Read Nalca LUKAS 7 Bible Online

LUKAS 7 - Nalca bible

LUKAS 7

¹Yesus ara nimi nidyaʾ ak seleb wenyaboka lebgogowosuk dara, alda Kapernaum heikek sam byuk.

²Dara Kapernaum heikek ara yin bonaʾanya bedya alja wanaʾ nong ulumok wa wenya benyek hyak neiknaʾ salamookanya somogoununaʾ ulumok.

³Wera yin bonaʾanya bera, Yesus ara nimi hweboka unulusilnya bera ulumla an yuba kemok dara, Yahudi dub nim ek nadya wa wenya hwebnamlaʾ anasa, alak e yanalum aboka orugosuk.

⁴Dara sikda Yesus ak yeindeboka, ”Neyung o, yin bonaʾanya bera alda anja arawanalam.

⁵Alda nunja sokok an nim ek wanaʾ uboka, Yahudi nim edya yuba don e sonaʾ hnon alja arawoka ulusil anasa,” aboka okoka lebek.

⁶Dara Yesus ara Yahudi nim eb neikaʾ yin bonaʾanya bedya ek byik. Wera Yesus ara e berem ok so yanggok dara, ”Neyung o, nara anak ara or pe yalem aboka wenyhenggunusinya anasa, salyaʾ kweldal yamenek aboka wenyaboka, nim ek Yesus ak wenyal bululum aboka orugosuk dara, wenyal byik.

⁷Hnonda leladya, ban nenesa leboka, na nong anaba anak ara yamenggom. Anasa or yub adyok wa wenya bera merewolul aboka yuba beibmen dara, alda merewanemla.

⁸Anasa wera, nara nadya imik eini dub nang yuba kelemna dara, onoʾ na damumduk onu ulumak nang era nadya yuba kelenyak. Nadya nimi yina bonaʾanya bek, Anyagan yalom, hen dara, yalamla. Onoʾ yoknya bek, Anda bilom, hen dara, alda balamla. Anya nadya wa wenya bek, Ban nenyek unuwalom, hen dara, alda keboka unulamla, wenyamla,” hyek.

⁹Dara Yesus ara ban wenyan yub enyek kebok dara, hyak loka dabok. Anasa Yesus ara alak diriga yalamek nang ek keeboka wenyhusuk, ”Nara ban benyek na lokja, Israeli nimi gangganek ara, ban unuwoka dib senenanya nera hnon mekaʾ eilinggulumna,” hyok.

¹⁰Wera Yesus ak el yeilimek nang era ek saaboka yanggek dara, wa wenya bera seleb meremokaʾ ak eibek.

¹¹Dara onoʾ Yesus ara hnon heik, Nain heikek sam byuk. Wera alja yuba doro diriga ban nang eb, nimi salyaʾ gong alak arawoka dobdo yabalamek nim eb nauba neikaʾ bilimek.

¹²Dara Yesus ara Nain heikek nauba pik sindamak sam nongok oka wekel bok dara, anyagan heik nim era, nimi beʾ gal ara an jaboka bo gobol yabek. Dara ban somogomok me nera yougel gedya hnonok yando me nek somogomok. Wera heik enyek an nim era nauba gel genyek an neikaʾ arawoka bo dil balamek.

¹³Wera Yesus ara me dam gel genyek eibuk dara, hyak angoo yadyek senewookanya alak lebokja, Genong o, anda engenaʾ ara mem!

¹⁴Wenyaboka somogomok me beʾ dam biniboka soruka salal yabok dara, nimi beʾ jaboka bo balamek nang era sek lobek. Dara Yesus ara, Wei, goubenya me o, nara anak wenyhenenggen, anda buklom, hyok.

¹⁵Wera somogomokaʾ anyek hwebokaʾ goubenenya bera, alda bukoka yuba sab einiwok. Dara Yesus ara me nen eiling gek, elegok.

¹⁶Dara nimi nidyaʾ lok ganya boboka Imik Neyung ak gigilemek. Anya sikja dara, ”Senenggom ununumnaʾ lesinya bera nu gangganek sam seleb lanawal. Imik Neyung ara alja mabo silibaʾ ak blebnunaʾ aboka, wera seleb yok!” alamek.

¹⁷Anedya Yesus ara anaso uboka unulamla an yub era, Yudea mok soko nidyaʾ heik gokgobok sam anaba oboka lelewok.

¹⁸Dara Yohanes Pembaptis bera alja yuba doro diriga ban nang edya, Yesus adya nidyaʾ unulumoknya nera, Yohanes bek nekdo byik.

¹⁹Dara Yohanes Pembaptis bera alja mabo penya nang ek yoururum aboka, sikda Yesus ak heil binirum aboka lebsukja, ”Neyung o, anda eimik yanamla hyoknya ben gom, nunda yoknya bek diri ulumnemab gom?” aboka hei yanarum aboka orugosuk.

²⁰Wera ban nang era Yesus ak birik dara, ”Yohanes Pembaptis bedya, alak heil binirum aboka orugeisilaʾ anasa heibnenggenem. Neyung o, al anak Imik Neyung yuba lebokaʾ sunuwoka yanamla alamaknya bera anak gom, nunda yok eimik yanalanya bek diri ulumnemab gom?” aboka heibdek.

²¹Yesus ara ban salek nong era, nimi nauba yok-yok neiknaʾ damok ek ab, igina kweboka okna ulusuknya nek ab, bisaʾ gong goloklesukaʾ hnon yakoka, hwelesuukanya, henga lum nimi nauba mereldilisuk.

²²Anasa Yesus adya sikenek, ”Ugunda Yohanes Pembaptis bek saaboka biniboka, hekaʾ ak ugunja eiyiboka kelelumaʾ anyek, heng lum nim era gwelegoka eillilemak, yana heilimla nimi pe sekoka yabalamak, gororomaʾ adya malya uro delemla nim eneba pe bokaʾ dolomak, o ounugamna nim era kelemak, seleb somogamna nim era embengaʾ bukillilisil, Imik Neyung adyaʾ perob lero yanggan yub era bonaʾ garan nim ek leb elekdo yabalamnaʾ anyek nekdo binirum.

²³Nak yokaʾ-yokaʾ amba geregoka lek senewoka longgulunelnya bera, pe ulumla,” hyok.

²⁴Wera Yohanes Pembaptis bedya Yesus ak heil binirum aboka bokosuk nang era seleb birik dara, Yesus ara anyagan nimi nauba longomek nim ek, ”Ugunda heknyek eibnobaʾ aboka hwalek sam ara bililum do? Leiya ak kaboʾ adya bo geklamlyaʾ anyek eibnobaʾ aboka bililum de?

²⁵Ugunda hekaʾ ak eibnobaʾ aboka bililum do? Nimi ben hnon boksoma pe ongolenya benyek eibnobaʾ aboka bililum de? Perob boksom enyek ongowoka, denaʾ pero-pero deregoka ulumak nimi, perob dub nang ulumak heikek ok ulumak.

²⁶Anasa dara, ugunda hekasa bililum do? Ununumnaʾ lelemoknya bek eibnobaʾ aboka bililum de? Aldib, alda hyak onoʾ naubaʾ imik ununumnaʾ lenya bek ulumla.

²⁷Anasa ban alsamba dara, Imik Neyung yuba bukuk sam momnya dobokaʾ ara, ” Imik Neyung adya dara, nadyaʾ boknanya bera an e. Ansamba pika yarawogululaʾ aboka, anda anam bok, alak men mengewoka bokol binimna!” wenyaboka dobok.

²⁸Nara ugunuk wenyhenesin anyek beknelum, Nimi gelewa adya nidyaʾ sokok an beillilimakaʾ ulumak nim era, Yohanes bek senenggomnya ulumla sokaʾ ara, hnon mekaʾ alsonya bera hnon unggulumek. Bok, alda nim Imik Neyung wenesin heikek ara, hyak mekaʾ anyek ululanya benyek ara, Yohanes bera mek so bok, alak danyek senenggomnya bek ulumla,” hyok.

²⁹Nimi nidyaʾ nim, mok soko amba rupiah molowoka dolomek nang eb danaba, Yesus adya ban wenyaro lelemok yuba kemek nim era, Imik Neyung adya unulululum hyok yuba perob senemek nim era sik nong anyek, anya Yohanes bedya meka dasuk nim era Imik Neyung adya peldisinaʾ anyek dib senewek.

³⁰Bok Parisi nang eb, Imik Neyung yuba neksin nang eb dara, Imik Neyung adya unu webnesin senemokaʾ damok ara, dobnenggunumab aboka lek senemek. Dara onoʾ sikda hnon Yohanes bedya dara, meka dabsilyek senemek.

³¹Dara onoʾ Yesus ara lebokja, ”Nimi wene salek ulumak nim era, nadya dara, hekaʾ anasoʾ ak sunuwoka lebnamna do? Sik nong ak dara, hekaʾ anasoʾ ak ulumak do?

³²Sik nong ak dara, deknaʾ gasaʾ ak memabo buma hnon bukoka, onoʾ yok mab ek lelemakja, Nunda ugunsamba eiya hlabnesom bera seblesab bok, ugunda perob senewoka sunuknenggululum! Anya, nunda ugunsamba ganya engen bera seblesab bok, ugunja dara, ganya suguwoka engenggululum! aboka wenyaldalamak mab enesoʾ ak ulumak.

³³Dara Yohanes bera seleb yeiniboka, alda gwanenga meka lobsiniwoka ulumok dara, ugunja dara lelelumja, Alda bisaʾ wekok, wenyalalum!

³⁴Dara ono, nimi dibaʾ me nera yeiniboka, alda gwanenga meka deregoka ulumla enyek, ugunja dara, Ugunda benyek kendululum! Denaʾ hwamnya, yu meka deregoka ganya uu anaʾ hwamnya, rupiah donaʾ nang eb, malya unaʾ hwam nang edyaʾ sikjaʾ hem benya, alalum.

³⁵Bok, geremseng unaʾ damok ak dara, alak dib dolomak nim edya danyek, dibaʾ pelemak beknaʾ ulumla,” hyok.

³⁶Dara Parisi nang ben hnon alja Yesus ak nadyaʾ ek neikaʾ denenam aboka yalom amok dara, alda biniboka bukoka delemok.

³⁷Wera heik enyek ara, gela malya unaʾ hnoum ulumok gel ge hnon, nidyaʾ ella ulumek gel gek ulumok. Dara gel gera kebok enyek, Yesus ara Parisinya bedyaʾ ek sam delemla an yuba kebok dara, alda perob song ngiknaʾ mek eb boboka Yesus delemokaʾ ek sam yok.

³⁸Wera gel gera Yesus delemok ak sam alda weilik sekoka, engenaʾ gadyaʾ eboka, alja heng mekaʾ era Yesus adyaʾ yan sangak sam niniwoka, Yesus adya yan ak ara, alja hong edya heng mekaʾ luboka, giboka, perob ngiknaʾ mek era an yanek an yek golumok.

³⁹Wenyek Parisinya bera Yesus ak nadya ek sam denenam aboka e bilimoknya bedya an unuwokaʾ anyek eibuk dara, alja ganya lomok seiniwokja, ”Alda ununumnaʾ lenya bek dara, ban unulamla gel genera alda heknya, alda genyaʾ senewoka ella danamso,” senemok.

⁴⁰Dara Yesus adya Simon bek, ”Simon o, nadya yokaʾ don anak hnon wenyhenenggen,” hyok. Danyek Simon bedya Yesus ak, ”Yo, neyung o, or wenyhenelom e,” hyok.

⁴¹Dara, ”Nimi penya nang edya yoknya bedya rupiah enyek deblorek. Nimi ben hnonda denga yubaʾ lambadya rupiah ak deblomok dara, ben hnonda denga yubaʾ hnonok rupiah ak deblomok.

⁴²Bok rupiah deblorek nang era, lunuwamenggom anasa, wera rupiah damnya bedya sikja deblorek rupiah era deknenggununurum, or deb lobnerum hyok. Anasa ban rupiah deblorek penya nang dara, heknyek pewanel aboka nauba so wanaʾ ulumnamso do?” wenyaboka heibok.

⁴³Wenyek Simon bedya dara, ”Nadya dara, nauba rupiah deb losonya benyek pewanel aboka nauba so wanaʾ ubnamso,” hyok. Dara Yesus adya Simon bek, ”Anja seinilamnya nera aldib seinilam,” hyok.

⁴⁴Dara onoʾ Yesus ara gel genyek an keeboka Simon bek lebokaʾ ara, ”Anda ban gel genera seleb eiyilam de? Nara anjaʾ ek anam yanggan dara, anda nadya yana mek eleganamna senewoka meka hnon gweboka orowek beibnenggubmanelem bok, ban gel genera alja heng mekaʾ edya nadya yana mek elegoka, onoʾ alja hong edya lubnel.

⁴⁵Anda nak pe gibnenenggonggom anjaʾ ek doro dibnelem bok, ban gel genera anam wekel yanggan salek ebaʾ moruwoka, nadyaʾ yan ak meka hmobdibigenel sok dangamla.

⁴⁶Anja dara, nadyaʾ huk dubuk ara, hong ngiknaʾ mek hnon ngiknenggunelem bok, ban gel genera, alda nadyaʾ yan ak sam perob song meka ngikenel.

⁴⁷Anasa nara anak wenyhenenggen, alja wanaʾ nauba unululanya nenesa, wera aljaʾ senenggom malya unaʾ unululanya nera nidyaʾ doboka bobogamla! Bok, malya unaʾ mekaʾ doboka boloklelanya bera, wanaʾ unaʾ anaba mek ok ulumla,” hyok.

⁴⁸Dara onoʾ Yesus ara gel genyek an, ”Anja malya unaʾ dara, anak ab seleb memenggen,” hyok.

⁴⁹Wenyek nimi yok nim, Yesus ab neikaʾ bukoka delemek nim edya sik moumen ganya lomok, ”Ban benera heknyek ulumlaʾ adya, nim adya malya unaʾ era sikenek ab memelesil do?” aboka seinimek.

⁵⁰Bok Yesus ara ban gel genyek an, ”Anda nak dib senenelemaʾ adya, anak seleb blebgelaʾ anasa, anda ei-ei ganya boboka, or binilam!” hyok.