Read Nalca LUKAS 16 Bible Online

LUKAS 16 - Nalca bible

LUKAS 16

¹Yesus ara alja yuba doro diriga ban nang ek lebsukaʾ ara, ”Nimi ben hnon dubnya ulumok. Ban dubnya bera alja bonaʾ amba rupiah wa meewoka welemoknya hnon ulumok. Yok sum enyek, ban dubnya bek, anja rupiah salawoka bo uboka memelenggelnya bera, alda anja rupiah dengaboka delenggel aboka nekek.

²Anasa dubnya bera rupiah beiyiboka memelemoknya bek e yeiniboka lebokja, hekaʾ ak nara ansamba yub era kemna do? Wenera nadya wa welenelemaʾ anyek, nara unu pe welemna aboka nidyaʾ lelewoka neknenelem. Anda sum enyek moruwoka eimik era, nadya rupiah salawoka bo unya unggulumnunelem, hyok.”

³”Dara ban bonaʾ dubnya bedya rupiah sala ulumoknya bedya seiniwok dara, nara wa wenenaʾ gwab lobnelom henelaʾ anasa, hekaʾ hubnamna do? Nadya neyung bera nak hyak gobdo lobnunaʾ aboka ubnel. Gwaneng wa welemnesinya bok, nara hmengnya bek ulumna; molonaʾanya danesinya bok, alya anasa lek.

⁴Wera ella dan! Nadya wa wenenaʾ loblom aboka gobdo gwab lobnenel dara, wen seininanya nenyek ubnya dara, nim edyaʾ e pik dero yabalemnamna.

⁵Wenyaboka ban benera, alja neyung bedya wa welemok salek enyek, rupiah del lolomek nanga nidyaʾ ebmamagosuk. Dara mennya bek, anda nadya neyung bedyaʾ ara hekbadya deb loblum do? aboka heibuk.

⁶Benedya dara, perob ngiknaʾ mek anyek senenggom gokna denga dombadya anaso deb lobsa. Dara wa wenaʾanya benedya, wera rupiah deb loblum momnya donaʾ era ban, anda bukoka, gokna denga penya aboka momnya doblom.

⁷Dara onoʾ benedya, hnon yoknya bek an, anya hem o, anda hekbadya deb loblum do? hyok enyek, benedya dara, gandum doka aklenga denga sagobadya danamso rupiah enesoʾ ak deb lobsa, hyok. Dara wa wenaʾanya bedya deblomoknya bek, wera anja deb loblum momnya donaʾ era ban anasa, denga linbadya aboka momnya doblom, hyok.”

⁸”Dara rupiah wa sala ulumoknya ben alja dubnya bedya dara, geremseng nongaʾ anyek hyak pebdangalam aboka gigiwok. Dilinaʾ ak ulumak nim era, anaso ununggulumak bok, sokok an salyaʾ lelem ulumak nim era, sik moumen ak, yokaʾ ubnaʾ ara, hyak geremsengaʾ anyek unuldalamak,” hyok.

⁹Dara onoʾ Yesus adya hnon lebokaʾ ara, ”Ugunda pe keblulum! Sokok an bonaʾ era malya dalya sum era, ugunda pe embengaʾ ulumak heikek doro beibsululaʾ aboka, wera nadya hemyabo nauba donulul senewoka, sokok bonaʾ enyek doboka bololulum,” hyok.

¹⁰”Meknya nek bojam welemak nang era, naubenya nek anaba bojam uboka welemnemak. Bok meknya nek anyek, bojam uboka wenaʾ orok nang era, naubenya nek anaba bojam wenggulumnemak.

¹¹Anasa wera, sokok an bonaʾ enyek, ugunda pe bojam uboka wenaʾ orok dara, heknedya dib nong wak sam or weboka bo ulumnelum henesuso do?

¹²Wera beknaʾ dibaʾ ara, yok nim edya bolomak bonaʾ enyek babya, ugunda pe bo unaʾ orokaʾ ak eibnesiseng dara, heknedya ugunja bonaʾ danasusonya nera eleganesuso do?” hyok.

¹³”Neiknya bedya nimi penya nang emba hiboka dara, wa pe webnenggunususo. Dara, alda hnonnya bek ara lek ganya boboka, onoʾ yoknya bek ara wanaʾ ubnamso. Goma, mennya bek ganya goluwoka, yoknya bek ara, dolbalek ganya bobnamso. Anasa, ugunda Imik Neyung wa we, rupiah wa we, ubnenggunusom,” hyok.

¹⁴Parisi nang era, sikda Yesus adya ban nidyaʾ lelemokaʾ ara kelemek. Dara sikda rupiah ak wanaʾ hwam ulumekaʾ adya, Yesus ak okseb goluwek.

¹⁵Bok Yesus adya sikenek lebsukaʾ ara, ”Ugunda nimi hnoum ara, pe ulumak nang de senen dangalalum bok, ugunja ganya lomok ara, Imik Neyung adya ok ella ulusil. Nim adya hnon perob senelemaknya nera, Imik Neyung adya dara, hyak lek senelamla.

¹⁶Musa bedya pe ulumnelum aboka unuwanalum an yuba elegesukaʾ ab, ununumnaʾ lelemek nang edya elegesik yub era, or lelemekaʾ ara, Yohanes Pembaptis be ulumok salek sidyaʾ ubdakok. Ban lebna salek ebaʾ moruwoka, Imik Neyung ara dubnya uboka wenelemnesil aro perob lero yanggan yub era, sobaʾ leldibilloklomak. Dara nim ara, Imik Neyung adya wenelemnesilaʾ ak weknob senewoka nauba dulumak.

¹⁷Im ab soko ab dara, or denghenemla bok, Imik Neyung adyaʾ unuwanalum an yub ek momnya dobokaʾ ara, mekaʾ hnonok sibin anaba denghenggunumla,” hyok.

¹⁸”Heknedya alja gel gek lolomlakanya, onoʾ yok gel ge dolomla dara, alda yok nang gel gek hokaʾ dololanya ulumla. Anya seleb lomna gel genyek dololanya beb dara, albabya yok gel hokaʾ salalanya ulumla,” hyok.

¹⁹”Nimi ben hnon bonaʾ dubnya ulumok. Boksom ara hyak perob nong boksom ok ongowoka, denaʾ ara hyak sobaʾ perob denaʾ ok delsinilemok.

²⁰Ban dubnya bedyaʾ pik sindamak sam ara, bonaʾ garanya gororomaʾ adya malya uboka delemoknya alja si nera Lazarus bek beil yalamek. Alja nong era gororomaʾ adya deknewoka delemok.

²¹Lazarus bera dubnya be delemlya enyek, denaʾ siknaʾ yanggalamlyaʾ anyek, eboka delenunaʾ aboka ulumok. Gam adyaʾ anaba Lazarus bedya gororomaʾ era meka hmouboka delemek.”

²²”Yok eimik sum enyek, bonaʾ garanya bera somogok dara, lero nang edya bobmekja, imik heikek Abraham bedyaʾ eibukuk sam bo beil byik. Dubnya beneba somogok dara, alda soko lokek.

²³Dubnya bera nimi somoknaʾ nang heikek sam hyak nauba gweklemok. Banyagan anyeb imik sam kemel weininglemok enyek, Abraham bera hyak mok sam ulumok dara, Lazarus bera Abraham bedyaʾ eibukuk sam bulumokaʾ ak eiyimok.

²⁴Anasa dubnya bedya lelemokja, neyung Abraham o! Nak angoo yadyek senewanelom e. Lazarus benyek, alja soruk enyek mek ek doronggalyekanya, nadyaʾ silyum ak an dil younululaʾ aboka orugalom. Nara uk lomok an hyak nauba gweklamna bar! alamok.”

²⁵”Bok Abraham bedya benyek lebokaʾ ara, najabo banyek seiniwanalam: anda or anam embengaʾ ululum dara, perobaʾ ok doboka boboka delelum, alda Lazarus bek dara malyaʾ ok doboka dereklemok. Amba wenyek dara, Lazarus bera perobaʾ ak bukla bok, anak dara, nauba gweklelam.

²⁶Ban orokaʾ anaba, an ululamaʾ ak abaʾ ara, nuk an ara nuk anyebaʾ ara nimi hnon anak sam an yeijek, onoʾ anak anyeb nang era nuk yeijek aboka, senenggom gwerena boblebok! aro lebok.”

²⁷”Wenyek dubnya bedya dara, neyung anaso unaʾ enyek leblam dara, Lazarus benyek nadyaʾ ek bokol bilomaʾ aboka anyek hnonok molowagen, aro lebok.

²⁸Nadya weisabo lambadya nang ulumakaʾ anyek, sikbabya igina kweboka gweknaʾ ak an yeijek anasa, Lazarus bedya wenel busululaʾ aboka orugalom, hyok.

²⁹Danyek Abraham bedya dara, sikda Musa bedya momnya dobok yuba hnon, ununumnaʾ lelemek nang edya webek yuba hnon seleb yakaʾ ak ulumak. Sikda yuba lom enyek an momnya dobokaʾ nidyaʾ anyek sunuwoka ulunok!

³⁰Bok dubnya bedya dara saaboka, neyung Abraham o, nenyek ok dara, seleb gom senewan. Bok somogelenya benyek, sikenek suboka yanamlaʾ nong ak eibnemak dara, wera sikja malya unaʾ ak ab ganya dangawoka yuba dib senewanamak, aro lebok.

³¹Bok Abraham bedya dara, sikda Musa bedya yub eb, ununumnaʾ lelemek nang yub enyek, dib senenaʾ loboka eib lobneseng dara, nimi somogoka suboka bukesonya bedya wenyaro bisoʾ anaba dib senewanggunuseng, hyok,” wenyaboka lebok.