Read Nalca RASUL 1 Bible Online

RASUL 1 - Nalca bible

RASUL 1

¹Nadya hem Teofilus o, anak perob aboka gibgen. Men youmaʾ bukuk sam weboka beiyinggesa ara, Yesus adya al wa web einimok salek eb moruwoka imik heikek welemok salek, yokaʾ-yokaʾ nidyaʾ unuwoka, alja neklesukaʾ ak momnya doboka beibsa.

²Yesus ara alda anam imik heik sam binggumok salek, Imik Neyung Geisinya migib adya arawoka, nadya yuba lebnokaʾ aboka yuba lenaʾ gak nang ek anyek pe unuwanalum aboka wenewoka neklesuk.

³Yesus ara, alda seleb somogoka embengaʾ suboka bukumokaʾ seleb dara, nara aldib embengaʾ subna bar aboka, alak diriga ban nang ek laga aabdangoka, dib nong beknaʾ gong elegosuk. Alda li denga hnonok ebdobnya mekbadya sum (empat puluh hari) sikenek aabdangdo amalasuukanya, Imik Neyung adya wenelemnesil yuba neikaʾ saboka ulumek.

⁴Dara Yesus ara, alak diriga ban nang eb, neikaʾ yuba salamek sum enyek, ban yub enyek sikenek lebsuk ara, ”Ugunda Yerusalem heik men lobanaʾ ara mem. Ugunda or anyagan ulumunaʾ ara, neyung bedya eleganesin amokaʾ anyek, nadya ugunuk unu eleganesil aboka lebsisa anyek, elegeisilya bok.

⁵Dara, Yohanes Pembaptis bera, alda mek dem adya ok dalasuk bok, mek anam mandewal henggonggom ugunuk Geisinya adya mek dibaʾ dabnesil,” hyok.

⁶Wera onoʾ, Yesus ab, alak diriga ban nang eb, neikaʾ longomek sum enyek, alja mab edya, ”Neyung Wenelesilimnya o, wen gom, eimik ek gom, Israeli soko ara, dub soko dangiyiwanalam de?” aboka heimek.

⁷Dara, Yesus adya alak diriga ban nang ek lebsuk ara, ”Imik Neyung bedya ok, alja sum enyek unuwanamna senewoka ella ulumla. Anasa ban unun damba dara, ugunsamba gom, Imik Neyung bedya ok ella ulumla.

⁸Bok, ugunda Imik Neyung Geisinya ugunuk sam seleb yeisilya dara, ugunda migibaʾ dobnelum. Dara, Yerusalem heik ab, nidyaʾ Yudea sokok ab, Samaria sam ab ara, nidyaʾ soko dagolongnaʾ me nidyaʾ, nasamba yuba bo lero yabalemnelum,” hyok.

⁹Yesus ara ban seleb wenyaboka lebgogomok dara, onoʾ alda sikja hogunguk ak sam uboka, henga kemelemek bok, imik heikek welok dara, kemelemekaʾ gangganek debaʾ adya sereklemok.

¹⁰Yesus imik heikek welokaʾ anasa, alak diriga ban nang era, anam kemero seklemek bok, wene sab-sab nimi penya nang geisa akleng ongo-ongo bilirek nang enyek, sik gokgobok sam sekerek.

¹¹Dara sik penya nang edya, Yesus alak diriga ban nang ek, ”Wei, ugunda Galilea nang o, ugunda hekasa anyagan ok sekoka imik sam kemelelum do? Yesus imik welemla eiblum sok, onoʾ eimik era hyak onnya benyek neikso unuwoka yanamlaʾ ak eibnelum,” arek.

¹²Dara, Imik Neyung yuba men domek nim era, Zaitun mein abaʾ ara Sabat mem sum era Yerusalem heik lo bilimek. (Zaitun mein ara Yerusalem berem ulumla, satu kilometer ok ulumla.)

¹³Dara, sikda Yerusalem heik ara sik ulumek ek biniboka, hyak imik somek ek dub nong ok biniboka welewoka ulumek. Dara, ban ulumek nim era, hnonda, Petrus, Yohanes, Yakobus, Andreas, Pilipus, Thomas, Bartolomeus, Matius, Alfeus bedya me Yakobus, Simon Patriot, Yakobus bedya me Yudas beb, ulumek nim era an.

¹⁴Sikda nidyaʾ ganya hnonok hiboka, heng uboka Imik Neyung ak mololsinilimek. Dara, sikda gelewa nauba uboka, Yesus alja genong Maria geb, Yesus alja weisab eb, neikaʾ longowoka heng uboka lelemek.

¹⁵Dara onoʾ yok sum enyek, yuba dolomek nim era, hiboka denga dombadya ebdobnya lindigin badya (seratus dua puluh orang) longomek dara, Petrus bedya yuba lebnun aboka sekoka yuba lemokja,

¹⁶”Hem yab o, Imik Neyung yuba momnya dobokaʾ ara, gigiwoka unuwanamla. Geisinya bedya uboka Daud bedya lemokaʾ ara, Yesus henga goubuka obnemak aboka duba dangamoknya Yudas bemba lemokaʾ ara, gigiwoka unuwanamla.

¹⁷Yudas bera nublaboka neikaʾ wa welenob aboka gaboka domoknya anasa, alablaboka neikik ulumouba,” hyok.

¹⁸Yudas bera Yesus ak oblulum aboka yuba dil bilimok amba elegemek rupiah edya, soko dekemok. Dara, anyagan alda huk dib malyinggyuukanya, alja mon era, hnoum pik serewoka mabok dara, aso ab, boka nidyaʾ laga lan-lan alamok.

¹⁹Dara, nimi nidyaʾ Yerusalem heikek ulumek nim era, Yudas bek alak an unumokaʾ anyek, ella dangamek. Anasa leboka, Yudas bek unumok soko era, sikja yub edya, Hakal-Dama aboka si simek. Nunja yuba dangawoka san dara, eneng sokok aboka si simek.

²⁰Onoʾ Petrus bedya dara, ”Anasa orowek Mazmur yub ek momnya domok ara, Alda ulumlya ak ara yokaʾ yuba deso aboka nimi gakdenaʾ ak danamla. Al ulumlyaʾ ak ara, nimi lunuwoka unaʾ ara lobnemak, hyok. Onoʾ hnon momnya dobokaʾ ara, Alja wa weboka ununaʾ ella dangamlyaʾ ara yok nim lunuwoka dorowanamak, wenyamok,” hyok.

²¹”Anasa wera, Wenelesilnya Yesus sokok an nublaboka yabalamouba salek enyek, neikik sobaʾ yabalamoubnya benyek hnon, sekiyiwanamab,” aboka Petrus bedya lemok. ”Yohanes Pembaptis be nimi meka dalasuk wek ara moruwoka Yesus imik heik welewok sum neikaʾ ulumabnya benyek, alab nublaboka Yesus embengaʾ suboka welemok anyek, laga lelenobaʾ aboka, lunuwoka sekiyiwanamab,” hyok.

²³Dara anyagan longomek nim edya dara, wera penya sunuwanamab aboka, ben hnonda nimi si Yusuf, neiknya bok yok si nera Barsabas, onoʾ al onnya bera alja si nera Yustus aboka silimeknya hnon, Matias be hnon sunuwanamab aboka lemek.

²⁴Dara, sikda nidyaʾ henga uboka Imik Neyung ak mololemeekanya, lelemekja, ”Wenelesilimnya o, anda nimi nidyaʾ ganya ak nidyaʾ ella ulusilimnya. Yudas bera yuba lenya dangamokjok, onoʾ malyingginiboka wanok soudya al oulyang ak bindowokaʾ anasa, wera Imik Neyung o, anja benyek lunuwoka sekiyiwanalum aboka neksilom,” aboka mololemek.

²⁶Seleb molomek dara, beknaʾ danganaʾ bobogomek enyek, Matias bek sam malyinggilimok. Dara, Matias bera goklombadya Yesus yuba lenaʾ gak nang eblaboka neikaʾ welenokaʾ aboka, Yudas be lunuwoka sekiyimek.