Read Nalca LUKAS 1 Bible Online

LUKAS 1 - Nalca bible

LUKAS 1

¹Teofilus, perob senenggomnya o! Nimi nauba adya nu gangganek an yokaʾ-yokaʾ nidyaʾ unulumokaʾ ara, pe yana lelewoka bolowoka momnya dobnob senewoka dulumak.

²Ban nidyaʾ yokaʾ-yokaʾ unulumokaʾ anyek, men ek ab okoka eiyiboka kemek nang edya, anya onoʾ sikja dara, yok nim ek leb elekdo yabalamak nang edya, nuk lero yeilisik sok, sikda anara lelewoka momnya dolomak.

³Wera anasa, unulumoknya nidyaʾ ara, nadya anam men unub einimokaʾ abaʾ ara seleb pe lelewoka einiro yasakanya, nara neyung anak ban nidyaʾ ara pe yana lelewoka momnya doboka, beibgunun senewoka ulumna.

⁴Wera anedya, neyung anak an neklenjek yuba dara, aldib unumokaʾ ak senewoka ella ululomaʾ aboka unuwanamna.

⁵Wera Herodes bera Yudea sokok sam wenesin dubnya dangoka ulumok sum enyek, Imik Neyung yuba wa gaknya hnon alja si Zakharia, Abia nang yilaʾ ak abnya bek ulumok. Alja gel gedya si nera Elisabet, albabya Harun nimi yilaʾ ak ab gel gek ulumok.

⁶Dara sik nang penya era, Imik Neyung ganya ak pe hekel eleklereekanya, Imik Neyung adya oruksin yub eb, sobaʾ amba meemen yub eb dara, meknenaʾ orokaʾ anyek, pe unulurek.

⁷Bok, Elisabet gera seleb me you gel dangamookanya, sik nang penya era seleb yamen dangarek adya, sikda me hnon beibnenggurek.

⁸Dara yok sum enyek, al nang yilaʾ adya Imik Neyung ak pama oboka beilin sum dangamok dara, Zakharia bera Imik Neyung saramek ban wa nenyek webe balamok.

⁹Nenera sik wa nen welemek nanga nidyaʾ hiboka, or sobaʾ unulumek sok, ban sum era heknyek wekoka gibnemak do aboka aklenga bomdemek dara, wera Zakharia bedya Imik Neyung e lomok wekoka, unuruwaʾ ara alja uka daboka gibnamla aboka sekiyimek.

¹⁰Wera ban anam Imik Neyung adya mem ek sam uka daboka gibnaʾ salek dok dara, beiyek sam ara nimi nauba longowoka diri uboka, heng uboka mololemek.

¹¹Dara ban unulumok salek, Wenelesilnya bedya lero era uka daboka gibnaʾ oulyanga sirik ek sam alak lanawoka sekok.

¹²Alda anyek eillilimok dara, alja ganya eb menegoka loka dabok.

¹³Bok lero enedya alak, ”Zakharia o, anda lok ganya bonggom mem! Imik Neyung ara anja molonaʾ seleb kenggel. Anja gel Elisabet gera me bobnamlakanya, nengma ak beibnamla. Dara, me si ara Yohanes aboka sibnelam.

¹⁴Dara, anda perob senewoka ganya eiya dabnenggel. Anya onoʾ yok nimi nauba adyaʾ anaba, ban al beiblyaʾ amba leboka hyak perob anasa, eiya dabnesil.

¹⁵Anasa alda, Wenelesilnya bedyaʾ saramek ab senenggomnya danamlakanya, yu mek gom, anggur dok mek ab dara, denggulumnamla. Anya alda anam beiblya salek ebaʾ ara moruwoka, Imik Neyung Geisinya adyok deknewoka ulumnamla.

¹⁶Dara al adya, nim Israeli nimi nauba sikjaʾ Wenelesilnya Imik Neyung bek sam saaboka doboka bo yanasil.

¹⁷Anya alda Wenelesilnya bek ab dara, alak men yuba lero bokol yangganya danamla. Dara alda Elia be ulumok sok, eili bera alaʾ me ak ganya dangawoka, ganya malya nim era pelemak nimi ganya ak dangawoka unuwanokaʾ aboka, hyak migibnya senenggomnya ulumnamla. Ban unuwanamlaʾ adya, Wenelesilnya bemba nimi nauba orowek meewoka beibnamla,” hyok.

¹⁸Wenyek Zakharia bera lero ak, ”Ban leblam yub era, nara aldib dib danamlaʾ anyaʾ aboka dara, hekaʾ huboka ella danamna do? Nera nara seleb yamen dasakanya, onoʾ nadya gel geneba nonga kaboka, seleb yamen anasa lebna,” hyok.

¹⁹Dara onoʾ on lero enedya Zakharia bek, ”Na anera Gabriel, Imik Neyung al dam uboka aranaʾanya ulumna. Dara Imik Neyung adya Zakharia bek wenyal bilom aboka bokdo dorogonelaʾ ak, ban perob yub enera wenyal yeilinggen.

²⁰Wera hekaʾ ak nadya nidyaʾ lebnaʾ ara, anda dib senewanggublam anasa, anda yuba goma dangamenaʾ ara, ban nidyaʾ lebnanya nen pe gigiwalya sum era, anda onoʾ yuba sab einiwanelam,” hyok.

²¹Dara ban salek era, nimi nauba Zakharia bek diri ubdibigemek. Dara Zakharia bera Imik Neyung e lomok ara, hekasa mandemla do senewoka ganya lokja senemek.

²²Bok Zakharia bera seleb beiyek goboka yibok dara, anyagan alak diri ulumek nim ek sam yuba hnon sab eleganggubsuk dara, alda Wenelesilnya bedya e lomok ara yokaʾ hnon eiyimla senewoka ella ubek. Anya alda seleb yuba sibamaʾ leboka, yuba goma dangamokaʾ anasa, soruk adya ok gwakdewoka lelemok.

²³Dara Wenelesilnya bedyaʾ ek sam alja webnesonya wa nera seleb webdakok dara, alda ek sam byuk.

²⁴Wera ubdabla henggonggom, alaʾ gel Elisabet gera me bobok. Dara, ek ab gobnaʾ orok anyek, walaʾ lambadya mabok.

²⁵Anya lebokja, ”Wera Wenelesilnya bedya nasamba yokaʾ unuwanelaʾ ara an. Anya wera, onoʾ alja nak eiyiba darawanyoknya nera, nimi hougung ak ab dara gebdebnenel anyaʾ,” wenhyok.

²⁶Wera seleb hnab walaʾ yenewok dara, Imik Neyung lero si Gabriel ak, anda Galilea sokok, hnon heik si ara Nazaret heikek, binilam aboka orugok.

²⁷Dara nenya mekaʾ salanaʾ orok gel, goubenenya be hnon, Yusuf alameknya, alda Daud nang yilaʾ ak abnya bedya molob lomok gel, alja si nera Maria gek, alak binilam aboka orugok.

²⁸Wera lero era Maria gedyaʾ ek sam wekel yeiniboka, ”Wei perob, anak perob senelenggel gel o! Wenelesilnya bera anab neikaʾ ulurum,” hyok.

²⁹Dara Maria gera ban wenhyokaʾ anyek kebookanya, alda hyak lok ganya boboka, ganya lomok, wera ban unuro gibnelaʾ ara, damok ara hekaʾ amba lebla do senewoka seiniwok.

³⁰Bok an lero enedya saaboka Maria gek, ”Wei Maria o, Imik Neyung hogung ak ara anak perob senenggelaʾ anasa, anda lok ganya bonaʾ ara mem.

³¹Aldib, anda me bobnelamakanya, nengma hnon beibnelam. Dara alja si nera Yesus aboka sibnelam.

³²Alda hyak imiknya danamlakanya, Imik Neyung imik ululanya bedya me aboka si silimnemak. Anya Wenelesilnya Imik Neyung adya, aljabo Daud bek dubnya bulumok ekla bunaʾ enyek, alak eleganamla.

³³Anya alda Yakub nang yilaʾ ak wenesin dubnya dangoka, hyak sob-sobaʾ ulumnamlakanya, alja wenelemnesilaʾ ara hyak denghenggunumla,” hyok.

³⁴Bok Maria gedya lero enyek an, ”Nara nenya adya hnon mekaʾ salanenaʾ orok bok anasa, ban leblamnya nera har so huboka nak ara dib danamla do?” hyok.

³⁵Wenyek lero enedya saaboka, ”Imik Neyung Geisinya ara an nong ak yanamlakanya, Imik Neyung hyak imik migibaʾ ululanya bedya migib era anak golul yanenggel. Anesemba, anja eimik beibnelam me nera, alda Imik Neyung bedyaʾ geisa me alamnemak.

³⁶Anya hnonda an dogol Elisabet gera, albabya yamen dib me bobnamlakanya, nengma ak beibnamla. Anya me you gel aboka silimaknya nera, wera alsamba dara, seleb walaʾ hnabnya mabla.

³⁷Anasa wera, Imik Neyung ak dara, yokaʾ hnon unuwanggunusonya nera mekaʾ hnon unggulumla,” hyok.

³⁸Danyek Maria gedya, ”Nara aldib Imik Neyung adya wa wenya ulumna; anasa or anja leblamaʾ sunuwoka or nak an unuwonulul,” hyok. Dara lero era, Maria gek lobonggookanya byuk.

³⁹Li wen maboka ubok dara, Maria gera lanawoka balamokaʾ ara, Yudea sokok mek meinik sam heikek byuk.

⁴⁰Wera lanel byuk dara, alda Zakharia bedyaʾ ek wekel byuukanya, Elisabet gek perob aboka men gibok.

⁴¹Dara Elisabet gera, Maria gedya gibel yabokaʾ anyek kel yabok sab-sab, alja mon lomok bomok me nera nauba ebegookanya, Elisabet gera Imik Neyung Geisinya adyok deknero lobok.

⁴²Anasa alda yuba nauba yeiriwoka lebokaʾ ara, ”Nimi gelewa nauba ulumakaʾ gangganek ara, anak danyek Imik Neyung adya perobaʾ lebnenggelekanya, anja me bolamaʾ anaba pewanamla,” hyok.

⁴³”Wera nara hurub so gel gek anasa, Wenelesilnya eilinggera nak an kemel yanel do?

⁴⁴Nera anja nak gibel yabenelem sab-sab, nadya ok an kel yaban dara, nadya monok an me nera, perob anasa nonggo aboka eiya hlabla.

⁴⁵Dara Wenelesilnya bek ab alak wenyalenya nera dib dangalamlaʾ anasa, seleb unuwanamlaʾ anyaʾ dib senemeija nim era pe ulumak,” hyok.

⁴⁶Dara Maria gedya lebokaʾ ara, ”Nadya nong unaʾ era Wenelesilnya bek giblamla.

⁴⁷Anya nadya ganya era Imik Neyung ara nadya bleblenelnya ulumla anasa, hyak eiya dablenel.

⁴⁸Nera nara alja aranaʾ gel gedya, nadya dolbalek seneldininaʾ anyek, alda keeboka pewanel anasa, aldib wenyok ab mouruwoka, nimi nidyaʾ soko dubuk an ulumak nim edya dara, gel gera alak or pebok wenyalamnenyak.

⁴⁹Nera hyak imik migibaʾ senenggom ululanya bedya, yokaʾ-yokaʾ senenggom damok era, nak an unuwanelaʾ anasa, alja si nera, hyak geisa nong ak ulumla.

⁵⁰Anya alja angoo yadyek senenaʾ ara nimi nidyaʾ lunu-lunu nebgiga balamnamak nim, Imik Neyung ak alak lok ulumak nim ek ulumnamla.

⁵¹Imik Neyung alja migib era alja soruk pik ab laga amalamlakanya, senenggom nong soruk goukwa edya, ganya lomok dengdang ganya boboka imik neneldalamak nang era doluwoka bokol goklamla.

⁵²Sokok an senenggomaʾ dub nang era, sikja bulumak ekla bunaʾ ak sam boulenglesilikanya, sokok so nim ek danyek, imik nenelesil.

⁵³Alda denaʾ garan ulumak nim ek, perob ok salyaʾ goklaboka eleklesilikanya, bonaʾ dub ulumak nim ek dara, malya nenewoka soruk dem bululum aboka yaklesil.

⁵⁴Alda alja ganya angoo yadyek senenaʾ anyek seiniwoka, alda alja wa wenya Israel bek aralamla.

⁵⁵Nenera alda nunjaʾ youmaʾ nauba nim, Abraham bemba hnon, alja mengerob nang yilaʾ amba hyak dibaʾ unulumnesin wenyamokaʾ sunuwoka unulamla,” wenyaboka gibok.

⁵⁶Dara Maria gera, Elisabet geb walaʾ winilya ubdeekanya, wera onoʾ alja ek byuk.

⁵⁷Wera Elisabet gera me bomokaʾ ara, me beilin salek era oka dok. Dara Elisabet gera nengma ak beibok.

⁵⁸Dara, aljaʾ neik heikek nim eb, al nimi yilaʾ ab dara, Wenelesilnya bedya alak angoo yadyek senewoka arawal an yuba kemek dara, alab sikeneb neikaʾ hyak perob aboka eiya hlaboka lelemek.

⁵⁹Wera me nera seleb li linbadya mabok dara, me nera bokaʾ garawanokaʾ aboka sikda yeiniboka, me nera aljaʾ neyung bedya si hema Zakharia aboka si sibnemab senemek.

⁶⁰Bok, alja genong gedya danyek, ”Mem! Alda Yohanes aboka sibnemab,” aboka lebok.

⁶¹Dara sikja alak, ”An si nera an nimi yilaʾ gangganek ara Yohanes aboka si sinaʾ orok bok anasa lemab,” hyek.

⁶²Dara onoʾ, sikja soruk adya gwakdewoka Zakharia bek, alja alaʾ me ak ara hek si nek sib eleganemla do aboka heilimek.

⁶³Danyek Zakharia bera girik lagasa adya momnya don go nenyek molowookanya, ban wenyaro webok, ”Alja si nera Yohanes,” aboka momnya dobok dara, nimi nidyaʾ banasa salyeknya senemek.

⁶⁴Dara al ban sab-sab eneba, alja si bakookanya, silyuma daramokaʾ ara glogokanya, alda yuba goboka saboka, Imik Neyung ak perob aboka gibel yabok.

⁶⁵Anasa, sik ok berem ulumek heik nimi nidyaʾ ab, anya ban anaso unuwal an yub era, Yudea moka meina nidyaʾ ara oboka lelewok.

⁶⁶Dara nimi nidyaʾ ban unuwal an yuba kemek nim edya dara, ”Wenelesilnya bedya alja soruk alak aralemokaʾ anasa, eimik era hekaʾ danamla me do?” aboka unu seiniwoka heibdangdo balamek.

⁶⁷Dara Zakharia, Yohanes eili bera, Imik Neyung Geisinya adya deknewoka ubookanya, anaso unuwanamla aboka ununumnaʾ lebokaʾ ara,

⁶⁸”Alda alja nim ek yeiniboka, siksamba heng lobnaʾ deknaʾ bo yal anasa, Israeli nim edya Imik Neyung sikja Wenelesilnya bek ara giblenok e.

⁶⁹Alja wa wenya Daud be pik nang yilaʾ ak ab uboka, alda nusamba blebsinaʾ bonga hnon sekiyiwal.

⁷⁰Wenelesilnya bedya youmaʾ enyek moruwoka, alja geisa ununumnaʾ lelemek nang edya si bamaʾ pik uboka orowek wenyasuk sok, sunuwoka wera unuweisil.

⁷¹Nera nunja malya nenelesak nang ek ab hnon, nunja isaʾ nang ek ab hnon, blebsil.

⁷²Hnonda angoo yadyek senewoka arasinaʾ alja geisa unuwanasin aboka lemoknya nera, hyak munaʾ dib unuwanamna amokaʾ anasa, bekoka unuwal.

⁷³Nunjaʾ neyung youmaʾanya Abraham bek, alja perob eleknaʾ nuk eleganesin amokaʾ ara, bekoka unuwal.

⁷⁴Anedya nunda lok ganya bonaʾ orokaʾ anyek, Imik Neyung ak arawoka webnokaʾ aboka, nunjaʾ isaʾ nang ek ab blebnesil amok anasa, unuwal.

⁷⁵Nera aljaʾ saramek ara nunda geisa uboka, pe ulunokaʾ aboka, unuweisil.

⁷⁶Anya anda najab o, anak dara, Wenelesilnya bedya pika meewoka yarawalom aboka, anda men mengewanelam anasa, Imik Neyung hyak imik ululanya bedya ununumnaʾ lenya aboka si silimnenjak.

⁷⁷Imik Neyung ara alja nim ek, sikja malya unaʾ era sikenek ab meewoka, anara blebnesilaʾ ak ulusil aboka, an ganya enyek mablulaʾ aboka ubla.

⁷⁸Nunjaʾ Imik Neyung bek ab ganya sanganaʾ ab, angoo yadyek senenaʾ ab dadya, alda nuk kemel yeisilikanya, alja heng era lugunaʾ nonga dorogal.

⁷⁹Nera sik lok ganya hwam uboka, gunaʾ hnoum ulumak nimi gong enyek yeblesilyekanya, nunja yan era hyak perob pik, ganya pe namenaʾ un heklesil pik eboka bo binisil amba,” wenyaboka lebok.

⁸⁰Dara me nera, nauba nebgiga balamookanya, ganya lomok anaba nauba kaboka nebgiga balamok. Anya alda hwalek ok ulwenelemokaʾ ara, nim ak laga danamok sum era geknewok dara, ban sum ok wera laga nenebdok.