Read Nalca YOHANES 1 Bible Online

YOHANES 1 - Nalca bible

YOHANES 1

¹Hyak men youbuka, nidyaʾ uyiwanggom bok, yub ara seleb ulumok. Yub ara, Imik Neyung ablaboka ulureekanya, yub ara Imik Neyung ulumok.

²Hyak men youmaʾ enyek ab moruwoka, yub ara Imik Neyung ablaboka ulurek.

³Yokaʾ-yokaʾ nidyaʾ ara al adya uyimok. Yoknya nedya, hnonok sibin anaba uyiwanggumok.

⁴Al lomok ara embeng unaʾ damok ulumlakanya, ban embeng unaʾ ara nim ek dilinaʾ yebellilisil.

⁵Ban dilinaʾ adya gunaʾ ak sam yeblamlakanya, gunaʾ adya dilinaʾ ak sikleldinggulumla.

⁶Nimi ben hnon alja si nera Yohanes, Imik Neyung adya wa weblulaʾ aboka bokol yeilimok.

⁷Al pik uboka nimi nidyaʾ dib senewanokaʾ aboka, ban dilinaʾ enyek, geklewoka neksununaʾ aboka yeilimok.

⁸Al nong ak dara, ban dilinaʾ nong unggulumok jok, ban dilinaʾ enyek, anya aboka neksunun aboka yeilimok.

⁹Ban dilinaʾ ara dib nongnya ulumookanya, yeindeboka, nimi nidyaʾ ak sokok an yebellilisil.

¹⁰Alda sokok an ulumookanya, soko ara aladya uyimok bok, soko nim edya dara, alak elgom ulumek.

¹¹Aljinya nek yeilimok bok, alja meneng mok nim edya dara, alak perobaʾ leboka dobnenggumek.

¹²Bok, alak dib domek nanga nidyaʾ ara, alja si nek dib senemek nim era, Imik Neyung mabo dangalamak migiba elegosuk.

¹³Dara, nimi lunuwoka beillilisakaʾ adya gom, soko nang ganya seininaʾ adya gom, nimi unuwanamna senelamla adya gom, Imik Neyung adya ok Imik Neyung mabo nenesuk.

¹⁴Yub ara soko nimi nong dangamookanya, wanaʾ uboka eleksinaʾ hnon, dib yub hnon, alak deknewoka, nun gangganek ulumok. Dara, alak imik nenemok nong senedyaʾ migib era, Imik Neyung alja hnonok me ulumokaʾ adya nong senedyaʾ eiyimouba.

¹⁵Yohanes bedya alsamba geklewoka nekesuk. Hnon wenyaro lelemokaʾ ara, ”Nak dara eimik, alda orowek men ulumokaʾ anasa, al eimik yanalanya bera, alak dara senenggomnya, nak dara meknya, wenyamsaʾ ara, ban benyek lemsa,” hyok.

¹⁶Dara, alja deknewoka ulumlaʾ ak ab, nunda nidyaʾ domouba. Alja wanaʾ uboka eleksinaʾ elegel sounulusilekanya, sobaʾ dolmorulumab.

¹⁷Imik Neyung adya unuwanalum an yub ara Musa bedya elegesuk bok, wanaʾ uboka eleksinaʾ hnon, dib yub damoka hnon dara, Yesus Kristus adya bo yeilisuk.

¹⁸Nimi hnonok adya, Imik Neyung bek heng eilinaʾ sibin anaba orok bok, Imik Neyung alja me hnonok ara, alja neyung beb neikaʾ lelewoka uluraakanya, nadya neyung bera ban anaso ulumla aboka nuk amasuk.

¹⁹Yerusalem heikik ulumek Yahudi nang edya, yuba gak nang ab, Lewi nang ab, anda heknya do aboka Yohanes bek heil bululum aboka orugomek dara, Yohanes bedya ban wenyaboka laga lebok,

²⁰”Nara Kristus nimi blebsinaʾ dubnya unggulumna,” hyok. Alda gununaʾ loboka, laga poboka lebok.

²¹Dara, alak heimek, ”Ban wenyalam dara, heknya ululam do? Anda Elia de?” aboka heibek bok, ”Nara Elia benyaʾ gomaʾ,” hyok. Dara, anda eimik yanamla alanjaknya ununumnaʾ lenya bera anda an de?” hyek. Bok, ”Orok,” hyok.

²²Dara onoʾ ”Dara, anda heknya ululam do? Orugosak nang ak ban wenyamla henemabaʾ anasa, nara benyaʾ aboka neksilom. An dam nang ak hekaʾ aldalalam do? aboka heibek.

²³Alda wenhyok, ”Ununumnaʾ lelemoknya Yesaya wenyamok sok lebsin, Nara gasak sokok ulumnakanya, Wenelesilnya alja pik jong peiyiwolulum aboka lelenanya ulumna,” hyok.

²⁴Heil bululum aboka orugosik nang danera, Parisi nang ulumek.

²⁵Dara, sikda Yohanes bek, ”Anda Kristus unggululam, Elia unggululam, eimik yanamla alamek ununumnaʾ lenya unggululam jok dara, hekasa meka dalasilim do?” aboka heibek.

²⁶Alda wenhyok, ”Nara mek dem adya ok dalasin bok, ugun gangganek sam ara, ugumba elgom ululumnya ben hnon ulumla.

²⁷Alda eimik nak yanalanya bera, alda senenggomnya bek anasa, nara meksonya bedya dara, alja yan ongonaʾ henga loboka gwiriwanggunusinya,” hyok.

²⁸Ban nidyaʾ unulumoknya nera, Yordan meka gobuka eer sam Betania heikek Yohanes bedya meka dalasukaʾ ak ab ulumok.

²⁹Ampum ara, Yohanes bedya Yesus ara alak yalamokaʾ eiyimok dara, ”Soko nimi malya unaʾ doboka boboganesilnya Imik Neyung domba pam ara kendululum.

³⁰Nak eimik yanalanya ara, alda men ulumok anasa, alda senenggomnya amsaʾ ara, ban benyek lemsa.

³¹Nababya alak men ella unggulusebok, alda Israeli nim eibnokaʾ aboka meka dabgiga yeilimsa,” hyok.

³²Dara, Yohanes bedya ban laga lebokaʾ ara, ”Geisinya ara yalma wining anasoʾ imik ab yingginiboka alak bul yeilimokaʾ eiyimsa.

³³Alak ella ubnenggusinya bok, mek adya dalalom aboka orugonyoknya bera nak wenyanyok, Geisinya yingginiboka bul yalyaʾ eibnelamnya bera, wera alja ugunuk Geisinya adya mek dibaʾ dalamnesilnya bera alan, henyok.

³⁴Dara, ban eiyimsakanya, ban benera, Imik Neyung alja me ulumlaʾ ara alan aboka laga lelesin,” hyok.

³⁵Ampum ara, onoʾ anyagan Yohanes beb, alak diriga balarekaʾ penya nang eb, neikaʾ ulumek.

³⁶Dara, Yesus ara ono sam yabalamokaʾ eiyimok dara, alda wenhyok, ”Kendururum, Imik Neyung alja domba pam ara alan,” hyok.

³⁷Alak diriga balarek nang penya alja lebokaʾ kerek dara, sikda Yesus bek diriga balarek.

³⁸Yesus al kemel samalamookanya, al weilik sam yalarekaʾ eibuk dara, wenyhusuk, ”Ugunda hekaʾ aboka do?” hyok. ”Rabi o, anda har sam malalam do?” arek. (Rabi ara nunja yub era, neklesilimnya aboka lerek).

³⁹Alda wenyasuk, ”Or yorurum. Eibnerum,” hyok. Dara, sikda onoʾ yalareekanya, al ulumokaʾ eiyireekanya, ban sum neikik ulumek. Sinik jam empat so ulumok.

⁴⁰Ban kereekanya, Yesus bek diriga bilirek nang penya ak dara, ben hnon Simon Petrus alja weis Andreas be ulumok.

⁴¹Alda men unumokaʾ ara, alja dong Simon be eboka alak wenhyok, ”Nunda Mesias seleb eiyimab,” hyok. (Kristus anasa lebok).

⁴²Dara, Simon benyek Yesus bek bo yeilimok dara, Yesus adya Simon bek henga keemookanya wenhyok, ”Anda Yohanes bedya me Simon ululam. Wera Kefas aboka si silimnenjak,” hyok. (Kefas si ara, Petrus andanasa lelemak).

⁴³Nenyek sum ara, Yesus ara Galilea sokok binimna senemok. Dara, Pilipus bek eibuk dara, ”Anda nak diriga yananelem,” hyok.

⁴⁴Pilipus bera, Andreas beb Simon beb, sikda neik Betsaida heik nang ulumek.

⁴⁵Pilipus bedya Natanael be eiyiboka alak, ”Musa bedya unuwanalum an yub sam alak weboknya bera, ununumnaʾ lelemek nang alak wemeknya bera, eiyimab. Nazaret heik nang Yusuf bedya me Yesus alak eiyimab,” hyok.

⁴⁶Natanael wenhyokaʾ ara, ”Nazaret alam de? Perobaʾ ara, Nazaret heik ab lanawanamso de?” hyok. Wenyek Pilipus bedya, ”Kemel yalom,” hyok.

⁴⁷Yesus adya Natanael oka yokaʾ eibuk dara, wenhyok, ”Israeli nang yokaʾ ara alan. Sondaʾ ara al lomok hyak unggulumla,” hyok.

⁴⁸Natanael bedya, ”Anda hekadya nak ella ulunelem do?” hyok. Wenyek Yesus adya, ”Pilipus bedya youbnenggubmagel bok, anda ara gal damak ulmalama wenyek eiyinggen,” hyok.

⁴⁹Dara, Natanael bedya, ”Rabi o, anda Imik Neyung me ululam, anda Israeli nang edya senenggom dubnya ululam,” hyok.

⁵⁰Yesus alak, ”Ara gal damak ulmalama eibgenekanya lebgenaʾ adya, dib senelam de? Anda hyak senenggom so unaʾ eillilemnelam,” hyok.

⁵¹Onoʾ Yesus alak, ”Ugunuk dib lebsin, ugunda nidyaʾ ara im pik bakoka, Imik Neyung lero nang adya nimi dibaʾ me ak wele golugoka ulumnamakaʾ eibnelum,” hyok.