Read Nalca RASUL 15 Bible Online

RASUL 15 - Nalca bible

RASUL 15

¹Wera nimi wene nang Yudea sokok sam ab ara, Antiokhia heikek yeilimeekanya, Imik Neyung yuba domek nang ek wenewoka, ”Ugunda Musa bedya momnya dobok yuba sunuwoka bolaʾ garanaʾ orok dara, dib embengaʾ blebnenggunusil,” aboka lel eleklesik.

²Bok Paulus beb, Barnabas beb dadya dara, nera sondaʾ lelelum aboka dogom aboka dukaʾ lolom-lolom aboka lelemek. Wenyabdanggiga balameekanya, wera Paulus beb, Barnabas beb, Antiokhia heikek Imik Neyung yuba dib domek nang eb, Yerusalem heikek bindiwoka Imik Neyung yuba lenaʾ gak nang eb, yuba dam nang eb, ban yub enyek sal binimab aboka, lebdangamek.

³Wera dara, Antiokhia heikek Imik Neyung yuba donaʾ nim edya, sikenek bo heik gokgobok sam bo bisik dara, sikda Fenesia pik uboka, Samaria heik ab ara unuwoka byik. Dara, pikik balamek ab ara, Yahudi gom nim eneba, Imik Neyung ak ganya dangawoka yuba dolomak aboka wenyaboka nekgiga balamek. Dara, anyagan Imik Neyung yuba doboka ulumek nim era, ban yuba kemek dara, sikda hyak ganya eiya dasuk.

⁴Wera sikda Yerusalem heik nong ok lanal byik dara, anyagan Imik Neyung yuba lenaʾ gak nang eb, yuba dam nang eb, Imik Neyung yuba donaʾ nim eb dadya, pe leboka doro diyisik. Dara wera, Paulus Barnabas arob nang edya sikenek pik uboka, nimi Yahudi gom nang ek Imik Neyung adya yokaʾ-yokaʾ nidyaʾ unulumok anyek nekesik.

⁵Bok, Parisi nang ulumek nang bok, Imik Neyung yuba dib senemek nang hnon nang adya sekoka, ”Yahudi yokaʾ gom nang bok Imik Neyung yuba dib senelemak nang era, Musa bedya bolaʾ garaldalalulum unuwanalum an hyokaʾ sunuwoka unulumnamak,” aboka lemek.

⁶Dara, yuba lenaʾ gak nang eb, yuba dam nang eb, ban yub enesa longowoka sabnob aboka longomek.

⁷Wera sikda nauba seiniyimeekanya, yuba saldibilloklomek danyek, Petrus bedya sekoka lemokja, ”Hem yab o, Imik Neyung adya men salek enyek, ugun gangganek ab nak gaboka doboka, perob lero yanggan yuba Yahudi gom nim ek lero balamlya adya sikda Imik Neyung ak dib senewanokaʾ aboka nak sekiyinyok ara, ella ululum.

⁸Dara, Imik Neyung adya nimi nidyaʾ ganya ella ulusilnya bedya, alja Yahudi gom nang ek doro dibnesuk amba dara, seleb laga amasuk. Unuwoka amalasuknya nera, Imik Neyung adya alja Geisinya benyek, nuk men youmaʾ seleb elegesuk sok anyek, onoʾ sikenek hnon seleb elegesuk adya, amasuk.

⁹Imik Neyung ara nub sikeneb weboka boknenggusuk. Alda Imik Neyung ak dib senemekaʾ adya sikja ganya mek elegeiyisuk.

¹⁰Nun nong ab, nunja neyung yab eb dara, Imik Neyung adya eleklesuknya nenyek unuwamenggom ara, pe ununaʾ orok ulumouba bok anasa, ugunda hekasa ban Yesus yuba doro diriga ban nang ek, an hyak senenggomaʾ kweillililum do?

¹¹Nera hyak mem nong! Wera Wenelesilnya Yesus alja wanaʾ uboka eleksinaʾ pik uboka, numba hnon, sikda hnon, neik so bleblesil senelemab,” hyok.

¹²Wera danyek, anyagan longomek nimi nidyaʾ yuba sanaʾ loboka gelegemek. Anya yuba gelegoka, Paulus beb, Barnabas beb dadya, Imik Neyung ara sik pik uboka nimi yok soko nim Yahudi gom nim ek yokaʾ-yokaʾ lok so beknaʾ ab senenggomaʾ lok soʾ anyek sik gangganek unulumok anyek neklesirik dara, sikenek kero bulumek.

¹³Wera Paulus beb, Barnabas beb, seleb lebgogorek dara, Yakobus bedya, ”Wera hemyab o, nak kebnululum.

¹⁴Simon bedya wen nuk lesilaʾ ara, Imik Neyung adya men youboka Yahudi gom nim eneba nadya mabo silibaʾ danok aboka sik gangganek ab hnon seleb domok adya, sikenek diri ulusuk anyek laga amasuknya nenesa lesil.

¹⁵Dara nera, hyak youmaʾ ununumnaʾ lelemek nang edya men orowek lemeknya nek gigiwal.

¹⁶Dara momnya doboka ara, Wenelesilnya bedya ban nen unubgogowanya seleb dara, onoʾ nara saawoka yanamna. Daud bedya somok e bloboka lukok ara eimik sounuwoka sobnamna. Nara alja sorrom aboka blobok anyek lunuwoka onsok sobnamna.

¹⁷Wera anadya bokoka mek ublanya nera, yok sokok nimi nidyaʾ ara, nadya mab aboka si silimak Yahudi gom nimi nidyaʾ anyek, Wenelesilnya bek eboka dobnok aboka unuwanamna.

¹⁸Imik Neyung adya, men youmaʾ enyek, ban orowek lemoknya bedya ban wenyalamla,” hyok.

¹⁹Onoʾ Yakobus bedya dara, ”Nadya senelamna dara, nunja dara, Yahudi gom nim Imik Neyung ak sam seleb ganya dangal balamak nim ek nunja adya okna nenewoka ganya wili-wala ab menegeibyek senelamna.

²⁰Bok nunda wen sikenek, sikja nim ugumaʾ ak sam hweboka beil balamak denaʾ dijik aboka hnon, gel salaldanaʾ anyek lobongganok aboka hnon, enenga heiboka somogalya wininga manaʾ ak dijik aboka hnon, enenga dijek aboka hnon, momnya donaʾ pik, nera loblulum aboka beibnemab.

²¹Hyak youmaʾ enyek moruwoka, Musa bedya Imik Neyung yuba momnya domok anyek, heika nidyaʾ sam nauba einiwoka lelemeekanya, onoʾ wenababya Sabat mem sum nidyaʾ ara Yahudi nim edya yuba don ek sam einilimak anasa,” hyok.

²²Dara, Imik Neyung yuba lenaʾ gak nang eb, yuba dam nang eb, nidyaʾ Imik Neyung yuba donaʾ nim eb, mamagoka yuba saboka nimi wenen nang Barnabas Paulus ab neikaʾ Antiokhia heikek binok aboka bokol binimab aboka lemek. Dara, sikda yuba saboka, Silas beb, Yudas bok yok si nera Barsabas alameknya beblaboka, neikaʾ bokol bilisik. Dara ban penya nang dara, Imik Neyung mab adya sikenek hyak perob senesik nang ek sekiyisik.

²³Dara, Antiokhia heikek sam bokol bilimek nang eb neikaʾ momnya donaʾ hnon weboka beiyimekaʾ ara yub era ban: ”Yuba lenaʾ gak nang eb, yuba donaʾ nim bo un nang eb, ugunjaʾ hemyabo nim edya, hemyabo nim ugun Antiokhia sam Siria sam Kilikia sam ululum nim ek perob aboka gibisab.

²⁴Nunja anyaganyeb kemab dara, anyagan nun gangganek ab ugunuk an yeiniboka, sikja lemek adya ugunuk sam malya nenewoka hnon ugunuk ganya soro-wara eiyiwoka, ugunuk unulusak anaʾ ara kemab. Nunja dara, sikenek unulululum aboka oruksinaʾ ara orok bok, unulusak.

²⁵Anasa wera nenesa leboka, nunda anyagan ara yuba longowoka nauba saboka, wera perob or unuwanamab amabakanya, ugunuk sam nimi wenen nang bokol binimab aboka umab. Dara, ugunuk binilum hibya nang era, nunja wanaʾ ulusab nang Paulus beb, Barnabas beb yanggeirija dara, neikaʾ binok senewoka unumab.

²⁶Ban penya nang enyek dara, sikda nunja Wenelesilnya bedya si Yesus Kristus amba leboka, sikja nong ara senenya loboka ngalengaʾ goluwoka ulurek nang ek bokol yeilisab.

²⁷Anasa wera, nunda Silas beb Yudas beb, ugunuk bokol yasab. Dara onoʾ, sik penya nang enedya anyagan momnya domab yub era, yuba sibamaʾ adya ok ab pe lebnesirik.

²⁸Ugunuk sam nauba senenggom igin yakaʾ enyek kweiyiwoka ubsilyek aboka, Imik Neyung adya Geisinya beneba hnon, onoʾ nunjaʾ anaba, nera ugunuk ubsilyek aboka, alda ban nenyek unuwanasengnya nera ban ulumla an:

²⁹Ugunda bisaʾ ak geklewoka hweboka beibija denaʾ masa era doboka denggom mem. Dara onoʾ, yokaʾ eneng ara salyaʾ denggom mem, nonga heiboka somogalya wininga manaʾ salyaʾ denggom, mem. Dara onoʾ, hnon gela salaldanaʾ ak, ugunda mok sam geboka ulululum. Ugunda ban nidyaʾ lebabnya danyek nidyaʾ mok sam geboka ulumun dara, wera hyak pelemunaʾ ara an. Seleb lebab, perob e,” wenyaboka momnya doboka beibek.

³⁰Wera seleb salawoka gibdanggogomek dara, sik bokosik nang era Antiokhia sam lanawoka balamek. Wera sikda Antiokhia heikek sam seleb byik dara, nim Imik Neyung yuba domek nimi neikaʾ mamagoka Yerusalem heik ab beiyimek momnya domek surat era sik gangganek sam elegemek.

³¹Dara wera, Antiokhia heikek Imik Neyung yuba doboka ulumek nim era momnya donaʾ beiyimek damok anyek einimek dara, sikja ganya angawoka hekoka perob senemek.

³²Wera Yudas beb Silas beb dara, Antiokhia heik ubdaboka, al sik nong ara ununumnaʾ len nang ulurek adya wera, Antiokhia heik sikja hemyab ek ganya migib geboka, onoʾ pe wenewoka pe ululum aboka ganya kayiwoka lelesirik.

³³Wera onoʾ Silas beb, Yudas beb dara, Antiokhia heikek sam nauba ub wenerek anasa, on pik bokol yeilisik nang ek binirum aboka ganya hekoka lemek dara, nunja perob aboka ugun bokol yeilisik nang ek gibsab anyek nekdo binirum aboka saawoka bokol bilisik. (

³⁴Bok Silas bera, nara anyagan ulumnamna aboka, Antiokhia heikek dibaʾ lomok.)

³⁵Dara onoʾ Paulus beb, Barnabas beb danaba, Antiokhia heikek sam uldablerek. Dara, sikda Antiokhia heikek sam ulumek Imik Neyung mabo nauba ab, hiboka Wenelesilnya bedya yuba nauba wenewoka lel eleklemek.

³⁶Dara onoʾ yok sum enyek, Paulus bedya Barnabas bek, ”Nunja men Yesus yuba lero yibilinum enyek, Yesus ak dib senewoka dorob nang ek, sik hekaʾ anaso ulumak anyek, lenum heik nidyaʾ kemero yibinanam anasa, wen bininam,” aboka lemok.

³⁷Wera danyek Barnabas bedya Yohanes Markus neikaʾ bobnanam senemok.

³⁸Bok Paulus bedya, sikeneblaboka neikaʾ pe uboka wa wenaʾ orok uboka, onoʾ men yuba lero yabalamek sum enyek, anam pikik balamekjok, Pamfilia heikek ab ara losaawoka Yerusalem heik yeilimoknya bek, Paulus bedya dara, bera neikaʾ yabanaʾ ara perob senewanggumok.

³⁹Dara danyek, Paulus beb Barnabas beb nauba lolowoka wabdangoka lelereekanya, wera doluwoka bokdangoka, Barnabas bera Markus beblaboka neikaʾ Siprus mokaʾ mek ekla bunaʾ adya bukoka birik.

⁴⁰Bok, Paulus bera alda Silas bek doboka boboka dara, Antiokhia heik Imik Neyung mab adya Wenelesilnya bedya wanaʾ uboka eleksinaʾ ak sam lobonggesik dara, Imik Neyung yuba lebgiga birik.

⁴¹Wera Paulus beb, Silas beb dara, Kilikia moka hnon, Siria moka hnon, Imik Neyung yuba aknewoka lel ganaklerek. Dara, sikja Imik Neyung yuba donaʾ nimi ganya kayiwoka ulurek.