Read Nalca RASUL 13 Bible Online

RASUL 13 - Nalca bible

RASUL 13

¹Antiokhia heikek Imik Neyung yuba donaʾ nim ek ara, ununumnaʾ lelemek nang eb, nimi yuba neklesik nang eb, nauba ulumek ara nang era, Barnabas ben hnon, bokaʾ mirinya aboka geklewoka silimeknya Simeon ben hnon, Kirene mok ebnya Lukius ben hnon, Herodes beblaboka neik salek nereknya Menahem ben hnon, Saulus be hnon, ulumek.

²Dara sikda gwanenga denaʾ loboka, Wenelesilnya bek giboka ulsinilimek sum enyek, Imik Neyung Geisinya adya sikenek, ”Barnabas beb, Saulus beb, nadya sikja webnerak senemsa wa webduruk aboka, nasamba gaboka sekiyiwanalum,” hyok.

³Wera sikda gwanenga denggonggom heng uboka molowoka ubgogomekaʾ seleb dara, Barnabas beb, Saulus beb sikenek soruka salawoka heng uboka lebsikaʾ seleb dara, sikenek Imik Neyung yuba lero yibiruruk aboka bokosik.

⁴Barnabas Saulus ara Imik Neyung Geisinya adya, wera binirum aboka bokosuk anasa, sikda penya dara, Seleukia heikek golugereekanya, onoʾ anyaganyeb uboka dara, mek ekla bunaʾ pik bukoka Siprus mek gwan dubuk sokok sam birik.

⁵Dara, sikda Siprus moka birik dara, Salamis heikek biniboka, Yahudi nim edya yuba don ek wekoka, Imik Neyung yuba leb elekdo yabalarek. Yohanes Markus bera arawoka yabalemek.

⁶Dara, sikda Siprus mek dubuk soko era, yuba lero yabalamek ara, gokgobok ono Pafos heikek lanal bilimek. Dara, heik enyegan yek dara, Yahudi nang yokaʾ ak alja si nera Baryesus alameknya, alja sonda anasa nara ununumnaʾ leboka nimi hwesinya ulumna aldalamoknya beblaboka ehwibdangamek.

⁷Siprus mok soko damnya bera alja si nera Sergius Paulus bera, ban nimi hwesinaʾanya beb neikaʾ ganya olokdangoka ulurek. Ban Sergius Paulus bera hyak geremseng hwamnya bek ulumok. Wera alda Imik Neyung yuba kebnun senewoka, Barnabas Saulus ak yorurum aboka e bilisuk.

⁸Nimi hwesinya bera Yunani yub adya dara, Elimas aboka silimeknya bedya, Barnabas, Saulus ak walawoka lelesuukanya, dubnya bera Yesus yub ak dib senewalyek aboka, ganya bob geregiyimok.

⁹Bok Saulus bedya, alja yok si nera Paulus alameknya bera, Imik Neyung Geisinya adya dib sekoka migiba gologomoknya bedya, nimi hwesinaʾanya bek okoka eiyiwoka lebokja,

¹⁰”Wei, anda hyak sondaʾ hwamnya ululam. Anda bisaʾ me uboka, nimi perobaʾ nenesinaʾ amba isaʾ nang dangallisinanya ululam. Anda hekasa Imik Neyung adya jongaʾ meemoknya nek sobaʾ soldol meneklelam do?” aboka lemok.

¹¹”Anasa wera kendelom. Wenelesilnya bedya anak henga geregagel. Anda li wen henga luma yanenggel dara, henga senedya dilinaʾ ara mekaʾ eibnenggunulam,” hyok. Dara, al wene sab-sab enyek, Elimas bera alja heng ek sam lum uboka, gunaʾ dookanya, alda salab hwiboka, nimek henga luma yanel anasa pika nekoka bo mengewanenulum aboka ero yabok.

¹²Wera, Siprus mok soko damnya bera an unuwok anyek eiyiwoka, alda Wenelesilnya bedya yub ek loka daboka kelemok bok adya, Elimas bek unuwokaʾ eibuk dara, Yesus ak dib senewoka domok.

¹³Paulus beb alja hemyab eb dara, Pafos heikek ab ara, mek ekla bunaʾ ak bukoka balamek ara, Pamfilia sokok sam Perga heikek byik. Wera anyaganyeb danyek, Yohanes Markus bera sikenek sikbeyok loboka, alda on pik losaawoka Yerusalem heikek yok.

¹⁴Wera sikda penya Perga heik ab ara, soko pik Pisidia moka Antiokhia heikek birik. Dara, Sabat mem sum era heik enyegan nim eblaboka Yahudi nim edya yuba don ek yuba longol bilimek.

¹⁵Dara, Imik Neyung e nenyek an yuba donaʾ dub nang edya, Musa bedya unuwanalum an yub eb, ununumnaʾ lelemek nang edya lemek yub eb, einimekaʾ seleb dara, anyagan Imik Neyung e dam nang edya Paulus bek alja hemyab eb dak, ”Wera ugunda ganya gwelelek an yuba hnon ulumlya dara, or an longowak nang ek an wenewanasurum,” aboka molomek.

¹⁶Wera Paulus bera sekoka, soruka moub-moub aboka lebokja, ”Wei, hemyab Israeli nang sokok nang eb, onoʾ hemyabo yok nanga hnon Imik Neyung ak lok ganya boboka ululum nang o, ugunda nak or kebnenulum.

¹⁷Israeli nimi nunja Imik Neyung adya, nun jabo yabo youmaʾ nang ek gaboka weboka dosuk. Dara, sikda Mesir sokok sam sekel yanggan nimi dangoka ulumek sum enyek, sikenek Imik Neyung adya senenggom sokok nang nenesuk. Dara onoʾ, Imik Neyung adya alja senenggom migib edya sikenek Mesir sokok ab ara bleboka bo gobosuk.

¹⁸Dara, Kanaan heikek binob aboka pikik sam anam balamek dara, hwalek sam ulumek salek era, gibnaʾ denga hnonok uboka ebdobnya mekbadya dangamok. Nera sikja gasa ganya boboka, Imik Neyung ak yokaʾ-yokaʾ unulumek anaba or siklewoka bo balasuk.

¹⁹Dara, Imik Neyung adya Israeli nim enyek Kanaan sokok ara Israeli nim ek bokoka, sikja yokaʾ dolul aboka, Imik Neyung adya nimi soko sekbadya heika doluwoka bokoka somok bok, doluwoka oboka, soko ara Israeli nim emba misaʾ yokaʾ elegesuk.

²⁰Dara, ban nidyaʾ Imik Neyung adya Israeli nim emba leboka unulumok salek era gibnaʾ denga sagodaraʾ badya lemok,” hyok. ”Wera seleb Kanaan sokok ara, Israeli nang ek bokoka elegesuk dara, onoʾ Imik Neyung adya sikenek yana lelewoka yuba lesinaʾ nang elekdo bilisuk. Dara, unubgiga balamok ara, ununumnaʾ lelemoknya Samuel berem dakal bilimok.

²¹Dara onoʾ, Israeli nang edya Imik Neyung ak nunja dubnya ben hnon sekiyiweisilom aboka molomek. Wera danyek Imik Neyung adya Benyamin nang yilaʾ ak ab, Kisi bedya me Saul bek elegosuukanya, Israeli nang sikja dubnya gibnaʾ denga hnonok ebdobnya mekbadya ulumok.

²²Dara onoʾ eimik enyek, Imik Neyung adya Saul bera doro bobogoka, Daud bek Israeli nang dubnya lunuwoka sekiyimok. Dara benesa leboka, Imik Neyung adya lebok ara, ”Isai bedya me Daud bedya, alda hyak nadya ganya pe angawoka hekellilinelnya eiyimna. Daud bedya eimik nadya unuwaso senelamna nidyaʾ ara pe unuwananel.

²³Dara eimik era, Imik Neyung adya Israeli nang ak, Daud nang yilaʾ pik uboka, nimi blebsinaʾ dubnya alja orowek eleganesin amok sok, eimik sekiyiwoka bo yok. Dara, Yesus anyek nimi blebsinaʾ dubnya bera alan,” hyok.

²⁴”Wera Yesus ara anam alja wa web einiwanggumok salek era, Yohanes Pembaptis bedya Israeli nimi nidyaʾ ak, ugunja malya unaʾ ak loboka ganya dangawoka meka danaʾ doblulum aboka lelesuk.

²⁵Wera onoʾ Yohanes bera alja wa seleb sidyaʾ webdaknemok sum era lebokja, Ugunja dara, nara heknya senelenulum do? Nara ugunja bera hek salek yanamla do senewoka diri ululumnya gomaʾ. Ugunja diri ululumnya bera na seleb uro dakdowanya danyek alda yanamla. Dara, nara alja yan ongonaʾ ara gwirin danaba, nara okna so danamso, wenyaboka lemok,” hyok.

²⁶”Wei, hemyab o, Abraham nang yilaʾ hnon, onoʾ yok nang bok Imik Neyung ak lok ganya boboka anyagan longolum nang nidyaʾ ak lebsin, Ban Imik Neyung adya nim embengaʾ blebsin yub ara, nuk bokol yeilisuk.

²⁷Anasa, Yerusalem heik ulumek nim eb, sikja dub nang eb dara, Yesus ara nimi blebsinaʾ dubnya senen ganya bobnenggumek. Sikda ununumnaʾ lelemek nang edya Sabat mem sum sikenek einilisik yub era, wera Yesus ak henga geregoka obek dara, ban unulumekaʾ nong adya, wera anadya ununumnaʾ lelemek nang edya lelemek yub era dib gigimok.

²⁸Dara, Yesus ara anyek okoka malya ubuk anasa, wanok soudya obnemab ara elgom bok, Pilatus bek Yesus ara malya ulumla anasa obnok aboka molomek dara, obek.

²⁹Wera sikda nidyaʾ seleb Imik Neyung bukuk Yesus amba geklewoka momnya doboka ara unubgogomek dara, Yesus nong ara gal dubuk ab ara, beʾ dakoka boblinggek dara, al nong ara girik lomok sokok sam diyimek.

³⁰Bok, Imik Neyung adya Yesus ak somoknaʾ lomok ab sam embengaʾ suboka bukiyimok.

³¹Wera, Yesus ara embengaʾ suboka bukumok dara, alda onoʾ nara embengaʾ subna aboka, alablaboka Galilea sokok ab ara, Yerusalem heikek neikaʾ yeiniboka ulumek nang ek, liga gong amaldal giriklemok. Dara, sik amasuk nang enyek, wera Israeli nang ek sam unuwoka yuba beknaʾ len nang ulumak,” hyok.

³²”Anasa wera, nunda Imik Neyung adya nunja neyung yab youmaʾ nang ek eleganesin amok yub enyek, wera ugunuk an ban perob yuba lero yabalasab.

³³Dara, Imik Neyung adya unuwanasin amokaʾ ara, nera seleb Yesus somogoka embengaʾ suboka bukiyimok adya, nera an seleb unubok an. Nen unuwanamoknya nenesa leboka, Mazmur yub ek penenya nek momnya doboka ara, Anda nadya me yokaʾ ululam. Sumen nong ak, nara anja neyung be yokaʾ nonga dagen, aboka lebok.

³⁴Imik Neyung adya Yesus ak embengaʾ bukiyimookanya, onoʾ saawoka somoganggunumla ak orowek lebok ara an: Nara eimik anak hyak salyaʾ so gom unaʾ ek, anak gigiwoka sunuwoka unuwanenggel anyek eleganenggen. Men youmaʾ Daud bek lemsa anyek anak eleganenggen, hyok.

³⁵Anasonya neiknya nenyek yok sam leboknya nera, Anja wa pe welelanya bera or bloblul aboka soko loknaʾ lomok sam gobdo eib lobnenggunulam, wenyaboka lemok,” hyok.

³⁶”Dara, Daud bera Imik Neyung adya anyek senenanya loboka weblul senemok anyek, seleb senenya loboka webgogobok sum era, alda seleb somogok dara, alja neyung yab youmaʾ nanga sik diyisik ak sam neikaʾ ak dibik. Dara, Daud be nong diyimek ara, seleb nidyaʾ bloboka yaabok bok,

³⁷Imik Neyung adya alja somoknaʾ damok ab sam embengaʾ bukiyimok Yesus ak dara, nonga bloboka yaawanggumok.

³⁸Hem yab o, anasa wera Yesus pik uboka, nim adya malya unaʾ memelesil yub era, ugunuk lero yabalasak. Nimi nidyaʾ hnonok-hnonok nang ara, Yesus ak dib senelemak nang era, Imik Neyung adya bok, Musa bedya unuwanalum an yub edya dara, sikja malya unaʾ doboka boboganggunususo bok, al Yesus pik uboka memelesil,” hyok.

³⁹

⁴⁰”Dara, ununumnaʾ lelemek nang edya lebek yub anyek, ugunuk gigiweisilyek aboka, mem nong anasa, ugunda hyak pe keebdangoka ulumnalum.

⁴¹Ben hnon lemokaʾ ara, Ugunda malya uboka geklewoka wasinaʾ nang o, ugunda pe keblulum e. Nara ugunja eimik nimi yok nang adya neklesilya bok dib senewanggunulumnya nek, nenyek nara unuwanesin anasa, ugunda gobdo ngolugomunjok somoganalum, wenyaboka lemok,” hyok.

⁴²Dara, Paulus bedya ban nidyaʾ wenyabgogomok dara, wera Barnabas beb, Paulus beb dara, Imik Neyung ek ab ara, gobuka barek salek enyek, Imik Neyung ek an longomek nim edya, nenyek Sabat mem sum hnon neknesurum anasa, onsok yanarum aboka molomek.

⁴³Wera nimi nidyaʾ Yahudi nim edya yuba don ek longomek nang era gobek dara, Barnabas beb, Paulus beb barek pik, Yahudi nang eb, Yahudi nanga yokaʾ gom bok Yahudi Imik Neyung yuba dolomek nang eb dara, sikenek dobgiga bilisik. Dara, Barnabas Paulus adya ugunda hyak Imik Neyung adya wanaʾ uboka eleksinaʾ lomok sam pe ulmorulumnalum aboka, wenyaboka wenewoka lesirik.

⁴⁴Dara onoʾ nenyek Sabat mem sum lebok dara, wera Antiokhia heik mok nim era, hyak nauba Imik Neyung Wenelesilnya bedya yuba dol yeilimek.

⁴⁵Dara, Yahudi nang yokaʾ nong adya kemelemek enyek, nimi nauba Barnabas beb, Paulus beb dadya, lelemek yub ek dolomekaʾ eiyimek dara, sikda hman ganya boboka ulumek. Dara, sikda Paulus bek anda malya nong aboka, alja lelemok yub ek sondaʾ anasa lelemla aboka blekoka derewoka lelemek.

⁴⁶Bok Barnabas beb, Paulus beb dara, danyek nauba so asaʾ ganya boboka yeiriwoka lelerek. Dara sikja lelerek ara, ”Imik Neyung adya yub enera ugunuk men seleb leb eleganesiseng senelelabok, ugunda lek senewoka wekdo doroklolumukanya ugumba yok nunda dib embengaʾ ulmoubnaʾ era dobnenggunusibya senen ululum anasa, wera nunda ugun Yahudi nim ek loboka, yok sokok nim ek Imik Neyung yuba lebnom aboka balanam.

⁴⁷Anasa wera, Imik Neyung yub adya nuk orugosuk ara ban: Nadya ugunuk Yahudi gom nim emba dilinaʾ dolulum aboka orowek gaboka dosisa. Wera anadya ugunja nidyaʾ mok soko me nidyaʾ blebsinaʾ damok elekdo yibilulum aboka usisa, wenyaboka lesuk,” arek.

⁴⁸Yahudi gom nim era, Paulus bedya ban wenyaboka lelemok anyek kemek dara, eiya uboka, Imik Neyung yub ak gigiwoka eiya hlalamek. Wera onoʾ, Imik Neyung adya embengaʾ unaʾ dobnemak senewoka orowek seiniwoka gegemok nimi nidyaʾ era, Imik Neyung yub ak dib senewoka domek.

⁴⁹Wera Imik Neyung yub ara, Antiokhia mok soko me nidyaʾ neikaʾ ok oboka lelemok.

⁵⁰Bok, anyagan heik yokaʾ senenggom dub nang eb, Imik Neyung ak lok ganya boboka ulumek dub gelewa eb dara, sikenek Yahudi nang edya wenyaro doblesik. Wera danyek, sikda Barnabas Paulus ak isaʾ nang geboka oboka, ugun penya dara, nunja ak sam ab lo binirum aboka waboka yakasik.

⁵¹Bok Barnabas Paulus adya dara, yan sang sembejaʾ heik enyegan beknaʾ dibaʾ bolom-bolom arek seleb dara, sikda Ikonium heikek birik.

⁵²Wera Antiokhia heikek ulumek yuba doro diriga ban nang era, hyak ei-ei ganya boboka, Imik Neyung Geisinya adya deknewoka ulumek.