Read Nalca YOHANES 5 Bible Online

YOHANES 5 - Nalca bible

YOHANES 5

¹Wera yok sum era, Yahudi nang perob sum yenemok dara, Yesus ara Yerusalem heikek bilimok.

²Yerusalem heikek domba pam pik aboka si silimek sereknaʾ berem, Ibrani yub adya, Betesda aboka silimek mek gwan ulumok. Anyagan ara, senenggomaʾ yangamek ekla lambadya gwaneb ganagamok.

³Dara ban ekla ak ara, neiknaʾ salalasuk nimi nauba maro balamek. Wera hnonda henga lum ulusuk nimi hnon, hnonda koma bulumek nimi hnon, hnonda nonga yana soruka heilisuk nimi hnon maro balamek. Dara, meka waral yabalya enyek, wene sab-sab hwibnobaʾ aboka diri malamek.

⁴Hnon yok sum yok sum era, Imik Neyung lero adya mek gwan enyegan sekel yinggin dara, meka wareboka lolomok. Dara neiknaʾ salananya bera, mek gwan en warel yaben sab-sab men berra yoruwoka hwibnanya bera, wera alak salamna neiknaʾ era dengalamok.

⁵Dara al onok ara, nimi be hnon neiknaʾ salamokaʾ anasa, malamok salek era gibnaʾ denga hnon goboka ebdobnya goklombadya dangamoknya be hnon malamok.

⁶Wera, Yesus adya ben era ekla bunaʾ ak malmoublemokaʾ ak eiyiboka, alda youmaʾ ek moruwoka salabmoumokaʾ ella umok dara, Yesus adya benyekan, ”Anda mereweisinya senelam de?” aboka heimok.

⁷Dara, neikdo malamoknya bedya Yesus ak, ”Neyung o, meka warel yaben salek dorong nen dara, nimi hnon anyagan aranggulunyakaʾ adya, okna ulunel. Wera onoʾ meka warel yaben dara, nababya hwibnunaʾ aboka balanabok, anam ban salek enyek, yok nang ek men hwildolomak,” hyok.

⁸Dara Yesus adya, ”Anda sekoka anja esonaʾ doboka bobmenekanya yabalom,” hyok.

⁹Wera al wene salek enyek bera merewok. Dara, alda esonaʾ dobok dara, bobookanya yabok. Ban unumokaʾ ara Sabat mem sum ek umok.

¹⁰Anasa wera, Yahudi nang edya, wenyok meremoknya bek, ”Sumen era Sabat mem sum anasa, anda anja esonaʾ doboka bo yabanaʾ ara unuwanalum an yuba mem alamla,” hyek.

¹¹Bok benedya sikenek ara, ”Ousa nak hwenelnya bedya, Anda anja esonaʾ doboka bobmenekanya, yabalom aboka orugenelaʾ anasa umna,” hyok.

¹²Dara sikja, ”Anak esonaʾ doboka bobmenekanya, yabalom aboka orugenggelnya bera heknedya do?” aboka heibek.

¹³Bok, Yesus ara seleb nimi hnoum dan dengamok bok adya, wera heknedya hwenel do aboka ganya emok.

¹⁴Wera onoʾ eimik enyek, meremoknya bera Yesus ara Imik Neyung ek sam eibuk dara, Yesus adya benyek, ”Wera anda seleb merewalamaʾ anasa, onoʾ hnon sounuwoka malya unggom mem. Onoʾ malya ubmen dara, hyak nauba so malya dagelyek bar,” hyok.

¹⁵Dara meremoknya bedya, wera Imik Neyung ek ab goboka biniboka Yahudi dub nang ek sam, ”Nara Yesus adya hwenel,” aboka nekdo bilimok.

¹⁶Anasa leboka, Yahudi nang edya dara, Yesus ara Sabat mem sum bok, nimi hwemokaʾ anasa, alak obnobaʾ aboka dub einimek.

¹⁷Bok Yesus adya Yahudi nang ek, ”Nadya neyung bedya weneba or wa weldibilloklamlaʾ anasa, wera nababya welemna,” hyok.

¹⁸Wera Yesus adya ban wenyaboka lemok yub edya, Yahudi nang era, hyak Yesus ak obnobaʾ aboka nauba so yeiriwoka dulumek. Dara, nera Sabat mem sum bok, nimi bleboka hwelesuk amba ok gom. Onoʾ alda, Imik Neyung ara nadya neyung aboka lena adya, wera nera Yesus ara, Imik Neyung nonga gebeldalamla senewoka, dulumek.

¹⁹Wera an ara Yesus adya Yahudi dub nang ek, ”Wera ban lebnesinaʾ ara dib lebnesin, Alja me nedya yokaʾ-yokaʾ unulamlaʾ ara, alja migib edya ok ganya doboka wenggulumla. Alja unululanya nera aljaʾ neyung bedya seleb unulamlaʾ anyek eiyiboka unulamla. Anasa wera, neyung bedya unulamlaʾ anyek, alja me neneba neikik unulamla.

²⁰Anasa, neyung bedya alja me nek wanaʾ ulumlakanya, alja unulamlaʾ nidyaʾ ara, alja me nek amalamla. Wera onoʾ eimik era, neyung bedya hyak senenggom ununaʾ enyek elegoka aawalya dara, ugunda eiyiboka hyak loka dabnesil.

²¹Anasa wera, neyung beneba somogamna nim embengaʾ bukiyiboka sikenek embengaʾ unaʾ eleklesil sok, alja me neneba neikso, nadya embengaʾ elegonun senewan nim ek embengaʾ eleklesil.

²²Neyung bedya alja ok ganya doboka nimi yana lelenggulusil. Bok, nimi yana lelesinaʾ damoka nidyaʾ ara, seleb alja me nek gobdo lemok.

²³Neyung bedya ban unumoknya nera, nim adya neyung bek giblemak sok, onoʾ alja me nek giblenokaʾ aboka umok. Wera anasa, heknedya alja me nek gibnenggulumla dara, wera al bokol yeilimoknya bek gibnenggulumla.

²⁴Nadya ban lelemnaʾ ara dib lebsin, heknedya nadya lelemna yub ek pe keboka neyung be na bokol yeilinyoknya bek dib senewalya dara, alda seleb embengaʾ unaʾ ara, alak dib uboka, alda seleb somoknaʾ damok ab ara, embengaʾ unaʾ ak sam yibilimokaʾ anasa, eimik alak Imik Neyung adya igina yakaʾ boyiwanggunusil.

²⁵Ugunda ban nadya lebsinaʾ anyek dib senewanalum, seleb somogorob nim era, Imik Neyung bedya alja me nedya yuba keboka embengaʾ buknemak salek era, eimik yanamlaʾ hnon, weneba seleb yeiniboka ulumla amna ara, ugunda dib senewanalum.

²⁶Neyung bera nim embengaʾ unaʾ damok gaknya ulumla sok, onoʾ al adya alja me nek nim embengaʾ unaʾ gaknya dangiyimok.

²⁷Dara, alja me nera nimi dibaʾ me ulumlaʾ anasa, alja neyung bedya alak nimi yana lelesinaʾ ara seleb elegemok.

²⁸Dara ban lelesin anyek, hyak lok ganya bobnenggunulum. Eimik yanamla sum enyek, seleb somogorob nimi nidyaʾ ara Imik Neyung bedya me nedya yuba kebija dara, dibsik oulyang ak ab ara, embengaʾ suboka buknemak.

²⁹Dara, seleb somogorob nim era, sik dibsikaʾ ak ab embengaʾ suboka buknemak dara, pe unulumek bok somogorob nim era, embengaʾ ulunokaʾ aboka subnemak. Bok, malya ulumekaʾ ara somogorob nim era, igina dobnobaʾ aboka subnemak,” hyok.

³⁰”Nara yokaʾ-yokaʾ nidyaʾ ara, nadya ok salyaʾ ganya doboka ununggulumna. Nadyaʾ neyung bedya anyek unuwalom alamlaʾ anyek, sunuwoka yana lelelesin. Nabeyok ganya doboka ununggulumnaʾ anasa, wera neyung be na bokol yeilinyoknya bedya unuwolul senelamla anyek unulamna anasa, nadya anyek yana lelewan alamna ara, munaʾ dib unulamla.

³¹Nabeyok ganya doboka, nasamba geklewoka yuba leldalasinya dara, wera ugunda nak dib senewanggununesom.

³²Bok, onoʾ ben hnon jok nasamba hnon geklewoka yuba lelemla. Dara, alja lelemla yub era dib lelemla ara, nara ella ulumna.

³³Dara, ugunja seleb Yohanes Pembaptis bek, seleb nimi yuba kel bululum aboka bokol bililum dara, alja dib yuba seleb ugunuk leb elegesuk.

³⁴Bok, nara ban wenyhenya nera, nara nim adya yuba nasamba geklewoka lelenenok senenggulumna, alda ban wenyhenyaʾ adya ugunuk blebsululaʾ aboka lelesin.

³⁵Yohanes Pembaptis bek, alda wesaʾ yebnaʾ dibaʾ ulumok. Dara alda yeblemok salek era, li hnonok perob senelum.

³⁶Bok nak geklewoka lelemla yub era, hnon senenggomaʾ ulumlakanya, Yohanes Pembaptis bera mek so lelenyok. Anasa wera, nadya wen hekaʾ unulamnaʾ ara, neyung be na bokol yeilinyoknya bedya unuwoka welelom aboka orugenyokaʾ anyek welemnaʾ adya, wera nara aldib Imik Neyung bedya bokol yeilinyokaʾ anyek geklewoka lelenel.

³⁷Imik Neyung be na bokol yeilinyoknya beneba, alda nasamba geklewoka yuba lelemla. Bok, ugunda alja yuba kenggululumukanya, onoʾ alja nong hogung eneba mekaʾ eilinggululum.

³⁸Ugunda alja bokol yeilimoknya bek dib senenggululumaʾ adya, alja yub era ugunja ganya lomok sam dibaʾ yinaʾ menggulusil.

³⁹Ugunja dara, Imik Neyung yuba momnya dobokaʾ einiwoka ulumeibya adya embengaʾ unaʾ dobnemab senewoka nauba einililum. Wera, ban bukuk sam anaba nasamba geklewoka yuba lelelabok,

⁴⁰ugunda embengaʾ unaʾ dobnob senewoka nak yangganaʾ lek senelelum.

⁴¹Nara nim adya gigiwanenok senewoka hogunga bo enggulumna.

⁴²Bok, ugunuk ella ulusin. Ugunda Imik Neyung ak ugunja ganya edya wanaʾ unggululum ara, nara ella ulusin.

⁴³Nara neyung bedya si pik moruwoka yasa bok, ugunja nak perobaʾ leboka doro dibninggunulum. Bok, yoknya bera alja si pik yalya dara, perobaʾ leboka doro dibnelum.

⁴⁴Ugunda Imik Neyung be hnonok ok ululanya bedya gigiwousululaʾ aboka enaʾ loboka, alda ugunuk nimi yok nim edya nuk gigilesinok senewoka hogunga bo elelum dara, hekadya ugunda dib senewanasom do?.

⁴⁵Ugunja dara, nadya neyung bedya saramek sam, aladya malya gebiyiwanesil senen ganya bonenggom mem. Ugunja dibnya senelelumnya Musa bedya malya gebiyiwanesil.

⁴⁶Musa bera alda nasamba geklewoka momnya domokaʾ anasa, ugunda Musa bedya momnya domok yub ek dib senemun dara, wera nak anaba dib senewananulum.

⁴⁷Bok, ugunda Musa bedya momnya dobok yub enebabya dib senenggululumaʾ anasa, wera hekaʾ adya nadya ugunuk lelesinaʾ ara dib senewanasom do?” hyok.