Read Nalca YOHANES 6 Bible Online

YOHANES 6 - Nalca bible

YOHANES 6

¹Ban unumokaʾ seleb dara, Yesus ara onoʾ saaboka Galilea mek ara neik mek bok, Tiberias aboka si silimek mek gwanek sam eer bilimok.

²Yesus adya yokaʾ-yokaʾ lok soʾ beknaʾ nauba unuwoka nimi hwelesukaʾ anyek, eiyiboka nimi nauba dirigoka dobdongoro balamek.

³Dara, mok soko meinik sam alja yuba doboka diriga ban nang eblaboka welewoka bukumek.

⁴Wera ban salek era, Yahudi nang welenaʾ orok roti gwaneng den salek perob sum oka dangamok.

⁵Ban sum enyek ara sekoka gokgobok sam nidyaʾ keeb ganagok dara, nimi nauba alak sam yalamekaʾ eiyimok. Dara Pilipus bek, ”Ban nimi gong danara denaʾ denok aboka, nunda har sam denaʾ dekel binimab do?” aboka heibok. (

⁶Yesus ban Pilipus bek wenhyokaʾ ara, gwaneng dekoka ununaʾ ara Yesus orowek ella ulumok bok anasa, Pilipus benyek sene hekaʾ hublul do? aboka lebok.)

⁷Dara, Pilipus bedya, ”Roti gwaneng ara walaʾ linbadya rupiah wa weboka deknaʾ ara, ban nimi gong danera mekaʾ dijaʾ anaba ellaʾ gigiwolulaʾ gomaʾ,” aboka lebok.

⁸Wera dara, onoʾ yok yuba doboka Yesus ak diriga balamoknya Simon Petrus alja wes Andreas bedya,

⁹”Anyagan me hnon roti gwanenga lambadya, hadyaʾ penya bomla bok, wera ban nimi gong mandebnaʾ adya, nidyaʾ gigiwolulaʾ gomaʾ,” aboka lebok.

¹⁰Dara, Yesus adya alja yuba doboka diriga ban nang ek, ”Ban nimi nauba buknok aboka orugolulum,” hyok. Dara, anyagan ara holaʾ nauba ulumokaʾ adya, nimi nidyaʾ holaʾ dubuk bukumek bok, nengmab ok einimek ara denga salyaʾ yubaʾ linbadya nang bukumek.

¹¹Nimi nidyaʾ bukumekaʾ seleb dara, Yesus ara roti gwaneng doboka, Imik Neyung molowoka, nimi nidyaʾ bukumek nang ak soboka bokoka elekdo yibilisuk. Anasonya neikik, hadyaʾ anaba alja unu denaʾ nauba senemekaʾ sunuwoka elegesuk.

¹²Seleb pe debgogomek dara, Yesus adya alja diriga ban nang ek, ”Ban nidyaʾ siknaʾ ara mekaʾ me anaba salyaʾ bobogeijik aboka, neikaʾ ak pe mamagolulum,” hyok.

¹³Dara sikda, nimi nauba lambadya roti gwaneng deregoka dara, boklomeknya nera serrem obadya mamagol bindiwoka deknemek.

¹⁴Nimi nauba Yesus adya unumok anyek, hyak lokso unumok eiyimek dara, ”Lok so beknaʾ ununumnaʾ lebnelanya sokok an yanamla, youmaʾ wenyalamekaʾ ara wera alan,” hyek.

¹⁵Wenyaboka, sikda nimi gong dara, Yesus ak dukaʾ lolowoka sikja senenggom dubnya sekiyiwanobaʾ aboka yanamakaʾ eiyimok dara, Yesus ara anyagan loboka albeyok gokoka meinik sam bilimok.

¹⁶Ban sum enyek sin dangoka inilyabok dara, Yesus yuba doboka diriga ban nang era, Galilea mek gemek yingginiboka,

¹⁷mek eklaʾ bunaʾ ak bukumek. Dara, sikda Kapernaum heik binobaʾ aboka garal balamek. Ban salek era seleb inimok bok, Yesus ara sik dam ak berra yanggumok.

¹⁸Dara balamek bok, senenggom kaboʾ doroklomok bok adya, mek yaknaʾ neboka eillilimok.

¹⁹Sikda hyak mok mek hnoumunga onoʾ pukgiga balamek jok, saaboka keemek enyek, Yesus ara mek dub pik yan inibgiga mek ekla bunaʾ berem yalamokaʾ eiyimek. Dara, sikda hyak ganya loka dasuk.

²⁰Bok, Yesus ara sikenek, ”Nera na anasa, ugunda lok ganya bonggom mem,” hyok.

²¹Dara, alja yuba doboka diriga ban nang edya perob aboka Yesus ak mek ekla bunaʾ ak yalom aboka unul yabek sab-sab, sikja mek ekla bunaʾ era seleb mek gemek lanal bilimok.

²²Ampum so maboka gwelegok dara, or anyagan anam ulumek nim ara, mek ekla bunaʾ ara hnonok ulumok bok, Yesus ara buknenggumookanya, alja yuba doboka diriga ban nang ok bukoka seleb bilimekaʾ eiyimek.

²³Bok, onoʾ yok mek ekla bunaʾ hnon Tiberias heikek ab yeiniboka Yesus gwanenga soboka Imik Neyung ak molomok enyek demek oulyang berem mal yalamek.

²⁴Dara nera, Yesus ab alja yuba doboka diriga ban nang ab, anyagan unaʾ eibnenggumek dara, nimi nauba ara mek ekla bunaʾ bukoka, Yesus ak ebgiga Kapernaum heikek bilimek.

²⁵Dara sikda nimi gong dara, eer bindiwoka Yesus ara mek gemek ok an ulumokaʾ eiyimek dara alak, ”Neklesilimnya o, anda hek sum ek anyagan yeilimom do?” aboka heibek.

²⁶Yesus adya sikenek, ”Nara ugunuk dib lebsin, ugunda nak elenulumnya nenera, nadya yokaʾ-yokaʾ lok soʾ ak unulamnaʾ anyek eiyiboka dib senelumaʾ adya gomaʾ. Ugunda gwaneng deregoka pe demab senelumukanya, nak ebgiga yalanulum.

²⁷Anasa wera, ugunda blolomla songa lelemla gwaneng emba yeiriwoka wenggom mem. Nimi nonga ganya embengaʾ nenelesil gwaneng enesa, yeiriwoka welelulum. Ban gwaneng era nimi dibaʾ me adya eleganesil. Alja neyung bedya pe unulamna aboka alak beknaʾ beiyimok anasa, alja ugunuk eleganesil,” hyok.

²⁸Dara sikja Yesus ak, ”Wera Imik Neyung adya senelelanya nenyek webnobaʾ aboka, hekaʾ ak unuwanamab do?” hyek.

²⁹Dara, Yesus adya sikenek ara, ”Imik Neyung adya ugunuk unuwaneseng senelamlaʾ ara, alja bokol yeilimoknya bek dib senewoka doloseng senelamla,” hyok.

³⁰Dara sikja, ”Wera neyung o, nunda anak dib senewagenobaʾ aboka, hek lok soʾ unaʾ nu hogung ek unuwanalam do?

³¹Nunja neyung yabo Kanaan heik balamek sum era, mok dum-dumaʾ gwanenga delemek, Nera Imik Neyung adya imik heikek ab, gwaneng eleklesuk aboka, momnya dobek sok, delemek,” hyek.

³²Dara Yesus adya sikenek, ”Nara ugunuk dib lebsin, Musa bedya imik heikek ab gwaneng eleganggusuk. Bok, nadyaʾ neyung bedya embengaʾ un gwaneng dibaʾ imik heikek ab eleklesil.

³³Imik Neyung adya eleklesil gwaneng dibaʾ ara, imik heik ab yeiniboka soko nim ek embengaʾ unaʾ eleklesilnya bera alan,” hyok.

³⁴Dara, sikja Yesus ak, ”Neyung o, ban roti gwaneng era, nuk sobaʾ eleklesilom,” hyek.

³⁵Yesus adya sikenek, ”Na nong anyek nim embengaʾ ul eleksin gwaneng era alan. Heknedya nak yanamla dara, alda gwaneng oka sobaʾ unggulumnamla. Onoʾ heknedya nak dib senewanenel dara, alda mek ok unggulumnamla.

³⁶Bok, nara ugunuk seleb wenyasisa sok, ugunda nak okoka nong eillilinulumaʾ anababya, ugunda nak dib senenggulunulum.

³⁷Nidyaʾ Imik Neyung adya eleklenel nim era nak yanamak dara, bindowoululum aboka wekdo boboganggunusin.

³⁸Anasa, nara Imik Neyung heik ab yinggilimsaʾ ara, nadya ganya doboka yokaʾ-yokaʾ unulununaʾ aboka yanggumsa bok, na bokol yeilinyoknya unuwosulul senelamlaʾ anyek, unulununaʾ aboka yeilimsa.

³⁹Na imik heikek ab bokol yeilinyoknya bedya dara, nak seinilenela ara, alja nak eleklenelnya nera, ben hnonok sirik anababya weininggoka denganaʾ ara mem. Anasa, alda nidyaʾ gobdo sidyaʾ daknamla sum era, embengaʾ bukiyiwosulul, senelenel.

⁴⁰Anasa wera, nadyaʾ neyung bedya alja orowek senelamlaʾ ara, nak heng eiyiboka dib senelemak nimi nidyaʾ ara, dib ulmoubnaʾ ganya dobnamak senelamla. Dara, sidyaʾ daknamla sum era, nara sikenek embengaʾ bukoka sekiyiwanesin,” hyok.

⁴¹”Nara imik heikek ab yinggilimsa embengaʾ unaʾ gwaneng era nara alan,” hyok. Anasa, sikda Yahudi nang alak wab einimek.

⁴²Dara sikja, ”Al nong ara Yesus, aljaʾ neyung bera Yusuf. Aljaʾ genonga neyung ara nunda seleb ella ulumab bok, hekasa nara imik heikek ab yeilimsa alamla do?” alamek.

⁴³Anasa, Yesus adya sikenek, ”Ugunda nak waboka lenenggom mem.

⁴⁴Nimi ben hnonok anaba nak bokol yeilinyoknya bedya, glinaʾ orok dara, nak yanggunumso bok, sidyaʾ daknamla sum era, nak yanalanya bera embengaʾ bukoka sekiyiwanamna.

⁴⁵Ununumnaʾ lelemek nang bukuk ara, sikda nimi nidyaʾ ara, Imik Neyung adya eimik wenewanesil, aboka momnya domek. Anasa, heknedya Imik Neyung bek pe keboka, alak ab dolomla dara, alda nak or yanenel.

⁴⁶Ban wenyhenya nera, nim adya hnon Imik Neyung ara laga eiyirob ak lebnenggubna. Alja bokol yeilimoknya be hnonok seleb neyung bera heng adya okoka eibok.

⁴⁷Nara ugunuk dib lebsin, dib senewoka dololenya bera, seleb dib ulmoubnaʾ ganya, alja ganya lomok ulumla,” hyok.

⁴⁸”Nara nim embengaʾ unaʾ eleklesin gwaneng era alan.

⁴⁹Ugunja neyung yab holaʾ seknenggulumok sokok, Kanaan heikek Mesir ab balamek sum enyek, mok dum-dumaʾ gwaneng delemek bok, somogomek.

⁵⁰Bok, wen lelemnaʾ ara, imik heikek ab yinggilimok gwaneng enyek, delemeija nim era, somoganggunumak.

⁵¹Imik heikek ab embengaʾ unaʾ gwaneng yinggyukaʾ ara, na nong ulumna. Anasa, heknedya ban gwanenga delenya bera, hyak sob-sobaʾ or ulmoublumnamla. Ban gwaneng era nadya nong ek lemna. Nadya nong ek, ban soko nim emba, nim embengaʾ ulunokaʾ aboka, eleganamnaʾ ak lemna,” hyok.

⁵²Yahudi nang era, Yesus adya ban wenyalamok yuba kemek dara, sik moumen yu ganya boboka nauba wabdangoka lelemekja, ”Ban benera alja nong soub enyek nuk denokaʾ aboka hekaʾ huboka eleganesil do?” alamek.

⁵³Wenyek Yesus adya sikenek ara, ”Ugunuk hyak dib lebsin, ugunda Imik Neyung adya bokol yeilimoknya bedya aljaʾ nong soub ab, alja eneng eb, denggulumnulum dara, embengaʾ unaʾ ugunjaʾ nong lomok sam unggulumnesil.

⁵⁴Heknedya nadya nong soub ab, nadya eneng eb, delenya bera, embengaʾ unaʾ seleb ulumlakanya, sidyaʾ daknamla sum era alak nadya bukoka sekiyiwanamna.

⁵⁵Nadya nong soub ara, hyak gwaneng nong dibaʾ ulumla, nadya eneng era, den mek dibaʾ ulumla.

⁵⁶Heknedya nadya nong soub eb, nadya eneng eb, delemlya dara, alda nadyaʾ nong lomok sam ulumnamlakanya, nababya alja nong lomok ulumnamna,” hyok.

⁵⁷”Nadyaʾ neyung be embengaʾ ululanya bedya nak bokol yeilinyok dara, nababya al adya ok ulumna. Anasonya neikik, heknedya nadya nong ak delenya bera, nadya nong adya ok ulumnamla.

⁵⁸Dara, imik heikek ab uboka sokok yinggilimok gwaneng ban e. Ban gwaneng ara ugunja neyung yab edya Kanaan heikek balamek sum delemek gwaneng anaso gomaʾ. Sikda seleb demek dara, nidyaʾ somogek bok, heknedya ban lemna gwaneng denelanya bera, alda hyak dibaʾ ulmoublumnamla,” hyok.

⁵⁹Yesus adya ban nidyaʾ lebokaʾ ara, Kapernaum heikek Yahudi nim edya yuba don ek ab yuba lelesuk sum enyek lebok.

⁶⁰Yesus adya, ban yuba nauba neklesuk sum enyek, alja lelemok yuba dobdongoro balamek nang era, ”Ban lelesil yub enera hyak gasa nong anasa, heknedya keboka dobnamsoʾ ak lelemla do?” wenyalamek.

⁶¹Yesus ara, alak yuba doro diriga ban nang era waldalamekaʾ ara ganya lomok eiyisuukanya, alja dara, ”Ban yub enedya ugunja ganya dangawom-dangawom aldalalum de?

⁶²Wera nimi dibaʾ me nera onsok saaboka youmaʾ ulumsaʾ ak welewanyaʾ eibmun bok dara, hekaʾ hubnalum do?

⁶³Embengaʾ ulmoubnaʾ dibaʾ ara Imik Neyung Geisinya adya eleklesil. Nimi nonga migib ara nera salyaʾ nong anasa, nadya ugunuk lelesin yub era, ganya ak anasa, sikda embengaʾ ulumak.

⁶⁴Bok ugun gangganek an, nimi hnon dib senenggululum,” hyok. Ban wenhyokaʾ ara, hek nang dib senewanggunumakaʾ hnon, al nong ak obnelum aboka yuba dil binimoknya benyek hnon, orowek ella ulumokaʾ anasa, lebok.

⁶⁵Onoʾ Yesus adya moruwoka, ”Nimi ben hnonok sirik anababya, nadyaʾ neyung bedya unuwolulaʾ aboka aranggululenya bera, nak sam yanggunumla, amsaʾ ara, hnon dib senenggululumaʾ anasa lemsa,” hyok.

⁶⁶Ban wenhyok sum enyek moruwoka, alja lelemok yuba doro diriga ban nang nauba ara, losaaboka alak diriga banggulumek.

⁶⁷Dara, Yesus adya alja obadya diriga ban nang ek, ”Ugumbabya hnon binimab senelelum de?” husuk.

⁶⁸Dara, Simon Petrus bedya Yesus ak, ”Neyung o, nunda heknya ak binisibya do? Embengaʾ ulmoubnaʾ yub ara anak danyek ulumla.

⁶⁹Anak danyek, Imik Neyung adya geisaʾ ak bokol yeilinjoknya ululamaʾ ara, nunda dib senewoka ella ulunjab,” hyok.

⁷⁰Danyek, Yesus sikenek, ”Wei, ugunda obadya nang enera, nadya sekiyisisaʾ an anano? Bok, ugun gangganek ara, ben hnon bisaʾ me ulumla,” hyok.

⁷¹Ban wenhyoknya nera, Simon Iskariot bedya me Yudas bera, obadya nang ulumekjok, al hnonok yuba dil binimoknya benesa lemok.