Read Nalca YOHANES 21 Bible Online

YOHANES 21 - Nalca bible

YOHANES 21

¹Wera onoʾ, Yesus ara alak diriga ban nang ek sam, Tiberias mek gwan gemek sam sikenek saaboka aabdok. Alja unuwok yub era ban:

²Simon Petrus beb, Thomas benesa yok si nera Didimus aboka silimeknya beb, Galilea sokok Kana heikek abnya Natanael beb, Zebedeus bedya mabo penya, onoʾ yok diriga ban nang yok penya nang eb, mamagoka ulumek.

³Simon Petrus bedya yok nang ek, ”Nara ikan el binimna,” hyok dara, onoʾ yok nang edya, ”Wera nunda neikaʾ unuwanamab,” hyek. Dara wera, sikda bindiwoka mek ekla bunaʾ ak bukumek dara, inimnek pik moruwoka elemekaʾ anaba, hadyaʾ hyak mekaʾ sibin anaba yokaʾ-yokaʾ hnon dorowanggumek.

⁴Dara, gwelek sirigoka henga dorogol yabok dara, Yesus ara mek gwan gem berem sekemok bok, alak diriga ban nang edya mek dubuk sam ab dara, nera Yesus ak sekemla senewoka ella ubnenggumek.

⁵Dara, Yesus adya sikenek, ”Najabo yab o, hadyaʾ hnon dolum gom?” aboka heibsuk dara, sikja, ”Hnon doldonaʾ orok,” hyek.

⁶Wera, Yesus adya, ”Ugunda hadyaʾ dobnelum aboka, ugunja hadyaʾ oumaʾ akleng anyek, mek ekla bunaʾ sirik ek sam bobogolulum,” hyok. Dara, unuwanalum amok sok unumek dara, hadyaʾ oumaʾ akleng ara hadyaʾ nauba adya deknewoka lang-lang alamok adya jabnamenggoma dangamok.

⁷Wera danyek, Yesus adya hyak wanaʾ nauba ulumokaʾ alja yuba doro diriga bannya bedya Petrus bek, ”Ban ara Wenelesilnya benyaʾ,” hyok. Petrus bedya, ”Ban ara Wenelesilnya bera an,” yuba kemok dara, men gwirimok akleng era onoʾ ongobgogobok dara, mekek yoruwoka mek gemek bilimok.

⁸Dara, yok diriga ban nang era, or ok gem berem wera ok berem ulumekaʾ anasa, hadyaʾ deknemok aklenga gliboka mek ekla bunaʾ pik eimik gokgiga bilimek.

⁹Wera, sikda mek gemek sam seleb yeilimek dara, Yesus ara orowek uka sekoka hadyaʾ hnon uk ak dab loboka, roti gwaneng uk dubuk weremokaʾ ak eiyimek.

¹⁰Dara Yesus adya, ”Wera ugunja wen doblum hadyaʾ era hnon anyagan wen bo yoululum,” hyok.

¹¹Wera, Simon Petrus bera mek ekla bunaʾ eilib welewoka, ikan akleng gliboka gemek bo beil yok. Nidyaʾ hadyaʾ ok deknero lomokaʾ adya, hadyaʾ nidyaʾ hiboka dara, denga hnab badya anaso ulumok bok, hadyaʾ oumaʾ akleng era hnon mekaʾ denewanggumok.

¹²Dara Yesus adya, ”Wera yeiniboka del yabalelulum,” hyok. Wera sikda nidyaʾ ara al banara Yesus ulumla senemekjok, sikja hnon anda heknya do aboka asaʾ ganya boboka, ben hnonok anaba heibnenggumek.

¹³Dara, Yesus ara yeindeboka roti gwanenga doboka soboka sikenek elegesuukanya, hadyaʾ anaba neik so unusuk.

¹⁴Wera Yesus seleb somogomokjok embengaʾ suboka bukok dara, nen unumoknya nera li winilinya, Yesus adya alak diriga ban nang ek al nonga laga amasuk.

¹⁵Wera, sikda nidyaʾ seleb debgogomek dara, Yesus adya Simon Petrus bek, ”Wei, anda Yohanes mamnya Simon o, yok danara mek so bok, anak dara, nak hyak nauba wanaʾ ulunelem do?” aboka heibuk. Dara, Petrus bedya Yesus ak, ”Aldib e, Wenelesilimnya o, nara anak wanaʾ ulunggenaʾ ara anda ella ulunelem e,” hyok dara, Yesus adya Petrus bek, ”Wera anasa, nadya domba memab anyek, pe geregoka bo ulunelom,” hyok.

¹⁶Dara onoʾ, hnon sounuwoka penenya sum Yesus adya Petrus bek, ”Wei, anda Yohanes mamnya Simon o, anda nak wanaʾ nauba ulunelem gom?” aboka heibuk dara, Petrus bedya Yesus ak, ”Aldib e, Wenelesilimnya o, nara anak wanaʾ ulunggenaʾ ara anda ella ulunelem e,” wenhyok dara, Yesus adya Petrus bek, ”Wera anasa, nadya domba pama danyek pe geregoka bo ulumnenelem e,” hyok.

¹⁷Dara, Yesus adya Petrus bek, alja onsok saaboka neiknya nenyek li winilinya sum, ”Anda Simon Yohanes mamnya, nak nauba wanaʾ ulunelem de?” aboka heibuk dara, wera Petrus bedya ganya angoo senewoka, Yesus ak, ”Wenelesilimnya o, anda yokaʾ-yokaʾ nidyaʾ ella ululamaʾ anasa, wera anasa, nadya anak nauba wanaʾ ulunggenaʾ ara anda ella ululam,” hyok dara, Yesus adya onoʾ Petrus bek, ”Wera anasa, nadya domba pam enyek pe geregoka bo ulunelom,” hyok.

¹⁸Dara, ban nidyaʾ Yesus ab, Petrus beb wenyab danggogorekaʾ seleb dara, onoʾ Yesus adya Petrus bek, ”Nara anak dib lebgen. Anda wen anam goubenya ululam danara, goukwa noronaʾ ara an damnya norobdangoka, anja nara anyagan bisinya senemnaʾ ak sam balalam bok, eimik anda nauba damen dara, anda soruk ok okmenekanya, yok nim edya anak noroyiboka, anya ban mok enyek an banaʾ lek senemen ak sam bo bininjak.”

¹⁹Yesus adya ban nidyaʾ Petrus bek wenhyokaʾ damok ara, Imik Neyung si imik nenen danasa, Petrus benyek hekaʾ huboka somoganamokaʾ damok anasa lemok. Ban nidyaʾ wenyabgogomokaʾ seleb dara, Yesus adya Petrus bek, ”Anda nak diriga yalanelom,” hyok.

²⁰Wera, Petrus bera kemel samalemok dara, Yesus adya wanaʾ nauba ulumokaʾ yuba doro diriga bannya bera, eimik dobol balasukaʾ eiyimok. Yesus obnemekaʾ anasa, neikaʾ sidyaʾ deldaklemek sum enyek, Yesus berem bukoka delemoknya bedya, Yesus ak, ”Wenelesilimnya o, anak heknedya oblulum aboka yuba dil bilinggel do?” aboka heimoknya benyek okoka eiyimok.

²¹Petrus bedya, bera eimik balamokaʾ eibuk dara, Yesus ak, ”Wenelesilimnya o, ban benyek anara, hekaʾ danamla do?” hyok.

²²Dara, Yesus adya Petrus bek, ”Nadya alda or embengaʾ ululul senemnya dara, alda or moruwoka ulumlyaʾ ara na eimik yanamna. Anasa nera, anjinya gomaʾ, loblom. Bok, anda nak diriga yalanelom,” hyok.

²³Dara wera, ban diriga bannya bera, alda somoganggunumla an yub era, Yesus yuba don nang gangganek nidyaʾ oboka lelemok. Yesus adya, alda eimik somoganggunumla anaʾ ara orok bok, alda Yesus adya dara, nadya embengaʾ ululul senesinya dara, alda or embengaʾ ulumnamso, nera ugunja gomaʾ, amoknya nenesa lelemek.

²⁴Dara ban benyek ara, Yesus adya unulumokaʾ nidyaʾ ak laga lelemookanya, ban yuba domokaʾ momnya doboknya bera alan. Alja nidyaʾ momnya doboka lebokaʾ ara, dib nonga lebokaʾ ara nunda nidyaʾ ella ulumab.

²⁵Dara, Yesus adya unulumokaʾ ara yokaʾ-yokaʾ hyak nauba hnon unulumok. Ban nidyaʾ pe yana lelewoka ellaʾ gigiro momnya doseng dara, nadya dara, wera soko me nidyaʾ lendeboka oulyang okna danamsoʾ anasa, hnon darasam buluk loboka momnya dorob.