Read Nalca LUKAS 14 Bible Online

LUKAS 14 - Nalca bible

LUKAS 14

¹Yok Sabat mem sum enyek, Yesus ara Parisinya bedya ek del bilimok. Anyagan anyeb dara, sikda Yesus ak pe maka meiboka kemelemek.

²Dara nimi ben hnon yan ak oklouba neboka, soruka bokoka meilemoknya bek Yesus ak yeilimok.

³Danyek Yesus adya Yahudi yuba neksin nang eb, Parisi nim anyagan bukoka delemek nang ek, ”Nunja dolomab yub edya dara, nim ara Sabat mem sum era or hwelenok hyok gom, orok gom?” aboka heibsuk.

⁴Yahudi yuba neksin nang eb, Parisi nim eb dara, yuba sanaʾ loboka gelegek. Dara onoʾ neiklemoknya bek Yesus adya salawoka hwebok dara, ek bilom aboka orugok.

⁵Seleb unubgogowok dara, Yesus ara anyagan nim ek, ”Nimi ben hnon ugun gangganek ara, alja me gom, pam gom, selengaʾ lomok malyingginimso dara, al unuwaso sum Sabat mem sum nong enyek, wekoka doboka bo gobnamso gom, orok gom?” aboka heibsuk.

⁶Bok nim danadya hnon Yesus ak, anyek leblam aboka yuba doro sab eleganggubek.

⁷Yesus adya kemelesuk enyek, nimi yeilimek nang dara, hnonda hyak perobaʾ ak gaboka buru balamekaʾ ak eibsukaʾ anasa, ban yub enyek sikenek sunuwoka leb elegosuk.

⁸”Gela dobdanameijaʾ ak sam ugunuk denaʾ denemab aboka ebsija dara, perobaʾ ak gibnesijaʾ ak senenaʾ ak ara bunggom, mem. Ban yok perobnya ben hnon anyagan yanalam amnemakaʾ don,

⁹anadya benyek yalya dara, e damnya bedya ugun penya yanarum alenya bedya, anak yeiniboka, Wei ban ekla era ban benesa yangabman, hekelyek. Danyek anda alya nong anasa, hyak doub nong eklek bimenek anasa, perobaʾ ak men enggom.

¹⁰Anasa wera, ugunuk nim adya neikaʾ denemab aboka ebsija dara, orowek gokgobok sam bukumunaʾ adya, wera e damnya bedya yanamlakanya, Hem o, anda perobaʾ ak an bul yalom, henenggel. Ban unulusak danyek, nimi nauba weklemakaʾ hnoum ab ugunuk gigilesakaʾ ara an.

¹¹Anasa, nim adya imik neneldalalanya bera, eimik sokok nenewanamla, bok sokok neneldalalanya bera, alak eimik era imik nenewanamla,” hyok.

¹²Dara onoʾ Yesus ara e damnya bek, ”Anda nim yok nanga yubyek gom, inimnek gom nadya ek denemab aboka e yanalam dara, anjaʾ hem be yokaʾ ak gom, an nang yilaʾ ak gom, anja weisab ek gom, e ok nim ek gom, e yanggeiseng gom, mem. Nera sikba unusiminaʾ anasa ambabya unuwanenjak dara, wera nera deknaʾ seleb dobnelam.

¹³Bok anda denaʾ masa youb lobnelam dara, denaʾ garan nimi hnon, henga lum nimi hnon, nonga heilimla nimi hnon, yana soruka mumdelemla nim enyek, denemab aboka e yanalam.

¹⁴Ban nang danadya dara, anak ara lunuwoka deknenggununjakaʾ anasa, anda pelelam. Anja sikenek pe unulusilimnya nera, nimi pe ulumak nim Imik Neyung adya embengaʾ suboka bukiyiwanasil sum enyek amba lunuwoka deknenggel,” hyok.

¹⁵Ban salek neikaʾ delemeknya bedya Yesus adya wenyaro lelemok yuba keboka, lebokja, ”Imik Neyung adya wenelemnesilaʾ ak ara, neikaʾ bukoka denelanya benyek, pe ulumla,” hyok.

¹⁶Bok Yesus adya benyek, ”Onoʾ yok sum enyek, nimi ben hnon masa nauba youb lobookanya, nimi nauba denemak aboka ebmamagosuk.

¹⁷Masa youblomlyaʾ ara dengewoka denemeija salek era oka dok dara, masa youlenya bedya alja wa wenya bek, Wera nidyaʾ seleb youboka beibnaʾ anasa, del yanamak aboka wenyal bisilom, aboka orugumok dara, wenyab girigemok.

¹⁸Bok sik del yanalum amok nim edya dara, Neyung o, anja masa youlamaʾ ara del yanggunumab ab ligiwek. Menya bedya oruknaʾanya bek, Nara soko dekemnekanya, maka meibel binimnaʾ anasa, anak lobna aboka molowan.

¹⁹Yoknya bedyaʾ anaba, nara pam huka lambadya dekemnekanya, sunul binimnaʾ anasa, del yanggununanya nemba molowan.

²⁰Onoʾ yoknya bedya dara, Nara nei wenyok gela domnaʾ anasa, del yanggunumnaʾ amba molowan, hyok.

²¹Wera oruknaʾanya bera alja neyung bek nidyaʾ nang wenhyak aro yok. Dara aljaʾ neyung bedya hyak yu ganya boboka, oruknaʾanya bek lebokaʾ ara, Anda hyak berra aboka pik gwandanyaʾ pik, nauba heik erem pik biniboka, bonaʾ garan nang eb, yana soruka mum delelanya neb, nong heiboka henga luma yalamla nang enyek e yanasilim, hyok.

²²Dara oruknaʾanya bedya eili bek ara, Neyung anja lelamnya nera seleb unuwan bok, ekla ara gloʾ or ulumla, hyok.

²³Dara onoʾ masa denaʾ damnya bedya, Anda nauba pik gwandanyaʾ ak gokgobok sam biniboka, nadya ek an nimi diblulaʾ aboka hyak anja yub edya dukaʾ lolowoka e yanasilim.

²⁴Anasa ugunuk lebsin, nadya masa denelum aboka el bisisa bok, del yangganaʾ lek hyak nang era, nadya masa ak ara, hyak mekaʾ del yanggunumakaʾ ak! hyok,” aboka Yesus adya lebok.

²⁵Nimi nauba Yesus ab neikaʾ yabalemek. Dara Yesus adya sikenek keeboka lebsukaʾ ara,

²⁶”Nimi ben hnon ara nak yalanel bok, bera aljaʾ genong gek gom, aljaʾ neyung bek gom, alja gel gek gom, alja me nek gom, alja weisab ek gom, goma al nong unaʾ ak gom, hyak wanaʾ nong ulumla dara, alda nadya diriga bannya danggunumla.

²⁷Heknedya aljaʾ igin yakaʾ loboka, nak yanggananaʾ oroknya bera, alda nadya diriga bannya danggunumla.

²⁸Nimi ben hnon ugun gangganek ara, imik e sobnamna aboka dara, sobnesonya bera, rupiah ara hekbadya daso dara, or sobnesinya gom, sobnenggunusinya gom aboka, orowek gegewoka einiwanamso.

²⁹Egomnaʾ ara seleb ikisodyok, e nong anyek pe sobdaknenggunumso dara, nimi nidyaʾ eibneseng nang edya dara, alak oksiyiwaneseng.

³⁰Eibseng nang edya dara, Mabo, ban benera e son dara, sololabok, alda gokgoba loboka soldaknenggulumla! heneseng,” hyok.

³¹”Nimi soko dubnya, ben hnon alda yin bonaʾ nanga denga yuba sagobadyinya bedya, onoʾ yin bonaʾ nanga denga yuba lindigin badyinya soko dubnya beb, mal weboka obdananam senewaso dara, bera alda orowek bukoka nara migib gom orok gom, hekaʾ huboka obdananamaʾ ara, men seinibgogowanamso.

³²Benera nara nimi mek anasa, elaʾ obdanggunusinema ara orowek ella daso dara, mala bobdangaserengnya bera anam pikek yalasobok, wera mala yuba seknenamaʾ anasa, wenyaro bululum aboka oruknaʾanya bek oruganamso,” hyok.

³³Anya onoʾ Yesus adya dara, ”Anasonya neikek ugumba unuwanalum. Nimi ben hnon ugun gangganek ara, alda yokaʾ-yokaʾ nidyaʾ aljinya nek ara, loboka ubnenggunumla dara, alda nadya yuba doro diriga bannya danggunumla,” hyok.

³⁴”Garam ara perob bok, angawom anaʾ anyek seleb denghesobok dara, saaboka angawom henemso de?

³⁵Dara masa weboka men damba lulungaʾ anaba hnon, masa mesaʾ pen damba anaba, perob danggunumla. Alda unuwal bar aboka boloknaʾ ok boloklemak. Ugunda o yakaʾ ara, pe keblulum!” hyok.