Read Nalca LUKAS 11 Bible Online

LUKAS 11 - Nalca bible

LUKAS 11

¹Wera onoʾ yok sum enyek, Yesus ara gakdenaʾ ak albeyok heng uboka mololemok. Seleb heng uboka molobgogowok dara, alja yuba doro diriga ban nanga ben hnonja Yesus ak, ”Wenelesilimnya o, Yohanes Pembaptis bedya alja yuba donaʾ nang ek, hekaʾ huboka heng uboka molowanokaʾ aboka neksuk sok, ambabya nuk neksilom,” hyok.

²Dara Yesus adya sikenek lebsukaʾ ara, ”Ugunda heng uboka molowanamun dara, ban nenyek wenyaboka molowanalumaʾ ara, Imik Neyung o, anja si nok munaʾ giblenggenok. Anja wenelemnesilaʾ ara dibaʾ dolul.

³Lika sob-sobaʾ nunja denaʾ denemeibyaʾ ara eleklesilom.

⁴Dara, nunda malya ubdangamna nim eb dara, memeldalamabaʾ anasa, ambabya nunjaʾ malya unaʾ era doboka bobogeisilom. Nuk sunulyamalesil pik sam boro dibnenggunusilim, aboka mololelulum,” hyok.

⁵Onoʾ Yesus adya sikenek lebsukaʾ ara, ”Banyek seiniyiwanalum, ben hnon ugun an nang enyek, anjaʾ hem bedyaʾ ek sam inimnek dukdukanek enyek biniboka,

⁶nadyaʾ hem be pikek mal yalaladyok, wene sab-sab wenyok nadya ek yal bok, gwanenga hnon dilinaʾ orok anasa, gwanenga winilya diyimen dara, seʾ dob eleganelom, wenyhenesom dara,

⁷anja hem bedya, aljaʾ e lomok sam ab, nak lobaʾ nenel yangganana ara orok! Pik ara seleb gasa seregoka, nadya mab eb seleb mamab bar. Nadya bukoka denaʾ yokaʾ-yokaʾ ara eleganggununggisinya, henemso dara, hekaʾ senewanesom do?” hyok.

⁸Dara onoʾ hnon lebokja, ”Wera hekaʾ do? Ban lebsin. Alda anjaʾ hem be yokaʾ nonga ulumsoʾ anasa, inimnek bok dara, bukoka yokaʾ-yokaʾ ara eleganggununggesobok, anda nadya hem benyaʾ senewoka alya ganya bonaʾ orokaʾ anyek, sobaʾ molobdibigesom dara, or bukoka eleganeso senesomaʾ ara eleganenggeso.

⁹Anasa wera, nara ugunuk banyek dib lebsin, mololomun dara, eleganesil; elemun dara, eiriwanalum; pika glorum-glorum alamun dara, ugunsamba pika baknesil.

¹⁰Anasa wera, mololemeija nimi nidyaʾ ara, dorowanamak, elemeija nimi nidyaʾ ara, eiriwanamak, pika baksilom aboka glorum-glorum alameija nimi nidyaʾ ara, siksamba pika baknesil.

¹¹Ugun gangganek ara, nimi ben hnon alja me nedya hadyaʾ ak molowaso dara, bagaʾ ak eleganamso de?

¹²Goma wining dok ak molowanamso dara, siribnaʾ ak eleganamso de?

¹³Anasa wera, ugun malya unaʾ nang enyek babya, ugunja mab ek ara perobaʾ anyek eleklelum. Wera ugunja Imik Neyung imik heikek ululanya bera, wanok! Alda Geisinya elegeisilom aboka molowanamak nim ek ara eleganesil,” hyok.

¹⁴Wera onoʾ yok sum enyek Yesus ara, yuba goma dangamoknya bek ab bisaʾ ganya hnon yakoka hwemok. Bisaʾ ganya ara seleb goboka byuk dara, gologomoknya bera alda yuba salamokaʾ anasa, nimi nauba hyak loka dasuk.

¹⁵Bok nimi hnon nim edya dara, ”Yesus adya bisaʾ yaklamla dara, wera bisaʾ dubnya Beelzebul bedya ganya edya unulumla,” alamek.

¹⁶Alda onoʾ yok nim edya dara, Yesus unulumoknya nenesa sene sunuwanobaʾ aboka, anda aldib Imik Neyung ak ab yeilimen dara, laga beknaʾ dolulaʾ aboka, imik ab yok lok sonya nenyek hnon unuwalom aboka molomek.

¹⁷Bok Yesus ara sikja bomek ganya ella usukaʾ anasa, alja sikenek lebsukaʾ ara, ”Yok mok soko nim edya yok-yok dub nang edya bokoka isaʾ neneldalaseng dara, sikda goʾ pe ubeinewanggunuseng. Hnonda nim e hnon gobdo isaʾ nenebdangoka mala weboka oldalaseng dara, e nera malya dangoka soldowoka orok danamso.

¹⁸Anasa neikek, bisaʾ dubnya Satan beneba unuwanamla. Hnon ulumeija nim eb, yok nim eb oldalamnemak dara, heik era hyak malya dangoka ubnamla. Ugunja dara nak ara, Beelzebul bedya ganya migib adya bisaʾ ara yaklamla alanulumaʾ anasa, lebsin.

¹⁹Wera nenyek aldib dara, ugunja yuba donaʾ nim era, hek migib edya sikda bisaʾ yaklamek do? Anasa, ugunja yuba don nim edya unulumeknya nenedya wera, ugunda meknewoka lelelumaʾ ara, an laga dangalamla!

²⁰Bok nak dara, bisaʾ yaklamnaʾ ara, Imik Neyung migib adya yaklamna, anya anyek unulamna dara, wera Imik Neyung adya ugun gangganek seleb wenelesilaʾ ara ulusil an.

²¹Nimi ben hnon hyak migibnya benyek, alda hyak mala yakaʾ anyek, alja e pe welmorulamla dara, alja bonaʾ nidyaʾ ulumlaʾ ara or pe ulumnamla.

²²Bok ban migibnya beneba, onoʾ yok hyak senenggom migibnya bedya, alja pe mobuka welemna senewoka ulumlaʾ anaba yeindeboka, doluwoka doboka, hyak migibnya bedya dara, alja mal yina doboka, yok bonaʾ anaba doboka alja hem yabek nidyaʾ haboka boknesuso.

²³Nak sam mala doboka neikaʾ denenggulumab nim era, sikda nak lek aboka lolonyak. Dara nak aranenaʾ orok nim era, nadya welemna wa nek soldol meneklemak nim era an,” hyok.

²⁴”Bisaʾ ganya era, nim ek ab goboka bilimna dara, elemaʾ pik dek-deka soboka ulununaʾ aboka ero yabalamnelabok, al un e nera eilinggulumla. Anasa wera alja lebneladya, nadya youmaʾ lo yeilimsa ek saaboka binimna! alamla.

²⁵Wera youmaʾ ek balamna enyek, e nera sembejaʾ orokaʾ anyek pe bonaʾ beiyiboka ulumnaʾ ak eillilamla.

²⁶Dara alda yu ara mek so bok, alda hyak yu nong ara yok so bisaʾ enyek sekbadya el balasil. Dara sikda bisaʾ dara, benyek an yeiniboka ulumak. Dara sik wekoka ulumnemaknya bedya nong unaʾ era youmaʾ dara or mek so bok, wenyek dara, hyak gobdo malya dangalamla!” hyok.

²⁷Yesus ara seleb wenyabgogowok dara, gela hnon nimi hnoum anyeb Yesus ak, ”An beiyiboka moma diniwajok gel gera alda pe ulumla!” hyok.

²⁸Bok Yesus adya dara, ”Nauba so ara, nim Imik Neyung yuba keboka pe unulumak nim enyek, hyak nauba pe ulumak!” hyok.

²⁹Wera nim era anam Yesus ak aknel yalamek bok, alda anam yuba sabdibigemok, dara alja lebokaʾ ara, ”Wen an ulumak nim era yu hwama lok nang ek ulumak. Sikda nak dib senewanenobaʾ aboka lok soʾ anyek unuwalom aboka mololenyak. Bok sikenek lok sonya nera eleganggunusin bok, alda Yunus ununumnaʾ lelemoknya bek unumok beknaʾ ek hnonok eleganesin.

³⁰Ununumnaʾ lenya Yunus bek umok lok so unaʾ enedya, Niniwe nim enyek sikja lok so beknaʾ ara an. Anasonya neikek, nimi dibaʾ me ara wen ulumak nim sikja lok so beknaʾ dibaʾ danamla.

³¹Soko sidyaʾ daknamla sum era, oblya sam dub gel gera, wene salek an ulumak nim eb neikaʾ sekoka bukija dara, sikenek yana kibnesil. Salomo bedyaʾ perob neksin yuba ken dambaʾ anaba, dub gel gedya dara, hyak mok sam ab anaba yeilimookanya, Salomo bedya geremsengaʾ lemok yuba kebok. Bok wen anyagan ara, Salomo bera or mek so bok, senenggomnya ben hnon ulumla!

³²Soko sidyaʾ daknamla sum era, Niniwe heik nim era, wen an ulumak nim eb neikaʾ suboka bukija dara, sikenek neikaʾ yana kibnesak. Anasa wera, Niniwe nim era, ununumnaʾ lenya Yunus bedya sikenek yuba leb elegosuk sum ganya dangawoka domekaʾ anaba, Yunus bera mek so bok, wen an ululanya bera senenggomnya bek ulumla!” hyok.

³³”Nimi ben hnon wesaʾ diniwoka beiyisodyok dara, onoʾ mek hmei lomok doronggoka pik ibnenggunumso. Alda laga diniwoka beibnyaʾ adya, nimi yanggeija nim era eibnokaʾ aboka, laga diniwoka beiyimnamso.

³⁴Nimi heng ak dara, nong amba wesaʾ dibaʾ ulumla. Ugunja heng enyek perobaʾ ok ulusil dara, nonga nidyaʾ ara dilinaʾ ok pe yeblesil. Bok ugunja heng enyek sologan dara, ugunja nonga nidyaʾ ara gunaʾ ok sene-monu al loblamla.

³⁵Anasa wera, ugun an ulusil dilinaʾ era, gunaʾ deisilyek anasa, keeboka ulululum.

³⁶Ugunja nonga nidyaʾ ara dilinaʾ ok yeblesil dara, anya nong ganggana hnon gunaʾ unaʾ orok dara, wera ugunja nonga nidyaʾ ara, wesaʾ dilinaʾ yeblamla anasoʾ ak yeblesil,” hyok.

³⁷Wera Yesus ara seleb yuba sabgogowok dara, Parisinya ben hnonja nadyaʾ ek neikaʾ denenam aboka e byuk. Dara Yesus ara e nenyek an del bilimok.

³⁸Danyek Yesus ara Yahudi yuba don nim ulumek sok, soruka mek elegoka denggulumokaʾ anasa, Parisinya bera hyak loka dabok.

³⁹Anasa wera, Wenelesilnya bedya benyek an, ”Ugun Parisi nang era sob unululumaʾ ara, yangawoka denaʾ ab, belaʾ ab dara, or eilibek ok mek eleklelum bok, ugunjaʾ nong lomok ak dara, nauba dobsinya ganya ab, malya unaʾ ab dadya ok deknewoka ulusil.

⁴⁰Ugunda hyak dongdang anaʾ ak ululum! Imik Neyung adya eilibek sam uyimoknya bedya, onoʾ lomok sam anaba uyiwanggumok de?

⁴¹Ugunjaʾ lomok sam ululanya nenyek, bonaʾ garan nim ek elegosululum. Ban unuwomunaʾ adya, wera ugunsamba yokaʾ-yokaʾ nidyaʾ geisa danasil.

⁴²Ugun Parisi nang ek dara, hyak omom nongaʾ ak ululum! Ugunja masa melelumaʾ so meklaʾ ab, doknaʾ ab, gadyaʾ masa ab dara, ugunda Imik Neyung ak sagonya nera eleklelum bok, Imik Neyung ak wanaʾ unaʾ ab, jong unaʾ ab dara, ununaʾ lololum. Mennya nera unun dara, lobnenggunusom bok, Imik Neyung jong uboka wanaʾ unaʾ anaba unulumnesom.

⁴³Ugunda Parisi nang era hyak omom nongaʾ ak ululum! Ugunda Yahudi nim edya yuba don ek ara hyak perobaʾ nonokdowaʾ ak ok bulunob senelelum, anya dekna gasaʾ ak ab giblesinok senen ganya bololum.

⁴⁴Ugunda hyak omom nong nang ek ululum! Ugunda nimi soko lokomna oulyang ek beknaʾ beibnenggumna ek, yok nim eibnenggonggom yan ingiwoka yabalemak oulyang anaso ak ululum,” hyok.

⁴⁵Danyek Yahudi yuba neklesuknya ben hnon Yesus ak, ”Neklesilimnya o, ban yub edya, neyung nuk malya uboka derewoka walasilemaʾ ara an,” hyok.

⁴⁶Yesus adya benyek lebokaʾ ara, ”Ugun yuba sunuwoka yana lelelelum nim anaba, hyak omom nong nim ek ululum! Ugunja dara, iginya nek hnon, okna nongnya nenyek, yok nim ek eleklelum bok, ugunja dara, hnon mekaʾ aranggulusulum.

⁴⁷Ugunda hyak omom nong nim ek ululum! Ugunda ununumnaʾ lelemek nang edya beʾ gala meewoka beillilelum bok, nera ugunja neyung yab edya omek nim ek anara ululum.

⁴⁸Wera anara ugunjaʾ neyung yaba youmaʾ nim edya umeknya nenyek ugumba perob alalumukanya, anara unululum; anasa ugunja neyung yabo youmaʾ nim edya sik nong ara omek dara, ugunja dara, sikjaʾ beʾ gala memelelum.

⁴⁹Anasa Imik Neyung geremseng adya lelemlaʾ ara, nara eimik ununumnaʾ len nang eb, yuba lenaʾ gak nang eb sikenek bokol binisin dara, darasam obnesak dara, darasam nim era lobaʾ nenewoka malya nenewanasak! hyok.

⁵⁰Anasa, Imik Neyung adya wen an ulumak nim enyek, men soko uyimok salek ebaʾ ara, ununumnaʾ lelemak nang olomeknya nenesa malya nenewoka obnesil.

⁵¹Dara Habel be omekaʾ abaʾ ara, Zakharia be obekaʾ ak anasa, obnesil. (Zakharia bera Imik Neyung amba uka daboka gibnaʾ oulyang ak ganggan, Imik Neyung ek gangganek sam ab alak obek.) Ugunda banyek dib senewanalum: Wene salek ulumak nim era, ban unulumeknya nenesa leboka nidyaʾ obnesil.

⁵²Ugun yuba sunuwoka yana lelelelum nang era, hyak omom nong nim ek ululum! Yokaʾ-yokaʾ ella dangan damba pik baknaʾ era, ugun an beibsuk bok, ugunja dara ella danganaʾ enyek eibnob senewoka e lomok weknaʾ ara lololum. Alda ugunja dara, yok nimi ella danganaʾ enyek dobnobaʾ dulumak nim anaba, pika garal meneklelum!” hyok.

⁵³Wera Yesus ara yuba salamokaʾ ak ara loboka bok dara, yuba neksin nang eb, Parisi nang eb dara, borowoka yok-yoknya bo doronggoka heilemek. Sikda sene yokaʾ-yokaʾ anyek nauba lelelulaʾ aboka benewoka lelemek.

⁵⁴Ban wenyalamek ek ab dara, Yesus adya malya uboka meknewoka leblya enyek, alak yana kibnobaʾ aboka kemero yabalamek.