Read Nalca RASUL 18 Bible Online

RASUL 18 - Nalca bible

RASUL 18

¹Ban nen seleb dara, Paulus bera Atena heikek ab ara Korintus heikek byuk.

²Dara anyagan ara, Paulus bera nimi Yahudi nanga ben hnon alja si nera Akwila, Pontus mok ebnya beb, ehwibdangarek. Akwila bera anam wenyokok Italia mok eb ara, alja gel Priskila geblaboka yeilirek. Sik nang penya era Korintus heikek yeilirek ara, Roma heikek dubnya Klaudius alameknya bedya Yahudi nang yokaʾ nong ara, nadya sokok anara nidyaʾ lo binimak aboka yaklesuk anasa yeilirek.

³Dara wenyek, onoʾ Paulus bera sik nang penya ek biniboka yuba saboka, wera wa anaba neikaʾ ak beiyik soboka malamak e manaʾ enyek, Paulus beneba sonaʾ ella ulumok bok adya, wera anyagan neikik maboka weboka ulumek.

⁴Bok Paulus Sabat mem sum hen dara, wa welemna ara loboka, Yahudi nim edya yuba don ek sam biniboka, sikenek hnon onoʾ Yunani nang ek hnon, nidyaʾ Yesus ak dib senewoka dobnok aboka yuba dukaʾ saawoka lel eleklesuk.

⁵Wera Silas beb, Timotius beb dara, Makedonia mok eb ara, seleb Korintus moka yarek dara, Paulus bera yok wa loboka, Yahudi nang ek Kristus anyek, Imik Neyung adya nimi blebsinaʾ dubnya eleganesin aboka orowek lemoknya bera, Yesus anasa lemok aboka yuba sobaʾ lel eleklesuk.

⁶Bok anyagan Yahudi nim edya sobaʾ Imik Neyung yub era lobnok aboka derewoka malya nenewoka lelemek anasa leboka, Paulus bedya sikja malya unaʾ era sobaʾ ulusulul aboka alja boksom sam sembejaʾ enyek Korintus heikek malya unaʾ damok ara an alanok aboka haboka yibinunaʾ aboka lemokja, ”Ugunda yokaʾ-yokaʾ damok ugunuk sam malya nenewanasil dara, nera ugun damnya urumunja. Nara ugunuk ara perob, hnon meknenaʾ ara orok. Anasa wenyek moruwoka Yahudi nim ek loboka Yahudi gom nim ek dibaʾ bin,” aboka lemok.

⁷Dara wenyaboka lebsuk seleb dara, Paulus bera Yahudi nim edya yuba don ek ab goboka, ok berem ek biniboka ulumok. Ban e damnya bera Imik Neyung bek giblemoknya alja si nera Titius Yustus aboka silimek.

⁸Dara, Imik Neyung e damnya Krispus bera, alja mabo gelewa nidyaʾ ab, Wenelesilnya bek dib senewoka domek. Dara, nimi nauba Korintus nang eneba yuba keboka dib senewoka yuba dolomek dara, sikbabya meka dasik.

⁹Dara yok sum enyek, Paulus bedya lendara mamok enyek, Imik Neyung adya alak yeiniboka lebokja, ”Paulus o, anda lok ganya bonggom mem. Anda yuba geleknaʾ loboka sobaʾ Imik Neyung yub anyek saboka lelmorululom.

¹⁰Nara anablaboka ulunam anasa, heik enyegan nimi nauba ulumaknya nera, nadya nim anasa, yok nim edya anak yokaʾ unuwanggununjak,” hyok.

¹¹Anasa wera, nenyek sunuwoka Paulus bera Korintus heikek ara gibnaʾ hnonok walaʾ hnabbadya uboka, Imik Neyung yuba Korintus nim ek neklesuk.

¹²Wera onoʾ Galio bera, Akhaya moka dubnya ulumok sum enyek, Paulus bek malya lelemla aboka Yahudi nang adya bleklemeekanya, Paulus be nong ak henga goubuka yana lelesinaʾ ak sam bo bilimek.

¹³Dara sikja lelemek ara, ”Ban Paulus benera, Musa bedya momnya dobok yub era sunuwoka, Imik Neyung ak gibnenggom mem aboka wenelesilnya bera an,” aboka lelemek.

¹⁴Dara wenyek, Paulus bedya yuba sabnunaʾ ul yabok bok, Galio dubnya bedya leboka ara, ”Wei, ugunda Yahudi nang o, ban ugunja lelelumnya nenera, nim oboka unaʾ gom, yuba blekoka unaʾ lelemun dara, wera ugunja lelelum ak dib lelemak senewoka kebnesisinyabok,

¹⁵nenera ugunja si nemba hnon, ugunja unuwanalum an yuba sanaʾ amba hnon, ugunja unululumnya nenesa leboka ululum anasa, nera ugumba yok unulululum. Nara unurubnya nera lek anasa, ugumba yok unulululum. Nara unurubnya nera lek anasa, ugumba yok dan meewoka uldalalulum,” hyok.

¹⁶Wenyaboka Galio bedya Yahudi nang ak anyagan ara bo bululum aboka okoka yakasuk.

¹⁷Dara wenyek, sikja Imik Neyung e damnya Sostenes bek salawoka yana lelesinaʾ saramek ab olomek. Bok Galio bedya, nera alba eibnenggumla de senen dogom aboka ulumok.

¹⁸Ban nen seleb unumok bok, Paulus bera or nauba Korintus heikek ulwenelemok. Wera Paulus bera Korintus nang ek or pe ululum abgogosuk dara, alda Akwila beb Priskila geblaboka, Siria sokok sam mek ekla bunaʾ adya bukoka bilimek. Men binggumok bok, Paulus bera Kengkrea heikek ab danyek Imik Neyung amba gwanga lomokaʾ ara, alja honga gomek.

¹⁹Wera sikda Epesus heikek seleb byik dara, Paulus bera Akwila beb, Priskila geb dara, anyagan loboka, alda Yahudi nim edya yuba don ek biniboka, sikenek yuba saboka neklesuk.

²⁰Wera Epesus heikek ulumek nang edya Paulus bek, ”Wera anda neikaʾ nublaboka sobaʾ ulunob,” aboka molomek bok, alda yo henggumok.

²¹Bok, onoʾ binimok sum era lebokja, ”Imik Neyung adya or helya dara, eimik onoʾ ugunuk saawoka yanasin,” hyok. Paulus bera seleb wenyabgogomok dara, mek ekla bunaʾ pik Epesus heikek ab ara, Antiokhia moka bununaʾ aboka lanawok.

²²Wera Paulus bera Kaisarea heikek yinggyuk dara, Yerusalem heikek welewoka, Imik Neyung yuba doboka ulumek nang ek perob aboka gibgogowosuk dara, onoʾ alda Antiokhia heikek byuk.

²³Wera onoʾ Paulus bera Antiokhia heikek ara, or li wen ubuk dara, yok sum era lanawoka Galatia sam hnon, Frigia sam hnon, yuba doro diriga ban nang ek ganya migib elegoka kayiwoka ubgiga yabalamok.

²⁴Wera danyek, Aleksandria mok eb beiyimeknya Yahudi nanga ben hnon alja si nera Apolos alameknya benyek, alda Epesus heikek eimik yeilimok. Alda hyak yuba sanaʾ ak sam geremseng nongnya uboka, Imik Neyung yuba momnya dobokaʾ nidyaʾ ara alda hyak gobdo ella ulumok.

²⁵Onoʾ hnon Wenelesilnya bedya neknaʾ lomok ab uboka domoknya. Anasa wera, alda hyak ganya yeiriwoka Imik Neyung yuba Yesus ak geklewoka nauba lelemok bok, wera Yohanes Pembaptis bedya dalasukaʾ ok ella ulumok.

²⁶Dara, Apolos bera hyak asaʾ nongaʾ anyek Yahudi nim edya yuba don ek sam wekoka nim ek yuba leb einisuk bok, Akwila Priskila sik nang penya edya kerek dara, Apolos bek yalom aboka sikja ek sam bo bilirek. Dara, sikja ek ab Apolos bek Imik Neyung pik ara alan aboka, pe wenewoka nekerek.

²⁷Wera danyek, Apolos bedya dara, Akhaya moka binimna senen ganya bobok. Wera anasa leboka, alja hemyab edya or binilam wenyaboka, Akhaya diriga ban nang ek sam, ugunda Apolos yanggalya dara, doro diblulum aboka momnya donaʾ beiyimek. Wera Apolos bera seleb Akhaya moka byuk dara, alja nimi nauba Imik Neyung adya wanaʾ uboka arasuk adya yuba dib senewoka domek nang ek ara nauba arasuk.

²⁸Apolos bera hyak senenggomnya uboka migib adya, wera Yahudi nang ek nimi hnoum sikenek yugom nanga nenelesuknya nera yokaʾ-yokaʾ lanalemok ak unulumok. Dara, Imik Neyung yuba momnya dobokaʾ anyek einiwoka, wera Yesus ara Kristus anyek, aldib Imik Neyung adya nimi blebsinaʾ dubnya sekiyimok aboka beknaʾ dangallilimok.