Read Nalca YOHANES 20 Bible Online

YOHANES 20 - Nalca bible

YOHANES 20

¹Dara, minggu en men sum hyak gweleknaʾ yangman enyek, Maria Magdalena gera Yesus diyimekaʾ ak bilimok. Wera Yesus diyimek girik era, seleb dangawoka demegemokaʾ ak eiyimok.

²Dara, Maria gera berra aboka Simon Petrus beb, Yesus adya wanaʾ nauba ulumoknya alja yuba doro diriga bannya beb, ulurekaʾ ak biniboka, ”Wenelesilnya bera nim adya hokaʾ beʾ gekman dakoka bo byaakanya, hanyagar gelelenga doknowoka beiyimakaʾ ara nunda elgom ulumab,” wenyal byuk.

³Dara, Petrus beb, ban yok diriga bannya beb, Yesus diyimek oulyang ek kemel bilirek.

⁴Wera, sik penya nang era berra aboka yeiriwoka kemel balarek bok, yoknya benyek men Yesus diyimekaʾ ak ok berem bilimok, bok Petrus bera or nemen so balamok.

⁵Dara, men byuknya bedya geniwoka Yesus diyimek girik lomok kemelemok enyek, waaboka diyimek boksom ok anyagan ulumokaʾ ak eibok. Bok alda girik lomok ara weknenggumok.

⁶Dara onoʾ, Simon Petrus bera eimik yeiniboka, alda Yesus diyimek girik lomok wekok. Dara, alda Yesus waaboka diyimek boksom hnon eibuukanya,

⁷Yesus adya hukuk sam waaboka diyimek boksom ara pe winiwoka albeyok oka mamokaʾ ak hnon eibuk.

⁸Dara onoʾ, men bilimoknya beneba Petrus beb neikaʾ wekoka, ban nidyaʾ unumokaʾ anyek, alja heng adya kaboka okoka eiyimok dara, dib senemok.

⁹(Sikda orowek Imik Neyung yuba momnya dobokaʾ ak sam, Yesus ara somogalya dara, winilinya sum embengaʾ suboka buknamla aboka, momnya dobokaʾ ara, anam elgom ulumek).

¹⁰Dara, yuba doro diriga ban nang ek sam on pik bilirek.

¹¹Bok, Maria gera Yesus diyimek girik damak engero seklemok. Engelemok jok, onoʾ geniwoka girik damok dan kemok dara,

¹²wera alda Imik Neyung lero nanga penya geisa boksom ongo-ongo bilirek nang ek eiyisuk. Penya lero nang era Yesus adya beʾ girik ek sam, ben hnonda huk sam ben hnonda yan ak sam, bulurekaʾ ak, Maria gedya eiyisuk.

¹³Dara, nang danadya Maria gek, ”Genong o, anda hekasa engelelam do?” aboka heibdek dara, Maria gedya sikenek, ”Nadya wenelesilnya benyek, nim adya hokaʾ doboka, hanyagar beil bilimak do aboka engelamna,” hyok.

¹⁴Seleb wenyabdangoka, onoʾ dangawoka weilik sam kemelemok enyek, Yesus ara lagono sekemokaʾ ak eibuk bok, Maria gedya dara, wera Yesus ara alan sekemla senewoka ella ubnenggumok.

¹⁵Dara, Yesus adya Maria gek, ”Genong o, anda hekasa engelelam do? Anda heknyek elelam do?” aboka heibuk. Wera, Yesus nong bok, Maria gedya dara, Yesus diyimek soko wenya benyaʾ aboka, ”Neyung o, anja Yesus beʾ dakoka doknemen dara, na damnya dobnamnaʾ anasa, anyagan doknomna aboka neknelom,” hyok.

¹⁶Dara, Yesus adya Maria gek, ”Maria o,” hyok. Wera danyek, Maria gera dangawoka, Ibrani yub adya, ”Rabboni o,” hyok. Rabboni nunja yub era, neklesilimnya alamla.

¹⁷Danyek Yesus adya, Maria gek, ”Nadyaʾ neyung bek anam binggumnaʾ anasa, anda nak soruk salanenggom. Bok, anda berra aboka nadya hemyab ek bimenekanya, Yesus ara seleb nub alab, nunja neyung Imik Neyung bek, binimla aboka, wenyal bilom,” hyok.

¹⁸Wera, Maria Magdalena gera, Yesus yuba doro diriga ban nang ek biniboka, ”Nara Wenelesilnya bek seleb eibna,” wenyaboka, onoʾ alja ban hnon ban hnon aboka wenyhenel wenyaro nekdo bilimok.

¹⁹Dara onoʾ, al on minggu en men sum enyek seleb inimok dara, Yesus alja yuba doro diriga ban nang era, Yahudi nang enyek lok anasa, obsijek aboka pika gasa seregoka, hnonokaʾ ak longomek dara, Yesus ara albeyok sik gangganek sam gelelenga sekel yeilimok dara, sikenek, ”Maly, lok ganya bonggom,” aboka lebok.

²⁰Yesus adya ban seleb wenyaboka lebok dara, alja soruka paku bokomekaʾ ab, yaijaʾ ak gamaʾ dolugumekaʾ ab, wera an unuwanyekaʾ anyek, kendululum aboka sikenek amasuk. Dara, alja diriga ban nang era Wenelesilnya eiyimek dara, hyak nauba eiya dasuk.

²¹Dara onoʾ, Yesus adya saaboka lebsukja, ”Maly, lok ganya bonggom. Neyung bedya nak sokok sam bokol yeilinyok sok, nadya ugunuk Imik Neyung yuba lero balalulum aboka boksin,” hyok.

²²Dara, ban wenyabgogomokaʾ seleb dara, sikenek hibaʾ gob goluwoka, ”Wera Imik Neyung Geisinya doblulum,” asuk.

²³”Ugunda yok nang malya unaʾ sikenek ab memewanggunulum dara, Imik Neyung anababya ugunja malya unaʾ ugumbabya meewanggunusil. Bok, ugumbabya nimi malya unaʾ sikenek ab memelemnalum dara, Imik Neyung anaba neikik, ugunja malya unaʾ ugunuk ab sobaʾ memelemnesil,” hyok.

²⁴Bok, Yesus yeilimok dara, yuba doro diriga bannya ben hnon nimi si Thomas yok si nera Didimus alameknya bera, yok yuba dolomek nang eb, neikik unggulumek.

²⁵Dara onoʾ, yok diriga ban nang, ”Nunja Wenelesilnya Yesus bek aldib eiyimab,” aboka lebek dara, Thomas bedya sikenek lebsukaʾ ara, ”Nara Yesus adya soruk ak paku bokomekaʾ diligaʾ ab heng yokaʾ bekoka eibnenggumnya dara, onoʾ nadya soruk enyek, alja gamaʾ yaijaʾ dolugekaʾ diligaʾ ak soruka dolongnaʾ orok dara, nara aldib senewanggunumna,” hyok.

²⁶Dara, onoʾ nenyek minggu sum enyek, Yesus alja yuba doro diriga ban nang eb, neikaʾ Thomas beblaboka neikaʾ ak ulumek. Dara, e pika nidyaʾ gasa seregoka longomek bok, Yesus ara gabdeboka sik hnoumunga sekoka, ”Maly, lok ganya bonggom,” hyok.

²⁷Dara, Yesus adya, Thomas bek, ”Anja soruk era nak an dibmenekanya, nadya soruk ak an kendelom. Anda soruk okoka, nadya yaijaʾ lomok sam soruka doronggoka, wera nak ganya penya-penya loboka, alda wera nak dib senewanenelem,” hyok.

²⁸Dara, Thomas bedya Yesus ak lebokja, ”Nadyaʾ neyung Wenelenelemnya, nadya Imik Neyung alan ululam,” hyok.

²⁹Dara onoʾ, Yesus adya Thomas bek lebokja, Anak dara, nak ok okoka eibnelemaʾ anasa dib senewanelem bok, nimi yok nimi nak heng eilinenaʾ orokjok, nak dib senewanyak nim era, hyak pe ulumak,” hyok.

³⁰Yesus adya hyak yokaʾ-yokaʾ damoka nauba, alja yuba doro diriga ban nang edya hogung ak yokaʾ-yokaʾ lok soʾ beknaʾ nauba unulumok bok, buku enyek an unulumokaʾ nidyaʾ eleʾ gigiro momnya dobnenggurub.

³¹Bok, ban nidyaʾ anyagan momnya dorobnya nera, ugunja Yesus ara aldib Kristus nimi blebsinaʾ dubnya uboka, Imik Neyung me dibaʾ senewoka seiniwolulumaʾ aboka, dara alak dib senelemunaʾ adya, alja si nenesa leboka, ugunda embengaʾ unaʾ dibaʾ dobnelum aboka, ban yub era momnya dorob.