Read Nalca LUKAS 13 Bible Online

LUKAS 13 - Nalca bible

LUKAS 13

¹Ban neik sum enyek, yok nim edya Yesus ak Galilea nim ek Imik Neyung amba pam oboka giboka uka dalamek enyek, Pilatus bedya obsuk aboka nekek.

²Ban yub en kebokaʾ ak dara, Yesus adya dara, ”Galilea nim enyek ban obsikaʾ amba dara ugunja ganya era, yok Galilea nimi dara malya unaʾ orok bok, sikenek malya unaʾ nauba adya damok era obsik senelelum de?

³Nera hyak orok! Bok ugumbabya ugunda malya unaʾ ak ab ganya dangawanggunulum dara, ugumbabya Galilea nim ubek sok somoganalumaʾ anyek, ugunda pe beknelum.

⁴Siloam aboka si simek e goumulumunaʾ dakoka, nimi sago daraʾ badya nang obsuk nim era hekaʾ hubek do? Ugunja dara, Yerusalem heikek ulumek nimi nauba bok, sikenek obsuk nimi dara, sikja malya unaʾ enyek nauba so adya obsuk senelelum de?

⁵Anadya gomaʾ, orok! Ugumba malya unaʾ ak ab ganya dangawanggunulum dara, sikba somogek sok, ugumba unu somoganalum amnaʾ anyek, ugunda pe beknelum,” hyok.

⁶Ban wenyabgogowok dara, Yesus ara ban sununaʾ enyek sunuwoka lebokaʾ ara, ”Nimi ben hnon den gal alja wak sam memok. Yok sum enyek, gal doka eboka daknamna senewoka bilimok bok, hnonok sibin anaba eibnenggumok.

⁷Anasa alja wa wenya gal dok en holaʾ gerewoka memelemoknya bek, Wei, anda kendelom, ban gal enera doka moumnamla gom aboka, eboka daknunaʾ aboka, gibnaʾ winilya kemel yan bok, wera gal doka hnonok sibin anaba mounaʾ eibnenggubna. Gal era, sokok mesaʾ salyaʾ orok nenewoka delemlaʾ anasa, wera webnelam! hyok.

⁸Bok anyagan wa welemoknya bedya dara, Neyung o, moubnamlyaʾ ak men aboka gibnaʾ danara or lobnenam. Nara gal dama nidyaʾ holaʾ hleboka lulungaʾ beibnamna.

⁹Gibnaʾ enyek leblya dara, doka moubnelulaʾ. Bok alda hyak gobdo mounaʾ orok danyek, wera neyung webnelum aboka oruganasilim, hyok,” aboka Yesus adya lebok.

¹⁰Yok Sabat mem sum enyek, Yesus ara yok Yahudi nim edya yuba don ek sam yuba lel eleklesuk.

¹¹Dara e nenyek ara, gela hnon bisaʾ gologomokaʾ adya, alda gibnaʾ sago daraʾ badya neiklemok. Gel gera alda bulum-bulum adya amnyaʾ dumokaʾ adya, domdigum seknaʾ dibaʾ sekna dara, seknamenggom.

¹²Yesus adya gel genyek eiyimok dara, alja yalom aboka lebokaʾ ara, ”Genong o, anda wera neiklelam neiknaʾ ek ab seleb merewalam!” hyok.

¹³Dara Yesus adya gel genyek soruka dibok dara, wene salek enyek, gel gera jongaʾ sekoka, Imik Neyung ak giblemok.

¹⁴Dara Imik Neyung e damnya bedya dara, Yesus ara Sabat mem sum nimi hwemokaʾ anasa, alja dara hyak nauba waboka yok nim ek, ”Lika hnabbadya dara wa wen sum era an, nimi hwebnenyak aboka dara sum enyek yanalum. Minggu sum era hyak mem!” hyok.

¹⁵Anasa Wenelesilnya bedya dara, ”Ugunda hyak bol nenenaʾ nim o! Sabat mem sum enyek, ugumbabya ugunja pam era loboka beiyek yuʾ ak bo yabalelum.

¹⁶Yo, anasa anyagan ara gela hnon Abraham nimi yilaʾ ak neiknaʾ salawoka Satan bedya goubmoruwok salek era, gibnaʾ sago daraʾ badya lebokaʾ ak ulumla. Al nong ara, Sabat mem sum era bleboka loboka hwebnenggunuseng de?” hyok.

¹⁷Yesus adya ban wenhyoknya nedya alak lek senen ganya bolomek nim era sikda hyak alya dabsuk, bok yok nimi nauba ara, Yesus adya lok soʾ unulumokaʾ anyek hyak perob senelemek.

¹⁸Yesus adya heibsukaʾ ara, ”Imik Neyung adya wenelesilaʾ ara, hekaʾ anasonya ulumla do? Nadya dara, hekaʾ anaso ulumlaʾ seiniwoka sunuwanamna do?

¹⁹Wera ban sununaʾ eneso ulumla. Nimi ben hnon geibya yinaʾ doboka alja wak sam doklamlaʾ anaso ulumla. Yinaʾ bongowoka welewoka gala dangalamla dara, wininga bul yalamak,” hyok.

²⁰Yesus adya onoʾ saaboka heibsukaʾ ara, ”Imik Neyung adya wenelemnesilaʾ ara, nara hekaʾ ak sunuwanamna do?

²¹Ban sum hogung ara nimi gela biknaʾ doboka roti gwaneng ab neikaʾ hiboka werelamlaʾ dara, neikaʾ ok dangoka imi hwilimlaʾ anasoʾ ak ubnamla,” hyok.

²²Yesus ara Yerusalem heikek bununaʾ aboka anam pik balamok ok ab dara, alda nauba heikek hnon mek-mek heik pik yuba leb elekgiga balamok.

²³Danyek nimi ben hnon Yesus ak, ”Neyung o, nim ara mekaʾ blebnesilaʾ ak lelelam goma?” aboka heibuk.

²⁴Yesus adya saaboka lebokaʾ ara, ”Nimi nauba weknemab senewoka dubnemak bok, weknenggunumakaʾ anasa, ugunda mek pik weknemab senewoka yeiriwoka dulululum.

²⁵Wera e damnya bedya sekoka pika seregalya sum era, ugunda beiyek sam sekoka pika baksilom aboka glorum-glorum henenulumaʾ ara, Neyung o, nunsamba pika baksilom! Wenyhenelum bok, ban benedya lebledya, Ugunda hekmok nim, nara elgom ulusin bok bar!

²⁶Dara ugunja lebnelumaʾ ara, Neyung, nunda anab gwanenga meka neikaʾ delemouba, dara neyung, anda nunja heik pik yuba leboka nekdo yabalesulum! henelum.

²⁷Bok e damnya bedya lebnamlaʾ ara, Nara elgom nim ek anasa, ugunda hekmok nang? Ugunda malya unaʾ hwam ok ululumaʾ anasa, anyagan abaʾ men berra bululum! henesil,” hyok.

²⁸ ”Wera ugunda Abraham beb, Ishak beb, Yakub beb, nidyaʾ ununumnaʾ lelemek nang eb, neikaʾ hiboka Imik Neyung wenesin heikek sam eiya hlaboka denaʾ delemnemakaʾ ak eibnelum bok, ugunuk dara, seleb yakasilyaʾ anasa, ugunda engewoka nauba glengdaralemnelum!

²⁹Eimik era nimi nauba yali sam ab hnon, kemban sam ab hnon, dabo sam ab hnon, woru sam ab hnon yanamaakanya, sikda nidyaʾ ara Imik Neyung wenesin heikek sam ara, neikaʾ delemnemab aboka eiya hlaboka glolomnemak.

³⁰Dib unuwanamakaʾ ara, wenyek mengewoka ulumak nim era, hnonda eimik dangoka, onoʾ wen eimik dangoka ulumak nim era, hnonda mengewanamak nimi danamak,” hyok.

³¹Ban neik sum enyek, Parisi nim wene nang Yesus ak yeiniboka lebekja, ”Anda anyagan unaʾ ara hyak mem! Herodes bedya anak obgununaʾ aboka ubgel bar,” hyek.

³²Wenyek Yesus adya dara, ”Ugunda ban meilinya bek an wenyal bululum, Sum enyeb ampum ab dara, nara nimi neiknaʾ nimi hweboka, bisaʾ yakoka ubnesin bok, amja sum ek dara, nadya wa nera seleb webdaknamna, amla, hululum.

³³Ban obnamna hel bok, youmaʾ ununumnaʾ lelemek nang era, Yerusalem heikek beiyek ab hnon osinaʾ orok bok anasa, nara sum enyeb, ampum ab, amja sum eb dara pika yabalemnamna,” hyok.

³⁴”Yerusalem, Yerusalem o! Ununumnaʾ lelemek nanga nidyaʾ ara anja ok oblum! Imik Neyung adya bokol yalasuk nanga nidyaʾ ara, anja ok girik adya ok seikoka obsulum dara, somogek! Bok nadya dara, wining adya aljaʾ ol lomok sam alaʾ mab ak doronggoka eirilamla sok, anja mab era, soowoka saramek sam gweiliwanamna senewoka lika wen dubseba, ugunda hyak lek anasa lobna!

³⁵Ban nenesa leboka, Imik Neyung anak arawoka bo unggulumnenggel. Dara dib lebgen, al sumen moruwoka anda nak eibnenggununelemekanya, anja lebnelamaʾ ara, Wenelesilnya si pik moruwoka yeilimoknya bera, or perobaʾ ak ululul, henelam sum enyek ok eibnenelem,” hyok.