Read Nalca YOHANES 13 Bible Online

YOHANES 13 - Nalca bible

YOHANES 13

¹Paskah sum era ampum so dok dara, Yesus ban sokok anara loboka, aljaʾ neyung bek binimok salek era oka dokaʾ ara ella ubok. Sokok an alja yuba dolomek nim ek sobaʾ wanaʾ ulusuk sok, onoʾ sirikaʾ daknamok sum eneba wanaʾ ubsuk.

²Yesus ab, alja yuba don nang eb, inimokaʾ anasa delemek. Iblis adya, Simon bedya me Yudas Iskariot bek, Yesus bek yuba dil bululaʾ aboka, ganyek seleb orugomok.

³Yesus ara, neyung bedya nidyaʾ yok-yok migib unulamlaʾ ara, nak seleb elegenyookanya, Imik Neyung ak ab yeilimsaʾ ara, onoʾ saaboka Imik Neyung ak binimna senewoka ella umok.

⁴Dara, Yesus debdakok dara, alda sekoka eilibik akleng gwiriwoka, mek lubnaʾ akleng adya der pik wegebdangamok.

⁵Ban seleb dara, solowak lomok meka yekoka alja yuba doro diriga ban nanga yana mek elek einisuukanya, derek norobdangamok mek lubnaʾ edya alja yuba don nanga yana gebesuk.

⁶Dara alda, Simon Petrus bek elekdo yabok dara, Petrus bedya alak, ”Wenelesilimnya o, anda nadya yana mek eleganenelem do?” hyok.

⁷Yesus adya, ”Nara unulusinaʾ ara, wen elgom ululam bok, eimik era amba ella danalam,” hyok.

⁸Petrus bedya dara, ”Anda nadya yan era mekaʾ mek eleganggununelem,” hyok. Yesus adya alak ok, ”Anak nadya mek eleganggununggisinya dara, nablaboka neikaʾ unggulumnesinim,” hyok.

⁹Dara, Simon Petrus bedya, ”Wenelesilimnya o, wera anaso dara, nadya yan ok gom bok, nadya huka nonga nidyaʾ mek eleganenelem,” hyok.

¹⁰Yesus adya saaboka, ”Seleb meka hwilenya bek dara, alja yan ok mek eleganamso, alja nong seleb pelemla. Dara, ugunda pesil bok, nidyaʾ pewanggusil,” hyok.

¹¹Yesus ara ban benedya yuba dil bininel senewoka ella ulumokaʾ anasa, ugunda nidyaʾ ara pe unggululum, hyok.

¹²Sikenek yana seleb mek elegesuk dara, Yesus akleng ongowoka bul yibilimookanya wenyhusuk, ”Ugunuk ubsin ara anyek ubla senewoka damok ara ella ululum gom, orok gom?

¹³Ugunda nak Neklesilimnya, Wenelesilimnya, alanulumaʾ ara, al unu ulumnaʾ anasa, dib lelenulum.

¹⁴Dara, nara ugunja neklesinya wenelesinya dangoka ulumnakanya, ugunuk yana mek elegeisin dara, wera ugumbabya yana mek elegeldalamnasom.

¹⁵Nara ugunuk ubsin sok, ugumbabya unuldalamnalum aboka, beknaʾ dibaʾ ara an elegeisin.

¹⁶Wa welelanya bera, eili be dibaʾ ak imik so danggunumso. Bokol bilimoknya bera, alak bokol bilimoknya bek imik so danggunumso, henaʾ ara, ugunuk dib lebsin.

¹⁷Ban ella domunukanya, wera unulumnalum dara, pe ulumnalum.

¹⁸Ugunuk nidyaʾ lenggulusin. Nadya benyek aboka dosenya bera orowek ella ulumna. Bok, Imik Neyung yuba momnya dobokaʾ ara, nablaboka neikaʾ delenamnya bedya isaʾ gebnel, amok yub anyek, gigiwolulaʾ aboka ubnamla.

¹⁹Ban unuwalya dara, ugunda nak alda alan, dib senewolulumaʾ aboka, ban nen anam unuwanggom bok, wen orowek ugunuk neksin.

²⁰Ugunuk wenyhesinya nera dib nongaʾ lebsin, heknedya nadya boklenanya bek doboka dililamla dara, alda nak doro dililenel. Heknedya nak doro dililenel dara, alda nak bokol yeilinyoknya bek doro dililamla,” hyok.

²¹Yesus ban wenyabgogomokaʾ seleb dara, ganya ya weboka, sikenek wenyhusuk, ”Nimi ben hnon ugun gangganek ab, nak yuba dil bininel wenyasinya nera, dib lemna,” hyok.

²²Dara, alja yuba doro diriga ban nang era, keebdangdo balameekanya, heknyek lemla do senewoka ganya esuk.

²³Yuba domoknya Yesus adya wanaʾ nauba ulumoknya hnon, Yesus berem buklingnemok.

²⁴Anasa, Simon Petrus bedya heknyemba lemla do senewoka heibya aboka alak soruk okomok.

²⁵Dara, alda Yesus ak lingnewoka, ”Wenelesilimnya o, heknya emba lelam do?” aboka heibok.

²⁶Dara Yesus adya, ”Gwaneng doboka mek hmeiya ek doronggoka soboka eleganenya bera alan,” hyok. Dara, gwanenga mek hmeiya ek soboka, Simon Iskariot bedya me Yudas bek elegemok.

²⁷Dara, Yudas bera ban gwanenga dol yabok sab-sab enyek, Satan bisaʾ ara aljaʾ ganya lomok wekel yeilimok. Dara, Yesus adya, ”Or anja unuwonun senemennya nera, berra unul yabalom,” hyok.

²⁸Yok nang nidyaʾ bukoka delemek nang era, Yesus ara hekasa alak anaso lemla do senewoka ganya ella danggumek.

²⁹Yudas bera, sikja rupiah beilinanya ulumokaʾ anasa, hnon nang edya dara, Yesus adya sik delemekaʾ amba denaʾ hnon dekel bilom aboka orugamla gom, bonaʾ orok nim ek rupiah hnon elegel bilom aboka orugamla gom, senemek.

³⁰Dara, Yudas bera, seleb gwanenga dobok sab-sab goboka byuk. Dara, seleb inimok.

³¹Yudas be seleb bilimok dara, Yesus ara, ”Wenyok nimi dibaʾ me nek imik nenewanamlakanya, Imik Neyung ak, nimi dibaʾ me pik moruwoka imik nenewanamla.

³²Dara, Imik Neyung ak Yesus pik moruwoka imik nenewanamla dara, Imik Neyung lomok al damnya onoʾ alja me nek imik nenewanamla.

³³Najabo yab o, nara ugunub anyagan sidyaʾ neikaʾ ura dakdowanamab. Ugunda nak elemnenulum bok, Yahudi nang ek lemsa sok, wen ugunuk wenyhesin, nak binya ak ara ugunda yamenggom.

³⁴Wenyok unulumnulum yub ugunuk elegeisin: Ugunuk nadya wanaʾ ulusisa sok, ugumbabya wanaʾ uldalamnalum.

³⁵Ugunda wanaʾ uldalamun dara, nimi nidyaʾ adya Yesus yuba doro diriga ban nang aboka, ella ubnesak,” hyok.

³⁶Simon Petrus bedya, ”Wenelesilimnya o, anda hekmok binilam do?” aboka heibok. Yesus alak lebokaʾ ara, ”Na binimnaʾ ak ara wen anda dobol yanggununelem bok, eimik ek dobol yananelem,” hyok.

³⁷Petrus hnon heibok, ”Wenelesilimnya o, hekasa wen anak dobol yanggununggisinya do? Nara hyak ansamba leboka somoganesinya,” hyok.

³⁸Dara, Yesus alak lebokaʾ ara, ”Aldib, anda nasamba leboka dib nong somoganesom de? Nara anak hyak dib lebgen, Wining yuba anam ngoubnenggulyebok, anda nak liga winilya bobnenewoka, naba elgomnya henenelem,” hyok.