Read Nalca LUKAS 5 Bible Online

LUKAS 5 - Nalca bible

LUKAS 5

¹Dara onoʾ yok sum enyek, Yesus ara Genesaret mek gwan gek sam biniboka sekemok. Dara, nimi nauba Imik Neyung yuba kebnobaʾ aboka al nong ok sam obgokdangoka yalamek.

²Wera Yesus ara hadyaʾ don mek ekla bunaʾ me penya eiyimok bok, mek ekla bunaʾ dam nang era seleb mek inik yingginiboka, hadyaʾ oumaʾ aklenga mek eleklemek.

³Wera Yesus ara mek ekla bunaʾ ak welewoka Simon bek, ”Anja mek ekla bunaʾ era seʾ bukna anasa, mek gek ab mek ek wekdo doroganelom,” aboka molomok. Dara Yesus ara, mek ekla bunaʾ lom enyegan bukoka, nim ek Imik Neyung yuba neksuk.

⁴Wera Yesus ara seleb Imik Neyung yuba leboka nekgogowousuk dara, Simon bek, ”Anda hyak dom buruknaʾ nong ok pukoka biniboka, hadyaʾ dobnelam anasa, hadyaʾ oumaʾ akleng ara bobogalom,” hyok.

⁵Danyek Simon bedya Yesus ak, ”Neyung neklesilimnya o, nunda inimnek pik hyak yeiriwoka hadyaʾ dobnob sene elmab bok, mekaʾ sibin anaba hnon doldonaʾ orok bok, wera neyung anja oruganelem anasa, naba hadyaʾ oumaʾ akleng doroganamna,” hyok.

⁶Wera sikda hadyaʾ akleng ara seleb dorogomek dara, hadyaʾ ara hyak nauba domekaʾ adya wera, hadyaʾ oumaʾ ara deknewoka deneb einimok.

⁷Anasa wera, sikda sik kabo nang ek ugunda nuk aral yousululum aboka, soruk adya langam aboka youbdangamek. Wera sikda yok sik kabo nang era oka yeilimek dara, hadyaʾ era doboka limek bok, hadyaʾ mandebnaʾ nauba adya penya mek ekla bunaʾ dara, mek lomok sonom henomaʾ aboka ulurek.

⁸Simon bera, anyek unumokaʾ ak eiyiboka, Yesus adyaʾ saramek koma lumugoka giboka, ”Wenelesilimnya o, nara malya unaʾanya ulumnaʾ anasa, nak anyeb lo bilom,” hyok.

⁹Simon beb, alab neikaʾ ulumek nang eb dara, hadyaʾ nong anyek hyak nauba domekaʾ anyek, hyak loka dasuk.

¹⁰Wera onoʾ Simon bedya alja hemyabo neikek welemak nimi Zebedeus bedya mabo Yakobus beb Yohanes beb dara, neikso loka dasuk. Danyek Yesus adya Simon bek, ”Anda lok ganya bonggom, mem. Al wene salek ebaʾ ara moruwoka, anda hadyaʾ dololam sok, nimi dol yabalemnelam,” hyok.

¹¹Dara Simon beb, alja hemyabo yok nang eb dara, sikja mek ekla bunaʾ mek dubuk ab ara, mek gek beib lobek dara, yokaʾ-yokaʾ nidyaʾ loboka, Yesus ak diriga bilimek.

¹²Dara onoʾ yok sum enyek, Yesus ara, yok nauba heikek don ulumok. Dara, an Yesus ulumok heik ara, nimi ben hnon gororomaʾ delemoknya bek ulumok. Wera gororomaʾ delemoknya bedya Yesus ak eiyimok dara, Yesus ak hogung dib malyingginiboka molowokaʾ ara, ”Neyung o, neyung anda nak or hwebnun senenemen dara, or hwebnenesom,” aboka lelemok.

¹³Dara, Yesus adya gororomaʾ delemoknya bek soruka diyiboka lemokja, ”Nadya dara, or merewolul senemnaʾ anasa, or merewalom,” hyok. Dara al wene salek enyek, gororomaʾ ara dengamok.

¹⁴Dara, Yesus adya alja gororomaʾ delemokaʾ anyek hweboknya bek an, ”Nara seleb merewan aboka, nimi yok nim ek salyaʾ lero yabenggom, mem. Alda ugunja Imik Neyung yuba lenya bek, anda aldib merewalem henenggelaʾ anasa, anda alak amaldal bilom. Dara onoʾ, Musa bedya momnya dobok yuba sunuwoka, anda yok nim edya alda seleb merewal senewoka eibnokaʾ aboka, Imik Neyung ak pam oboka giboka beil bilom,” hyok.

¹⁵Bok Yesus amba yub era, mok soko nidyaʾ nauba so oboka lelero yabalamok dara, nimi nauba alja yuba keboka dobgiga, hnonda neiknaʾ hwebsululaʾ aboka yalamek.

¹⁶Bok, li hnonda Yesus ara albeyok gakdenaʾ ak sam heng uboka molowonunaʾ aboka balamok.

¹⁷Onoʾ yok sum enyek, Yesus ara anam neklesuk salek enyek, anyagan ara Parisi nanga hnon, Yahudi Imik Neyung yuba neklesik nanga hnon bulumek. Sikda Yerusalem ab hnon, Galilea sokok ab, Yudea sokok nimi heikek ab, nimi nidyaʾ yeilimek. Wenelesilnya bedya migib era, neiklemek nim ek hwebsululaʾ aboka, Yesus ak ulumok.

¹⁸Ban sum enyek, nimi ben hnon heimoknya bek esonaʾ adya yangawoka, nimi wene nang jaboka bo yeilimek. Bo yeilimek nang edya dara, Yesus ulumlyaʾ saram nong ok beibnobaʾ aboka dulumek.

¹⁹Ban anyagan ara, nimi nauba ulumekaʾ adya, pik yokaʾ pik bo wekna dara, hyak okna nonga dangamok. Anasa leboka sikja dara, erumaʾ dubuk bo welewoka, erumaʾ joboka Yesus ulumokaʾ nong ok, nimi hnoum esonaʾ ak meiyiwoka doblinggemek.

²⁰Bo yeilimek nang edya, Yesus adya hwebnamlaʾ anyaʾ dib senen ganya bomekaʾ ak eibsuk dara, heimoknya bek an, ”Hem o, anja malya unaʾ era seleb doboka bobogagen,” hyok.

²¹Dara wenyek, Yahudi nang eb, sikja Imik Neyung yuba neksin nang eb dara, sik moumen seiniwoka leldalamekja, ”Ban benera alda Imik Neyung si ak malya nenelamlaʾ anasa, alda heknya do? Imik Neyung ak hnonok malya unaʾ doboka boboganasuso bok anasa, nim ak dara, sikenek ab meewanggunuseng bok bar,” alamek.

²²Wenyaboka Yesus adya sikja seinimekaʾ ara, seleb ella ubsuk dara, ”Ugunda hekasa ugunja ganya lomok an heildalalum do?

²³Har sonya nek lebneseng, Seleb anja malya unaʾ anak ab meewagen, heneseng gom, alda Sekoka balom, heneseng gom?

²⁴Bok wenyek dara, nimi dibaʾ me nera sokok ara, malya unaʾ amba memesin migib ulunel ununaʾ ella danalum.” Anya onoʾ Yesus ara nonga heimoknya bek, ”Sekoka anja esonaʾ doboka bobmenekanya, or balalom!” hyok.

²⁵Dara, bera an wene salek nimi gangganek bukoka sekoka, alja esonaʾ doboka bobok dara, Imik Neyung ak perob aboka gibgiga ek byuk.

²⁶Nimi nidyaʾ ganya loka daboka, Imik Neyung ak nauba giblemek. Nimi nauba lok ganya boboka, ”Nunja sumen eibabaʾ ara hyak senenggom nongaʾ ak eibab,” aboka lelemek.

²⁷Dara onoʾ, Yesus ara goboka yibiniboka kemelemok enyek, mok soko amba rupiah molowoka dolomoknya, alja si Lewi bek, aljaʾ wa wen ek ab eiyimok. Dara Yesus adya alak, ”Anda nak an yalom,” hyok.

²⁸Wenyek Lewi bera sekoka nidyaʾ yokaʾ-yokaʾ loboka, Yesus ak neikaʾ makal bilimok.

²⁹Dara alda Yesus ab neikaʾ denenam aboka, alja ek denaʾ youlomok. Rupiah molowoka dolosik nang gong eb, nimi nauba yok nim eb neikaʾ bukoka delemek.

³⁰Parisi nanga hnon, Yahudi Imik Neyung yuba neksin nanga hnon wene nang edya, sikda lek ganya bomeekanya, Yesus adya alja yuba doro diriga ban nang ek, ”Ugunda hekasa rupiah molowoka dosin nang ab, malya nang eb, neikaʾ delelum do?” aboka heibsik.

³¹Ban wenyanaʾ anasa, Yesus adya sikinek saaboka lebokaʾ ara, ”Nim eik nim edya hwebneseng senenggulumak bok, alda neiklamna nim edya ok hwebneseng senelemak.

³²Nara nunda pe ulumab senelemak nim emba yanggumsa, alda malya unaʾ nim enyek, sikja malya unulumakaʾ ak ab, ganya dangawoka lobnokaʾ aboka yeilimsa,” hyok.

³³Nimi hnon Yesus ak lelemekaʾ ara, ”Parisi nang eb, Yohanes bedya yuba donaʾ nang era, gwaneng denaʾ loboka mololamna dara, denaʾ orok bok anyek, anak diriga yalanjak nim danara, salyaʾ gwaneng deblaboka ulumak,” hyek.

³⁴Anasa Yesus sikinek saaboka lebsukaʾ ara, ”Nimi ben hnon gela domsoʾ ak ara, gela domsoʾ amba nimi kemel yeiliseng nim era, or anam uluseng bok dara, ugunja dara, wera gwaneng meka denaʾ loboka mololsinililulum aboka oruganasom de?

³⁵Orok. Hyak wenyhenggunusom, bok gela doblenya bera sik gangganek sam ab dobnamla sum era eimik yanamla. Wera sik ban sum enyek, gwaneng meka loboka mololsinilimnemak,” hyok.

³⁶Dara, Yesus adya ban sununaʾ enyek sunuwoka sikinek lebsukaʾ ara, ”Nimi hnon youmaʾ denemso akleng ek, wenyok akleng gweldekdobaʾ edya denewoka wibnenggunuseng. Ban unuwanaseng dara, wenyok akleng eneba salyaʾ hiboka gweldek lobnesengaʾ anasa, wenyok gweldekoka losengnya nedya, youmaʾanya nek denewoka wil binisengaʾ anaba, neik digum danggunumso.

³⁷Anasonya nera, nimi hnon youmaʾ mek akleng ek, anggur meka gweb libnenggunuseng. Unuwanaseng dara, mek era gweboka liseng akleng ek ara denewanamso. Anasa, akleng denewanamso dara, mek era yek weininggoka, akleng ak dara, dib malya ubnamso.

³⁸Wenyokaʾ perobaʾ anyek gwebseng anggur mek era, wenyek akleng ek libneseng.

³⁹Nenesonya nera, wel anggur meka desonya bedya dara, onoʾ wenyok anggur meka denggunumso. Youmaʾ wel mek enyek hyak pe lelemla henemso,” hyok.