Read Nalca YOHANES 11 Bible Online

YOHANES 11 - Nalca bible

YOHANES 11

¹Betania heik nimi si Lazarus, alja weisabo si Maria geb, Marta geb, neikaʾ ulumek.

²Ban Maria gera, Wenelesilnya Yesus bek perob song meka yan ak ngikoka, alja hong adya lubumok gel ge ulumok.

³Dara ban salek enyek, Lazarus bera seleb neiknaʾ salawoka neiklemok. Dara, sik penya al hmal gelewa Maria Marta adya, Yesus ak anja nauba wanaʾ ululamnya bera seleb neiklamla aboka yuba beiyirek.

⁴Wera Yesus adya Lazarus be neiklamla an yuba kebok dara, ”Ban neiklamla neiknaʾ edya dara, somoknaʾ damoka lanawanggunulabok, Imik Neyung si imik nenen damba ban unulamlaʾ adya, al dam nang si imik nenewoka, onoʾ al neiknya Imik Neyung bedya alja me nedya si hnon imik nenewanokaʾ aboka ulumla,” hyok.

⁵Wera Yesus ara, Lazarus beb, alja hmal gelewa Maria geb, Marta geb danyek, sikenek hyak wanaʾ nauba ulusuk.

⁶Bok Yesus ara, Lazarus be neiklamla an yuba seleb kebokjok, sene mandewoka al ulumok heikek li penya mamok.

⁷Li penya maboka gwelegokaʾ seleb dara, Yesus alak diriga ban nang ek, ”Nunda wen Yudea sokok sam onoʾ binimab,” aboka orugusuk.

⁸Bok, alak diriga ban nang edya dara, ”Neklesilimnya o, eijanok Yahudi nang edya girik adya obgenobaʾ aboka ulunjongok sam ak anasa, anja dara or mok enyek an binob senelam de?” hyek.

⁹Wenhyek bok, Yesus adya saaboka lebokja, ”Li hnonok dara, dilinaʾ ara obadya jam ulumla do? Wera anasa, ben hnon ara sokok dan dilinaʾ ulumlaʾ anyek, yubyek pe keeboka yabalamla dara, wera girik oluka diknenggunumla.

¹⁰Bok, nimi ben hnon salyaʾ inimnek yabalamla dara, alak dilinaʾ unggulumlaʾ anasa, yana girik oluka diknamla.

¹¹Yesus adya alak diriga ban nang ek ban seleb wenyabgogosuk dara, Wera nunja hem Lazarus bera hogunga mamla bok, gaaboka bukiyiwanamnaʾ anasa, al ulumlaʾ ak sam binimab,” hyok.

¹²Bok alak diriga ban nang edya, ”Wenelesilimnya o, Lazarus bera hogunga malamla dara, wera merewanamla,” hyek.

¹³Yesus adya lemoknya nera, Lazarus bera seleb somogomoknya nenesa lemok bok, alak diriga ban nang edya dara, or hogunga dibaʾ mamlaʾ ak lemla, senemek.

¹⁴Anasa wera, Yesus adya sikenek laga poboka, ”Lazarus bera seleb somogok.

¹⁵Bok, nak Lazarus be ulumlaʾ ak sam unggulumsaʾ adya, eiya dabnel. Wenyek dara, anadya ugunda dib senewanalum dara, pewanesilaʾ anasa, eiya dabnel. Anasa, wen nunda alak binimab,” hyok.

¹⁶Dara, Thomas yok si nera Didimus bedya, al kabo nang ek, ”Nunda alab neikaʾ somoganamabaʾ anasa, or Betania sam neikaʾ binimab,” hyok.

¹⁷Wera Yesus ara seleb Betania heikek byuk dara, Lazarus bera seleb li dombadya soko lomok mamokaʾ ak eiyimok.

¹⁸Yerusalem heik ab ara, Betania heikek ban dara, mok gom, ok so hnonok jam anaso balamak.

¹⁹Wera sikja dong be Lazarus seleb somogomokaʾ anasa, Yahudi nanga nauba, Maria geb, Marta geb dak, sikja ek sam nimi saleka bul yeilimeekanya, ganya hek elekgiga yeilimek.

²⁰Marta gera Yesus yanggal an yuba seleb kebok dara, Yesus ak men pika dil byuk. Bok Maria gera or ek ulumok.

²¹Dara, Marta gedya Yesus ak, ”Wenelesilimnya o, anda anyagan ulusom dara, nadyaʾ dong Lazarus bera somoganggunusobok, anak anyagan unaʾ orok adya seleb somogok.

²²Bok, wene salek enebabya, anja Imik Neyung ak anyek unuwalom aboka molowamen dara, onoʾ unuwananggelaʾ ara, seleb ella ulumna,” hyok.

²³Dara, Yesus adya Marta gek, ”Anja dong bera embengaʾ subnamla anyaʾ ”, hyok.

²⁴Dara, Marta gedya leboknya nera, ”Sidyaʾ daknamla sum, nim embengaʾ bukiyiwanasil sum, albabya embengaʾ suboka buknamlaʾ ara, nara seleb ella ulumna,” hyok.

²⁵Dara Yesus adya, ”Nara nim embengaʾ bukullilisinya uboka, nim embengaʾ nenelesinya ulumnaʾ anasa, heknedya nak dib senewoka dolonelnya bera, seleb somogamlyaʾ anaba embengaʾ bukiyiwanamna.

²⁶Dara, heknedya embengaʾ uboka nak dib senelenelnya bera, eimik era hyak dib somoganggunumla. Nera anda ella uboka dib senelam de?” hyok.

²⁷Dara, Marta gedya Yesus ak, ”Wenelesilimnya o, nera nara dib senelamna. Anda aldib Imik Neyung bedya me ululamakanya, nimi blebsinaʾ dubnya Kristus eimik sokok yanamla wenyameknya bera alan dib nong ululam,” hyok.

²⁸Marta gedya Yesus ak ban seleb wenyabgogomok dara, saaboka bindiwoka Maria gek gelelenga lebenggemok, ”Nimi neklesilnya bera anyagan seleb yalakanya, anak youlul aboka youbonggel,” hyok.

²⁹Anasa, Maria gera Yesus ara seleb nuk yal an yuba kebok dara, men sekoka Yesus ak berra byuk.

³⁰Ban salek era, Yesus ara Betania heik nongok ara, anam wekel yanggumok bok, heik berem Marta genya yuba salarekaʾ ak sam anam ulumok.

³¹Dara, Lazarus somogomokaʾ anasa, Yahudi nang nauba nimi saleka bukoka, engeb arawoka ul yeilimek nim edya dara, Maria genyek berra sekoka byukaʾ eiyimek dara, alda nimi dilinaʾ ak engel balamla senewoka, sikda alak eimik dobol bilimek.

³²Maria gera seleb Yesus ulumokaʾ ak sam bilimok dara, Yesus yan damak koma lumugoka lebokja, ”Wenelesilimnya o, anak anyagan ulusom dara, nadyaʾ dong bera somoganggunusobok, wera anak orok adya seleb somogok,” hyok.

³³Wera, Maria gera engel yabok dara, Yahudi nim eneba engel yabekaʾ anyek, Yesus ara eiyimok dara, Yesus anaba ganya gololong aboka umok.

³⁴Dara, Yesus adya ganya angwei senewoka sikenek lebsukaʾ ara, ”Lazarus bera har sam diblum do?” aboka heibsuk. Dara sikja, ”Wenelesilimnya o, banasam dibubaʾ anasa, anyagan uboka kemel yalom,” hyek.

³⁵Dara, Yesus anaba engenaʾ salamok.

³⁶Yahudi nang edya, ”Kendululum, Lazarus bek alda wanaʾ nauba ulumlaʾ ara alan,” hyek.

³⁷Bok onoʾ yok nim edya dara, ”Henga lum ulumla nang era hweleledyok dara, Lazarus bek ara somoknaʾ loblulaʾ aboka yokaʾ unumso do?” hyek.

³⁸Dara, Yesus ara onoʾ angwei senewoka, ganya nonga obdangoka, Lazarus be diyimek oulyang ak bilimok. Lazarus bera selengaʾ ak girik adya denewoka diyimek.

³⁹Yesus adya, ”Diblum girik era demegolulum,” hyok. Dara, Lazarus somogomoknya alja weis Maria gedya, Yesus ak, ”Wenelesilimnya o, dibub salek era li dombadya mabokaʾ anasa, songa lelemla bar,” hyok.

⁴⁰Wera, Yesus adya Maria gek, ”Nara anak seleb wenyanggenaʾ ara, anda nak dib senewananelem dara, Imik Neyung adyaʾ lok soʾ senenggomaʾ unuwanamlaʾ ara eibnelam, wenyamna do?” hyok.

⁴¹Dara, Lazarus diyimek girika jaboka laga beiyimek dara, Yesus adya imik keeb weininggoka, ”Imik Neyung ak, anda nadya molonaʾ kebnelemaʾ anasa, perob aboka gibgen.

⁴²Nadya molonaʾ sobaʾ kelenelemaʾ ara, seleb ella ulunadyok, anyagan nimi nauba ulumaknya nenesa, anja anyagan yokaʾ unuwamenaʾ anyek eiyiboka, nak alda aldib Imik Neyung adya sokok bokol yeilimoknya dib senewananokaʾ aboka, or mololenggen,” hyok.

⁴³Ban nen seleb wenyabgogomok dara, Yesus adya Lazarus soko lokomeknya bek, ”Lazarus o, wera anda goboka yabalom,” aboka bii aboka lelemok.

⁴⁴Dara, seleb somogomoknya Lazarus bera embengaʾ suboka lanabok. Alja hogung ab, nonga nidyaʾ, somogamna nimi waaboka dililimek boksom edya wamamek bok, suboka lanabok. Dara, Yesus adya, ”Boksoma nidyaʾ gwiriwomun dara, alda or yabalul,” hyok.

⁴⁵Dara, Yahudi nimi nauba Maria gek nimi saleka bukoka ul yeilimek nim edya, Yesus adya ban unuwoka Lazarus bek embengaʾ suboka bukiyiwokaʾ ak eibek dara, alak dib senewoka domek.

⁴⁶Bok onoʾ Yahudi nimi darasam nim edya dara, Parisi nang ek Yesus adya unuwal aboka bo nekel bilimek.

⁴⁷Dara, Parisi nang eb, sikja Imik Neyung yuba wa gakaʾ dub nang eb adya, yuba sabnobaʾ aboka, mok soko dam nang ak molowoka, sikda nidyaʾ eb bolobdangoka longowoka Yesus ara yokaʾ-yokaʾ hyak nauba lok soʾ ara beknaʾ dibaʾ unulamlaʾ anasa, nunda hekaʾ hubnemab do aboka yuba salamek.

⁴⁸Nunda alak or unululul senewoka eil lolomeibya dara, nimi nidyaʾ alak dib senewoka, onoʾ eimik era, Roma nang edya, nunja un mok soko alawanasakaʾ ak, alak eil lolomab aboka yuba salamek.

⁴⁹Ban salek, Yahudi nang yuba wa gakaʾ dubnya si Kayafas bedya, Yahudi nang ek lebokja, ”Ugunda hyak elgom nang ululum.

⁵⁰Nunja soko malya uboka soldowoka denghelyek anasa, nenesa leboka nimi hnonok ara nimi nidyaʾ amba lunuwoka somokna dara, ugunja dara, perob dolul senenggululum de?” hyok.

⁵¹Nera Kayafas bedya ok ganya seiniwoka lebnenggumok. Alda ban salek yuba wa gakaʾ dubnya ulumok bok adya, eimik Yesus ara sikja soko amba somoganamokaʾ anasa, orowek ununumnaʾ dibaʾ men lemok.

⁵²Ban somoganamoknya nera, sik Yahudi nim emba ok lebnenggumok bok, nidyaʾ Imik Neyung mabo bokgogoka ulumek nim enyek, bolowoka neikaʾ ak nenewosululaʾ aboka somoganamoknya nenesa, ununumnaʾ dibaʾ lemok.

⁵³Dara, sum enyek abaʾ moruwoka, eiyiboka Yahudi dub nang edya, Yesus ak obnobaʾ aboka dulumek.

⁵⁴Anasa, Yesus ara Yahudi nang gangganek nimi hnoum uru yabanaʾ loboka, alda Yudea sokok loboka, holaʾ seknaʾ orok sokok berem Efraim heikek biniboka, alak diriga ban nang eb neikaʾ ulumek.

⁵⁵Ban salek enyek, Yahudi nang edya perob sum era oka yenemokaʾ anasa, nimi nauba Yerusalem heikek biniboka, sikja nimigumaʾ mek elekdanobaʾ aboka, sikja heikek abaʾ ara balamek.

⁵⁶Dara, Yesus ara yalamla anyaʾ senewoka, Imik Neyung e eremek sekoka, kemero yabalameekanya, sik moumen anaba, ”Wei, ugunda hekaʾ senelelum do? Nunja perob sum oka dal bok, Yesus anaba yanggunumla do?” aboka heibdangdo yabalamek.

⁵⁷Dara, al neik salek enyek, Parisi nang eb, yuba wa gakaʾ dub nang eb, yok nim ek ugunda Yesus ak eibmun dara, salawoka henga goubnemabaʾ anasa, wera an ulumla aboka nuk nekel yanasulum aboka, wenyab girigemek.