Read Nalca RASUL 11 Bible Online

RASUL 11 - Nalca bible

RASUL 11

¹Yok-yok Yudea sokok sam ara Imik Neyung yuba lenaʾ gak nang eb, yok Imik Neyung yuba domek sik kabo nim eb, wera Yahudi nimi gom bok nim enebabya, wera Imik Neyung yuba dib senewoka dolomak an yub kemek.

²Wera yok sum enyek Petrus bera Yerusalem heikek byuk dara, Yahudi nang yokaʾ bok Imik Neyung yub ak dib senewoka domek nang edya, Petrus bek meknewolum aboka waboka wenelemek.

³”Anda bolaʾ garanggulumak nang edya ek sam biniboka, onoʾ sikineblaboka neikaʾ deregoka ululum,” aboka waboka lelemek.

⁴Anasa wera, nenesa leboka, Petrus bedya nidyaʾ unulumokaʾ ara neik digom yana lelewoka, men unumoknya nek ab ara moruwoka, Petrus bedya lebsuk ara,

⁵”Nara Yope heikek sam henga uboka mololamsa enyek, ononaʾ dib bo aawanyok ak eibsa. Dara al onoʾ ara akleng yuba dombadya gonggaragoka hnonok hiboka boksom akleng eneso ak, nara ulumsa ak sam imik ab ara doblinggemokaʾ ak eiyimsa.

⁶Wera nadya akleng en lomok sam kemelamsa dara, yokaʾ-yokaʾ ebeklamla yana soruka yakaʾ hnon, beiyek sam salyaʾ ululanya hnon, mon dib lele balamla hnon, bei wining hnon, maro balamek ak eiyimsa.

⁷An yuba hnon kebsa dara, Wei, Petrus o, anda sekmenekanya wera hnon oboka del yabalom aboka orugonyok.

⁸Bok nadya alak lebsenya nera, Wenelesilimnya o, orok e, nara malya denaʾ eb, mem amna denaʾ eb dara, hyak denggulunanya anasa, orok, amsa.

⁹Bok on yub era saawoka imik heik ab ara, nak, Imik Neyung adya or perob nenelelanya nera mem anggom, anyok.

¹⁰Dara, ban nera li winilya unuwoka saawoka bo aaboka ubnyok dara, on pik imik heikek sam joboka bo welewok,” hyok.

¹¹”Bok onoʾ al wene sab-sab enyek, Kaisarea heikek ab nak el bululum aboka orugeisik nang era, winilya nang na mamsa ek seleb bilimek.

¹²Dara onoʾ, nak Imik Neyung Geisinya adya, ganya yok senenggom, or sikeneblaboka neikaʾ binilum aboka orugonyok. Dara ban nimi hnabbadya nablaboka neikaʾ Kaisarea heik seleb bilimoub dara, Kornelius bedya ek sam wekel bilimouba.

¹³Wera danyek, Kornelius bedya alak Imik Neyung bedya lero be hnonja alja ek sam sekoka alak sam lemok yub era nak anaso unuwanyok aboka, nimi ben hnon si ara Simon Petrus benyek Yope heikek ulumla anyek, e yanok aboka nim orugeisilom aboka nak wenyaboka lebnyok aboka nuk nekesuk.

¹⁴Petrus bedya alja ugunuk, Kornelius anab, anja mabo silibaʾ e gekman blebnesuk yuba ugunuk neknesil henyok, aboka nuk neksuk,” hyok.

¹⁵”Dara, nara anam yuba saboka leb einimsa dara, Imik Neyung adya Geisinya era, nuk men youmaʾ Imik Neyung adya elegesuk sok, onoʾ sikenek yinggilisuk.

¹⁶Wera danyek, Yesus adya nuk lesuk anyek seiniwasa, Yohanes Pembaptis bera mek dem adya meka dalasuk bok, ugunuk dara, eimik era Imik Neyung Geisinya adya mek dibaʾ dabnesil, amoknya nek seiniwasa.

¹⁷Anasa, nunja Wenelesilnya Yesus Kristus bek dib senemoub sum enyek, elegesuk eleknaʾ neiknya nenyek, onoʾ sikenek hnon elegesuk dara, nara hekaʾ huboka Imik Neyung ak eleksinaʾ mem loblom henesinya de?” hyok.

¹⁸Wera Yerusalem heikek ulumek Imik Neyung mab era ban yuba kemek dara, Petrus bek anda meknelelam aboka yuba lolowanggumek. Dara sikda Imik Neyung ak perob aboka giboka lelemekja, ”Yahudi nimi yuba donaʾ orok nim eneba Imik Neyung adya sikja malya unaʾ pik ab ganya dangawoka embengaʾ unaʾ dib dobnok aboka li eleklesil anasa, perob,” wenyaboka Imik Neyung bek giboka lelemek.

¹⁹Wera Stefanus bera seleb obek dara, Imik Neyung yuba dolomek nang era, doboka olosik. Dara yok heik yok heik bok sen-senem abgokoka ulumek. Dara, bokdangoka hnonda Fenesia sam yeiri balamek dara, hnonda Siprus sam balamek, hnonda Antiokhia sam balamek. Dara, sikda Imik Neyung adya perob lero yanggan yub era Yahudi nang yokaʾ nong ok leb elekdo yabalamek.

²⁰Bok onoʾ sik yub dib senewoka domek nang hnon era, Siprus mok eb nang hnon, Kirene mok eb nang edya dara, Wenelesilnya Yesus adya perob lero yanggan yuba enyek boboka, Yahudi nang gom nang ek sam Antiokhia heikek biniboka lel eleklemek.

²¹Wenelesilnya migib era, yuba lelemek nang gologoka ulusuk adya, wera sikja nimi yok nim ek yuba lelemek dara, nimi gong dib senewoka, sikja nonga ganya gekman Wenelesilnya bek sam elegemek.

²²Ban unulumokaʾ danara, Yerusalem heikek sam ulumek yuba donaʾ nim ek oboka lelel bilimok. Dara, sikja Barnabas bek Antiokhia heikek bilom aboka bokol yeilimek.

²³Wera, Barnabas bera seleb Antiokhia heikek yeiniboka, Imik Neyung adya nimi ganya lomok yokaʾ-yokaʾ nidyaʾ pe arawoka unulumokaʾ eiyimok dara, alda hyak eiya damok. Dara, Barnabas bedya Antiokhia nim ek, ugunda hyak Wenelesilnya bek pe ganya dib ologoka kweboka ululum aboka wenewoka lesuk.

²⁴Ban Barnabas benera, alda Imik Neyung Geisinya adya dib sekoka, alda dib senenaʾ ganya deknewoka uboka, hyak perobnya ulumok. Dara, nimi nauba alsamba leboka Wenelesilnya bek dib senelemek.

²⁵Ban nen seleb dara, Barnabas bera Saulus bek ebgiga Tarsus heikek bilimookanya,

²⁶seleb eibdangerek dara, onoʾ Antiokhia heikek bobdanga yeiniboka, anyagan yuba donaʾ nim eb neikaʾ uboka, nimi nauba ak yuba leb elegoka, sikba yuba doboka ulumek salek era gibnaʾ hnonok gobdo lemok. Dara, ban Antiokhia heikek ab men youbuka, Yesus yuba doro diriga ban nang ek Kristen nang aboka si sib einimek.

²⁷Dara ban salek enyek, ununumnaʾ lelemek nang era, Yerusalem heikek ab ara Antiokhia heikek wenebadya nang yeilimek.

²⁸Dara, ban yeilimek nang era ben hnon alja si nera Agabus. Alda sekoka Imik Neyung Geisinya migib adya aralemok adya ununumnaʾ yub anyek, orowek mok soko me nidyaʾ senenggom gwaneng okaʾ enesa leboka,

²⁹nimi nidyaʾ Yesus yuba doro diriga ban nang edya yuba saboka, numba bolomabaʾ sunuwoka, nunja hemyabo Yudea sokok ulumak Imik Neyung mab enesa, elek arawanamab aboka yuba samek.

³⁰Dara, seleb bolowoka mamagoka beibek dara, yuba dolomekaʾ dam nang ek bo binirum aboka, Barnabas beb Saulus bebdak orugosik.