Read Nalca YOHANES 19 Bible Online

YOHANES 19 - Nalca bible

YOHANES 19

¹Wera Pilatus bera wekoka Yesus ak, an legeboka oblulum aboka orugusuk.

²Dara, yin bonaʾ nang edya, si henga gwanewoka Yesus adya hukuk sam goliyimek. Dara onoʾ, mouk dok bokaʾ boksom akleng hnon ongiyimek.

³Wera sikda Yesus ak sam bini yeiniboka, ”Anda hyak Yahudi nimi dubnya ululamaʾ anasa, giblenjab,” aboka nauba waboka olomek.

⁴Dara onoʾ, Pilatus bera ek abaʾ ara gouboka, Yahudi nim ek, ”Kendululum, Yesus ak doboka ugunuk bo yeilisinaʾ ara, damoka lelemnaʾ anyek, alja anyek okoka malya ulumlaʾ ara, eibnenggumnaʾ anasa, ugumba eiblulumaʾ aboka usin,” hyok.

⁵Wera, Yesus ara si heng adya huk ak goluwoka, mouk dok akleng ongiyimekaʾ ab, gobok dara, Pilatus bedya, ”Wera anyek kendululum,” hyok.

⁶Wera, Yahudi yuba wa gakaʾ dub nang eb, yin bonaʾ nang eb, Yesus ak eibik dara, ”Oboka gal ak glabnok, oboka gal ak glabnok,” wenyalamek bok, Pilatus bedya sikenek, ”Nara alja malya unaʾ uboka, damok anyek okoka eibsinya enyekaʾ, nera or ugunja ganya doboka oboka dibnelum,” aboka lebok.

⁷Bok, Yahudi nim edya Pilatus bek, ”Nunja Yahudi nang yuba momnya dobok sok, Yesus adya al damnya, Nara Imik Neyung bedya me, aldalamlaʾ anasa, alda or somogolul,” alamek.

⁸Pilatus bedya ban wenyalamekaʾ kebok dara, alda onoʾ lok so uboka,

⁹saaboka senenggom ek wekok dara, ”Anda damok ara hekmok abnya do?” aboka heibok bok, Yesus adya dara, alak mekaʾ yuba sab eleganggubok.

¹⁰Anasa wera, Pilatus bedya Yesus ak, ”Anda nak yuba sal eleknenaʾ orok ara lek senelam de? Nadya or oboka gal ak glablulum e, or henga loblulum e, henesininya bera nara an ulumnaʾ ara, anda elgom ulunelem de?” hyok.

¹¹Dara, Yesus adya Pilatus bek, ”Imik Neyung adya unun migibaʾ, neyung anak elekgenaʾ orok dara, wera, neyung anda yokaʾ-yokaʾ salyaʾ ganya doboka unuwanggunusom. Anasa, neyung o, anak gom, alda nak oblulum aboka yuba diyinelnya benyek, alja malya unaʾ era hyak senenggomaʾ ulumla,” hyok.

¹²Ban kemok dara, Pilatus bedya Yesus ak henga lob lobnunaʾ aboka dul yabok bok, Yahudi nim edya, ”Ban benyek henga lobnelam dara, wera anda Kaisar bedya alja hemyab unggulumenaʾ adya ubnelam. Nara dubnya aldalananya alda Kaisar bek isaʾanya ulumlaʾ adya lelelabok anasa,” aboka ngeboka lelemek.

¹³Pilatus bedya ban unurub yuba kebok dara, Yesus ak seleb doboka bo gomek dara, Pilatus bera henga geregoka yana lelelesikaʾ ak, lagasa girik ekla bunaʾ ak, Ibrani yub adya dara, Gabata alamekaʾ ak bukumok.

¹⁴Ban salek era yubyek dukdukanek dang-dang balamok. Al onoʾ neik sum era, Israeli nim edya sikja perob sum meewanobaʾ aboka ulumek.

¹⁵Dara, Pilatus bedya Yahudi nim ek, ”Ugunjaʾ dubnya bera alan,” hyok. Bok Yahudi nim edya, ”Bo goblulum, bo goblulum! Oboka gal ak glablulum,” aboka lelemek. Dara, Pilatus bedya Yahudi nim ek, ”Nadya ugunja dubnya benyek oboka gal ak glabnun de?” aboka heibsuk dara, Yahudi yuba wa gakaʾ dub nang edya, ”Kaisar benyek ok nunja dubnya bera alan ulumlaʾ anasa, or oblulum,” aboka lelemek.

¹⁶Dara, Pilatus bedya Yesus ak doboka, wera an oboka gal ak glablulum aboka elegesuk dara, yin bonaʾ nang edya doboka bo byik.

¹⁷Wera, Yesus ara alak oboka glabnemek gala, al damnya doboka bobok dara, nimi huk yanggol meinik, Ibrani yub adya dara, Golgota mein aboka silimek meinik sam bo byik.

¹⁸Dara wera, Yesus ara mein enyek an gal ak glamek. Wera neik sum enyek, Yesus ab, hokaʾ dorek nang penya uboka, ben hnon sirik ek sam, ben hnon waneng ek sam, Yesus ara hnoumung uboka, gal ak glabsik.

¹⁹Wera Pilatus bedya, Yesus oboka glamek gal ak sam ara, Yesus ara Nazaret mok ebnya, Yahudi nimi dubnya an momnya donaʾ enyek doboka geregolulum aboka orugousuk.

²⁰Ban wenyaboka momnya domekaʾ ara, Yesus ara senenggom heik berem oboka gal ak glamekaʾ adya, ban momnya donaʾ era Yahudi nimi nauba einilimek. Ban momnya domekaʾ ara, Ibrani yub adya hnon, Latin yub adya hnon, Yunani yub adya hnon, denewoka domek.

²¹Dara, Yahudi yuba wa gakaʾ dub nang edya Pilatus bek, ”Yahudi nimi dubnya aboka momnya donggom mem. Alda nara Yahudi nimi dubnya bera alan aldalalanya bera an aboka momnya doblom,” hyek.

²²Bok, Pilatus bedya dara, ”Al nadya seleb wenenya nok ulumnamla,” hyok.

²³Wera, yin bonaʾ nang edya, Yesus ak seleb oboka gal ak glamek dara, sikda Yesus adya ongolomok boksom gwiriwoka domek. Dara, boksom garawoka dombadya nenewoka, ben hnonok-hnonok domek dara, onoʾ Yesus adya wameldan akleng eneba domek. Yan akleng ara garawoka lelewoka wibnenggumek, alda salyaʾ doblinggoka denewoka wimek.

²⁴Dara, yin bonaʾ nang edya sik moumen, ”Boksom enera garal meneknaʾ ara lobnemab mem. Alda heknedya nidyaʾ dobnamla do aboka sununaʾ sunuwanamab,” alamek. Ban wenyamekaʾ ara, ununumnaʾ lelemek nang edya Imik Neyung yuba momnya domekaʾ anyek gigiwolulaʾ aboka ulumekaʾ ara, ”Sik gangganek sam nadya akleng bokoldalamek. Dara, nadya dolungnaʾ akleng dobnobaʾ aboka maka meiboka sunumek,” amokaʾ anasa, yin bonaʾ nang edya ban orowek lemok sok gigiwoka unumek.

²⁵Dara, Yesus oboka glamek gal damak ara, Yesus alja genong geb, alja weisab eb, Klopas alaʾ gel Maria geb, yok Maria Magdalena geb, diri seklemek.

²⁶Yesus adya alja genong geb, alja wanaʾ ulumokaʾ diriga bannya beb, neikaʾ sekerekaʾ eibok dara, alja genong gek, ”Genong o, nera anja me nera an,” hyok.

²⁷Dara, Yesus adya alja wanaʾ ulumoknya bek, ”Nera anja genong gera alan,” hyok. Dara ban sum enyek, Yesus eilin gera, nab neikaʾ ulumnenam aboka Yesus adya wanaʾ ulumoknya bedya domok.

²⁸Wera, Yesus adya yokaʾ-yokaʾ nidyaʾ ara hyak seleb unumokaʾ ella ulumookanya, Imik Neyung yuba ununumnaʾ yuba momnya dobokaʾ anyek gigiwolulaʾ aboka lebokja, ”Nara mek ok ubnel,” hyok.

²⁹Dara, ok berem ara yu anggur mek ek, mek hmei yanggol hnonok ulumok. Dara, hnyomaʾ anyek anggur mek lomok hwiboka, gorokaʾ go gondowoka, Yesus adya sibamaʾ ak sam doro doronggomek.

³⁰Wera, Yesus adya seleb debgogowoka, ”Wera seleb nidyaʾ gigiwal,” hyok dara, nganga gukoka ganya dubhin dakoka somogok.

³¹Yesus ara Yahudi nim edya Sabat mem sum oka dangamok dara, nim oboka gal ak glabalonaʾ mem senelemekaʾ anasa, Yahudi nang edya, Yesus ab neikaʾ oboka glasik nang eb dara, sikja yana bologoka, nimi beʾ dakoka sokok sam dibnemak aboka, Pilatus bek or unuwanamak gom aboka molol yeilimek.

³²Dara, yin bona nang era men biniboka, Yesus ab, neikaʾ penya nang gal ak glasik nang edya yan moumenaʾ yoka nidyaʾ bologosik.

³³Bok, Yesus bek oka bilimek enyek, seleb somogomokaʾ eiyimek dara, yana boloknaʾ lomek.

³⁴Bok, yin bonaʾanya ben hnonja, Yesus adya yaijaʾ ak sam gamaʾ dolugomok dara, eneng ab, mek ab, berra belega yanggalamok.

³⁵Dara, ban nidyaʾ unulumokaʾ anyek okoka ok ab eiyimoknya bedya, aldib unumok aboka laga neksuukanya, alja eiyimoknya bedya unumok hyokaʾ ara aldib lebok. Alja lebok yub era dib nong yub anyek ella uboka, ugumbabya dib senelelulumaʾ aboka nekesuk.

³⁶Ban unuwoka Yesus adya alja yana bologanggumekaʾ ara, ununumnaʾ lelemek nang orowek lero momnya domekja, ”Alja yan yoka hnonok sibin anaba bologanggunumak,” aboka momnya domekaʾ anyek, gigiwolulaʾ aboka umek.

³⁷Dara onoʾ ununumnaʾ yuba momnya hnon dobokaʾ ara, ”Nim adya sikja alja yaijaʾ ak gamaʾ dolugumeknya bek kemelemnemak,” aboka momnya domok.

³⁸Ban eini nidyaʾ unumokaʾ seleb dara, nimi Yusuf Arematea mok ebnya bedya, Pilatus bek, ”Yesus ara beʾ dakoka dibnamna goma?” aboka molol bilimok. (Yusuf bera Imik Neyung yuba doboka Yesus adya diriga ban nang ulumok bok, Yahudi nang anyek lok anasa, laga lenggulumok.) Dara, Pilatus bedya, ”Or unuwanalam,” hyok dara, bindiwoka Yesus anyek beʾ gala dakoka domok.

³⁹Wera onoʾ, youmaʾ Nikodemus Yesus ak inimnek yeilimoknya benebabya, Yusuf beb Yesus doboka neikaʾ dibnenam bar aboka yeilimok. Dara, Nikodemus bera benelya song gal ab, ngikildan gal yareng ab, nidyaʾ hiboka igin ara tiga puluh kilo anasoʾ ak bo yeilimok.

⁴⁰Dara, Yusuf beb, Nikodemus beb, Yesus adya beʾ dakoka beibdek dara, somogan nim dibnamna danyek, song mek eb, kelemek boksom eb waaboka, Yahudi nang edya nimi somogan nim unulumek sok sunuwoka ubdek.

⁴¹Dara, Yesus oboka gal ak glabnemekaʾ berem, nimi dilinaʾ perob oulyang hnon ulumok. Dara, al onok ara, nimi hnon mekaʾ dibnenggumekaʾ anyek, or anam loklomek oulyanga hnon ulumok.

⁴²Dara, ban oulyang enyek ok uboka, Yahudi nim edya perob sum era oka dok bok anasa, Yesus ara anyagan loklomek sokok beiyimek.