Read Nalca LUKAS 2 Bible Online

LUKAS 2 - Nalca bible

LUKAS 2

¹Wera Kaisar Agustus dubnya, alda Roma mok soko dubnya ulumok salek, nimi mok soko nidyaʾ sik nonga einiwanasak aboka orugosuk.

²Wera Kirenius bera Siria mok sokok emba dubnya ulumok salek, ban nim einisinaʾ ara, men youboka si momnya dob einiweisiknya nera ban.

³Dara, nimi nidyaʾ yok-yok beiyisikaʾ heik elaʾ gigiro si momnya doboka einiwosunukaʾ aboka, si doronggol dal bilimek.

⁴Dara Yusuf beneba, Nazaret heikek Galilea sokok abaʾ ara, Yudea sokok bilimok. Nera albabya Daud nang yilaʾ ulumokaʾ anasa, Daud dubnya be beiyimek heikek Betlehem aboka silimek heikek bilimok.

⁵Wera anedya, alja molob lomokaʾ me bomok gel, Maria geblaboka, si momnya neikaʾ dobsinokaʾ aboka, bobdanga bilirek.

⁶Wera sikda heik enyek an lanel birik sum enyek, Maria gera me beilin salek oka dok.

⁷Sikja man e nera gloʾ orok anasa, Maria gera alja yando me nengma ak beibuk. Wera me nera seleb beiyiboka boksom adya waabok dara, pam amba denaʾ eleklemekaʾ ak sam meiyimok.

⁸Dara an inimnek era, mok enyek anara salyaʾ mab lorobaʾ ak, domba pama beiyiboka yakna nanga hnon, sikja pama bo ulumek.

⁹Dara al wene sab-sab, Wenelesilnya bedya lero, sikenek yookanya, Wenelesilnya bedya hyak senenggom dilinaʾ era sikenek yeb goluwosuk dara, sikda hyak loka dabsuk.

¹⁰Bok lero era sikenek, ”Nara nimi soko nimi nidyaʾ amba ganya hekoka eiya dabnesil yub ek ugunuk wenyhenesinaʾ anasa, ugunda lok ganya bonggom mem.

¹¹Sumen era ugunsamba, nimi blebsinaʾ dubnya, Wenelesilnya Kristus benyek, Daud bedya heikek beibla.

¹²Dara ugunsamba beknaʾ dibaʾ ara, anam wenyek ok beiyimeija me nenyek, wamenaʾ adya waaboka pam amba denaʾ elekna golongaʾ ak mamlyaʾ ak eibnelum,” hyok.

¹³Dara onoʾ al wene sab-sab enyek, lero enyeb, yok imik heik yin bonaʾ nang lero gong-gong eb yingginiboka, neikaʾ Imik Neyung ak ban wenyaro giblemekaʾ ara,

¹⁴”Senenggomaʾ perobaʾ ara, Imik Neyung hyak imik ululanya bembakanya, ganya hekoka namenaʾ pe unaʾ ara, sik sokok an alak urumuk dangalamlya nim emba ulumnamla,” wenyaro giblemek.

¹⁵Wera lero gong dara sikenek loboka imik heikek saaboka byik dara, pam beilin nang era sik moumen, ”Wenelesilnya bedya Betlehem heikek hekaʾ humlaʾ anyek, nuk wenyasilaʾ anyek kemel binimab,” wenyabdek.

¹⁶Dara sikda Betlehem heikek berra aboka biniboka, Maria geb, Yusuf beb, beiyimok me nera golongaʾ lomok mamokaʾ ak eibek.

¹⁷Wera pama beilinaʾ nang era, me nen seleb eibek dara, me nenesa leboka, sikenek lero adya wenyaboka nekesukaʾ anyek, wenyaro yibik.

¹⁸Dara nimi nidyaʾ ara, pam beilinaʾ nang edya sikenek wenyaro yabalamekaʾ anyek kemek dara, hyak salyek nang senemek.

¹⁹Bok Maria gek dara, ban nidyaʾ wenyamekaʾ anyek, ganya lomok boboka, seiniro ulumok.

²⁰Dara pam beilinaʾ nang era, o keboka, heng eibekaʾ nidyaʾ ara, lero adya sikenek lesuk sok, dib beknaʾ nong anasa, perob aboka giboka, bera seboka Imik Neyung gigibgiga, sik ulumekaʾ ak sam saaboka byik.

²¹Wera seleb li linbadya maboka dara, me nera bolaʾ garawareekanya, onoʾ me nen mon lomok anam bobnenggom enyek, lero adya si nenyek sibnelum amok si, Yesus aboka sibdek.

²²Dara, oruksin yuba Musa bedya momnya domok sok, me galasaʾ don salek oka dok dara, alda sikja Imik Neyung ak Yerusalem heikek bo elegel bilirek.

²³Wera Imik Neyung adya unuwanalum an yuba momnya dobok sok, ”Ugunda yando me beibmunaʾ ara, Imik Neyung amba munaʾ eleklelulum,” wenyaboka momnya dobokaʾ anasa, unuwanomaʾ aboka bilirek.

²⁴Anya onoʾ, Wenelesilnya bedya unuwanalum an yuba momnya dobok sokaʾ ara, yalma wining moumenaʾ gom, makwa wining gakma penya gom giboka elegolulum, wenyamokaʾ sunuwoka, ban gibnomaʾ aboka bilirek.

²⁵Dara Yerusalem heikek ara, nimi ben hnon Simeon alameknya bek ulumok. Dara alda Imik Neyung hogung ak ara peboka, geisa ganya boboka ulumookanya, Israeli nim emba ganya gwelelek anaʾ anyek eibnunaʾ aboka, diri ulumok. Anya Imik Neyung Geisinya ara alak arawoka bo ulumok.

²⁶Dara alda Imik Neyung Geisinya adya orowek alak men, anda Imik Neyung adya nimi blebsinaʾ dubnya, Wenelesilnya bedya sekiyiwoknya Mesias benyek, anam eibnenggumem bok dara, anda men somoganggunulam.

²⁷Dara alda Geisinya be pik uboka, Imik Neyung e eremek sam yeilimok. Dara me nen Yesus ara, alja nauba nim edya, unuwanalum an yub adya unuwanamak aboka momnya domokaʾ sunuwoka unu meewanokaʾ aboka, Imik Neyung ek bo yeilirek.

²⁸Dara, me nera Simeon bedya doboka gwelib salawoka, alda Imik Neyung ak giboka lebnemokaʾ ara,

²⁹”Anasa wera Wenelesilimnya Imik Neyung o, anja wa wenanya bera, anja yuba lelemlaʾ sunuwoka, or pe ganya senenya loboka bindiwoululaʾ aboka or senewanalam.

³⁰Dara nimi blebsinaʾ anak abaʾ ara, nadya heng yokaʾ edya bekoka seleb eibnaʾ anasa,

³¹an blebsinaʾ damok ara, nimi yok-yok soko nimi nidyaʾ sik hogung ak seleb anja memewolumaʾ ara,

³²wera, yok-yok mok soko nim emba dara, laga aamanaʾ geknenaʾ danamla dilinaʾ era yalakanya, anja nim Israeli nim emba dara, imik giginaʾ damok danamla,” hyok.

³³Wenyek Simeon bedya alsamba wenyaboka nidyaʾ geklewoka lebokaʾ anyek, alja neyung beb, genong geb dara, hyak salya lebla senewoka ganya loka dabsuk.

³⁴Dara Simeon bera sikenek perobaʾ leb elegousuukanya, dara me nen aljaʾ genong Maria gek wenhyokaʾ ara, ”Hyak dib nong ara ban me nera, nimi gong Israel sam ara hnon golugiyiwoka, hnon sekiyiwoka ubsululaʾ aboka orowek memewookanya, nimi nauba ara alak malya aboka walamnemak aboka, alda yokaʾ nong lok so beknaʾ danamla.

³⁵Dara nimi nauba ganya lomok laga doululaʾ aboka, onoʾ anak dara, yok mal edya anja ganya nong ak doluganenggel,” hyok.

³⁶Dara onoʾ al anyeganera, Asyer nang yilaʾ Fanuel manggel, alja si nera Hana, ununumnaʾ lelemok gel gek hnon ulumok. Alda neboka, seleb yamen dangamok. Anasa nenya dobok salek era, gibnaʾ sekbadyok alaʾ nenya ab neikaʾ ubdek.

³⁷Anya, alda danera seleb you gel ulumookanya, wene salek era gibnaʾ denga winilya ebdobnya winilya lemok. Dara Wenelesilnya Imik Neyung bedya ek ara, inimnek yubyek pik moruwoka, Imik Neyung amba gwanenga meka denaʾ loboka molobsiniwoka ulumok.

³⁸Dara neik salek enyek, albabya anyegan yeiniboka, Imik Neyung ak perob aboka gibookanya, me nenyek geklewoka, Yerusalem heik henga lobnaʾ amba bo yanamok sum amba diri ulumek nim ek, nauba wenyhusuk.

³⁹Wera Yusuf Maria ara, Wenelesilnya bedya unuwanalum aboka unuwanalum an yub ak sam lemoknya nera sunuwoka seleb unubgogowarek dara, sik ulumekaʾ ak, Nazaret heikek Galilea sokok sam birik.

⁴⁰Dara ban me nera nonga nauba neboka hyak migibaʾ kabgiga balamookanya, anya onoʾ geremseng nongaʾ anyek ubgiga balamookanya, Imik Neyung adyaʾ wanaʾ uboka eleksinaʾ ara, alak ulumok.

⁴¹Wera gibnaʾ lelemna ellaʾ gigiro Yesus alja nauba nim era Paskah perob sum era Yerusalem heikek balamek.

⁴²Anedya Yesus ara alda gibnaʾ o badya lebok dara, sikda ban perob nauba sum amba sobaʾ unu balamek sok, sikda bilimek.

⁴³Wera perob nauba sum emba seleb longobgogowoka binobaʾ aboka lanelemek dara, Yesus ara alja neyung beb, genong geb, ella danggonggom, alda Yerusalem heikek loboka ulumok.

⁴⁴Dara alja nauba nim edya dara, yok balamak nim eblaboka, nimi hnoum salyaʾ hiboka balamla senerek. Bok seleb liga hnon pikek maboka gwelegok ab danyek eibnenggurek dara, sikja ella uldalamek nimi pik hnon, nim ebun pik heibdangoka ero yibirek.

⁴⁵Bok sikda eibnenggubdek dara, onoʾ losaaboka Yerusalem heikek, on pik ebgiga birik.

⁴⁶Wera elerek salek era liga winilya seleb maboka gwelegok danyek, alda Yahudi nim edya Imik Neyung yuba neklesik nang eb, yuba wa gak nang eb, sik gangganek sam sikenek heiboka, alja onoʾ saaboka leboka, Wenelesilnya Imik Neyung bedya ek sam bulumok ak eiyirek.

⁴⁷Dara, nidyaʾ alak kelemek nim edya dara, alja yuba dam nang heiboka lelemok ab, alak heibnanya neneba pe lelemok geremseng enesa, salya lelemla me senewoka hyak loka dasuk.

⁴⁸Wera aljaʾ neyung genong ara, Yesus adya ban unulumok anyek eiyirek dara, hyak ganya lok dasuk. Dara alja genong gedya Yesus ak, ”Anda hekasa nuk ara anaso unulusilim do? Anja neyung beb, nab dara, nunda anak ilil ganya boboka elenggenem bar,” hyok.

⁴⁹Yesus adya sikenek lebsukaʾ ara, ”Ugunda hekasa nak elenurum do? Nara nadyaʾ neyung bedyaʾ e lomok sam ulumnesinya ara, ugunda elgom ulurum de?” hyok.

⁵⁰Bok sikda alja wenhyok yub era, damok ara anasa leblaʾ senewoka pe ella danggurek.

⁵¹Wera alda, alja neyung genong ab neikaʾ Nazaret heikek byik. Dara Yesus ara sikjaʾ gangganek ab pe ulumok. Bok ban nidyaʾ unulumoknya nera, alja genong gera ganya lomok sam pe seiniwoka bo ulumok.

⁵²Dara Yesus ara, nauba dangoka nebgiga balamookanya, onoʾ nauba ella danggiga ulumookanya, nim ab, onoʾ Imik Neyung adyaʾ anababya alak perob senelemek.