Read Nalca YOHANES 3 Bible Online

YOHANES 3 - Nalca bible

YOHANES 3

¹Nimi Parisi nanga ben hnon alja si Nikodemus bera, Yahudi nang emba Imik Neyung yuba lenaʾ dubnya ulumookanya,

²inimnek enyek, Yesus ak sam yeiniboka, ”Neyung neklesilimnya o, anja yokaʾ-yokaʾ migib unululamaʾ anyek, Imik Neyung adya anak aragenaʾ orok dara, wera unuwanggunusomaʾ anasa, anak dara Imik Neyung adya aldib sokok sam neksinya bokol yeilinjoknya bek ululamaʾ ara, nunda ella ulumab,” hyok.

³Dara, Yesus adya Nikodemus bek, ”Nara anak dib lebgen, Nimi ben hnon penya beilinaʾ anam orok dara, alda Imik Neyung wenesin heikek sam ara mekaʾ eibnenggunumla,” hyok.

⁴Dara, Nikodemus bedya Yesus ak, ”Seleb nauba dangosonya benyek saaboka alja genong gedya mon lomok wekoka beibneseng de? Seleb nauba nesobok dara, unuwanggunuseng,” hyok.

⁵Dara onoʾ Yesus adya, ”Nara hyak dib lebgen, nimi be hnon alda mek adya hnon, Geisinya adya hnon, beilinaʾ orok dara, alda Imik Neyung bedya wenesin heikek weknenggunumla.

⁶Nimi nong ak dara, nim adya beillilimak bok, ganya ak dara, Imik Neyung Geisinya adya beillilisil.

⁷Nadya ugunuk saaboka beibnesil wenyalasinaʾ ara, anda loka dabnenggununggeso.

⁸Kaboʾ ara alja dorogunun senemnaʾ ak ara nidyaʾ doroklamla. Dara, alja uu alamlaʾ ara kelelam bok, hanyagar ab sam yalamla, hekmok balamlaʾ ara, anda elgom ululam sok, Imik Neyung Geisinya adya beillilisil nim ek dara, al anaso ulusil,” hyok.

⁹Dara, Nikodemus bedya Yesus ak, ”Ban ara hekaʾ anasonya ubnamso do?” aboka heibuk.

¹⁰Yesus adya alak, ”Anda Israeli nim emba yuba neksinya ululam bok, nera elgom ululam de?

¹¹Nara anak hyak dib lebgen, Nunja seleb ella unanya nenyek ugunuk neklesab hnon, nunda seleb heng eiyinanya nenyek ugunuk laga lelesab bok, ugunda nunja yuba dib senewoka donggululum.

¹²Sokok sam an ululanya nenyek neksinaʾ anaba dib senenggululumaʾ anasa, nenera imik heikek sam ululanya nenyek neknesisinya dara, hekaʾ huboka dib senewanesom do?” hyok.

¹³”Nimi hnonok sibin anaba imik heik sam embengaʾ welewanggubuk bok, nimi dibaʾ me nek imik heik ab yeilimoknya bek hnonok unumok.

¹⁴Musa bedya, hwalek gasaʾ ak sam, mesa bagaʾ gal ak kweb weininggemok sok, nimi hnonok-hnonok nidyaʾ alak dib senewanamak nim era, embengaʾ unaʾ dibaʾ dobnokaʾ aboka, nimi dibaʾ me nenebabya neik so gal ak glab weiningganamak,” hyok.

¹⁶”Al Imik Neyung adya nimi soko nim ek, hyak wanaʾ ulusuukanya, alja me hyak hnonok bok, nimi soko nim amba bokol yeilisuk. Nimi nidyaʾ hnonok-hnonok alak dib senewoka dobnamak dara, somoganggunumak bok, embengaʾ unaʾ dibaʾ dorowanamak aboka, alja me bokol yeilisuk.

¹⁷Imik Neyung alja yando me sokok sam bokol yeilimokaʾ ara, anyagan yana lelelesululaʾ aboka bokol yanggumok bok, alda alja me nedya soko nim ek blebsululaʾ aboka bokol yeilimok.

¹⁸Alak dib senewoka dolomak nim era, Imik Neyung adya eimik yana lelewoka igina boyiwanggunesil. Bok, alak dib senenggulumak nim era, wera, Imik Neyung alja hnonok me nedya si nek dib senenggulumakaʾ anasa, seleb igina dobnemakaʾ lomok ulumak,” hyok.

¹⁹”Imik Neyung adya yana kilisilaʾ damok ara ban: Dilinaʾ ara sokok an seleb yok bok, nim ara sikja unulumakaʾ anyek malya nong anasa, gunaʾ ak sam anyek perob so senelemak.

²⁰Nimi be hnon malya ululanya bera, dilinaʾ ak lek senelamlakanya, alja unulamla anyek laga danalyek aboka, dilinaʾ ak sam yangganggulumla.

²¹Bok, heknedya dib nong ok pe unululanya bera, alja unulamlaʾ ara, Imik Neyung senelamla sok unulamlaʾ anyek, laga dolulaʾ aboka dilinaʾ ak yalamla,” hyok.

²²Ban nen seleb dara, Yesus ara alja diriga ban nang eb, Yudea sokok bilimek. Dara, sikeneblaboka minggu penya so ulumeekanya, nimi hnon meka dalasuk.

²³Dara, Yohanes beneba alak anam henga geregoka gasa ek beibnenggumek salek enyek, Salim ok berem Ainon heik sam ulumookanya, meka nauba ulumokaʾ anasa, nimi hnon meka dalasuk. Nim ara meka dabsululaʾ aboka sobaʾ banyagan yalamek dara, meka dalasuk.

²⁵Ban sum enyek, Yohanes Pembaptis bedya diriga ban nang eb, be hnon Yahudi nang eb, nimigumaʾ mek eleknaʾ damba lololdalamek.

²⁶Dara, hnon nang ara Yohanes Pembaptis ak biniboka, ”Neyung neklesilimnya o, anab neikaʾ Yordan mek inik ulurumukanya, nuk amasulumnya bera, wera albabya nimi meka dalasilikanya, nimi nauba alak mamagal balamak,” hyek.

²⁷Wera Yohanes Pembaptis bedya dara, ”Nim ara Imik Neyung adya sikenek eleganggunususo dara, yokaʾ-yokaʾ dobnenggunuseng.

²⁸Nara nimi blebsinaʾanya gomaʾ, alda pika mengelelul aboka bokol yeilinyoknya nok ulumna, ugunuk seleb wenyamsaʾ anyek, damoka kelum nim ululum.

²⁹Dobnamna gel gera, dobnenanya bek aljinya ulumla. Dobnenanya aljaʾ hem bera, sikda dobdanaraakanya, doblanya bedya yuba hnon kelemla dara, eiya dablamla. Anasonya neikik, wera nababya hyak nauba eiya dablenel.

³⁰Alak dara, hyak nauba danggiga balamnelabok, nak dara mek danggiga balamnenel,” hyok.

³¹”Imik heik ab yeilinanya bera, yokaʾ-yokaʾ nidyaʾ amba dubnya ulumla. Sokok ab yeilinanya bera, nera alda sokok yokaʾanya anasa, alda sokok sam ululanya nenyek seiniro lelelabok, imik ab yeilinanya bera, hyak imik dubnya ulumla.

³²Alda seleb heng eiyimoknya hnon, o kemoknya hnon, nenyek laga neklesil bok, nimi nidyaʾ ara alja lelemla yuba pe keboka donggulumak.

³³Bok, alja lelemla yuba dib dololanya bedya dara, alda dolomlaʾ adya, Imik Neyung ara alda dib nongnya ulumla aboka laga amalamla,” hyok.

³⁴”Dara, Imik Neyung adya bokol yeilimoknya bedya, Imik Neyung bedya lelemla yub enyek lelemla. Alak ara Imik Neyung Geisinya elegelmorulamla.

³⁵Imik Neyung adya alja me nek nauba wanaʾ uboka, yokaʾ-yokaʾ nidyaʾ ara, al adya salawolulaʾ aboka elemok.

³⁶Heknedya Imik Neyung bedya me nek dib senewalenya bera, dib ulmoubnaʾ ganya seleb dolomla, bok heknedya alja me nek bleklelanya bera, dib ulmoubnaʾ ganya hyak dobnenggunumlakanya, Imik Neyung adya yu ganya ara al nong ak sob-sobaʾ ulumnamla,” hyok.