Read Nalca LUKAS 12 Bible Online

LUKAS 12 - Nalca bible

LUKAS 12

¹Nimi denga sal-salyaʾ anyek dokol dalameekanya, yan ingib sabdangda balamek. Wera nimi dara mamagal yalamek dara, Yesus ara alja yuba doro diriga ban nang ek, ”Ugunda Parisi nang edya roti welenaʾ enyek keeboka diri uldalalulum. Nadya lebnanya nera, sikja sene or-or lelesaknya nenyek lebna.

²Yokaʾ-yokaʾ wen doknolomaknya nera, eimik laga geleboka beibnenggunulanya hnon unggulumla. Anya onoʾ, wen gunulumaknya nera, eimik ella danggunumaknya hnon unggulumla.

³Ugunja gunaʾ ak sam lelelumnya nera, laga yubyek ek kebnemak; ugunja o lomok gelelenga e lomok ab lelelumnya nera, eimik era meinik ab laga bii aro yibinemak,” hyok.

⁴”Nadyaʾ hemyab o, ugunda banyek beknelum! Ugunda nong dem ak olomak nim ek ara, onoʾ mok so senenggomnya nek ara unuwanggunusengaʾ anasa, ugunda sikenek lok ganya bonggom, mem.

⁵Alda ugunja loka ulumnelumnya benyek nadya ugunuk aawanasin. Imik Neyung ak ok lok ganya bolomnelum. Al adya, seleb olosil nim era, seleb obgogowan dara, al adya danyek ok uka desin heikek boloklesilaʾ anasa lemna. Aldib unululanya benyek alak ok lok ganya bololulum, hen.

⁶Senero wininga lambadya dara, rupiah sirik penya ok dolomak. Ban unulumakaʾ anaba, Imik Neyung ara wining dara hnon hiliknenggulumla.

⁷Onoʾ Imik Neyung ara hong anyek babya einilamlaʾ anasa, wining ara mek so bok, ugunuk dara hyak perob nongaʾ ak ululumaʾ anasa, lok ganya bonaʾ ara mem,” hyok.

⁸”Ugunuk dib lebsin, nimi ben hnon ara, nimi hnoum nara Yesus ak diriga bannya ulumna aboka laga lebnamla dara, albabya nimi dibaʾ me nedya Imik Neyung lero nang hogung ak sam laga lebnamla.

⁹Bok alda nimi hnoum, nara Yesus ak diriga banggulunanya aboka bobnenewoka lelelanya bera, albabya nimi dibaʾ me nedya Imik Neyung lero nang saramek sam ab, or-or lebnamla.

¹⁰Nimi dibaʾ me nek nim adya si malya nenewanamaknya nera or malye aboka, malya unaʾ era sikenek ab memewanasil bok, Imik Neyung Geisinya bek malya lebnemak dara, malya unaʾ era perobaʾ leboka sikenek ab meewanggunusil.

¹¹Ugun nong anyek, Yahudi nim edya yuba don ek sam gom, wenewoka bo usin nang saramek gom, senenggom dub nang hogung ak laga yana leleweisinobaʾ aboka bo binisak dara, ugunja dara, nunda hekaʾ huru yuba garabdanamab gom, hekaʾ lebnemab gom, aboka ganya daldom-daldom anaʾ ara mem.

¹²Anasa alda ugunja hekaʾ ak lebnelumaʾ ara, Imik Neyung Geisinya adya lebnelum salek ok neknesil,” hyok.

¹³Nimi hnoum ulumekaʾ ak ab ben hnonja Yesus ak, ”Neklesilimnya o, nunjaʾ neyung bedya somogoka lo byuk bonaʾ enyek, nadyaʾ hem bedya na hnon bokoka eleganelaʾ anasa, anja orugalom,” hyok.

¹⁴Yesus adya benyek an lebokaʾ ara, ”Hem o, heknedya nak ara yana lelesinya sekiyiwanyok goma, ugunjaʾ neyung bedya misaʾ boksinaʾ amba sekiyiwanyek gom?” hyok.

¹⁵Dara onoʾ Yesus ara nimi nauba ulumek nim ek an, ”Nim ara bonaʾ dubnya ulumnaʾ anaba, embeng unaʾ ara anyagan anyek ganya kweboka unggulumakaʾ anasa, hmabaʾ ganya ab yokaʾ-yokaʾ sunulusilaʾ ak ab keeboka pe diri uldalalulum,” hyok.

¹⁶Anya Yesus ara ban sununaʾ enyek sunuwoka lebokaʾ ara, ”Nimi ben hnon bonaʾ dubnya bek ulumok. Alda dub nongnya uboka, wa soko masa naubanya bek ulumok.

¹⁷Ban bonaʾ dubnya bedya seiniwok dara, Nadya masa ak ab denaʾ doboka beilin e nera orok dal. Nara hekaʾ hubuka beibnamna do senewoka seiniwanamna do? aboka seiniwok.

¹⁸Dara onoʾ alda ganya seiniwoka al damnya ganya ek lebdokja, Wera ban nenyek seiniwan, nadya masa beilin e nera onoʾ golowoka nauba sobgoknamna senewok. Unu sobnya ek an nadya gandum ab, nadyaʾ yok-yok bonaʾ eb dara anyagan beibnamna.

¹⁹Dara onoʾ nadya nong ek na damnya lebdananadya, Anak dara, pelelam! Yokaʾ-yokaʾ nidyaʾ ara anda deregoka bololamaʾ anjaʾ ulumlaʾ anasa, gibnaʾ gong-gong lelemlyaʾ anaba denghenggunumla. Anda dek-deka soldibilloklolom! Gwaneng meka deblaboka eiya hlaboka pero nonggo aro ululom! aboka lebdok.

²⁰Bok Imik Neyung adya benyek lebokaʾ ara, Wei, dongdang anaʾ anya ululam! An nong ara sumen inimnek somoganalam dara, anja nidyaʾ bolowoka beillilelam bonaʾ era heknedya an lunuwoka danamla do? hyok.

²¹Anasa, Imik Neyung adya perob senelamlaʾ duboka unuwonun senenaʾ loboka, nimi ganya adya ok seiniwoka duboka nanokok bonaʾ dubnya donun senewoka yeirilemak nim era, sikenek anaso unuwanasil,” hyok.

²²Dara onoʾ Yesus ara alja yuba doro diriga ban nang ek, ”Ban nenesa nadya lelesinaʾ ara, Ugunja nong unaʾ enesa leboka ganya daldom-daldom aboka youmburaʾ debnaʾ ara, mem. Nunda hekaʾ denemab gom, hek akleng ongowanamab do aboka youmburaʾ debnenggom, mem.

²³Nim nong unaʾ anyek hyak nauba perob nongaʾ ak ulumlakanya, denaʾ ak dara, domdigum soʾ ak ulumla. Dara nimi nong ak perobaʾ ak ulumlakanya, akleng ara or domdigum soʾ ak ulumla.

²⁴Ugunda sam wining anyek pe seiniwolulum! Sikda yinaʾ menggulumak, nong yongonggulumak, masa hnon beilin e soboka beilenggulumak. Bok Imik Neyung adya sik nong pe beiyiboka bo ulusil! Wining ak dara, or domdigum so bok, ugun nong ak dara, hyak senenggom nongaʾ ak ululum!

²⁵Ugun gangganek nimi ben hnon alja ganya daldom-daldom aboka youmbura debnaʾ adya, al nong un salek era, goʾ warenaʾ ub einewanamso de?

²⁶Ugunda or mek siriknya nenyek babya ugumba yok ganya doboka unaʾ orok bok dara, hekasa naubenya nemba leboka ganya daldom-daldom anaʾ ganya bololum do?

²⁷Ugunda hwalek sam esaʾ molumlaʾ anyek pe keebdablulum. Ban esaʾ dara, sikda wa wenaʾ orok uboka, onoʾ aklenga winaʾ anaba winggulumak. Anya, Salomo beneba yokaʾ-yokaʾ dubnyakanya hyak senenggomnya benyek babya, ban esaʾ hogung hyak perob nongaʾ ulumlaʾ anaso akleng bokaʾ era hnon ongonggulumok.

²⁸Holaʾ ara sumen enesoʾ ara, youruwanaʾ ara, ampum dan dara, dengaboka uka dalamak. Ban unulumakaʾ anaba, Imik Neyung adya anaso hyak perob esaʾ era, ongon akleng eneso eleklesil. Ugunuk dara, hyak wanok! Bok ugunda mek ok dib senelelum!

²⁹Onoʾ, ugun gwaneng meka denemunaʾ anyek orok amba leboka, ganya daldom-daldom anaʾ ab, ganya soro-wara anaʾ ab dara ununggom, mem.

³⁰Ban ganya en boboka yeiriwoka elemak nim era, yok-yok mok soko nim Imik Neyung ak elgom ulumak nim edya anara unulumak. Alda Imik Neyung ara ugunja nidyaʾ dobsibya bobsibya senelelumaʾ ara, alda pe ella ulusil.

³¹Bok ugunda Imik Neyung adya unuwanok senelamlaʾ anyek eboka nonogomun dara, yoknya nera, Imik Neyung adya ugunuk ganya doboka elek maknesil,” hyok.

³²”Ugun ululum nim era dumunga mekaʾ me bok anasa, ugunda lok ganya bonaʾ ara mem! Imik Neyung ara alja wenelemnesilnya nenyek, ugunjinya danasil.

³³Ugunja bonaʾ rupiah dekoka doboka, dobmun rupiah era, bonaʾ garan ulumak nim ek elegolulum. Ban unulumun dara, ugunja songa leboka blobnenggunumla rupiah beilinaʾ memelelum, nera imik heikek beillilesil bonaʾ dibaʾ ara an. Ban bonaʾ era hokaʾ donaʾ orok uboka, gereremaʾ denggunumla.

³⁴Anasa wera, ugunja bonaʾ ulumlaʾ ak ara, anyagan anaba ugunja ganya seininaʾ ulumla,” hyok.

³⁵”Yokaʾ-yokaʾ unuwanamunaʾ ara, keebdangoka pe diri ubdangoka unulululum. Ugunda sobaʾ akleng ongobmoruwoka, ugunja wesaʾ era sobaʾ yebeldalalulum.

³⁶Wa welemna nim ek, sikja neyung be mok sam gela dol bilimnaʾ ara yanamna sum ek diri yuba kero ulumak sok ugumba unulululum. Sikjaʾ neyung bera yeiniboka pika baknenokaʾ aboka glorum-glorum al yaban dara, sikda keboka pika berra baklemak.

³⁷Wa wen nang enyek, sikjaʾ neyung be ek yanamnaʾ amba diri ulunabok, wera yalamla dara berra eillilemak nim era, hyak pelemakaʾ nong ara an. Ban lebnesinaʾ ara, wera ban wa dubnya bera meebgogowoka, alja wa wen nim ek buklulum aboka oruganasil dara, alda sikenek denaʾ youboka beiyiboka deb eleganesil.

³⁸Wera wa wen nim era, sikjaʾ neyung bedya sikda yuba kero diri ulumakaʾ ara, or inimnek dukdukanek gom, mandewoka yanamsoʾ gom anaba, sikda pe diri ulumak dara, sikda pelemakaʾ ara an.

³⁹Ugunda ban nenyek beknelum! Nimi ben hnon hokaʾ dolomak nang alja ek wekel yalamla salek ella ululanya bera, nadya ek yeijek aboka, hyak pe welemla dara, hokaʾ donggulumak.

⁴⁰Wera nimi dibaʾ me anaba sumen yanamla senenggululum salek enyek yanamlaʾ anasa, ugumbabya pe diri ulululum,” hyok.

⁴¹Wenyek Petrus bedya Yesus ak, ”Wenelesilimnya o, anja lel eleklesilim sununaʾ yuba danara, nimi nidyaʾ nim ak lelesilim gom, nun ok lelesilim gom?” aboka heimok.

⁴²Danyek Wenelesilnya bedya dara, ”Heknyek wa bojam uboka geremsengaʾ welelanya benyek, wa damnya bedya yok wa wen nang sikenek den salek denaʾ eleklesululaʾ aboka, sikja dubnya sekiyiwanamla do?

⁴³Wa damnya bera yokok bilimsoʾ ara, yalamso enyek, wa unu webnelam aboka oruga bilimsoʾ ara pe welemnamsoʾ eibnamsoʾ dara, pelemsoʾ ara an.

⁴⁴Wera anasa wa damnya bedya dara, alja bonaʾ nidyaʾ ara benyek nidyaʾ bo ulululom aboka eleganamla. Anyek dib lebsin,” hyok.

⁴⁵”Bok wa pe welemnelam asonya benyek, alja ganya edya seiniwanasodya, Nadyaʾ neyung bera or eimik ek mandemlyaʾ ara yanamlaʾ anyaʾ, aboka yok wa wenaʾ nanga nidyaʾ oboka, denaʾ deregoka, yu meka deregoka serema salab menegoka ubnamso dara,

⁴⁶alja wa dubnya bera yanggunumla senelamla salek enyek goboka seknamla. Dara wa wenya benyek olomlyaʾ ara, Imik Neyung ak dib senewoka ganya oloknenggulumak nim ura osin onoʾ enyek, neik digum obnamla,” hyok.

⁴⁷”Alja wa dubnya bedya ganya seininaʾ ara ella ululadyok, pe diri unaʾ loboka, alja lelemla sok pe sunuwoka wa wenggululanya bek hyak nauba legebnaʾ deboka obnamla.

⁴⁸Bok alja wa dubnya bedya seinilamla ganya era elgom ululadyok, legebnaʾ deboka obnamso unaʾ enyek, welemla wa wenya bek ara, or mek domdigum soʾ obnamla. Anasa anam nauba unulumnenelem alenya bek ara, alja nauba lunuwoka molowanamla,” hyok.

⁴⁹”Nara sokok anyek uka singinaʾ damoka bo yeilimsa. Uk anyek seleb singiwoka denemso dara, perob senewanasinya.

⁵⁰Yokaʾ unuwanenelaʾ ak dorongganenel. Ban nidyaʾ unubdaknenggunelya salek era, nadya ganya era hyak ingmuna berelenel.

⁵¹Ugunja dara, nara sokok an heknaʾ damoka bo yok senelenulum de? Orok, nara heknaʾ ak bo yanggubsebok, alda mala weldanaʾ ak bo yasa.

⁵²Anasa wenyek ab moruwoka, nim e hnon lambadya ulumak nim era, sik moumen doluwoka oldalamnemak, winilya nang edya penya nang ek gom, onoʾ penya nang edya winilya nang ek gom unu oldalamnemak.

⁵³Neyung bedya alja me neb mala webdanarak dara, onoʾ alja me nedya eili beb mala lanabdanarak. Dara gel adya alja gelma ek mala lanawanamla dara, onoʾ gelma adya eiling gek mala lanawanamla. Anya alja soumun gedya alja gelma edya gelma eb mala lanawanamla dara, onoʾ saaboka gelma adya gelma enedya aljaʾ soumun gek mala lanawanamla,” hyok.

⁵⁴Yesus adya nimi nauba wekemek nim ek, ”Ugunda debaʾ anyek kemban sam welewoka lebel yabanaʾ anyek eibnek ab dara, lelelumja, Ousa era moka yanamla, alalum dara, al nera gigiwoka yalamla.

⁵⁵Alda ugunda woru kaboʾ doroganamla senewan dara lebnadya, Sum era douba danamla, alalum. Dara aldib douba dangalamla.

⁵⁶Ugunda hyak sene or-or uboka gununaʾ hwam nang o! Ugunda mok soko ima hogung ak keeboka sum era anaso unuwanamla aro lelelum. Alda wen an ulumab salek ululanya nera, ugunda hekasa anasoʾ unuwanamla anggululum do?” hyok.

⁵⁷”Ugumba yok dara, hekasa perobnya nek unuwanamab aboka yuba gekenggululum do?

⁵⁸Nimi ben hnonja anak, anja hokaʾ donulum aboka henga gouboka, yana lelelesak ek bo bininggel dara, anam pikek balarumun salek enyek, hyak ganya pe seiniwoka anaso-anaso meebdananam aboka, wenyaboka meebyamadenesom. Ban nenyek unuwanggunulam dara, bo bigelenya bedya yana lelesinaʾ dubnya bek dib unuwokaʾ aboka, doboka elegagelya dara, anya onoʾ yana lelesinaʾ dubnya bedya, an nong doboka yin bonaʾ dubnya bek elegagelya dara, yin bonaʾanya bedya, anak doboka gasa ek doronggoka beibnenggel.

⁵⁹Anda henga geregoka beiyinggijaʾ anyek, deknaʾ dobdaknenggumen bok dara, hyak goboka yibinggunulamaʾ nong anyek, danamlaʾ anasa lebsin,” hyok.