Read Nalca LUKAS 15 Bible Online

LUKAS 15 - Nalca bible

LUKAS 15

¹Yok sum enyek, rupiah molowoka dolosik nang eb, heik yokaʾ nang edya dara, malya nang senelesik nang eb dara, Yesus yuba lelesukaʾ ak sam dol yeilimek.

²Wenyek Parisi nang eb, Yahudi yuba neksin nang eb dara, omoma lelemek. ”Wei, ban benera malya nang enyek, yoululum aboka leboka, denaʾ anaba sikeneb neikaʾ delemak!” aboka lelemek.

³Anasa leboka Yesus ara ban sununaʾ enyek sunuwoka lebsukaʾ ara,

⁴”Nimi ben hnon, alja domba pama denga winilya so beiyimso bok, hnonok weiningganamso dara, pam damnya bera hekaʾ hubnamso do? Al pam damnya bedya dara, yok pam dara, or yuʾ ak loboka, weininggamso pam enyek eibnunaʾ aboka el binimso goma?

⁵Wera weininggamso domba pam era eibso dara, pam damnya bera eiya anasa, pam nong soowoka sagonyaʾ ak beiyiboka,

⁶ek bo yanamso. Dara onoʾ bera, aljaʾ hemyab eb, aljaʾ heik ok nim eb dak, ‘Nadya pama weiningdokaʾ ara wera seleb eibnaʾ anasa, ugunda nab neikaʾ eiya hlaboka ubnemabaʾ anasa, yoululum!’ henemso.

⁷Yo, anasonya neikek, nimi ben hnon malya unaʾanya bek ganya dangalamla dara, imik heikek anaba alsamba hyak eiya hlaboka glonaʾ salalamak, yok denga winilya pe ulumak nang enyek, nauba so ununggulumak,” hyok.

⁸”Goma, gela hnon sagobadya rupiah beiyisobok, hnon gaboka weiningganamso dara, gela gera na rupiah aboka hekaʾ hubnamso do? Wera gera alja e sembejaʾ bokoka, wesaʾ yeboka yok pik nidyaʾ ero yabalamsoʾ ara eibnamso.

⁹Wera gel gera weininggamso rupiah elemsoʾ ara onsok eibso dara, aljaʾ hemyabo nim ek hnon, e ok nim ek hnon lebsodya, nadya rupiah weininggasaʾ ara, wera saaboka onsok eibnaʾ anasa, hyak eiya dabnel. Anasa nunda hnonokaʾ perob aboka eiya hlaboka glolomnemab! henemso.

¹⁰Ugunda hyak dib senewanalum! Anasonya neikek, nimi malya unaʾanya ben hnon ganya dangalamla dara, Imik Neyung lero nang eneba unu eiya hlaboka glolomak!” hyok.

¹¹Yesus adya hnon lebokaʾ ara, ”Nimi ben hnon alda memabo penya beiyimoknya bek ulumok.

¹²Naba me nedya eili bek, neyung o, nunja bonaʾ era, nasamba anya nera, al wenyek bokoka eleganenelem, hyok. Dara, sikjaʾ neyung bedya, bonaʾ nidyaʾ ara, alaʾ mab ak haboka boksuk.

¹³Lika wen mabok dara, naba me nera, alja bonaʾ dara dobgogowok dara, mok heikek byuk. Wera mok bilimok heikek ab dara, bo bilimok rupiah era, malya unaʾ uboka, dek menegemok.

¹⁴Wera unulumokaʾ ara, alja rupiah nidyaʾ denghyok sum era, al ulumok mok soko era senenggom gwaneng okaʾ lanawok dara, bera hyak nonga mel-mela garagoka malya dok.

¹⁵Dara, bera mok enyek an heik nang ek, nadya wa beiyek sam pama weiboka bo ulumnenelem aboka orugumoknya bek biniboka wa welemok.

¹⁶Bera gwaneng ok nong adya e buknamenggom ulumokaʾ anasa, pam amba beil bin denaʾ siknaʾ enyek, desinya senen ulumok. Bera gwaneng ok nong ara yokaʾ anaso ol neblemok bok, yok nang edya dara, alak gwanenga hnon eleknenggulumek.”

¹⁷”Dara anyek eibkweboka seinibdokokanya, nadya neyung bedya ek uboka wa welemak nang era, denaʾ nauba bok loboka delemak bok, nak dara anyagan gwaneng okaʾ adya somoganamna!

¹⁸Nara lanawoka nadya neyung bek onok binimna, dara alak, neyung o, nara Imik Neyung ak hnon, neyung anak hnon, malya ubsisa.

¹⁹Neyung, nak ara nadya me anenggom. Alda nadya wa oruknaʾanya nenewananelem henemna, senewoka seiniwok.

²⁰Dara, alja neyung bek lanawoka byuk.” ”Wera mok so e berem yanggok bok, aljaʾ neyung bedya ek ab uboka eibuk. Dara aljaʾ neyung bedya, na me eiriwan aboka, hyak angoo yadyek senewokaʾ anasa, bik-bika alja me dam biniboka, soob salawoka meka hmobuka eiriwoka gibuk.

²¹Me nenedya lebnemokaʾ ara, neyung o, Imik Neyung ak hnon, neyung anak hnon, nara malya ubsisa. Nak ara nadya me henggununelem, hyok.

²²Bok alja neyung bedya alja wa wenaʾ nang ek yoululum aboka sikenek ara, hyak berra! Perob aklenga hnon doboka, alak ongiyiwanalum. Perob soubna damaʾ doronggiyiwoka, perob yan ongonaʾ ongiyiwanalum.

²³Seleb unubgogowoumun dara, mesaʾ nong sapi pam me nenyek doboka oboka youbmun dara, nunda eiya hlaboka neikaʾ dero weknemab.

²⁴Nadya me nera seleb somokdowokaʾ ara, wera onsok embengaʾ dangoka yal. Alda dengarowok bok, wera onoʾ saaboka onsok eibnaʾ anasa, denaʾ neikaʾ hiboka denemab, aboka, wera sikda hyak nauba masa youboka deregoka eiya hlalamek.”

²⁵”Ban unulumek salek era, yandonya bera alda beiyek sam wa anam welemok. Wera sinik enyek e berem yalamok enyek, benggong yub ab, nimi yan dildilib anaʾ ak kebok.

²⁶Dara yandonya bera, ek wa welemek nang ek ben hnonok yalom aboka alak, e lomok onora hekaʾ hulum do? aboka heibuk.

²⁷Wenyek ek wanya bedya dara, neyung, anja weisa yeilimla! Neyung anja neyung bedya me nera weiningdoka ara, pe onsok saaboka merewoka yalaʾ anasa, neyung bedya mesaʾ nong pam enyek oboka youmla, hyok.”

²⁸”Dara, yandonya bera hyak yu ganya bobookanya, e lomok ara weknaʾ lobok. Dara, alja neyung bedya goboka yibiniboka onowoka e lomok yalom hyok.

²⁹Yando me nedya dara, nak danyek gibnaʾ gong-gong neyung ansamba wa yeiriwoka welemna. Nak dara, neyung anja yuba hnon blekgenaʾ ara hyak orok. Dara, neyung anja dara, hekaʾ ak nak ara elegenulum do? Nadya hemyab enya eiya hlaboka oboka youboka delenobaʾ aboka, anja dara, kambing sirik anyek babya hnon eleganggunulum!

³⁰Bok, anja me nera anja bonaʾ era malya ulumak gelewa pik bokoka orok nenewok me nenyek anam yanggal sab-sab, neyung anda na me eibna bar aboka, mesaʾ nong pam enyek oboka youblam! aboka lebok.”

³¹”Danyek eili bedya dara, najab o, anda anyagan nab sobaʾ neikek ulunam. Nadyaʾ anyek, nidyaʾ ura yabalamlaʾ danara, anjaʾ ak ulumla.

³²Bok nunda perob senewoka eiya daboka, pam oboka youbabaʾ ara, anja weis era seleb somogok bok, wera embengaʾ bukoka yal, seleb weiningdokjok, onoʾ saaboka eibabaʾ anasa, ubab! hyok,” wenyaboka lebok.