Read Nalca YOHANES 15 Bible Online

YOHANES 15 - Nalca bible

YOHANES 15

¹”Nara dib nong gal nong ulumnakanya, nadyaʾ neyung bera pe yeboka memenaʾanya ulumla.

²Nak doka mounggulumla soruka nidyaʾ diblamlakanya, nidyaʾ molulanya nera, nauba dangoka sobaʾ moubgiga balalulaʾ aboka, onoʾ gereboka lelekdeboka memelamla.

³Nara ugunuk seleb elegeisisa yub edya, ugunda anaso seleb pewousuk.

⁴Ugunda nablaboka kwebdangoka ulumnamab dara, nara ugunub kwebdangoka ulumnamab. Gal soruk ara albeyok doka moubnenggunumso bok, gal nong ok ulumso dara, moubnamso. Anasonya neikik, ugunda nablaboka kwebdangoka unggulumnesibya dara, doka mounggulumnusom.

⁵Nara gal nong ulumna. Ugunda, gal soruk ululum. Heknedya nak ulumnenelekanya, nara alak ulumnamna dara, alda doka nauba moulumnamla. Bok, na orok dara, ugunda yokaʾ-yokaʾ pe unuwanggunusom.

⁶Heknedya nablaboka kwebdangoka unggulunam dara, gal soruka diboka bobogamna ek mekemnaʾ anaso ulumla. Ban anaso soruk ara, neikaʾ ak mamagoka uka dalamak dara, uka delemla.

⁷Ugunda nablaboka kwebdangoka ulumeibyekanya, nadya lelesin yub era, ugunja ganya lomok sam ulusilya dara, ugunda yokaʾ-yokaʾ dobsibya senelelumaʾ anyek, elegeisilom aboka mololomun dara, ugunuk eleganesil.

⁸Ugunda doka nauba molumnesil dara, nadyaʾ neyung bedya si imik nenewoka, ugunda nadya yuba doro diriga ban nang dibaʾ ulumnulum,” hyok.

⁹” Neyung bedya nak wanaʾ ulunyok sok, nadya ugunuk wanaʾ ulusisa. Anasa, nadya wanaʾ ulusisa nang geknebaʾ ulululum.

¹⁰Nadyaʾ neyung bedya orugenyok yub keboka unulamsakanya, alja wanaʾ unaʾ ak ulumna sok, ugumbabya nadya oruklesin yuba keboka unulumun dara, ugunda nadya wanaʾ un ak ulumnulum.

¹¹Nadya ei-ei ganya ara ugunja ganya ek ulumnesilikanya, ugunja ei-ei ganya bololumaʾ ara deknelesululaʾ aboka, ban nidyaʾ ara ugunuk lebsin.

¹²Ban oruklesin: Nara ugunuk wanaʾ ulusin sok, ugumba wanaʾ uldalamnalum aboka orugeisin.

¹³Nimi ben hnon ara, alja hem bemba alja nonga somogonun senelelanya bera, alja wanaʾ unaʾ ara hyak nauba so ulumla.

¹⁴Ugunda nadya oruklesin yub enyek, keboka unulumnulum dara, ugunda nadya hemyab ulumnulum,” hyok.

¹⁵”Wa wenya bera alja neyung bedya unulamlaʾ ara elgom ulumlaʾ anasa, wene salek ebaʾ ara, eimik ugunuk wa wen nang wenyhenggunusin. Bok, onoʾ saaboka nadyaʾ neyung bek ab kemsa yub ugunuk nidyaʾ laga lemsaʾ anasa, ugunuk nadya hemyab alamnesin.

¹⁶Ugunda nak dobnenggunulum bok, nadya ugunuk weboka dosisa. Ugunda bindiwoka, sobaʾ ulmorulumnamla doka moulusululaʾ aboka, dosisa. Dara, nadya si sibuka, neyung bek ab yokaʾ-yokaʾ nidyaʾ elegesilom aboka mololomun dara, eleganesil.

¹⁷Ugun dam nang wanaʾ uldalalulum aboka orugeisin,” hyok.

¹⁸”Sokok an yokaʾ nang edya ugunuk lek senewanasil dara, nababya men lek senelenyekaʾ ara, seiniwoka beklemnelum.

¹⁹Ugunda sokok anyebaʾ ak ulusom dara, aljinya nek anasa, wanaʾ nauba ulumnesuso bok, ugunda sokok anyebnya unggululumaʾ anasa, nadya sokok ab ugunuk dosisaʾ anasa, ugunuk lek senelesil.

²⁰Wa wenanya bera, alja neyung bek ab imik so unggulumla seleb wenyamsaʾ ara, beklulum. Dara, sikda nak olonyek dara, ugumba olomnesak. Sikda nadya yuba kelenyek dara, ugumba ugunja yuba kelemnesak.

²¹Bok, sikda nak bokol yeilinyoknya bek elgom ulumakaʾ anasa, nadya si nemba leboka, ban yokaʾ-yokaʾ ugunuk unulumnasak.

²²Nak yanggusinyekanya, ban sikenek wenyanaʾ orok dara, malya unaʾ sikenek unggulumnususo bok, wenyek dara, sikja malya unaʾ orok senen lebnengguneseng.

²³Nak lek senelelanya bera, nadyaʾ neyung bek anaba lek senelamla.

²⁴Yok nim edya hyak ununggulusengnya nek, sik gangganek ununggulusinya dara, sikja malya unaʾ unggulususo bok, wenera, nadya unulamnaʾ eillilimak bok, nak lek senelenyaakanya, neyung beneba lek senelemak.

²⁵Bok, unuwanalum an yuba sikja bukuk momnya dobokaʾ ara, dib gigiwolulaʾ aboka umokaʾ damok ara, anyaʾ senewal henggonggom bok, nak lek senelenyek.

²⁶Bok, arasinya neyung bek ab, bokol yanasinya bera, neyung bek ab lanawoka dib yub lelelanya Geisinya bera, yeiniboka, alda nasamba leboka laga neklemnesil.

²⁷Dara, ugumbabya hnon, nara ugunublaboka youmaʾ ek moruwoka neikaʾ ulumoubaʾ anasa, nasamba leboka laga neklemnenulum,” hyok.