Read Nalca RASUL 16 Bible Online

RASUL 16 - Nalca bible

RASUL 16

¹Wera Paulus bera balamok ara Derbe heikek ab uboka dara, onoʾ Listra heikek byuk. Dara, anyagan ara Yesus ak yuba doro diriga balamoknya si Timotius ben hnon ulumok. Alja genong gera Yahudi nimi yokaʾ bok, Yesus ak dib senewoka domok gel. Bok alja neyung bek dara, Yunani nang ulumok.

²Imik Neyung ak dib senewoka domek nang Listra heikek hnon, Ikonium heikek hnon, ulumek nang edya dara, Timotius bera alda hyak perobnya senewoka dib senelemek.

³Wera anyek eiyiwoka, Paulus bedya dara, nab neikik bininam aboka, Timotius bedya bolaʾ garamok. Ban unumoknya nera damok ara, anyagan Yahudi nang ulumeekanya, nidyaʾ ara Timotius alja neyung bera Yunani nang ulumla senelemek anasa umok.

⁴Paulus beb yok nim eb, sikda yok heik yok heik yabalameekanya, yuba lenaʾ gak nang eb, yuba dam nang eb dadya, Yerusalem heikek ab lemekaʾ anyek, dib senewoka unuwanok aboka elekdo yabalamek.

⁵Ban unulumek adya Imik Neyung yuba donaʾ nimi nidyaʾ sikja Imik Neyung ak dib senenaʾ ganya nauba danggiga balamookanya, nimi nong anaba li sobaʾ nauba danggiga balamok.

⁶Imik Neyung Geisinya adya Paulus beb, Silas beb dak, Asia mok era Imik Neyung yuba lel birijek aboka mem hyok dara, loboka sikda Frigia sam hnon, Galatia sam yuba lebgiga birik.

⁷Dara Paulus Silas ara, Misia soko berem birik dara, wera onoʾ Bitinia moka bininam senen ubdek bok, Yesus ab Geisinya adya, ”Mok enyegara banaʾ lobdurum mem,” asuk.

⁸Anasa Misia mok eb ara loboka, Troas moka lanal birik.

⁹Troas heikek sam inimnek mabekek ab danyek, Paulus bedya lendara mabok enyek, nimi Makedonia nanga ben hnon sekoka Paulus bek sam lelemokja, ”Anda anasam garal yamenekanya, nuk aral yeisilom,” aboka molowoka bii alamok.

¹⁰Wera Paulus bedya lendara wenyaboka maboka bukoka dara, nunja dara, anara Imik Neyung adya mok enyegan nang ek sam Imik Neyung yuba leb eleganok aboka lebla senewoka, men li pe mab lobla wenyek Makedonia sam binob aboka meebdangamoub.

¹¹Wera nunda Troas heikek ara loboka, mek ekla bunaʾ adya Samotrake heikek almanagoka byuba. Dara anyaganyeb ara, ampum ara Neapolis moka byuba.

¹²Neapolis heikek ab uboka dara, Makedonia mok bokoka hnonok ak sam heikek si ara Pilipi heikek lanal byuba. Dara, Pilipi heik ara Roma nang nadya aboka alawoka domok heik ulumok. Dara, nunda anyagan biniboka liga wen ulumouba.

¹³Pilipi ulumoub salek Sabat mem sum dok dara, Yahudi nang edya anyagan Imik Neyung ak mololomak ak senemoub ak mek gwana longomokaʾ ak heik gokgobok sam bilimouba. Dara, nunda anyagan ulumek gelewa gong danyeb neikaʾ yuba saro bulumouba.

¹⁴Dara, sik hnoum an bulumok gel gera alja si nera Lidia, alda Tiatira mok eb gel gek ulumok. Alda mouk dok akleng ek deknaʾ dekoka dolomok gel ulumok. Dara, alda Imik Neyung ak giblemok gel ulumok. Dara ban sum enyek, Paulus bedya neklesukaʾ ak pe keboka doblulaʾ aboka Wenelesilnya bedya alja ganya bakamok.

¹⁵Wera dara, Lidia geb alja ek nimi nidyaʾ meka dasik. Seleb Lidia gera meka dabgogomek dara, alda nuk nadya ek sam yanalum aboka e bilisuk. ”Hem yab o, ugunja nak alda Imik Neyung pik uboka Yesus ak dib domla senemun dara, wera ugunda nadya ek sam mabnelum,” aboka e bilisuk. Dara, alja nadya pe keboka unuwanok, lobijek senewoka dukaʾ lolom-lolom asukaʾ adya, yo amouba.

¹⁶Dara onoʾ yok sum enyek, nunda heng uboka mololomoub ak sam balamouba enyek, nunda arasinaʾ gel gek hnon eiyimouba. Gel genera bisaʾ adya gologomookanya, alda yokaʾ-yokaʾ eimik unuwanananya nek men orowek unuwanamla aboka lero yabalamok gel hnon ulumok. Alda nimi yok nang ek sam, eimik era anda anyek dib unuwanenggel hen dara, rupiah eleklemek adya, alja ek wa weboka ulumok ek nim ek ara nauba duba dangamek.

¹⁷Dara, al on gel nub Paulus beb yabalemouba pik dobdo yeiniboka bii aboka ebngalogoka lelesukja, ”Ban nang danara, Imik Neyung senenggom ululanya bedya alja wa wenaʾ nang era an. Sikda ugunuk hekaʾ huboka eimik blebnesil anyek neklesirik,” aboka lelemok.

¹⁸Hyakaʾ li wen sob-sobaʾ gel gera wenyal giriklemok. Dara, yok sum era, Paulus bera siklelonaʾ loboka, alda gel genyek an keeboka lemokja, ”Yesus Kristus si sibuka lebgen, Ban weklum bisaʾ era goboka yibilom,” hyok. Dara, al wene salek enyek, bisaʾ era gel genyek abaʾ ara goboka bilimok.

¹⁹Dara, gel dam nang edya, ek wa weboka ununumnaʾ lelemla adya rupiah nauba dolomab bok denghelaʾ senemek dara, sikda Paulus beb, Silas beb salawoka, deknaʾ gasaʾ ak sam gliboka bo biniboka henga geregoka dub nang ek sam bo bilimek.

²⁰Dara, ban nang edya Paulus beb, Silas beb, Roma dub nang ek sam bo amal bilisik dara, sikja lemekja, ”Ban nang danara Yahudi nang yokaʾ. Sikda nunja heikek an malyaʾ nenebgiga yabelesirik.

²¹Sikda yokaʾ-yokaʾ Roma nang edya dara, nera memnya ununggomnya alamabnya nek, wera sikja unuwaneseng senewoka neklesak,” hyek.

²²Dara nimi nauba Paulus beb, Silas bebdak, doluwoka olosik. Wera mok soko dub nang edya, sikja boksom gweldekoka, ”Wera or olululum,” aboka nim ek orugesik.

²³Wera hyak nauba saboka obgogosik seleb dara, nimi henga gasa gobuka beilisin ek sam bobonggosik. Dara, nimi henga gereksinaʾ dubnya bek, ”Anda hyak pe yeiriwoka welesilom,” aboka orugumek.

²⁴Dub nang edya wenyaboka orugumek yuba keboka, wera henga gereksinaʾ dubnya bedya dara, Paulus Silas beb dara, hyak lomok nong ok ek sam doronggoka, yan anaba gasa bonaʾ edya gobuka beiyisuk.

²⁵Wera inimnek dukdukanek enyek, Paulus beb Silas beb dara, Imik Neyung ak heng uboka molowoka, bera seboka giboka lelerek. Dara onoʾ yok anyagan henga geregoka beiyisik nang era sikenek kero ulumek.

²⁶Dara wene sab-sab enyek, senenggom sogoumaʾ enyek dorogomok dara, henga gereksin e yanganaʾ girik egomnaʾ eneba warawoka lomok. Dara, albeyok henga goubuka beilisin e pik era nidyaʾ bakdo yibiniboka, nimi henga goubuka beiyisik nang era, heng ara albeyok lobdo yibilisuk.

²⁷Wera anyagan nimi henga gereksinaʾ dubnya bera lok dangoka bukokok. Wera bukoka kemelemok enyek, nimi henga gereksin e pik era nidyaʾ bakok eibuk dara, henga geregoka beillilimab nimi dara, nidyaʾ byak senewoka al damnya gaba doboka dolukdonun aboka webekdok.

²⁸Bok, Paulus bedya yuba senenggomaʾ ebngalogoka, ”Nunda nidyaʾ an ulumabaʾ anasa, salya obdamenek mem,” aboka lemok.

²⁹Dara wenyek nimi henga gereksin e damnya bera nimek wesaʾ bo yoululum aboka alda e lomok sam biniboka, ber-beranaʾ dib Paulus Silas adya saramek sam biniboka oumuwoka gisuk.

³⁰Wera Paulus Silas ak henga gereksinaʾ dubnya bedya bo goubuka, ”Neyung yab o, nara hekaʾ huboka nimi blebsinaʾ damok ara dobnamna do?” aboka molomok.

³¹Paulus beb, Silas beb dadya lebdekja, ”Anda Wenelesilnya Yesus ak dib senewanalam dara, an nong ara blebnenggel. An nong ab, anja ek nimi nidyaʾ blebnesil,” arek.

³²Wera, Paulus beb Silas beb adya, Wenelesilnya yub enyek, nimi henga gereksinaʾ dubnya bek hnon, nimi nidyaʾ al alja ek ulumek nimek leb elegesirik.

³³Dara, al neik inimnek enyek, wera nimi henga gereksinaʾ dubnya bera, Paulus Silas ak doboka bo biniboka sikja eneng menengaʾ mek elegoka ubsuk. Dara, al dubnya beb, alja ek nimi nidyaʾ eb, wene salek enyek meka dabsik.

³⁴Wera nimi henga gereksinaʾ dubnya bera Paulus beb, Silas beb, alja ek sam eboka bo biniboka denaʾ siksamba urusuk. Dara alab, alja ek nimi nidyaʾ Imik Neyung ak wen dib senewab senewoka, sikja ganya ak eiya dasuk.

³⁵Ampum maboka gwelegok dara, Roma dub nang edya yin bonaʾ nang ek, nimi henga gereksin ek sam Paulus beb Silas beb henga lobsinok aboka, wenyal bululum wenyamek dara, bokol yeilimek.

³⁶Wenyal bilimek seleb dara, nimi henga gereksinaʾ dubnya bedya Paulus bek, ”Neyung yab o, Roma dub nang edya ugunuk or henga loblulum amak anasa, wera henga lobsin anasa, or neyung yab o, bururum e, perob e,” hyok.

³⁷Bok, Paulus bedya yin bonaʾ nang ek lebsuk ara, ”Nunda Roma yokaʾ nang bok, nuk heibuka yana lelesinaʾ loboka nimi hnoum ab oboka gasa ek sam doronggusung. Bok onoʾ wenyek dara, salyaʾ gelelinga bururum aboka orugasak de? Anasa, nunda lek. Anasa, men mok sokok dub nang edya sik damnya yeiniboka nuk henga lobsinok aboka orugul busululum,” hyok.

³⁸Ban wenyasuk dara, yin bonaʾ nang edya Roma mok soko dam nang ek, Paulus bera ban wenyhesil al bilimek. Wera mok soko dub nang era Paulus beb, Silas beb dara, nunda Roma nang yokaʾ herek an yuba kemek dara, sikda hyak loka dasuk.

³⁹Dara, Roma soko dub nang edya Paulus Silas ak biniboka, ”Salyaʾ elgom adya ubsab,” aboka lelel bilimek. Ban unusik seleb dara, onoʾ sikenek neikaʾ henga gereksin ek ab henga loboka bobsik dara, ”Wera nunja heik ab ara lo binirum,” aboka bo bokdo dorogol bilisik.

⁴⁰Paulus beb, Silas beb, sikda nimi henga lobsikaʾ seleb gobdek dara, Lidia gedya ek bilirek. Wera e nenyek an Imik Neyung yuba domek nim ek sam, pe ululum aboka wenewoka ganya hekiyiwesirik seleb dara, Paulus Silas ara lanawoka birik.