Read Nalca LUKAS 4 Bible Online

LUKAS 4 - Nalca bible

LUKAS 4

¹Wera Yesus ara, Imik Neyung Geisinya adya boro loboknya bera, alda Yordan mekek abaʾ ara yanggok dara, Imik Neyung Geisinya adya hwalek sam mok bo byuk.

²Dara, alda anyegeinira liga empat puluh sum anaso ulumok dara, Iblis adya sunubyaawok. Alda anyagan ulumok salek era, yokaʾ-yokaʾ denaʾ ara hyak gobdo orokokanya, ban salek seleb danggiga balamok dara, alda gwaneng ok ubok.

³Wera danyek Iblis adya alak lebokja, ”Anda Imik Neyung me ulumen dara, wera ban girik enyek roti gwanenga dalom helom,” hyok.

⁴Bok, Yesus adya Iblis ak lebokaʾ ara, ”Momnya dobokaʾ ara, Nim embengaʾ ulumakaʾ ara, roti gwaneng adyok embengaʾ unggulumak,” hyok.

⁵Dara, alda Yesus ak bobookanya, yok senenggom imik olok bo welebookanya, hyak wene sab-sab enyek, mandewal henggonggom, alak yok-yok mok soko an nidyaʾ ara amawok.

⁶Anya Iblis ara Yesus ak, ”Nidyaʾ migib unaʾ ab, senenggomaʾ dub unaʾ gebman ab dara, nidyaʾ ara seleb nak lenyok. Dara ban nidyaʾ ululanya nenera, nadya benyek eleganamna senewanenya bek eleganamna anasa, anak eleganenggen.

⁷Anasa, anda nak koma lumugoka gibnemen dara, ban nidyaʾ ara anjaʾ yokaʾ danamla,” hyok.

⁸Bok, Yesus adya Iblis ak saaboka lebokaʾ ara, ”Momnya dobokaʾ ulumlaʾ ara, Anja Wenelesilnya Imik Neyung bek ok giblemenekanya, alsamba ok unululom, wenyaboka momnya dobok,” hyok.

⁹Dara onoʾ alda Yesus ak eboka boboknya nera, Yerusalem heikek bo byuukanya, Imik Neyung gibnaʾ e erumaʾ dubuk, hyak imik bo sekel dil biniboka, alak lebokja, ”Anda aldib Imik Neyung me dara, an nong anyek, anyaganyebaʾ ara sakdo boublingdalom.

¹⁰Nera an momnya dobokaʾ ulumla sok, Ansamba dara, Imik Neyung ara alja lero nang ek, anak arawagenokaʾ aboka oruganesil.

¹¹Dara, anja yan era girik ek ob lumugagelyek aboka dara, lero nang edya soruk yangab salawanenjak,” hyok.

¹²Wenyek Yesus adya alak lebokaʾ ara, ”Imik Neyung yub ulumlaʾ ara, Anda anjaʾ Wenelesilnya Imik Neyung bek ara sunulyamenggom, hyak mem, alamla,” hyok.

¹³Wera Iblis ara alja ban nidyaʾ sunulyamanaʾ ara seleb unubdakok dara, alda Yesus ak ab gokoka byuukanya, pewalya sum donok senewoka diri ubok.

¹⁴Wera Geisinya bedya migib gebman, Yesus ara Galilea sokok sam saaboka yok. Dara alsamba leboka lelemek yub era, ban mok soko heik era nidyaʾ oboka lelewok.

¹⁵Dara ban salek era, Yesus ara Yahudi nim edya yuba don ek sam nim ek yuba lero yabalesuk dara, nimi nidyaʾ alak gigilemek.

¹⁶Dara, alda al beiyiboka nemok heikek, Nazaret heik biniboka, alda sob ulumok sok, Sabat mem sum era, Yahudi nim edya yuba don ek wekoka, yub einiwoununaʾ aboka sekemok.

¹⁷Dara, ununumnaʾ lenya Yesaya buku ek doboka alak elegemek dara, alda buku gelebookanya, alda ban yub en wenyaro momnya dobokaʾ digum anyek ara,

¹⁸”Wenelesilnya bedyaʾ Geisinya ara nak ulunel. Wera anasa, alda nak seleb sekiyiwanyokaʾ ara, perob lero yanggan yub era, bonaʾ garan nim ek alja lelelulaʾ aboka, alda nak seleb orowek doboka sekiyinyok.

¹⁹Nara igin yakaʾ kwellilisak nim ek siksamba yuba irigoka sablulaʾ aboka hnon, heng lum nim ek henga gwelegiyiwosululaʾ aboka hnon, igina ulumna nim ek, jakmanaʾ gebsununaʾ aboka hnon, anya Wenelesilnya bedya alja nimi blebnesil sum enyek, sumen unuwanesil aboka wenyalasululaʾ aboka hnon, nara an bokol yeilinyokaʾ,” ara Yesaya yub ek eiyiboka einiwok.

²⁰Wera seleb dara, buku siklewoka Imik Neyung e wa wenaʾ amba wa bomoknya bek saaboka elegok dara, alda bukuk. Dara, nimi nidyaʾ Imik Neyung ek an bukumek nim edya heng mandebnaʾ era alak keeboka ngeklumek.

²¹Dara Yesus ara sikenek an wenyaboka nek einiwousuk, ”An Yesaya yuba momnya dobokaʾ damok ara, sumen ugunuk an keblum dara, wera seleb gigiwal,” hyok.

²²Anya nimi nidyaʾ ara alak pe lelemla senemeekanya, alja lero balamok yub enyek hyak perobja senewoka, ganya salya ura lelelanya senemek. Anasa sikja lelemekaʾ ara, ”Benera Yusuf bedya me bok lelelaba,” abdangdo yabalamek.

²³Dara, alda sikenek, ”Ugunda nak ban bol nenenaʾ yub enyek wenyhenenulumaʾ ara, ’Wei, hwelesilimnya o, an damnya hweldalalom. Nidyaʾ yokaʾ-yokaʾ hyak lok soʾ anyek, Kapernaum heikek seleb unululumaʾ kelemoubaʾ ara, wera anyek anjaʾ meneng mok ok an, anyeganyebaʾ unululom henenulumaʾ anyaʾ,” hyok.

²⁴Anya onoʾ hnon wenhyokaʾ ara, ”Nara ugunuk hyak dib lebnesin, Nimi ben hnon ununumnaʾ lelelanya bera, aljaʾ meneng heik nim edya dara, nunja moknya benyaʾ senenggulumak.

²⁵Anya onoʾ nara ugunuk hnon wenyhenesin, dara ban wenyhenenanya nera hyak aldib. Ununumnaʾ lelemoknya Elia ulumok salek era, gibnaʾ winilya uboka walaʾ hnabbadya moka yangganaʾ lomok dara, mok enyeganera senenggom gwaneng okaʾ enyek lanamookanya, ban salek era nenyabo somogomek geleb era, Israeli sokok ara nauba ulumek.

²⁶Bok, Elia bek dara, sik ulumek gelewa en, gela hnon amba oruganggumok bok, alda Sidon sokok Sarfat heikek ulumok gel gek hnonok, alsamba bilom aboka orugomok.

²⁷Anya onoʾ ununumnaʾ lenya Elisa ulumok salek eneba, Israel sam ara nimi nauba bokaʾ ak gororomaʾ delesuk nimi hnon bok, sikda hnonok sibin anaba bokaʾ donaʾ orok bok, alda Siria nanga Naaman bek hnonok bokaʾ domok,” wenyaboka neksuk.

²⁸Ban wenyaboka lebokaʾ anyek, Yahudi nim edya yuba don ek an yuba longomek nim era kebek dara, hyak yu ganya bobek.

²⁹Dara sikda sekoka, Yesus ak walawoka heik gokgobok sam bo yakal byiikanya, mok soko dinibmanaʾ ak gweren sam yakdo boublingganob senewoka, yakdo dorogol byik.

³⁰Bok Yesus ara sik hnoum walawoka gabdo beiyiboka byuk.

³¹Dara, onoʾ Yesus ara Galilea sokok Kapernaum heikek biniboka, Sabat mem sum era, yuba nekoka lelemok.

³²Wera alja lero neklesukaʾ ara, hyak migibaʾ gebman pe lelemokaʾ anasa, sikda alja neklesukaʾ anyek hyak salye ura lelelanya senewoka kero bulumek.

³³Dara, ban Yahudi nim edya yuba don ek ara, nimi ben hnon bisaʾ wekemoknya bek hnon ulumok. Dara, benera alda hyak nauba ebngalogoka lemok,

³⁴Wei, anda Yesus Nazaretnya o, anab nub dara, hekaʾ ak ulumla do? Anda nuk orok nenewoka dengeiyiwosununaʾ aboka yeililam de? Nara anda benyaʾ senewoka ella ulunggenaʾ ara, ”Anda Imik Neyung bedyaʾ geisa ululamnya bek eiyinggen,” hyok.

³⁵Bok Yesus ara alak waboka lebokaʾ ara, ”Yuba sanaʾ gelegamenekanya, alak ab lo yibilom!” Wera danyek, ban bisaʾ era, gologomoknya bek soob salawoka yok nimi saramek an bobokaʾ seleb dara, wekemoknya bek ab gobookanya, hnon ol nebnaʾ lomok.

³⁶Dara, nimi nidyaʾ ara ganya loka daboka, sik moumen lebdangdo balamekaʾ ara, ”Alja salamla yub era hyak lokja! Dara alda senenggomaʾ uboka, migibaʾ gebman ab dadya, yu bisaʾ gong ek, goboka bululum aboka oruklesil dara, goboka yabalemak anasa, hyak lokja,” aboka lelemek.

³⁷Wenyek, alja an unulamla an yub era mok soko enyek an heik me nera nidyaʾ oboka lelewok.

³⁸Ban seleb dara, Yesus ara Yahudi nim edya yuba don ek lobok dara, Simon bedya ek bilimok. Wera, Simon al soumun gera poba neiknaʾ neiklamla aboka, yok nim edya Yesus ak nek elegemek.

³⁹Wera Yesus ara gen malamok ekla ak biniboka, poba neiknaʾ ara yakoka hwemok. Wera wene salek poba neiknaʾ ara denghyok dara, Simon aljaʾ soumun gera bukoka siksamba denaʾ youb einimok.

⁴⁰Wera sin dangoka henga wekel bok salek era, nimi yok-yok neiknaʾ salalemoknya nera, alak bo yalamek. Dara alja soruka sik eilib yok-yok diyiboka, sikenek hwelesuk.

⁴¹Dara bisaʾ gong dara, nimi weklesik nimek ab goboka balameekanya lero goblemekja, ”Anda Imik Neyung bedya me ululam,” wenyabgiga goblemek. Anya ban bisa gong era, sikda Yesus ara Kristus, nimi blebsinaʾ dubnya ulumokaʾ ella ulumekaʾ anasa, Yesus adya sikenek hyak gorogoka mem aboka lebookanya, yuba hnon sanaʾ lobganokaʾ aboka, yuba garawok.

⁴²Wera yubyek so dok dara, Yesus ara munaʾ ak olok, or pe gakdenaʾ ak byuk. Bok, nimi nauba alak elemeekanya, alda seleb eiyimek dara, alda sikenek lo bisilyek aboka, lo binggunusilim aboka lebek.

⁴³Bok alda sikenek lebokja, ”Nara Imik Neyung adya ban nenesa unuwolul aboka sokok sam bokol yeilinyok anasa, Imik Neyung wenesin heik yub, perob lero yanggan yub era, yok heik pik anaba nidyaʾ lero yabalamnamna bar,” hyok.

⁴⁴Dara, alda Yudea sokok Yahudi nim edya yuba don e pik nidyaʾ ara Imik Neyung yuba leb elekdo yabalesuk.