Read Nalca YOHANES 10 Bible Online

YOHANES 10 - Nalca bible

YOHANES 10

¹”Nara ugunuk dib lebsin, Nimi ben hnon, domba pama pik yokaʾ ak weknaʾ loboka yok pik gelelenga meknewoka weklelanya bera, alda hokaʾ donanya ulumla.

²Anasa wera, domba pam pik yokaʾ ak uboka weklelanya bera, pama beilinanya yokaʾ nongnya bera alan.

³Pam lekaʾ ak sam welelanya bedya dara, pama beiyek yibinokaʾ aboka pika bakna dara, pam ara damnya bedya yuba keboka, nidyaʾ ellaʾ gigiro si yok-yok silisin dara, beiyik goboka mengelesil pika balamak.

⁴Domba pama gong dara, nidyaʾ seleb beiyik sam bo goubsin dara, domba damnya bera mengewoka balamna dara, sikda alja yub orowek ella ulumakaʾ adya, keboka eimik diriga balamak.

⁵Bok yok salyaʾanya bek dara, alja yuba sanaʾ elgom adya, yoknya bedya youbol yabasuso dara, alak kenaʾ loboka yeiri biniseng,” hyok.

⁶Dara, Yesus adya ban yuba sunuwoka lebsuk bok, sikja dara, damok ara anasa lemla senewoka ella danggumek.

⁷Dara, onoʾ hnon saaboka lebokaʾ ara, ”Nara ugunuk dib lebsin, Na nong anyek domba pam amba pik dibaʾ ulumna.

⁸Na pam damnya anam yanggunabok, yok nim enyek men yalameknya nera, hokaʾ donaʾ nang ek yalameekanya, sikja yuba sanaʾ yok anasa, domba adya sikja yuba kenggulumek.

⁹Nara pik nong dibaʾ ulumna e. Heknedya pik dibaʾ ak uboka weklelanya bera alak blebnamla. Dara, pik dibaʾ pik bini yeini uboka perob denaʾ deregoka ulumnamla.

¹⁰Hokaʾ donaʾ nimi yalamak dara, hokaʾ dobnun, nim obnun, malya uboka soldob menegonunaʾ aboka yalamak bok, nak dara, embengaʾ unaʾ dibaʾ elegoka, hyak nauba pe ulunokaʾ aboka yeilimsa,” hyok.

¹¹”Nara domba pama pe beilinanya dibaʾ ulumna e. Domba pama pe beilinanya dibnya bera, alja nong enyek pam amba somogamnyaʾ anaba senelamla.

¹²Bok, salyaʾanya rupiah deknenjabaʾ anasa, pama geregoka bo ululom ananya bera bo ulunabok, bei gama yangganaʾ eibna dara, nadya pam gomaʾ senewoka, lok anasa pama loboka yeiri balamla. Dara, bei gam adya domba pama nidyaʾ ara doluwoka ob menegoka yaklamla.

¹³Salyaʾanya bera alda deknaʾ amba ganya hwiboka welemlakanya, domba pam ak ganya goluwoka bo unggulumlaʾ adya, bei gam adya domba obnunaʾ aboka yanggan dara, alda lok anasa yeiri balamla.

¹⁴Nara pe domba pama beilinaʾ yokaʾ nongnya ulumna e. Neyung bedya nak ella ulunelekanya, nababya alak ella ulumna sok, anasonya neikik nababya nadya domba ak ella ulusin dara, sikda nak onoʾ ella ulunyak. Anasa, nara siksamba somogonun senelamna.

¹⁶Dara onoʾ nadya domba pam gong dara, yok lekaʾ ak sam hnon ulumak. Sikbabya hnon anyagan bo yanasin. Dara, sikda hnon nadya yuba pe keboka, anyagan orowek men ulumak pam eb neikaʾ ak hibnya dara, nadya yokaʾ pama hnonok, nak pama beilinanya hnonok danamla.

¹⁷Nadya nong anyek, saaboka dobnanabok, nim amba somoganesin senelamnaʾ anasa, nadyaʾ neyung nak wanaʾ nauba ulunel.

¹⁸Na nong ak dara, nadya ganya doboka or obnulum anaʾ orok bok dara, wera obnenggununeseng bok, nadya ganya doboka or ubnulum henesinya. Anasa, nara ganya doboka eleklesinya uboka, onoʾ saaboka onsok donaʾanya ulumna. Ban wa nera Neyung bedya nak unu welelulaʾ aboka elegenyok,” hyok.

¹⁹Yesus adya ban wenyaboka lebgiga balamok dara, Yahudi nang edya onoʾ nauba ganya bokdangoka ulumek.

²⁰Nimi nauba wenyalamekaʾ ara, ”Ban wenyalalanya nera bisaʾ gologoka serema salalamlaʾ anasa, hekasa ugunda alak kelelum do?” aboka lelemek.

²¹Bok onoʾ yok nang edya hnon lelemekaʾ ara, ”Bisaʾ gologanggumna nang era yuba salamlaʾ anasa, bisaʾ gologosonya bera henga lum nang ek henga gwelegoka hwebnamso de?” aboka lelemek.

²²Ban salek enyek, Yerusalem heikek Imik Neyung e meewoka pika bakamekaʾ beknaʾ sum dangamok. An salek era saragenaʾ li ulumok.

²³Dara, Yesus ara Imik Neyung ek Salomo bedya makoka somok e sindamak wekoka kemero yabalamok.

²⁴Ban sum enyek, Yahudi nang era Yesus ak aknel ganagal yeiniboka, ”Anda nuk lobaʾ nenelesilimaʾ ara hek sum lobnesilim do?” aboka heibek. ”Anasa wera, anda aldib Kristus nimi blebsinaʾ dubnya ulumen bok dara, nara alan aldib ulumna aboka or laga poboka leblom,” hyek.

²⁵Dara, Yesus adya sikenek lebsukaʾ ara, ”Nara ugunuk seleb lebsisa bok, nak dib senenggulunulum. Nadyaʾ neyung be si sibuka yokaʾ-yokaʾ lok soʾ unulamnaʾ anadya, nak okoka beknaʾ laga lelesil.

²⁶Ugunda nadya pam unggululumaʾ adya, nak dib senenggulunulum.

²⁷Nadya pama yokaʾ ak dara, nara sikenek ella ulusinekanya, sikda nadya yuba keboka nak diriga yalanyak.

²⁸Nara sikenek sobaʾ ulmorulunokaʾ aboka embengaʾ unaʾ eleganesin dara, sikda hyak somoganggunumak. Nimi yok nim edya nadya soruk ak ab hyak bleboka dobnenggunusak.

²⁹Nadyaʾ neyung bedya, sik nonga nak doboka elegenyoknya bera, yokaʾ-yokaʾ nidyaʾ ara mek so bok, alda hyak senenggomaʾ imiknya ulumlaʾ anasa, alja bo ulusilaʾ anasa, alja soruk ak ab yoknya bedya bleboka dobnenggunusil.

³⁰Nab Neyung beb dara, hnonok ok ulunam,” hyok.

³¹Dara onoʾ saaboka Yahudi nang edya, Yesus ak girik adya doboka obnobaʾ aboka ulumek.

³²Bok onoʾ Yesus adya sikenek lebsukaʾ ara, ”Nadyaʾ neyung bek ab lanalamla unaʾ enyek ugun hogung ak nauba unulusinaʾ anasa, har nenyek malya unulamnaʾ anasa girik adya obnenobaʾ aboka ulunulum do?” hyok.

³³Dara, Yahudi nang edya Yesus ak, ”Anja pe unululam wa nenesa gom, alda an nong anyek nimi sirikaʾ bok, nara Imik Neyung me aboka Imik Neyung ak malya nenelelamaʾ anasa, girik adya obgenobaʾ aboka ulunjab,” hyek.

³⁴Dara, Yesus adya sikenek, ”Ugunja unuwanalum an yuba momnya dobokaʾ ara, Imik Neyung adya, ugunda im nang ululum amok, aboka momnya dobok.

³⁵Anasa, Imik Neyung yuba doboka unulumek nim ek, im nang aboka si sisukaʾ anasa, wera nadya Imik Neyung bedya me nera, nara an alamna dara, ugunda hekasa nak malya lelemla aboka, yana kilinulum do? Nera Imik Neyung adya orowek munaʾ geboka sokok an bokol yeilinyoknya ulunabok unulunulum.

³⁷Nadyaʾ neyung bedya nak welelom aboka elegenyok wa nenyek unuwoka wenaʾ orok dara, wera ugunda nak dib senenenggom mem.

³⁸Bok nadya dara, unuwoka welenabok, ugunja danyek nak dib senenaʾ orok bok, nadya welemna wa nenyek keeboka dib senewolulum. Anadya wera, Neyung bera nadya nong lomok ulunelekanya, nara alja nong lomok ulumnaʾ ara, ugunda ella danalum bar,” hyok.

³⁹Dara, onoʾ saaboka Yahudi nang edya, Yesus ak salawoka heng goubnobaʾ aboka ul yabek bok, alda sikenek ab loboka yokok byuk.

⁴⁰Dara Yesus ara, Yohanes Pembaptis bedya nimi youmaʾ meka dalasukaʾ ak, Yordan mek gemek eer sam biniboka ulumok.

⁴¹Dara, nimi nauba Yesus ak yalamek. Wera onoʾ sikja dara, ”Yohanes Pembaptis bera alja dara, yokaʾ-yokaʾ hnon lok so beknaʾ dibaʾ ununaʾ orok bok, alda yub adya ok benesemba nekoka unuwanamla alamokaʾ ara aldib lelemok,” alamek.

⁴²Dara, anyagan ara nimi nauba Yesus ak dib senewoka dolomek.