Read Nalca LUKAS 6 Bible Online

LUKAS 6 - Nalca bible

LUKAS 6

¹Dara onoʾ yok Sabat mem sum enyek, Yesus ara nim adya gandum dokomek wa pik yabalemok salek, alja yuba doro diriga ban nang edya gandum doka hnon denobaʾ aboka dakeekanya, sikja soruk adya gorogoka delemek.

²Bok Parisi wene nang edya lebekaʾ ara, ”Ugunda hekasa Sabat mem sum ununaʾ ara mem hyoknya nek blekoka unulum do?” wenyaboka heibsik.

³Wenyek Yesus adya sikenek lebokaʾ ara, ”Ugunda Daud bedya unumokaʾ ara, alab neikaʾ balamek nang eb dara, gwaneng ok ubsuk dara, alja unumokaʾ anyek, Imik Neyung yuba bukuk momnya dobokaʾ ara, ugunda einiwanggublum de?

⁴Dara alda Imik Neyung ek wekoka, Imik Neyung amba beillilemek roti gwanenga dobok dara, al hnon deregoka, onoʾ alab neikaʾ balamek nang ek hnon elegosuk. Dara ban roti gwaneng era, salyaʾ nang hyak denaʾ memekanya, alda Imik Neyung e wa gak nang ok deneseng bok anyekaʾ,” hyok.

⁵Dara onoʾ Yesus ara sikenek hnon lebokja, ”Nimi dibaʾ me ara Sabat mem sum amba Wenelesilnya ulumla,” hyok.

⁶Dara onoʾ hnon yok Sabat mem sum enyek, Yesus ara Yahudi nim edya yuba don ek wekoka, yuba lel eleklesuk. Dara anyaganera, soruka darasam heimoknya bek hnon ulumok.

⁷Dara, Yahudi Imik Neyung yuba neksin nang eb, Parisi nang eb dara, Yesus ak sondaʾ anasa miniwoka hekaʾ huboka lebnob senewoka yuba gak ebnobaʾ aboka, sikda Yesus ara, Sabat mem sum bok nimi hnon hwebnamla do senewoka diri keeblomek.

⁸Bok alda sikja seinimeknya nera seleb ella ubsuukanya, soruka heimoknya bek lebokja, ”Anda bukmenekanya hnoumunga seklom!” hyok. Dara benera bukoka sekel yibuk.

⁹Dara Yesus ara sikenek, ”Nara ugunuk heibnesin, Sabat mem sum era hekaʾ ak or unulunok hyok do? Perobnya nek ununaʾ ak gom, malyinya ununaʾ ak gom? Nim nong ak blebnaʾ ak gom, nim orok nenewoka onaʾ ak gom?” wenyaboka heibsuk.

¹⁰Wenyabgogowokaʾ seleb dara, alda nimi gokgob pik nidyaʾ keeb ganagokaʾ seleb dara, neiknaʾanya bek lebokja, ”Anja soruka nginigalom,” hyok. Dara heimoknya bera, alja lebok sok, soruka nginigoka okdo doroklomok enyek, alja soruk era seleb merewok.

¹¹Bok, Parisi nang eb, Yahudi Imik Neyung yuba neksin nang eb dara, yu heiboka, ”Hekaʾ huboka Yesus ak malya ubnemab do?” senewoka yuba sab einimek.

¹²Dara ban salek era, Yesus ara hnon meinik don heng uboka molowoununaʾ aboka welemok. Dara Yesus ara inimnek pik moruwoka, alda Imik Neyung ak molob gwelegemok.

¹³Wera dilinaʾ uboka gwelegel yabok dara, alda alja yuba doro diriga ban nang ek, mamagel youlululum aboka ebmamagosuk. Dara bokoka, obadya nang ok Imik Neyung yuba lenaʾ gak nanga danalum bar aboka weboka dobsuk. Wera weboka dobsukaʾ nang enyek, sikenek yuba lenaʾ gak nang aboka si silisak an,

¹⁴Simon, bok Petrus aboka si sibuk. Dara Simon alja weisa Andreas, Yakobus hnon, Yohanes hnon, Pilipus be hnon, Bartolomeus be hnon,

¹⁵Matius be hnon, Thomas be hnon, Alfeus bedya me Yakobus be hnon, Simon bek bok yok si Patriot alameknya be hnon,

¹⁶Yakobus bedya me Yudas be hnon, alja eimik era Yesus ak oblulum aboka yuba dil binimoknya Yudas Iskariot be hnon, doboka sekiyiwousuk.

¹⁷Dara Yesus ara meinik abaʾ ara, alja yuba doro diriga ban nang eb, yanggalamek ara bluk soklorobaʾ ak sam yinggyik. Dara anyeganera, onoʾ yok yuba dolomek nang eb, onoʾ yokmok-yokmok, hnonda Yudea sokok sam ab hnon, Yerusalem heikek ab hnon, yali sam penya mek gemek sam Tirus mok eb, Sidon mok eb yeindeboka longomek.

¹⁸Dara sikda yalameknya nera, hnonda Yesus adya Imik Neyung yuba lelemokaʾ anyek kelenobaʾ aboka yalamek, hnon nim era, sik neiknaʾ neiklemekaʾ anyek hwebsululaʾ aboka yalamek. Dara onoʾ sik bisaʾ goloklesuk nim eneba bisaʾ yakoka merellilisuk.

¹⁹Wera nimi nidyaʾ ara, Yesus ara nimi hwesin migib alak ab goblomokaʾ adya, nimi nidyaʾ merellilisukaʾ anasa, sikda Yesus adyaʾ akleng ek soruka dibibya dara, merewananobaʾ anyaʾ senewoka dulumek.

²⁰Dara Yesus ara, alja yuba doro diriga ban nang ek keebdaboka lebokja, ”Ugunda bonaʾ garana ululum nang o, Imik Neyung wenesin heik ulumlaʾ ara, ugunjaʾ ak ulusilaʾ anasa, ugunda pe ululum.

²¹Ugunda wen gwaneng ok ulusil nim era, eimik era, mona buknesilaʾ anasa, pe ululum. Ugunda wen engelelum nim era, eimik era, oksewanalumaʾ anasa, wera pe ululum.

²²Nimi dibaʾ me nemba leboka, sikda ugunuk walamnesak, hnonda bisaʾ si ak geklewoka derelemnesak, hnonda malya nenewoka di songa leboka walasija dara, wera pe ululum.

²³Youmaʾ ununumnaʾ lelemek nang ek anaba neikso anaso nauba unulusik. Dara onnya nenyek ugun hnon unul yabasija dara, ugunsamba deknaʾ ara nauba imik heikek ulumlaʾ anasa, ugunda pelesak aboka, sunugoka eiya hlalalulum.

²⁴Bok ugun wen dub ululum nang era, ugunda seleb senenya loboka boro delelumaʾ anasa, eimik era ugunuk omomaʾ ak okna dabnesil.

²⁵Onoʾ ugunda wen gwanenga denaʾ mona bukoka delelum nim era, eimik era gwaneng oka nauba kwebnesilaʾ anasa, omom nong ak ululum. Onoʾ ugunda wen okselelum nim era, eimik era ganya suguwoka engewanalumaʾ anasa, omomaʾ ak ululum.

²⁶Youmaʾ dara, sondaʾ anasa nunda ununumnaʾ lelemab nang alamek nang ek, nimi nidyaʾ perobaʾ lelesik sok, wera ugunuk yok nimi nidyaʾ adya, perobaʾ lelesija nim era hyak nauba omomaʾ ak ululum,” hyok.

²⁷”Bok wen ugunda nak an kelelum nim era, nara an wenyhenemna, Ugunda ugunja isaʾ nang ek wanaʾ uboka, ugunuk lek senelesija nim ek pe unulululum.

²⁸Ugunuk malya leboka wema dalasija nang emba, ugunja dara, perobaʾ lelelulum; ugunuk malya nenewoka derelesija nim enesa, aralasululaʾ aboka Imik Neyung ak henga uboka molololulum.

²⁹Ugunuk hnon nang edya ugunja darasam sum ek sam waboka obnesak dara, darasamnya neneba or obnelom henelum. Dara, onoʾ yok nang edya ugunja golun akleng ek dobija dara, wera ongon akleng eneba or dobnok senewolulum.

³⁰Onoʾ yok nang edya, bonaʾ ugunuk moloweisija dara, or elegolulum. Ugunja bonaʾ hokaʾ dobsija dara, onoʾ saaboka numok aboka, bleboka donggom, mem.

³¹Anya, ugunuk yok nim edya anaso unuweisiseng senewanalum dara, ugumbabya anasonya nenyek yok nim ek unuwolulum.”

³²”Anya ugunda ugunuk wanaʾ ulusak nim ok wanaʾ ulumun dara, hek deknaʾ ek ugunsamba lanawanasuso do? Nenera sik malya ulumak nim eneba, sikenek wanaʾ ulusak nim ek wanaʾ ulusak bok anasa lebna.

³³Dara, malya unaʾ nim eneba sikba unulumak bok anasa, ugunda ugunuk pe unulusak nim ok weboka wanaʾ ulumun dara, hek deknaʾ ek saaboka dobnesom do?

³⁴Anya ugunda yokaʾ hnon yok nim ek seʾ naba eimik onsok lunuwoka eleganenokaʾ senewoka eleganalum dara, hek deknaʾ ek dobnesom do? Dara nenera malya unaʾ nim eneba eimik dara, gong lunuwanenyak senewoka unu elegel lolomak bok anasa, lebna.

³⁵Bok ugunuk dara, ugunja isaʾ nim ek wanaʾ ulumunukanya, sikenek pe unulumnulum. Ugunja bonaʾ yok nim ek seʾ elek lobmun dara, naba lunuwoka men elegonulul senen ganya bonggom. Ugunda nenesonya nenyek unulumun dara, ugunja deknaʾ imik heikek nauba uboka, ugunda Imik Neyung imik ululanya bedya mabo dibaʾ ulumnelum ara an. Al Imik Neyung ara, alda perob unaʾ elgom ulumak nim ek hnon, onoʾ perob aboka gibnenggulumak nim ek anaba, pe unulusilaʾ anasa, ugumbabya unulumnulum.

³⁶Wera anasa, ugunja Imik Neyung ara angoo yadyek senewoka aralesilnya ulumlaʾ anasa, neikek ugumbabya angoo yadyek ganya adya unuldalalulum,” hyok.

³⁷”Imik Neyung adya ugunuk yana leleweisilyek anasa, ugunda yok nim ek yana lelenggom, mem. Imik Neyung adya ugunuk igin yakaʾ kweiyiweisilyek anasa, onoʾ ugunja yok nim ek ganya adya henga goubnenggom, mem. Nadya malya unaʾ Imik Neyung adya blebiyiwananel senewoka, anda yok nim ek sugunaʾ ganya ara, meebdanalum dara, Imik Neyung anaba, anja malya unaʾ era meewananggel.

³⁸Anja men yok nim ek arawamen dara, wera Imik Neyung ara ambabya lunuwoka eleganenggel. Wera anja yok nim ek unuro eleganemna senewoka pe sunuwoka keebdaboka eleklelamnya nera, ambabya Imik Neyung adya anak seleb al unuro eleganemna senewoka beillililanya nenyek, ambabya eleganenggel,” hyok.

³⁹Dara Yesus ara sikinek hnon yok sununaʾ enyek sunuwoka lebokja, ”Wera ben hnon heng lumnya bedya, yok heng lumnya bek arawoka neikaʾ binisereng de? Anaso dara, sikda penya neikaʾ gwerenek langa diniwanggunusereng de?

⁴⁰Sekolah me hnon ara anam dolomna salek era, neklesilnya be hwiboka geremseng so unggululabok, heknyek dobgiga balamnaʾ ara dobdakna danyek, wera neikek neklesilnya beneso dangalamla.”

⁴¹”Anda anjaʾ hengek senenggom gal booma ulunggelnya nera, pe eibdanggulamjok, hekasa anda anjaʾ hem bedya heng ek mek heng soloknaʾ enyek kemelelam do?

⁴²Dara anda anjaʾ hem bek lelelamja, Hem o, wera or anjaʾ heng soloknaʾ dobnenggen e, wenyalelam bok, anjaʾ heng ek senenggom gal booma era eibdanggunadyok dara, nera har sonya nek lelelam do? Anasa bol nenenaʾanya o, anja heng ek gal booma senenggomaʾ anyek men dobdamenaʾ adya, wera anjaʾ hem bedyinya mek heng soloknaʾ era anedya pe eiyiboka dobnelam” hyok.

⁴³”Dara pe mesaʾ uboka welelamla gal era, dok ara malyinya nek mounggulumlakanya, onoʾ eka lerelamla gal era perob gal dok ek mounggulumla.

⁴⁴Anasa gala nidyaʾ ara dokok ab ella dangalamak. Anya sabalaʾ gal ak ab, anggur doka daknenggulumak. Onoʾ giriknaʾ si gal pikik ab dara, bira daknenggulumak.

⁴⁵Dara nimi pe ulumak nim era, ganya lomok ara perobnya nok ulumlaʾ adya yuba salamakaʾ ara, sikja ganya ak ab dara, perobnya nok lanalamla. Bok malya ulumak nim era, ganya lomok ara malyinya nok ulumlaʾ adya, sikja ganya ak ab dara, malyinya nok lanalamla. An nenera alja yuba salamlaʾ ara, ganya ak ab lanalamla anasa, unulamla.

⁴⁶Ugunda nadya wenyalasinaʾ ara keboka unuwanggunadyok, hekasa nak, Wenelesilimnya o, Wenelesilimnya o, alanulum do?

⁴⁷Dara heknedya nak yeindeboka, nadya lelemnaʾ anyek pe kebnekanya unululanya bera, benera an nadya ugunuk wenyhenesinya benesoʾ ak ulumla.

⁴⁸Alja unaʾ era, nimi hnon e girik eilibek gasa darawoka somnaʾ anasoʾ ak ulumla. Benera alda soko lomok lok-lok aboka girik eilib yangawoka solomla. Dara moka bliboka mek ililamla dara, wera alda girik eilibek somnaʾ adya, e nera mel-mel anaʾ adya golol meneknenggulumla anasoʾ ak ulumla.

⁴⁹Bok heknyek nadya yuba kelenadyok, anyek lelemla senewoka ununggululanya bera, alja unaʾ era, soko eilibek gasaʾ sobnenggumna somna e nenesoʾ ak ulumla. Anedya moka bliboka, meka iliwan sum era, golol meneklamla sok, neikso alja unaʾ era anaso ak ulumla,” hyok.