Read Nalca LUKAS 10 Bible Online

LUKAS 10 - Nalca bible

LUKAS 10

¹Onoʾ yok sum era, Wenelesilnya Yesus ara, nimi yok yuba len nang denga penya uboka ebdobnya goklomdaraʾ badya nang era penya-penya yandara nang uboka, yok-yok heikek al yibinemok heik me nidyaʾ heikek binilum aboka boksuk.

²Anya Yesus adya sikenek lebsukaʾ ara, ”Nonga daknemak ara nauba ululabok, alda nonga dakne nang enyek mek ok ulumak. Anasa wera, ugunda wa damnya bek, masa nonga daknemeija nang era, bokol yousululaʾ aboka molowolulum.

³Wera ugunda or bululum! Nara ugunuk domba pam eneso ak bei gam hnoum boksin.

⁴Ugunda dem akleng eb, rupiah bonaʾ ab, yan ongonaʾ bonaʾ ara mem. Ugunda yok nim ek gibnobaʾ aboka pikek anya dek-deka sonaʾ ara mem.

⁵Ugunda yok nim edya ek weknelum dara, Ban e nenyek an perobaʾ dalom, henelum.

⁶E nenyek anara, e damnya bedya ugunub ganya hekoka ulumnemab senewanamla dara, ugunja perob aboka gibnelumnya nera alak sobaʾ ulumnamla, bok orok dara, ugunja hekoka gibmunya nera onsok ugun damnya yanesil.

⁷Ugunda ban hnonok ek ok ulumnelum. Wa welemna nim era deknaʾ doboka delemakaʾ anasa, ugun ulumun ek anya denaʾ beibnesak dara, doboka delelulum. Yok-yok e pik salyaʾ welem-welem aro yabanaʾ ara mem.

⁸Ugunda yok senenggom heikek gom yanalum danyek, youmunaʾ anasa perobaʾ lebsijekanya, denaʾ ugunsamba aboka beibnesak dara, or doboka denelum.

⁹Dara heik enyek an, nimi neiknaʾ nimi or hwebnelum, hnonda Imik Neyung adya eimik ugun gangganek sam wenelemnesilaʾ ara oka yal aro leb eleganesulum.

¹⁰Bok ugunda yok heikek yanalum enyek, heik en nim edya ugunuk perobaʾ leboka dobnenggunusak dara, ugunda pikek sam sekel yibiniboka lebnelumja,

¹¹Ugunja heikek ab nunjaʾ yan ak sam oumesilya blesa era ugunuk beknaʾ dibaʾ hab lobsab. Bok ugunuk dara, wera Imik Neyung adya ugun gangganek sam wenelemnesilaʾ anyek oka yalamla anyek ella danalum, henelum.

¹²Wera, ugunuk lebsin. Soko sidyaʾ daknamla sum era, Sodom nim ek dara, malya unaʾ amba mek so obnesil bok, ban sikja unuwanamak heik nim malya unaʾ amba nauba so obnesil,” hyok.

¹³”Korazim heik o, anak dara hyak omomaʾ ak ululam! Betsaida heik o, anak dara hyak omomaʾ ak ululam! Ugun gangganek an unulamla migib ununaʾ enyek, Sidon heikek hnon Tirus heikek seleb unusobok dara, wera heik enyek an nim era seleb nidyaʾ malya unaʾ loboka ganya dangawoka, sikda soloma kweboka engelemak anaʾ dibaʾ ara, sikja huk era aso lobgoulob dangamnaseng.

¹⁴Soko denghenemla sum era, Sidon nim eb, Tirus nim eb dadya, malya unaʾ amba mek so obnesil bok, ugunuk dara, nauba obnesil.

¹⁵Alda Kapernaum heik o, anak dara, im nongok eini nenewananel senelelam de? Orok! Alda anda gobdo somoknaʾ nim heikek boboganenggel!” hyok.

¹⁶Anya Yesus ara alja yuba doro diriga ban nang ek, ”Nim ugunja yuba kelesak nim era, sikda nadya yub ek kelenyak. Alda ugunuk lek alasak nim era, sikda nak lek alanyak. Anya wera, nak lek alanyak nim era, sikda nadyaʾ neyung be na bokol yeilinyoknya bek, lek alamak,” hyok.

¹⁷Nimi denga penya uboka eb loboka bokosuk yuba len nang era, ganya hyak eiya daboka onoʾ yek. Anya sikja dara, ”Wenelesilimnya o, wera bisaʾ anaba nunja anja si sibuka goboka bilom wenyal yaban dara, nunja yub era pe kelesak!” hyek.

¹⁸Danyek Yesus adya sikenek lebnesukaʾ ara, ”Bisaʾ dubnya Satan ara ebnaʾ langam-langam aboka, imik abaʾ ara malyinggyukaʾ ak eibsa.

¹⁹Ugunda banyek pe kebnalum! Ugunda bagaʾ ab, siribnaʾ ab, yok isaʾ nang migib ab, ugunuk sam hnon malya nenesinaʾ orokaʾ anyek, yan ingib saboka hmenga nenelelulumaʾ aboka nadya migib era ugunuk elegeisisa.

²⁰Ban seleb bisaʾ ara ugunja yuba keboka goboka balamlaʾ amba leboka perob senewoka ei-ei ganya bonaʾ ara mem. Alda ugunja si nenyek imik heikek sam momnya dolosilaʾ anasa leboka ei-ei ganya bololulum,” hyok.

²¹Dara ban neik salek Yesus anaba, alda ei-ei ganya bomokaʾ ara, Imik Neyung Geisinya adya deknemokaʾ adya umok. Anasa Yesus adya dara, ”Neyung, Wenelesilimnya o, anda soko ab im ab dubnya ululam! Nara anak perob aboka gibgenaʾ ara, ban nidyaʾ unulusilimaʾ ara, geremseng nang eb, yokaʾ-yokaʾ ella danganaʾ dolomak nim ek ara gunuweisinjok, alda mek so nim ek anyek laga nekoka amalesilimaʾ anasa gibgen. Ban unululamaʾ ara, anja ganya adya uboka, perob senelelamaʾ anasa perob,” hyok.

²²”Yokaʾ-yokaʾ nidyaʾ ara neyung bedya nak lebnyok. Nimi nidyaʾ ara me ak ara elgom ulumak bok, neyung anak ok hnonok ella ulunelem. Nim adya dara, anak elgom ulunjak bok, anja me nedya danyek, hnonok ella ulunggen. Anya hek nim ek, me nenedya neyung bera ban aboka neksin nang edyaʾ anaba ella ulunjak,” hyok.

²³Dara Yesus ara alja yuba doro diriga ban nang ek keeboka, onoʾ sikba youkowek lebsukaʾ ara, ”Ugunda wen an eiblumnya nenyek, yok nim anaba eillilimak nim era pe ulumak.

²⁴Anasa ban nenyek lebsin, Youmaʾ ununumnaʾ lelemek nang eb, dub nang eb dara, ugun an wen eiblumnya nenyek eibnob senewoka diri ulumek bok, hyak mekaʾ eruwanggubek. Sikda ugun wen an kelelumnya nenyek, kebnob senen diri ulumek bok, kebnenggubek,” hyok.

²⁵Dara onoʾ Yahudi yuba neksinya ben hnon Yesus ak sene sunuwonunaʾ aboka goboka sekel yeilimok. Benedya Yesus ak, ”Neyung neklesilimnya o, nara hekaʾ ak hubnyaʾ adya embeng unaʾ ara dobnamna do?” aboka heibuk.

²⁶Danyek Yesus adya benyek an lebokaʾ ara, ”Imik Neyung adya unuwanalum an yuba bukuk sam ara, hekaʾ aro momnya dobok do? Anja dara, nera hekaʾ ak lebok senelelam do?” aboka saaboka heibok.

²⁷Wenyek benedya lebokaʾ ara, ”Anda Imik Neyung bek ganya gebman adya wanaʾ ululom, anja nong unaʾ gebman adya wanaʾ ululom, anja nong migib gebman adya wanaʾ ululom, anja ganya seininaʾ gebman adya hnon wanaʾ ululom. An dam nang wanaʾ uldalalam sok, an kabo nim ek wanaʾ ululom, wenhyok,” hyok.

²⁸Danyek Yesus adya, ”Anja leblamaʾ dara, dib leblam. Ban nenyek nidyaʾ unulumen dara, wera anda embeng unaʾ dib dobnelam,” hyok.

²⁹Bok Yahudi yuba neksinya bedya perobnya benyaʾ beknaʾ donulul senewok. Anasa, ”Na kabo nim era hek nim ek lelam do?” aboka heibuk.

³⁰Dara, Yesus adya benyek an lebokaʾ ara, ”Nimi ben hnon alda Yerusalem heikek abaʾ ara Yerikho heikek yanggalamok. Pikek anam yanggalamok bok, beiyek nim edya pika weboka, alja bonaʾ nidyaʾ dorowoka, al nonga hyakaʾ oboka, anya wera pik ganggan ob loyi byik.

³¹Wera onoʾ neik pikek ara, yuba wa gaknya ben hnon yanggalamok. Dara benyek oboka pikek meiyimekaʾ eibuk dara, bera pika leiboka byuk.

³²Anasonya neikek, Lewi nang ben hnon al on pik enyek an yanggalamokaʾ anaba, ben mamokaʾ eibuk dara, wera neikso mok so geboka byuk.

³³Bok, onoʾ neik pik era, Samaria nanga ben hnon balamok. Wera ban ben oboka beiyimekaʾ eibuk dara, alja ganya hyak angoo aboka yadyeka wanaʾ dabok.

³⁴Dara ok berem biniboka, alja omek menengaʾ mek elegoka, ngiknaʾ mek adya ngikoka, kenaʾ adya keboka hwemok. Ban nen seleb unubgogowok dara, alja abaksin pam ek bukiyiwok dara, dekoka man ek bo biniboka, meewoka hwero bo mabok.

³⁵Ampum maboka gwelegok dara, hweboka bo mamoknya bedya e damnya bek rupiah penya doboka elegoka lebokja, Anyagan hweboka bo ululom. Dara, rupiah nauba so dalya dara, yok sum yanggannya dara, eleganenggen,” hyok.

³⁶Dara Yesus ara ban sununaʾ enera ban nenyek sidyaʾ heiboka lebokaʾ ara, ”Ban winilya nang danara, har berek oboka beiyimeknya alkabo dangamok senelam do?” hyok.

³⁷Dara, Yesus ak sene heil yeilimoknya bedya dara, ”Oblomekaʾ anyek angoo yadyek senewoka arawoknya benyek alkabo dangamok, senewan,” hyok. Yesus adya benyek lebokaʾ ara, ”Wei, wera anasa, ambabya biniboka anaso unulumnulam!” hyok.

³⁸Wera onoʾ Yesus ab alja yuba doro diriga ban nang era, pikek balamekaʾ ara, yok mek heikek wekel byik. Heik enyek anyeb gela hnon alja si nera Marta gedya, Yesus ak nadya ek yalom aboka e byuk.

³⁹Marta gera alja weisa yak gel, anya gel genedya si nera Maria. Ban Maria genera Yesus dam oka bukoka, Yesus adya lelemok yub enyek, pe kero bulumok.

⁴⁰Bok Marta gek dara, gelewa ek welemak wa nenyek yeiriwoka webdibigemok. Danyek Marta gedya Yesus ak biniboka lebokaʾ ara, ”Wenelesilimnya o, anja Marta gera albeyok unululaʾ aboka, Maria gera alda or eiblolam de? Alda nak arawonululaʾ aboka orugalom,” hyok.

⁴¹Danyek Wenelesilnya bedya lebokaʾ ara, ”Marta, Marta o. Anak dara, yokaʾ-yokaʾ ganya ok dokoka seiniro balalam.

⁴²Bok alda dib nongaʾ ara hnonok ulumla. Anya Maria gek dara, alak ab yokaʾ adya salyaʾ dobnenggunumlaʾ perobaʾ anyek, weboka dobla,” hyok.