Read Nalca YOHANES 4 Bible Online

YOHANES 4 - Nalca bible

YOHANES 4

¹Yahudi nang edya Yohanes Pembaptis bera mek so meka dalasil bok, Yesus ak dara, nauba meka daboka nimi doro dililamla an yuba kemek.

²Ban wenyameknya nera, Yesus adya ununaʾ orok bok, alja diriga ban nang edya meka dalasik.

³Ban yuba en kemok dara, Yesus ara Yudea sokok ab loboka Galilea sokok yeilimok.

⁴Yesus balamok pik era Samaria soko hnoumunga garal bilimok.

⁵Pika balamookanya, Yesus ara Samaria sokok heik si Sikar heikek bilimok. Ban heik ara, Yakub bedya alja me Yusuf bek elegemok soko berem ulumok.

⁶Ban sokok sam ara, Yakub bedya oulyang aboka si simekaʾ den mek ulumok. Yesus alda balamookanya, hmeng umokaʾ anasa, ban mek denaʾ oulyang berem bul bilimok. Heng ara yubyek dukdukanek salek bul bilimok.

⁷Alja diriga ban nang era heikek denaʾ dekel bilimek. Dara, Samaria gel gera meka gwel yeilimok dara, Yesus adya wenhyok, ”Wei, genong o, mek ok anasa, meka gweb eleganenelem,” aboka molowok.

⁸

⁹Dara, ban gel genedya, ”Anda Yahudi nang bok, na Samaria gel gek hekasa meka dunun aboka molonelem do?” hyok. Yahudi nim eb, Samaria nim eb, neikaʾ olokdangoka unggulumek nim ek anasa lemok.

¹⁰Gela ara ban wenhyok dara, Yesus adya alak, ”Anda Imik Neyung adya eleklesilaʾ ab, heknedya anak meka mololenggelaʾ ab, ella ulusom dara, anja alak molowanasom dara, alja dib embengaʾ unaʾ mek era eleganenggeso,” hyok.

¹¹Dara, gel genedya Yesus ak, ”Neyung o, anda mek gwenaʾ orok, mek oulyang ara hyak lom nong ok onu anasa, hekaʾ huboka dib embengaʾ unaʾ mek ara gwebnelam do?.

¹²Nunja neyung Yakub bedya, ban mek denaʾ oulyang enera nuk elegosuk. Yakub beneba alba anyagan meka delemookanya, alja mab eb, alja pama beillilimokaʾ nidyaʾ ara, al anyagan delemek. Bok, anda Yakub bek sokok nenewanalamakanya, anak dubnya danalam de?” hyok.

¹³Yesus adya alak, ”Ban mek demeija nim era, eimik onoʾ saaboka mek ok ubnesil bok,

¹⁴nadya elegeisinya mek enyek delenya bera, eimik saaboka mek ok ubnenggunumla. Bok saaboka, nadya elegeisinya mek ek dara, alja nong lomok sam ara sob-sobaʾ yabalmorulamla mek anaso dangoka, dib embengaʾ ulmoubnaʾ eleganamla,” hyok.

¹⁵Dara, onoʾ ban gel genedya, ”Wei, neyung o, onoʾ mek ok ubnelyakanya saaboka anyagan mek sobaʾ gwel yanyek aboka, wera ban mek enyek eleganenelem,” hyok.

¹⁶Yesus adya alak, ”Anja nenya youbol bimenekanya, onoʾ anyagan yanarum,” hyok.

¹⁷Dara, ban gel genedya, ”Nara nenya orok,” hyok. Dara Yesus adya, ”Anda hyak dib nong leblam.

¹⁸Seleb liga lambadya nenya dolum bok, wen anablaboka ulurumnya bera, wera anja nenya unggulumlaʾ anasa dib leblam,” hyok.

¹⁹Yesus adya ban wenyamokaʾ eiyimookanya, ban gel genedya alak, ”Neyung o, anda hyak dib nong ununumnaʾ lenaʾanya ululamaʾ eiyinggen,” hyok.

²⁰”Nunja neyung yab era, Imik Neyung bek ban mein enyek an giblemek bok, ugunda Yahudi nim era, Yerusalem heikek ok Imik Neyung gibnemab alalum,” hyok.

²¹Yesus adya alak, ”Yok yanamla sum enyek, nim adya Imik Neyung ak ara, mein enyekan gomaʾ, Yerusalem heikek ok gomaʾ, giblemnemak ara dib senewalom.

²²Ugunda Samaria nim era, ugumba ella unggululumnya nek giblelum. Bok nunda Yahudi nimi numba ella ulumabnya nek, nimi blebsinaʾ damok ara, Yahudi nim ek ab yalamlaʾ anasa, numba ella ulumabnya nek giblemab,” hyok.

²³”Bok eimik yanamla sum era, onoʾ al wen seleb ulumla sum eneba, Imik Neyung bek dib giblemak nim era, ganya adya gibnemak, Imik Neyung alba ulumla sok sunuwoka gibnemak. Ban anaso nimi ganya ara, Imik Neyung adya nak unu gibneneseng senelamla.

²⁴Imik Neyung ara, ganya ok ulumlaʾ anasa, alak giblemak nim era, ganya lomok, Imik Neyung alba ulumla sok sunuwoka, unu giblemnamak,” hyok.

²⁵Dara, ban gel genedya Yesus ak, ”Nimi blebsinaʾ dubnya, Kristus aboka si silimaknya bera, yanamlaʾ ara ella ulumna. Alda yalya dara, yokaʾ-yokaʾ nidyaʾ ara nuk neknesil,” hyok.

²⁶Yesus adya, ”Wenyhelemnya bera nara alan. Alan anab yuba neikaʾ salanam,” hyok.

²⁷Ban salek enyek, alja diriga ban nang era denaʾ dekel bilimekaʾ ara yek. Yesus ara gel ab yuba salarekaʾ eiyimeekanya, sikda loka dasuk. Bok sikja dara, ”Genong o, hekak senelelamakanya yeililam do?” aboka heibnenggumek. Onoʾ Yesus ak anaba, ”Hekasa anda gel ab yuba salmorum do?” aboka heibnenggumek.

²⁸Dara, ban sum enyek ban gel gera mek hmeiya beib loboka, heikek byuukanya lebokja,

²⁹”Ugunda nak yokaʾ-yokaʾ nidyaʾ nadya unulunanya nidyaʾ laga nenelnya benyek kemel yoululum. Alda nimi blebsinaʾ dubnya Kristus ulumla do?” hyok.

³⁰Dara, nimi nauba sikja heikek ab goboka Yesus ak kemel bilimek.

³¹Wene salek enyek, alja diriga ban nang edya, ”Neyung o, wera or denaʾ seleb ulumlaʾ anasa, wera or del yabalom,” aboka alak dukaʾ lolom-lolom alamek.

³²Bok alda sikenek, ”Ugumba elgom denaʾ don nak hnon ulumlaʾ anyaʾ,” hyok.

³³Dara, alja diriga ban nang era, sik moumen heibdangdo balamek. ”Nimi hnon alsamba denaʾ bo yeilimak de?” aboka heibdangdo balamek.

³⁴Dara Yesus sikenek, ”Nadya denaʾ era, nadyaʾ neyung, nak bokol yeilinyoknya bedya, alja senelamla anyek, unululul senelamlaʾ hnon, nak welelulaʾ aboka lenyok wa hnon, senenenya loboka welemna dara, wera nadya denaʾ era alan,” hyok.

³⁵Dara Yesus sikenek, ”Walaʾ dombadya mablya dara, gwaneng denaʾ lanawanamla ara ugunda wenyalalum. Bok, nara ugunuk saaboka lebnesin, wa weblorobaʾ anyek doka daknenyak senewoka eng olomlaʾ anyek, ugunda kendululum.

³⁶Doka daklamak nang ara, sikja deknaʾ seleb dolomak. Embengaʾ ulmoubnaʾ amba dakoka mamaklemak. Dara, eimik era doka doklomak nim eb, doka daklamak nim eb, ei-ei ganya daboka ulumnemak.

³⁷Be hnon melemla dara, onoʾ yok nang daklamla, wenyalamak ara, dib nong.

³⁸Nara ugunja webnenggublum wak sam doka daknelum aboka orugusin. Yok nim edya orowek seleb nauba wemekaʾ anyek, ugunda daklumaʾ adya perobaʾ doblum,” hyok.

³⁹Dara ban gel genedya, ”Nadya nidyaʾ ulusenya laga lenel,” hyokaʾ adya nimi nauba Samaria nim era, Yesus ak dib senewoka domek.

⁴⁰Dara, Samaria nimi Yesus nong ak okoka eiyimek dara, alak yeiniboka nuk pe ulunobaʾ aboka alak molomek. Anasa, Yesus ara liga penya sikja heikek gobdo mamok.

⁴¹Dara, nimi nauba ara Yesus adya neklesukaʾ anyek, sikja okoka eiyimeekanya, alak dib senewoka domek.

⁴²Dara, Samaria nim edya ban gel genyek an, ”Anja nuk wenyasilimaʾ adya ok dib senewanggumab. Wenyok alda nun dam nang okoka heng yokaʾ bekoka eiyimabakanya, alja lelemla yuba kemabaʾ adya, alak dib senewoka doboka, alda soko nimi bleblesilnya dibaʾ ulusilaʾ ara ella ubab,” hyek.

⁴³Yesus ara Sikar heikek liga penya mamok dara, Galilea sokok bilimok. (

⁴⁴”Nimi be hnon ununumnaʾ lenaʾanya bera, dam heikek nim adya gibnenggulumak,” aboka Yesus adya yok men sum enyek wenhyok).

⁴⁵Yesus ara Galilea sokok bilimok sum enyek, nimi ganya eiya daboka alak doro diyimek. Sikda Yerusalem heikek Yahudi nang perob sum enyek ulumeekanya, Yesus adya yokaʾ-yokaʾ unulumokaʾ anyek eiyimekaʾ anasa, perobaʾ leboka Galilea yanggok dara, doro diyimek.

⁴⁶Dara, Yesus ara Kanaan heikek mek sirikaʾ bok anggur meka nenemok heikek onoʾ yeilimok. Kapernaum heik ara, soko dubnya bedya me neiknaʾ salamokaʾ ak malamok.

⁴⁷Dara, soko damnya bera Yesus ara Yudea sokok abaʾ ara, Galilea sokok yeilimla anaʾ kemok dara, Kapernaum heikek ab nadya somogonunaʾ ulumla me era hwebnululaʾ aboka Yesus ak el bilimok.

⁴⁸Dara, Yesus ara ban soko dubnya bek, ”Ugunda yokaʾ-yokaʾ lok so beknaʾ senenggomaʾ, lokol danaʾ eilinggululum dara, dib senenggululum,” hyok.

⁴⁹Ban soko dubnya bedya Yesus ak, ”Neyung, nadya me anam somoganggumlya salek enyek ban men yalom,” hyok.

⁵⁰Yesus adya alak, ”Anja me nera seleb meremla anasa or bilom,” hyok. Dara, dubnya bedya Yesus lemokaʾ dib senewoka lo bilimok.

⁵¹Dara, dib lebnel senewoka pikek balamok salek enyek, alja ek wa nang alak yeiniboka, ”Neyung, anja me nera seleb merewo,” hyek.

⁵²Dara, ”Alja hwer salek ek me nera merewo do?” aboka heisuk dara, ”Yubyek dukdukanek enyek pob ara denghyo,” hyek.

⁵³Dara, ban me nen aljaʾ neyung bedya, Yesus ara al wenyek wenyamoʾ anasa, nadya me merewo senemok. Dara, alaʾ mabo gel e gekman Yesus ak dib senewoka domek.

⁵⁴Yesus ara Yudea sokok abaʾ ara, Galilea sokok yeilimok dara, ban senenggom ununaʾ enyek penenya unumok.