Read Nalca YOHANES 16 Bible Online

YOHANES 16 - Nalca bible

YOHANES 16

¹”Ban nidyaʾ wenyalasin ara, ugunda solom ganya boboka lobmunuk aboka lelesin.

²Ugunuk Imik Neyung ek sam abaʾ ara, yaklemnasak. Dara, onoʾ hnon, sik unulusija nim edya dara, Imik Neyung amba nunda pe giboka unulumab senelemeija salek era, yanamla.

³Ban unuwanasakaʾ ara, sikda neyung beb nab elgom ulusakaʾ adya, ugunuk eimik unulumnasak.

⁴Eimik ubnamla sum era, al orowek nekesukaʾ ara, seiniwanalum aboka, ban lebsin. Men salek era, nara ugunuk neikaʾ ulumoubaʾ anasa, ban yuba neknenggusisa.

⁵Nara wen na sokok bilom aboka bokol yeilinyoknya bek binimna. Bok, ugun gangganek ab ben hnonja, Anda hekmok balalam do aboka heibnenggunulum.

⁶Bok, ban nenyek ugunuk seleb lebsin adya, ugunja ganya engewoka soloma dabsil.

⁷Anasa, ban nidyaʾ nadya ugunuk, na imik heik binimna, ugunsamba perob dosulul amnaʾ ara, dib lebsin. Nak banaʾ orok dara, arasinya bera ugunuk yanggunumsoʾ anasa, nak binya dara, wera alda ugunuk bokol yanasin.

⁸Wera, Geisinya ben yalya dara, soko nim edya malya unaʾ ek hnon, pe unaʾ ak hnon, yana lelesinaʾ ak hnon, sikja seinilimakaʾ anyek, nenegom aboka, okoka neknesil.

⁹Nak dib senenggulunyakaʾ anasa, malya unaʾ ak meknewoka seinilimak.

¹⁰Ugunda eimik nak eibnenggununulumaʾ ak sam, nadyaʾ neyung bek binimnaʾ anasa, perobaʾ nenenaʾ ak meknewoka seinilimak.

¹¹Sokok an dubnya bek seleb yana lelewoka igin yakaʾ alsamba seleb ulumlaʾ anasa, yana lelesinaʾ ak meknewoka seinilimak.

¹²Nara yok-yok yuba nauba ugunuk lebnesisinya bok, wenyek dara, ugunuk hyak igin ubnesuso.

¹³Bok, Imik Neyung jong ganya unaʾ ugunuk lebnesil Geisinya benyek yalya dara, alja dib yuba nidyaʾ ella danalum aboka neknesil. Alja ok yok seiniwoka ganya doboka lebnenggunulabok, alja seleb kemlyaʾ anyek, ugunuk neknesil. Nera yokaʾ-yokaʾ eimik unuwanalanya nenyek neklemnesil.

¹⁴Alja nak ab doboka, ugunuk neklemnesil adya, nadya si imik nenewanenel.

¹⁵Yokaʾ-yokaʾ nidyaʾ Imik Neyung aljinya ulumlaʾ ara, narinya nek ulumla. Ban anasa, Geisinya bedya nak ab doboka, ugunuk neklemnesilaʾ ak wenyasin,” hyok.

¹⁶”Ugunja nak eibnenggununulum salek era, mek anam ubnamlakanya, onoʾ saaboka eibnenulum salek era, mek anam ubnamla,” hyok.

¹⁷Yesus adya ban wenhyokaʾ seleb kemek dara, alak diriga ban nang edya sik moumen, ”Ugunja nak henga eibnenggununulum salek era, mek anam ubnamlakanya, onoʾ nak eibnenulum salek era mek anam ubnamla, helnya nera, hek damok nenesa lelemla do? Hnon, nadya neyung bek binimna anasa, alanya nera, hek damok emba lemla do?

¹⁸Mek anam ubnamla alamlaʾ anasa, hekaʾ ak lelemla do? Alja lelelanya nera nunda elgom ulumab bar,” aboka leldalamek.

¹⁹Yesus adya alja yuba doro diriga ban nang edya alak heibnobaʾ senemekaʾ eiyisuk dara, sikenek, ”Eibnenggununulum salek era anam ubnamlakanya, eibnenulum salek era mek anam ulumla, ananya nenesa leboka, damok eboka heiboka gangabdangdo balalum de?

²⁰Nara ugunuk dib lebsin, Ugunda engewoka bonggeliklimnelum bok, soko ak dara, eiya hlaboka glolomnamla. Ugunuk sugunaʾ ganya bolomnulum bok, ugunja sugunaʾ ganya era eimik ei-ei ganya danamla.

²¹Gela hnon me bomna gel gera, beibnamla salek me juka gweklamla dara igin ululabok, seleb beibna dara, wera me ara seleb sokok an beibna senewoka, oka gwekemnaʾ ara hiliklamla.

²²Wen an lebnanya nera, ugunuk neik so danamla. Wen ganya engelelum bok, nara ugunuk onoʾ eibdeibya sum era, ei-ei ganya bolomnulum. Dara, ugunja ei-ei ganya ara yok nim edya ugunja ganya ek ab salyaʾ lolowoka dobnenggunusak,” hyok.

²³”Ban sum enyek, ugunja yokaʾ-yokaʾ nak molowanggununulum bok, ugunja nadya si sibuka Neyung bek nunda anyek elegeisilom aboka molowanalumnya nera nidyaʾ eleganasilaʾ ara dib lebsin.

²⁴Ugunda wenera, nadya si sibuka yokaʾ-yokaʾ Neyung bek elegeisilom aboka molonggululum. Wenyok molowolulum. Dara, ugunuk eleganesilikanya, hyak ei-ei ganya bolomnulum,” hyok.

²⁵”Wen ugunuk wenyalasinya nera okoka poboka, gak ara an aboka lenggulusin bok, eimik yanamla sum era, nadyaʾ neyung bek ban men lelesinya loboka, poboka laga lebnesin.

²⁶Ban lebna sum era, ugumbeyok nadya si sibuka molowanalum. Nababya nadyaʾ neyung bek ugunsamba molowanamnaʾ ara wenyanggulumna.

²⁷Ugunda nak alda Imik Neyung ak ab yeilimok senewoka, wanaʾ nauba ulunulumaʾ anasa, Imik Neyung adya ugunuk hnon wanaʾ ulusilekanya, alja yokaʾ-yokaʾ ugunuk eleganasil.

²⁸Nara Imik Neyung bek abaʾ ara sokok yeilimsa. Dara, onoʾ wen saaboka sokok loboka Neyung bek binimna,” hyok.

²⁹Dara, alja yuba doro diriga ban nang edya Yesus ak, ”Wenelesilimnya o, yokaʾ-yokaʾ nidyaʾ ara bob nenewoka lenaʾ loboka, wera poboka lelam.

³⁰Anda yokaʾ-yokaʾ nidyaʾ ella ululamakanya, yok nim edya anak yokaʾ-yokaʾ amba leboka salyaʾ heibnenggununggeseng, ara wen ella ulenjab. Anasa, nunja dara, anda Imik Neyung ak ab yeililumaʾ ara, ban adya dib senelenjab,” hyek.

³¹Dara Yesus adya sikenek, ”Wera, ugunda dib senelum de?

³²Ugun doluwoka bokgoknesak salek ara, eimik yanamla, hnonda al wen seleb yal. Ugunda ugunja e pik bokgokoka bindowanalumukanya, nara nabeyok lo bininulum bok, nabeyok unggulumnamna, nadyaʾ neyung beb neikaʾ alablaboka ulumnanam.

³³Nadya ban orowek men ugunuk nidyaʾ laga lelesinaʾ ara, ugunda nablaboka seleb hnonok dangoka, perob ok ulululum aboka lelesin. Ugunda sokok an anam ulumun salek, yokaʾ-yokaʾ damok oka kwelemnesil bok, sokok an yokaʾ-yokaʾ damok ara, nadya seleb yu gom nenewasaʾ anasa, ugunja ganya siklewoka kaboka ulululum,” hyok.