ aboka, wenyaro lebok.

⁷Wera debaʾ yalamokaʾ ara siklewosuukanya, ana lomok anyeb, yuba hnon sal yabokaʾ kebekaʾ ara, ”Nadyaʾ wanaʾ nong ulumna me nera ban. Alak pe kelelulum!” hyok.

⁸Al wen salek enyek, ok anyan-anyan kemel ganagal yabek dara, sikda yok nang dara, eibnenggubek, bok Yesus ok eibik.

⁹Wera sikda mok soko meinik abaʾ ara yanggek ek ab dara, Yesus adya sikenek lebsukaʾ ara, ”Nimi dibaʾ me nera somoknaʾ ak ab anam suboka embengaʾ bukiyiwanggumlya salek era, ugunja ban eiblumaʾ ara, anasoʾ ak eibab aboka, nimi yok nang ek salyaʾ nekdo yabanaʾ ara hyak mem,” hyok.

¹⁰Anasa, sikda Yesus adya an wenyaboka lebokaʾ ara, ganya lomok bobekjok, sik moumen, ”Somoknaʾ ak ab embengaʾ suboka bukiyiwanamla, helaʾ anyek, damok ara, hekaʾ ak lemla do?” aboka heibdangdo yabalamek.

¹¹Anya sikda Yesus ak, ”Hekasa Yahudi yuba neksin nang edya dara, Elia benyek men yanamla alamak do?” aboka heibek.

¹²Dara, Yesus adya sikenek lebokaʾ ara, ”Elia bera aldib men yanamlakanya, yokaʾ-yokaʾ memewanamla. Bok nimi dibaʾ me nera, nim adya alak nauba igina kweboka derewoka wabnamak aro momnya doboknya neneno?

¹³Bok nara ugunuk dib lebsin, Elia bera sokok seleb yok bok, nim adya alak sikja unuweisibya senelemeknya nera nidyaʾ unumek. Ban unumekaʾ ara, alsamba momnya domokaʾ sunuwoka unumek,” hyok.

¹⁴Wera Yesus ab, Petrus beb, Yakobus beb, Yohanes beb dara, yok yuba doro diriga ban nang ek sam meinik abaʾ ara yanggek dara, sikda nimi nauba longolomekaʾ ak eibek. Sikda Yahudi yuba neksin nang eb, yok diriga ban nang eb dara, yokaʾ ak leboka leleldalamekaʾ ak eibek.

¹⁵Wera nimi dara, Yesus nong ak eibik dara, sikda senenggomnya be yanggal bar aboka, alak pika dil yek.

¹⁶Dara, Yesus ara sikenek, ”Ugunda hek yuba damok ek, sikeneblaboka leleldalalum do?” wenyaboka heibsuk.

¹⁷Dara nimi hnoumung anyeb ben hnonja Yesus ak, ”Neyung neklesilimnya o, nadya me nera bisaʾ wekdoboka, yuba sanggulumlaʾ anasa, nara anak bo yeilimna.

¹⁸Wera bisaʾ anyek, alja nong lomok gologol yan dara, alja nong era sokok eiying-eiyinga gwekoka, sibamaʾ gamalaʾ youlul-youlul aboka, si glengdarab-glengdarab aboka, alja nong era, heiboka gasa daralamla. Nara anja yuba doro diriga ban nang ek, bisaʾ yakoka hweblulum aboka, sikenek molosin bok, sikja dara, hwebnamenggom,” hyok.

¹⁹Anasa, Yesus ara sikenek, ”Wei, ugunda dib senenaʾ orok nang ek liklum nang o, nara ugunub dara, liga hekbadya neikaʾ uldablemnamna do? Li hekbadya uweibya ek, ganya hwibnelum do? Wera me nera nak an bo yoululum!” hyok.

²⁰Dara, sikda me nera doboka Yesus ak bo yek. Wenyek bisaʾ ara, Yesus ak okoka eilil yabok dara, me nenedya nong era, serema salamnaʾ yenewok. Dara, me nera sokok malyinggyuukanya, sibamaʾ ara, bolgamalaʾ youl-youl aboka, sokok bonggeiling-bonggeiling al yabok.

²¹Dara Yesus ara me nen eili bek, ”Me nenera hwer salek ek an neiknaʾ era salamok do?” aboka heibuk. Dara, me nen eili bera Yesus ak, ”Anam beiyimsa salek ek moruwoka unubmoruwok!” hyok.

²²”Anya bisaʾ ara, li sobaʾ, ukuk gom, mek inik gom, doronggoka obnunaʾ ulumla. Anasa wera, anda unuwanesom migib ulunggel dara, nuk angoo yadyek senewoka arayiwanasilim,” wenyaboka molowok.

²³Wenyek Yesus adya dara, ”Anda hekasa unuwanesom migib ulunggelya dara alam do? Anasa, al dib senelelenya nemba dara, yokaʾ nidyaʾ ara unuwanamsoʾ ok,” hyok.

²⁴Dara me damnya benedya bii al yabokaʾ ara, ”Nara dib senewan! Bok alda dib senewoka ganya oloknaʾ anyek mek anasa, nauba dib senewoka ganya ologonunaʾ aboka, nak arawanenelem!” hyok.

²⁵Wera Yesus ara, nimi nauba yeiniboka, alak aknelganagel yanggekaʾ eibuk dara, alda bisaʾ ak, ooma leboka wabokaʾ ara, ”Wei, anda o ounugoka yuba gom geblesilim bisaʾ o, nara anak lebnenggen, Anda me nenyek anyebaʾ gobnelam. Anya, onsok saaboka wekel yanggunulam!” aboka yakok.

²⁶Dara ban bisaʾ era, ngolukdo me nenyek nauba eiying-eiying eiyiboka gwekdo gobok. Wera gologomok me nong era, seleb somogamna nim eneso ura mabokaʾ anasa, yok nim edya, ”Alda hyak dib seleb somogamla,” aboka lelemek.

²⁷Bok Yesus ara, me nenyek eiriyiboka bukiyibok dara, wera me nera albeyok sekok.

²⁸Wera Yesus ara ek wekok salek, alja yuba doro diriga ban nang eblaboka sikbeyok dara, sikda alak, ”Hekaʾ adya nunda bisaʾ ara, yaknenggumab do?” aboka heibek.

²⁹Anasa Yesus adya sikenek, ”Ban nenesonya nera, alda heng uboka molonaʾ adya ok, or yakneseng,” hyok.

³⁰Wera Yesus ab, alja yuba doro diriga ban nang eb dara, anyaganyebaʾ ara, Galilea sokok sam pik uboka balamek. Ban unu pika leiboka balameknya nera, Yesus ara alja yuba donaʾ nang ek neklemokaʾ anasa, yok nang ella deijik senewoka, unumek. Dara alda sikenek, ”Nimi dibaʾ me nera, eimik yok nang soruk lomok sam doboka eleganamak dara, sikda alak obnemak bok, omeija salek li winilinya sum era, alda embengaʾ subnamla,” wenyaboka neksuk.

³¹

³²Bok sikda alda anyek lelemla senenaʾ ara, elgom umek bok, lok anasa, alak heibnenggumek.

³³Wera sikda Kapernaum heikek lanal byik. Anya, ek byik dara, Yesus ara sikenek, ”Ousa pikek ara, ugunda hek yub ek gangawoka leldalmolum do?” wenyaboka heibsuk.

³⁴Bok sikda heknyek sikjaʾ naubenya dangoka ulumla do aboka gangawoka lebdangamek bok anasa, sikja dara, yuba mekaʾ hnon doro sabnenggubek.

³⁵Dara Yesus ara bukoka, alja yuba doro diriga ban nang obadya nang ek keblululum hyookanya, sikenek, ”Nara men dubnya dangoka ulumnamna senewanalenya bera, wera alda sidyaʾ lobnamlakanya, nidyaʾ amba arawoka wa wenya dolul,” hyok.

³⁶Anya wenyaboka, Yesus ara mek me nek na saramek sekel yalom aboka, soruk gliboka dil byuukanya, sikenek wenyhesuk,

³⁷”Anasa heknedya nasamba leboka, ban eneso me nenyek perobaʾ leboka dolomla dara, wera alda nak dolonel. Anya onoʾ heknedya nak dolonel dara, alda nak donggulunel bok, alda nak bokol yeilinyoknya bek dolomla,” hyok.

³⁸Dara onoʾ Yohanes bedya Yesus ak, ”Neyung neklesilimnya o, nub neikaʾ unggulumabnya bedya, anja si sibuka bisaʾ yaklamlaʾ ak eiyiboka, anda nubnya gomaʾ aboka, ununaʾ ara mem aboka yuba sekemab,” hyok.

³⁹Bok Yesus ara Yohanes bek, ”Nimi ben hnon nadya si sibuka lok so migib ununaʾ unulamla dara, wera onoʾ nadya si nek malya nenewanggununelaʾ anasa, mem aboka yuba seknenggom.

⁴⁰Anasa were, nimi heknedya nuk isaʾ gebnenggulusilnya bera, alda nuk sam dangalalanya bera an.

⁴¹Nara ugunuk aldib lebnesin, Ugunda Kristus bedya yuba donaʾ nang uboka nadya si amba leboka, ben hnonja ugunuk meka gweboka eleganesil dara, alba deknamlaʾ ok,” hyok.

⁴²”Heknedya banyan mek nang danyek, nak dib senelenyak mabo danyek, me hnon ak meknewolulaʾ aboka bobnenewanemso dara, igin girik alja nganga ak geregoka, alda mek gwanek boboganeseng dara, alda nenesonya nenyek pewaneseng.

⁴³Anjaʾ meneng soruk edya malya ul eleklenggelya dara, unulunggelya soruk era garawoka bobogalom! Wera sarangganggunumla uka desin heikek sam, nidyaʾ penya soruk gekman bobonggagelyek anasa, darasam soruk mumuruwaʾ anyek, embengaʾ unaʾ ak weknelam dara, pewanalam.

⁴⁴Wera uka singilimnamla heik era, uk ara mekaʾ sarangganggunumlakanya, nimi delemnesil ek era somoganggunumla.

⁴⁵Wera anjaʾ meneng yan edya bo eboka malya ul eleklenggel dara, ununggelya yan era garawoka bobogalom. Nera anda yan moumenaʾ nidyaʾ senenggom uka desin heikek sam bobogalyek anasa, yana darasam mumuruwaʾ anyek geimda embeng unaʾ ak weknelam dara, pewanalam.

⁴⁶Wera uka singilimnamla heik era, uk ara mekaʾ sarangganggunumlakanya, nimi delemnesil ek era somoganggunumla.

⁴⁷Anjaʾ meneng heng edya an nonga malya ul eleklenggelya dara, unulunggelya heng era gurugoka bobogalom! Wera anda heng gebman nidyaʾ an nong ab uka desin heikek sam doro bobogalyek anasa, henga hnonok darasam ok uboka, Imik Neyung wenesin heikek weknelam dara, pewanalam.

⁴⁸Wera uka singilimnamla heik era, uk ara mekaʾ sarangganggunumlakanya, nimi delemnesil ek era somoganggunumla.”

⁴⁹”Nim oboka beillilimak soub era, garam adya daklemak sok, nimi nidyaʾ uk adya unu sunuwanasil.

⁵⁰Garam ara perob bok, angawom anaʾ denghenemso dara, ugunda hekaʾ adya saaboka angawom anaʾ gebnesom do? Anasa ugunda yok nang eb neikaʾ pe kwebdangoka ulumnamab aboka dara, garam angawom anaʾ anyek ugunja ganya lomok ululul,” wenyaboka lebok.