Read Nalca LUKAS 3 Bible Online

LUKAS 3 - Nalca bible

LUKAS 3

¹Wera Tiberius bera senenggom wenesin dubnya ulumok salek, gibnaʾ meija dubukaʾ badya lebok. Ban salek danaba, Pontius Pilatus bera Yudea soko amba dubnya ulumok. Dara Herodes bera, Galilea soko emba wenesin dubnya ulumok. Anya Herodes alja hem Pilipus bek dara, Iturea mok eb, Trakhonitis mok eb damba, wenesin dubnya ulumok. Anya onoʾ Lisanias bek dara, Abilene mok emba wenesin dubnya ulumok.

²Dara Hanas beb, Kayafas beb dara, Imik Neyung yuba wa gakaʾ dub nang dangarek salek, Imik Neyung yub ara Zakharia mamnya, Yohanes bek hwalek sam mok yok.

³Anasa Yohanes Pembaptis bera Yordan meka gemek mok sokok sam nidyaʾ heikek yeiniboka yuba doroklomokaʾ ara, ”Ganya dangawomunukanya, ugun nong elekdangoka meka dabdanalum dara, Imik Neyung ara ugunja malya unaʾ ugunuk ab meewanasil.”

⁴Wera ununumnaʾ lenya Yesaya buku lomok sam momnya dobokaʾ ulumla sok, ”Hwalek mok yuba hnon bii aro yabalamlaʾ ara, Wenelesilnya bemba pika memewoka, alsamba pika haboka jongaʾ gebnelum.

⁵Dokloma guruklamlaʾ yok-yok ara sangawolul aboka soko beibnelumukanya, mein yema yok-yok bululanya nera, sangab lobnelum. Dara, gongolyaʾ yengem kweilim alalanya nera, jongaʾ nenewanalumukanya, gurung elim alalanya nera, pe sangawanelum.

⁶Dara, nimi nidyaʾ ara Imik Neyung adya blebsinaʾ ara eimik era, henga boro beiyiboka eibnemak,” wenyaro momnya dobokaʾ ak, wenyalamok.

⁷Dara, alda nimi nauba alja meka dabsululaʾ aboka yalamek nim ek wenyaboka lelemokaʾ ara, ”Wei, ugunda wabaʾ keeblo nimi osin bagaʾ edya mengerob nang yilaʾ o! Heknedya ugunuk Imik Neyung adya yu ganya yanamla ak ab merebdanga beiyi binilum alasil do?

⁸Wera anasa, nunda seleb malya unaʾ ak ab ganya danganaʾ geknewolul aboka, anyek sunuwoka beknaʾ okoka unulululum. Anya ugunja ganya lomok ara, Abraham bera nunja neyung ulumlaʾ anyaʾ seneldanggom mem! Anasa nara ugunuk wenyhenesin, Imik Neyung ara ban girik danaba nimi geboka, Abraham nang yilaʾ dangiyiwanemso!

⁹Dara ya ara gal yarengek sam seleb orowek dibok. Anera gala nidyaʾ yok-yok doka pe mounggulumnelanya nera, eimik era weboka uk lomok dobdabnamla,” wenyaboka lelemok.

¹⁰Wenyek nimi nauba alak heilimekaʾ ara, ”Wera anaso dara, nunda hekaʾ ak hubnamab do?” wenyaboka heilemek.

¹¹Danyek alja sikenek lebokaʾ ara, ”Anasa heknedya ongon akleng penya ululanya bera, yoknya ongon aklenga oroknya bek bokoka, hnonda eleklelul. Anya onoʾ heknyek denaʾ yak ululanya bera, yoknya oroknya bek al neikso unululul,” hyok.

¹²Dara mok sok amba leboka rupiah molowoka dosin nanga hnon, meka dabsululaʾ aboka yeilimeekanya sikda Yohanes Pembaptis bek, ”Neyung neklesilimnya o, nuk dara, hekaʾ ak huwanesibya do?” wenyaboka heimek.

¹³Dara, Yohanes Pembaptis bera sikenek lebsukaʾ ara, ”Ugunuk dara, unu dolomnelum aboka lerobnya nera sikleb loboka, onoʾ ugunja nauba so gokoka donggom mem,” hyok.

¹⁴Dara onoʾ yin bonaʾ nang eneba alak heimekaʾ ara, ”Dara numbabya, hekaʾ hubnesibya do?” wenyaboka heimek. Wenyek, Yohanes Pembaptis bera sikenek lebsukaʾ ara, ”Ugunda salyaʾ bolowoka bleboka donggom, mem. Anya dangab eiliwoka yok nim ek sondaʾ anasa, dukaʾ lolowoka salyaʾ donggom mem. Alda ugunuk ugunjinya aboka eleklesak rupiah enyek, pe sunuwoka bo deregoka ululum,” hyok.

¹⁵Wera ban sum enyek nimi nidyaʾ ara, Yohanes Pembaptis benesa leboka youmaʾ enyek ununumnaʾ lelemek nang edya nimi blebsinaʾ dubnya yanamla aboka diri ulumabnya bera an gom aboka, ganya lomok heibdangdo yabalemek.

¹⁶Anasa wera, Yohanes Pembaptis bedya sikda nidyaʾ ak lebsuk ara, ”Nadya dara, wenera mek dem adya dalasin bok, eimik era hyak senenggomnya yanamla. Alja yan ongonaʾ eneba na meknya bedya dara, henga loboka gwiriwamenggom. Alja danyek, wera eimik era, ugunuk Imik Neyung Geisinya adya hnon, uk adya hnon, mek dibaʾ dabnesil.

¹⁷Pe weboka yabnaʾ ara, alja gandum weboka memelamla ak sam meewoka, gandum dok ak dara, dakoka alja beilinaʾ ek doronggoka beibnunaʾ aboka, aljaʾ seleb sorukuk ulumla. Bok, gandum glakaʾ ak dara, hyak sarangnaʾ orok ukuk dabnamla,” hyok.

¹⁸Dara, Yohanes Pembaptis bera yok-yok yuba nauba adya sikenek weneboka, perob wenyaro yanggan yub era, sikenek lelesuk.

¹⁹Bok, alda Herodes Galilea mok soko dubnya bera, alja hem bedya gel, Herodias gek bleboka domok amba hnon, onoʾ yok malya unaʾ nidyaʾ unulumoknya nemba hnon, nera malya ululam aboka wabok.

²⁰Dara, Herodes bera alda yok-yok malya unaʾ ek seleb nauba unulumokjok, onoʾ hnon sounuwoka meknewoknya nera, Yohanes Pembaptis benyek henga geregoka gasa henga gereksin ek sam doronggomok.

²¹Wera nimi nidyaʾ meka dabsuukanya, onoʾ Yesus anaba meka dabookanya, heng uboka molol yabok salek, im pik ara gabdebok.

²²Dara, Imik Neyung Geisinya ara yalma wining uruma anasoʾ anyek, lak-lak aboka, Yesus eilib ak bul yinggyuk. Anya, imik ab yuba hnon kebekaʾ ara, ”Anda nadya hyak wanaʾ nong ulunggen me, an nong adya nadya ganya heklenel,” hyok.

²³Yesus ara sokok an alja wa web einiwok salek era, alda gibnaʾ ara denga hnonok ebdobnya winilya lebok bok, web einiwok. Dara, nimi yok nim edya senelemekaʾ ara, Yesus ak dara, Yusuf bedya me ulumla senelemek. Yusuf bera alda Eli bedya me ulumok.

²⁴Dara, Eli bera Matat bedya me, Matat bera Lewi bedya me, Lewi bera Malkhi bedya me, Malkhi bera Yanai bedya me, Yanai bera, Yusuf bedya me.

²⁵Yusuf bera Matica bedya me, Matica bera Amos bedya me, Amos bera Nahum bedya me, Nahum bera Hesli bedya me, Hesli bera Nagai bedya me,

²⁶Nagai bera Maat bedya me, Maat bera Matica bedya me, Matica bera Simei bedya me, Simei bera Yosekh bedya me, Yosekh bera Yodah bedya me,

²⁷Yodah bera Yohanan bedya me, Yohanan bera Resa bedya me, Resa bera Zerubabel bedya me, Zerubabel bera Sealtiel bedya me, Sealtiel bera Neri bedya me,

²⁸Neri bera Malkhi bedya me, Malkhi bera Adi bedya me, Adi bera Kosam bedya me, Kosam bera Elmadam bedya me, Elmadam bera Er bedya me,

²⁹Er bera Yosua bedya me, Yosua bera Eliezer bedya me, Eliezer bera Yorim bedya me, Yorim bera yok Matat bedya me, Matat bera Lewi bedya me,

³⁰Lewi bera Simeon bedya me, Simeon bera Yehuda bedya me, Yehuda bera Yusuf bedya me, Yusuf bera Yonam bedya me, Yonam bera Elyakim bedya me,

³¹Elyakim bera Melea bedya me, Melea bera Mina bedya me, Mina bera Matata bedya me, Matata bera Natan bedya me, Natan bera Daud bedya me,

³²Daud bera Isai bedya me, Isai bera Obed bedya me, Obed bera Boas bedya me, Boas bera Salmon bedya me, Salmon bera Nahason bedya me,

³³Nahason bera, Aminadab bedya me, Aminadab bera Admin bedya me, Admin bera Arni bedya me, Arni bera Hezron bedya me, Hezron bera Peres bedya me, Peres bera Yehuda bedya me, Yehuda bera Yakub bedya me, Yakub bera, alda Ishak bedya me,

³⁴Ishak bera Abraham bedya me, Abraham bera Terah bedya me, Terah bera Nahor bedya me, Nahor bera Serug bedya me,

³⁵Serug bera Rehu bedya me, Rehu bera Peleg bedya me, Peleg bera Eber bedya me, Eber bera Salmon bedya me,

³⁶Salmon bera Kenan bedya me, Kenan bera Arpakhsad bedya me, Arpakhsad bera Sem bedya me, Sem bera Nuh bedya me, Nuh bera Lamekh bedya me,

³⁷Lamekh bera Metusalah bedya me, Metusalah bera Henokh bedya me, Henokh bera Yared bedya me, Yared bera Mahalaleel bedya me, Mahalaleel bera Kenan bedya me,

³⁸Kenan bera Enos bedya me, Enos bera Set bedya me, Set bera Adam bedya me, Adam bek dara, alda Imik Neyung adya me.