Read Nalca YOHANES 12 Bible Online

YOHANES 12 - Nalca bible

YOHANES 12

¹Yahudi nim edya perob sum era li lambadya anam gweleganamla aboka ubek bok, Lazarus embengaʾ suboka bukiyimoknya bedya heikek, Yesus ara yeilimok.

²Dara, anyagan Yesus amba masa youmek. Marta gera denaʾ boklomookanya, Lazarus bera Yesus ab neikik bukoka delerek.

³Ban salek enyek, Maria gedya hyak perob gen-gen songa ngikildan meka doboka, Yesus alja yan sang ak ngikemookanya, onoʾ alja hong adya lubumok dara, sikja e nera neik mek song ok gee alamok.

⁴Bok, Yesus ab neikaʾ yuba doro diriga bannya si Yudas Iskariot bera eimik era, Yesus ak oblulum aboka yuba dil binimoknya bedya lebokja,

⁵”Hekasa ban perob song mek era, yok nim ek rupiah dekoka, dobsibya rupiah era bonaʾ garan ulumak nim ek eleganggunusibya do? Gibnaʾ hnonok wa weboka dolomak rupiah eneso danamso bok,” hyok.

⁶Yudas bedya wenhyoknya nera, alja bonaʾ garan nim enyek, wanaʾ uboka elegosununaʾ aboka lebnenggumok. Alda Yesus yuba doro diriga ban nanga rupiah beilinaʾ ara alja bo uboka, hnon hokaʾ doboka delemoknya nenesa lemok.

⁷Bok Yesus adya dara, ”Nak oboka sokok loknenija sum enesa, beknaʾ dibaʾ or nak unuwoulul bar, wenyanggom loblulum.

⁸Wera, bonaʾ garan nim ek dara, ugun gangganek sobaʾ ulumnemak bok, nak dara, ugunub sobaʾ neikaʾ unggulumnemabaʾ anasa, or unululul,” hyok.

⁹Yahudi nang nauba adya, Yesus ara, wera Betania heik ulumla an yuba kemek dara, Yesus amba ok gom, aladya Lazarus embengaʾ suboka bukiyimoknya benesa hnon kendenobaʾ aboka bilimek.

¹⁰Dara, alak embengaʾ sumoknya nenesa leboka, nimi nauba ara Yahudi nang yuba loboka, Yesus ak nauba dib senewoka yalamekaʾ anasa, Yahudi Imik Neyung yuba wa gakaʾ dub nang edya, Yesus ab Lazarus beneba, nidyaʾ neikaʾ obnesab aboka, yuba salamek.

¹¹

¹²Yesus ara ampum so maboka gwelegok dara, nimi nauba Yahudi nim edyaʾ perob sum anasa, yeilimek nim edya, Yesus ara heikek younunaʾ aboka wera pikek yanggal anaʾ kemek dara,

¹³wera sikda nimi nauba yogul meklaʾ lebsalawoka Yesus ak eiya hlaboka pika dil biniboka alak giboka wenyalamek, ”Hosana! Wenelesilnya si amba yoknya, alak perobaʾ dangalalul! Israeli nimi dubnya bek perobaʾ dangalalul!” wenyaboka lelemek.

¹⁴Dara, youmaʾ ununumnaʾ lelemek nang edya, al yanamla aboka momnya dobek yub enyek, gigiwoulul aboka, Yesus ara nim abaklesil pam, mek goubenya pam enyek, eiyimok dara, bukoka balamok.

¹⁵Momnya dobek yub era an: ”Wei, Sion heik nim o, ugunda lok ganya bonggom mem. Wera kendululum, anja dubnya bera mek goubenya keledai pam dubuk bukoka yanggal,” alamek.

¹⁶Yesus adya alak diriga ban nang era, anam salek era, ella danggumek bok, Yesus anyek seleb imik nenewok danyek, Imik Neyung yuba youmaʾ momnya domekaʾ ara alsamba lebokaʾ ak an, wen unulumek senewoka seinimek.

¹⁷Onoʾ, Yesus adya Lazarus bek goboka yalom amookanya, suboka embengaʾ bukiyimokaʾ ak nauba longowoka eiyimek nim edya dara, Yerusalem heikek alsamba nekoka yuba lero yabalamek.

¹⁸Yokaʾ-yokaʾ lok soʾ beknaʾ dibaʾ unululanya bera yalamla an yuba kemek dara, nimi nauba Yesus ak pika dibgiga el bilimek.

¹⁹Dara, Parisi nang edya sik moumen, ”Wera ugunda yokaʾ unuldalalumaʾ ara kendululum. Nimi soko nimi nidyaʾ ara alak wekel yalamakaʾ ara eillililum,” aldalamek.

²⁰Dara, Yerusalem heik Yahudi nim edya perob sum anasa, yuba longowanamab aboka balamek sum enyek, Yunani nimi hnon neikaʾ makoka bilimek.

²¹Dara, sikda Betsaida heikek Galilea sokok abnya Pilipus bek biniboka, ”Neyung o, or senemen dara, nunda Yesus ab eibdeisibya senemabaʾ anasa yeilimab,” hyek.

²²Dara wera, Pilipus bedya Andreas bek yuba bo bilimok dara, sikda neikaʾ Yesus ak wenyal bilirek.

²³Dara Yesus hnon lebok, ”Wera, nimi dibaʾ me nak imik nenewanamak salek ara seleb oka dal.

²⁴Nara ugunuk dib lebsin, gandum dok okoka sokok malyingginiboka blonaʾ orok dara, wera doka hnon ulmoublumnamso bok, soko lomok bloblya dara, yok doka nauba mengewoka gong liklamla.

²⁵Heknedya alja nong unaʾ ek wanaʾ nauba uldalamla dara, eimik alja nong unaʾ weiningdowanamla. Bok, heknedya meneng nong ek sokok an wanaʾ uldanggulumla dara, eimik alak bo beiyiboka pe ulmoublemnamla.

²⁶Heknedya nak aralenelnya bera, or nak diriga yeiniboka, na ulumnyaʾ ak anaba, alba anyagan ulumnamla. Nak arawoka welelanya bera, nadyaʾ neyung bedya gigiwanamla.

²⁷Wenera nadya ganya soldob menegoka ubnelaʾ anasa, wera hekaʾ ak lebnamna do? Neyung o, nak wene salek or blebnelom henemna de? Orok, al nenesa unuwonunaʾ aboka yeilimsa,” hyok.

²⁸Dara, Yesus onoʾ molowokaʾ ara, ”Neyung, anja si nek imik nenelelom,” hyok. Dara, imik ab yuba hnon doblinggoka lebokja, ”Youmaʾ hnon seleb imik nenewasebok, onoʾ hnon saaboka imik nenewanamna,” hyok.

²⁹Yok nimi nauba anyagan seklemek nim edya dara, hnonda, ”Liming gururu amla,” alamek. Hnon yok nim edya dara, ”Lero enedya yuba salamla,” alamek.

³⁰Yesus adya sikenek, ”Yalaʾ keblumnya nera, nasamba ubnenggublabok, nera ugunsamba leboka ubla.

³¹Wera, sokok an yana lelewanamla salek era, seleb yalaʾ anasa, sikja dubnya bera eleboka boboganamla.

³²Bok nak dara, sokok anyek dara, imik nenewanelya dara, nimi nak gliboka eboka bo yanamna,” hyok.

³³Nera Yesus anyek hekaʾ huboka somoganamna ella ulumoknya nenesa, sene orowek lel gogolomok.

³⁴Dara nimi nauba longomek nim edya Yesus ak lebekja, ”Nunda Musa bedya unuwanalum an yuba kemoubaʾ ara, nimi blebsinaʾ dubnya Kristus bera sob-sobaʾ ulmoublemnamla wenhyokaʾ ella ulumab bok anasa, nimi dibaʾ me nek eimik imik nenewanamla alamla dara, nimi dibaʾ me nera heknyek lelelam do?” hyek.

³⁵Dara, Yesus adya sikenek, ”Mek anam ok dilinaʾ ara ugun gangganek ulumnamla. Anasa, gunaʾ adya ugunuk anam siklewanggusil salek, dilinaʾ or ulumla wenyek, or yabalalulum. Heknedya gunaʾ ak or anam yabalelanya bera, pik okoka binimnaʾ ara elgom ulumla.

³⁶Ugunda dilinaʾ mabo danalum aboka, dilinaʾ ugun gangganek anam ulumla salek enyek, dilinaʾ ak dib senewoululum,” hyok. Yesus ara wenyabgogomokaʾ seleb dara, sik gangganek loboka, yokok sam doknol bilimok.

³⁷Yesus adya nimi hogung ak yokaʾ-yokaʾ hyak lok soʾ unulumok bok, sikda alak dib senenggulumek.

³⁸Yahudi nim edya Yesus ak dib senenggulumekaʾ damok era, Imik Neyung yub orowek ununumnaʾ lelemoknya Yesaya bedya momnya dobokaʾ anyek gigiwolulaʾ aboka, unumek. Momnya domok yub era, ”Wenelesilimnya o, nunja lelemab yub era, heknedya dib senemla do? Hnon Imik Neyung migib ara heknyek laga amamla do?” aboka dobok.

³⁹Yesaya bedya ununumnaʾ lelemok sok anasa, Yahudi nim edya Yesus ak dib senenggulumek. Yesaya yokok sam lemok ara ban:

⁴⁰”Dara, heng adya pe eibijek, ganya adya pe seiniweijek aboka, Imik Neyung adya sikja henga luma neneiyisuk, onoʾ ganya su kiyiwousuk. Sikda pe eiyiboka pe seiniwoka ganya dangaweijekanya, meiriyiweisinyek aboka umsa,” alamla.

⁴¹Yesus ak imik nenemokaʾ anyek eiyiboka, Yesaya ara Yesus amba yuba lelemookanya, ban nidyaʾ ara men lelemok.

⁴²Bok, Yahudi dub nang edya, nimi nauba darasam Yesus ak dib senewoka dolomek. Bok, Parisi nang edya, Yahudi nang Imik Neyung gibnaʾ ek weknaʾ mem hisijek aboka, lok anasa, Yesus ak dib senelemab anaʾ ara doknowoka lolomek.

⁴³Ban unulumekaʾ damok ara, Imik Neyung adya nuk perob senesin danagom, nim adya danyek nauba gigilesinok senewoka ulumek.

⁴⁴Dara, onoʾ Yesus adya laga sekoka bii aboka, ”Heknedya nak dib senelenel dara, alda nak ok dib senenggulunel bok, nak sokok bokol yeilinyoknya bek dib senelamla.

⁴⁵Wera anasa, heknedya nak heng eilinel dara, alda seleb nak bokol yeilinyoknya bek eillilamla.

⁴⁶Nak dib senelenija nim era, gunaʾ lomok ulumeijek aboka, nara imik abaʾ ara sokok an dilinaʾanya yeilimsa.

⁴⁷Nara sokok an yana lelelesununaʾ aboka yanggumsa, soko nimi blebsununaʾ aboka yeilimsaʾ anasa, nimi ben hnon heknedya nadya yuba keleladyok pe ununggulumla dara, nara alak yana lelewanggunumna.

⁴⁸Heknedya nak lek senewoka lolonelekanya, nadya yub ek dib donaʾ lolomla dara, alak yana lelewanalanya bera seleb orowek ulumla. Nera nadya lemsa yub edya sidyaʾ daknamla sum eimik alak yana lelewanamla.

⁴⁹Yuba lelemnaʾ ara, nadya ok ganya seiniwoka lenggulumna. Bok neyung be na sokok bokol yeilinyoknya bedya, anyek wenyhenelam aboka orugonyokaʾ anyek lelesin.

⁵⁰Imik Neyung bedya oruklesilaʾ ara, embengaʾ unaʾ eleklesilaʾ ara, nara ella ulumna. Anasa, hekaʾ ak nadya lelemnaʾ ara, neyung bedya anyek leb elegeisilom alamlaʾ anyek ok lelemna,” hyok.