Read Nalca LUKAS 22 Bible Online

LUKAS 22 - Nalca bible

LUKAS 22

¹Biknaʾ orok roti gwanenga meewoka den sum, anya memab on sum alamek sum era seleb oka dok.

²Yahudi yuba wa gakaʾ dub nang eb, yuba neksin nang eb dara, nimi yok nang enyek lok anasa, sikda Yesus ak geleleng aboka obnemab senewoka pik elemek.

³Wera Satan ara Yudas yok si nera Iskariot alameknya, Yesus adya alja yuba doro diriga bannya bek wekel yok.

⁴Anasa wera Yudas bera alda biniboka yuba wa gakaʾ dub nang eb, Imik Neyung e bo diri ulumek nang eb, Yesus ara hekaʾ huboka obnelum aboka yuba dil binimok yuba saboka sunuwanobaʾ aboka byuk.

⁵Dara sikda nidyaʾ ara hyak ganya eiya daboka, wera rupiah nauba eleganenjab aboka lebgogowek.

⁶Wera Yudas beneba or yo aboka, nimi yok nang nauba unggulumeija wenyek, doboka elegonunaʾ aboka maka meibdo yabalamok.

⁷Memab onaʾ amba bekoka biknaʾ orok roti gwanenga den sum, anya domba pama hnon oboka delemek sum era seleb yenewok.

⁸Anasa Yesus ara, ”Denaʾ meewoka youboka beil binisurum,” aboka Petrus beb Yohanes beb dak orugosuk.

⁹Wenyek sikja dara, ”Neyung anja dara, hanyagar sam meewoka ubnerak senelam do?” aboka heibdek.

¹⁰Dara Yesus adya sikenek, ”Ugunda nauba heikek burumun dara, nengmabo ben hnon meka gweboka bo yabelenya benyek eibdanalum. Anya ben wekel balya ek an benyeb ugumba neikaʾ weknelum.

¹¹Dara e damnya bek ara lebnerumja, Neklesilnya bedya dara, Hanyagarek nab, nadya yuba doro diriga ban nang eb dara, memab onaʾ sum beknaʾ bekoka denemab do? amla, henerum.

¹²Danyek e damnya bedya ugunuk imik ekla ek sam yokaʾ-yokaʾ bonaʾ beilinaʾ orowek sunuwoka beiyemeijaʾ nauba ekla enyek lebnesil. Dara anyagan denaʾ nidyaʾ ara meewoka beibnesurum,” hyok.

¹³Wera Petrus beb Yohanes beb dara, balarek enyek nidyaʾ Yesus adya sikenek lesuk sokaʾ ak eibdek. Dara memab onaʾ beknaʾ denaʾ era nidyaʾ ekla enyek an meewoka beibdek.

¹⁴Wera den salek oka dok dara, Yesus ara alja yuba doro diriga ban nang eb neikaʾ denobaʾ aboka, ekla ek buk ganagek.

¹⁵Dara Yesus adya sikenek, ”Nara anam igin yakaʾ kweboka gweknenggumna salek, ugunub neikaʾ memab onaʾ amba beknaʾ denaʾ neikaʾ denemab senemnaʾ anasa, perob.

¹⁶Anasa ugunuk banyek dib lebsin. Nara ban denaʾ enera denggulumnyaʾ ara moruwoka, Imik Neyung adya wenesin heikek sam gigiwanamla sum ek,” hyok.

¹⁷Ban nen wenyabgogowok dara, Yesus ara alda mek hmeiya doboka Imik Neyung ak perob aboka giboka molowok dara, delemek nang ek lebokja, ”Ugunda banyek dobmunukanya, bokdangoka denelum e.

¹⁸Anasa ugumba ella danalum, ban mek enera nara ugunub neikaʾ denggulumeibyaʾ moruwoka Imik Neyung adya wenesinaʾ sum danamla,” hyok.

¹⁹Seleb dara Yesus ara roti gwaneng doboka, Imik Neyung ak perob aboka giboka molobgogowok dara, roti gwaneng neikaʾ delemek nang ek soboka elekgogowosuk dara, lebokja, ”Nadya nong ugunsamba doboka elegeisinaʾ ara an. Ugumba ban unu delemnelumaʾ adya nak beklemnenulum.”

²⁰Anaso neikek seleb debgogowek dara, meka gweboka beiyimokaʾ ara neikaʾ delemek nang sikenek lebokja, ”Ban mek enedya wenyok unuwanamna anaʾ era pik mourunaʾ dibaʾ yarawal. Nadya eneng edya, mek eneng enera ugunsamba leboka yeksin,” hyok.

²¹”Bok ugunda kendululum! Nak obnelum aboka yuba dil bilinelnya bera nab neikaʾ ulunam!

²²Nimi dibaʾ me nera, Imik Neyung adya orowek lebok sok gigiwoka somoganamla bok, yuba dil bililenya be nong ak hnonok hyak omom nongaʾ ak ulumnamla!” hyok.

²³Dara anyagan Yesus ab neikaʾ delemek nang edya sik moumen heknedya unuwanamlaʾ ak lelemla do senewoka heibdangdo balamek.

²⁴Yesus adya alja yuba doro diriga ban nang edya dara, sik gangganek ara heknyek eimik era, nunja dubnya ulumnesil aboka waldanaʾ lanawok.

²⁵Danyek Yesus adya sikenek, ”Nimi mok soko dub nang era, Imik Neyung elgom ulumak dara, sikja mok soko nim ek malyaʾ nenelemak; alda sikja unuwolulum alamna yuba keboka unulumak nang era, Nimi Bo Usin Nang alamak.

²⁶Bok ugunuk dara, anaso ununaʾ ara hyak mem. Alda ugunda ban nenyek unulululum, alda wenyek ugun gangganek sam senenggom nanga dangoka ulumak nang era, mek sirikaʾ anaso dangoka ulunok; alda wen nauba dangoka ulumak nang era, wa oruknaʾ nang eneso ulunok.

²⁷Ban penya nang danara, har berek senenggomnya ulumla do? Yangamna gal ak sam bukoka delelanya benyek gom, alda alak denemla bar aboka masa beib arawoka ululanya benyek naubenya ulumla gom? Yangamna gal ak sam bukoka delelanya benyek senelemak bok, nak dara, masa beib arawoka ululanya beneso ulumna,” hyok.

²⁸”Nak yokaʾ-yokaʾ igina kwelenelaʾ hnoum ara, ugunuk danyek sobaʾ nab neikaʾ ulumab.

²⁹Nadyaʾ neyung bedya nak yok nang ek orugoka wenesin migib eleganyok sok, onoʾ nadya dara, migib era ugunuk elegeisin.

³⁰Anedya wera, nara mok soko dubnya danamna sum era, ugunda nablaboka neikaʾ ganya eiya daboka ulumnemab. Anya ugunda obadya senenggom nang ekla bunaʾ ak bukoka, onoʾ obadya nang nimi yilaʾ yana lelemnesulum,” hyok.

³¹”Simon o, Simon o, anda nak kebnelom! Gandum glakaʾ gwereklemak dara, anadya perobnya nera laga nenewoka malyinya nera lobnobaʾ aboka ulumak sok, Satan bedya ugunuk sene sunuwosununaʾ aboka galaweisil.

³²Simon o, anja dib senewoka ganya oloklelamaʾ anyek, goowoka denghegelyek aboka, nara ansamba heng uboka mololenggen. Anya anda nak saaboka yanalamaʾ seleb dara, anja weisab enyek sikja ganya migiba geb eleganesilim,” hyok.

³³Danyek Petrus bedya Yesus ak, ”Wenelesilimnya o, nara gasa ek henga geregoka doronggeinijekanya, anablaboka neikaʾ obnesakaʾ anaba, or unuwanasak,” hyok.

³⁴Anasa Yesus adya Petrus bek, ”Petrus o, anda banyek dib senewanalam, sumen enesoʾ anyek wining yuba anam sabnenggumlya salek, anda nak lika winilya sondaʾ amba bobnenewoka nara bera elgomnya henenelem,” hyok.

³⁵Wenyabgogowok dara, onoʾ hnon sikenek, ”Nara yuba lel binilum aboka bokosisa sum era, nadya rupiah bonaʾ ab, akleng gom, yan ongonaʾ gom, bo banggom asisa dara, ugunuk ara yokaʾ-yokaʾ hnon, or bukulum de?” aboka heibsuk. Sikja dara, ”Orok, neyung hnon unuwanggumouba,” hyek.

³⁶Dara Yesus adya, ”Bok wenyek dara, heknedya rupiah bonaʾ gom, akleng gom ubnamla dara, bobnamla. Heknedya mala oroknya bera alja ongon akleng anyek mala deknunaʾ aboka rupiah dekoka dobnamla.

³⁷Anasa ugunuk dib lebsin, Imik Neyung yuba lero momnya dobokja, Alda malya unaʾanya beneso nenewek hyoknya nera, nak an nidyaʾ gigiwoka unuwanamla. Anasa Imik Neyung yuba bukuk sam nasamba geklewoka momnya dobokaʾ ara, wera an seleb gigiwoka unul yibel an,” hyok.

³⁸Yesus adya yuba doro diriga ban nang edya alak, ”Wenelesilimnya o, anyagan ara mala penya ulumlaʾ banyek, kendelom,” hyek. Bok Yesus adya dara, ”Or maly e, seleb,” hyok.

³⁹Yesus ara Yerusalem heikek ara, loboka yok sum Zaitun meinik balamok sok, alja yuba doro diriga ban nang eneba neikaʾ byik.

⁴⁰Sikda Zaitun meinik sam seleb byik dara, Yesus adya sikenek, ”Ugunuk sunuwanasilikanya, ugunda malya unaʾ lomok malyinggumunuk aboka, mololdalalulum,” hyok.

⁴¹Dara onoʾ alda mok so girika nakna ek balamla sok so ak byuk. Anya koma lumugoka henga uboka mololemok.

⁴²Alja Imik Neyung ak ara, ”Neyung o, or dara, nak an nauba igina kweboka gweklamnaʾ anyek mok nenewalom. Bok nadya senenenya nek gom, alda anja unuwanamna senemenya nenyek or unuwanelom,” aboka mololemok.

⁴³Dara, Imik Neyung lero ben hnon yeiniboka, alak ganya akwaʾ dimok.

⁴⁴Yesus ara alda ganya ak nauba igina berewoka gweklemokaʾ anasa, alda hyak ganya dib beiliwoka nauba Imik Neyung ak mololomok. Dara hwin ara eneng anasoʾ anyek sokok sam debom-deboma belega yanggalamok.

⁴⁵Seleb heng uboka molobgogowok dara, Yesus ara alja yuba doro diriga ban nang ek saaboka yok. Yeiniboka kemelesuk enyek, sikda ganya suguwoka angwei senen ganya bomekaʾ anasa, salyaʾ hogunga mamekaʾ ak eibsuk.

⁴⁶Anasa Yesus adya sikenek, ”Wei ugunda hekasa malalum do? Ugunuk yokaʾ migib adya sunubyamadesilyek aboka, ugunda bukoka mololelulum,” hyok.

⁴⁷Yesus ara wenyaboka anam yuba salamok sab-sab, nimi buma hnon lobmekja oka yek. Yesus yuba doro diriga bannya, Yudas bedya huka bosuk nang ek yek. Dara onoʾ Yudas bera Yesus ak oka biniboka u meka hmobnunaʾ aboka ul yabok.

⁴⁸Bok Yesus adya Yudas bek, ”Yudas o, ban unu meka hmoubnelamaʾ adya, wera anda nimi dibaʾ me nek doboka elegalem de?” aboka heibuk.

⁴⁹Wera Yesus adya yuba doro diriga ban nang era, hekaʾ hubnamlaʾ anyek seleb ella ubek dara, sikja Yesus ak, ”Wenelesilimnya o, nunda ban nang enyeb parang gab adya weboka obdanamab de?” hyek.

⁵⁰Wenyaboka ben hnonja Imik Neyung yuba wa gakaʾ dubnya bek aranaʾanya ben hnon yeilimokaʾ anyek, parang adya o meklaʾ garawoka obok enyek, benedya o meklaʾ era leboka denghyok.

⁵¹Bok Yesus adya, ”Seleb e,” aboka onoʾ onsok soruka salawoka o meklaʾ era dirigoka hwebok.

⁵²Dara onoʾ Yesus ara, yuba wa gakaʾ dub nang eb, Imik Neyung gibnaʾ e bo diri ulumek nang eb, Yahudi dub nang alak henga goubnobaʾ aboka yeilimek nang ek, ”Ugunja dara, nara hokaʾ doboka nim ololanya senenulumukanya, henga goubnenobaʾ aboka, mal dibaʾ gab ab, doluknaʾ gamaʾ ab bo yeililum de?

⁵³Lika sobaʾ nara ugunub neikaʾ Imik Neyung ek sam ulumouba bok, ugunda nak ara henga goubnenggunulum. Bok, gunaʾ migib anyek hyak perobaʾ dangoka yeiriwanamla sum geknewalaʾ ara wera ugunda an unul yabalum,” hyok.

⁵⁴Wera sikda Yesus ak seleb henga gouboka bobek dara, Imik Neyung yuba wa gakaʾ dubnya bedya ek bo byik. Bok Petrus bera eimik dobgiga mok so balamok.

⁵⁵Dara e nenyek an heik gasaʾ ak sam ara, hnoumung nong uka daboka lomek dara, anyagan ara nimi nauba aknewoka bul ganaklemek dara, Petrus beneba nimi hnoum biniboka neikaʾ bulumek.

⁵⁶Gela hnon oruknaʾ wa welemok gel gedya kemelemok enyek, Petrus bera anyagan biniboka bulumokaʾ ak eibuk dara, gel genedya Petrus bek hyak pe keeboka, alja lebokaʾ ara, ”Ban beneba Yesus ab neikaʾ ulumaknya bera an!” hyok.

⁵⁷Bok Petrus bera sondaʾ amba bobnenewoka, alja dara, ”Nara orok, benera nab elgomnya bek lelenulum!” hyok.

⁵⁸Dara onoʾ mandenaʾ loboka, yoknya bedya Petrus bek eiyiboka lebokja, ”Anda sikenek neikaʾ ululumnya ben goma!” hyok. Bok Petrus bedya dara, ”Orok, nera na goma!” hyok.

⁵⁹Dara onoʾ ousa so dara, nimi ben hnon hyak laga poboka, Petrus bek, ”Alda Galilea mok ebnya bek anasa, albabya Yesus adya yuba doro diriga balalanya bera an!” hyok.

⁶⁰Bok Petrus bedya dara sondaʾ amba bobnenewoka, ”Ugunda hek yub ek lelelum, nara elgom bar!” hyok. Wenyaboka bobnenewoka anam yuba salamok salek enyek, wining yuba ngoubuk.

⁶¹Yesus anaba dangawoka Petrus bek keebdabok. Danyek Petrus bera, Wenelesilnya bedya men danyek alak, ”Sumen wining yub anam lebnenggumlya salek nak sondaʾ amba lika winilya bobnenewoka lebnenelem,” amokaʾ anyek seiniwok.

⁶²Dara Petrus bera heikek goboka yibiniboka nauba goukdik-goukdika engel byuk.

⁶³Dara Yesus ak henga geregemek nang edya, alak nauba lobaʾ nenewoka saboka olomek.

⁶⁴Sikda Yesus ak henga lebsalawoka, ”Wera heknedya olonggel do? Benedya olonelem aboka laga leblom,” aboka lelemek.

⁶⁵Dara yuba dem adyaʾ anaba hyak nauba saboka derewoka waboka lelemek.

⁶⁶Ampum maboka gwelegok dara, Yahudi dub nang eb, Imik Neyung yuba wa gakaʾ dub nang eb, yuba neksin nang eb, longowoka yuba sabek dara, Yesus ak doboka bobek dara, yana lelesin ek sam bo byik.

⁶⁷Wera seleb bo byik dara, sikja Yesus ak, ”Anda aldib nimi blebsinaʾ dubnya ulumen dara, laga lebsilom,” hyek. Danyek Yesus adya sikenek, ”Nara ugunuk aldib ulumna aboka neksinyaʾ anaba, ugunda dib senewounululumaʾ gomaʾ.

⁶⁸Hnonda nadya ugunuk heibsinyaʾ anaba, ugunja dara, nak saaboka yuba sab eleganggununululumaʾ.

⁶⁹Bok wenyek ab moruwoka, nimi dibaʾ me nera Imik Neyung hyak migibaʾ imik sam ululanya bedyaʾ sirikek sam buknamla,” hyok.

⁷⁰Dara nimi nidyaʾ wekemek nim edya, ”Anda wenyhelemaʾ anasa, wera anda aldib Imik Neyung bedya me ululam de?” hyek. Yesus adya sikenek, ”Alan ugunja lelum an,” hyok.

⁷¹Dara sikja, ”Wera alja sibamaʾ nonga adya laga lebdalaʾ kebab bok anasa, yok nim edya laga lebsija enyek senenaʾ ara mem,” hyek.