Read Nalca RASUL 19 Bible Online

RASUL 19 - Nalca bible

RASUL 19

¹Wera Apolos bera anam Korintus heikek ulumok salek enyek, Paulus bera oblyek pik uboka yabalamok ara, Epesus heikik lanal bilimok. Dara, Paulus bera Epesus heikek seleb byuk dara, anyagan Imik Neyung yuba doro diriga ban nang eb ehwibdangamek.

²Wera Paulus bedya Epesus nang ek sam, ”Ugunda dib senelum sum era, Geisinya ara seleb doblum gom?” aboka heisuk. Dara, Epesus nang edya Paulus bek lebek ara, ”Nunda Geisinya hnon donaʾ ara orok. Numbabya Imik Neyung adya Geisinya ara, an okoka yokaʾ ara numba elgom ulumab,” hyek.

³Dara Paulus bedya, ”Wera danyek dara, heknedya mek danaʾ edya dabsik do?” aboka heisuk. Dara sikja, ”Yohanes bedya dalasuk diligaʾ enyek diliwoka dabsik,” hyek.

⁴Dara, Paulus bedya sikenek lebsuk ara, ”Yohanes bedya meka dalasuknya nera, nimi meka dabsin nim enera, aldib malya unaʾ ak ab loboka ganya dangawok an danasa ulumok. Bok Yohanes bera nimi meka dalasuk ab dara, Israeli nim ek lelemokja, Nimi si Yesus alamaknya benyek, eimik era yanamla anasa, alak dib senewolulum, wenyaboka dalasuk,” hyok.

⁵Wera sikda Epesus nim era, banyek seleb kemek dara, sikenek Wenelesilnya Yesus si sibuka meka dasik.

⁶Wera Paulus sikenek soruka salawoka heng uboka lelesuk sum enyek, Imik Neyung Geisinya sikenek gologol yingginiboka, sikda yok-yok yuba saboka, Imik Neyung yuba lel yabek.

⁷Dara, sik unusuk nang era hiboka dara, obadya nang anaso dangamok.

⁸Paulus bera walaʾ winilya Epesus heikek uboka, anyagan Yahudi nim edya yuba don ek wekoka Imik Neyung adya eimik wenelemnesil yub enyek, nimi yok nang ek lolowoka anyek aboka bekellilisuk.

⁹Bok sik gangganek ara, nimi hnon ganya gasa uboka, Imik Neyung yuba dib senewanggunusibya senemek. Dara, anyagan longolomek nang ek sam, ban nang edya Imik Neyung adya Yesus pik uboka nim embengaʾ blebnesin amok anyek, lek aboka sonda anasa lelemak aboka blekoka lelemek. Anasa wera, Paulus bera sikenek ab loboka, Yesus yuba doro diriga ban nang eblaboka neikaʾ senenggom sekolah dolomek e si Tiranus ekla ak sam bilimek. Dara anyagan ara li sob-sobaʾ Paulus bera yok nang eb heibdangoka unulumek.

¹⁰Paulus bera ban unuwoka unulumok salek era, gibnaʾ penya gobdo lemok dara, Yahudi nang yokaʾ babya, onoʾ Yahudi gom nang eneba, nidyaʾ sikda Asia moka ulumeknya nera, gobdo Yesus yuba nidyaʾ kemek.

¹¹Imik Neyung adya hyak lok so migib ununaʾ senenggomaʾ anyek, Paulus be pik uboka nauba unulumok.

¹²Dara anedya, soruk lubuldanaʾ gom, saramek noroldanaʾ akleng gom, Paulus bedya ongolamnaʾ beiblomna anyek doboka, neiknaʾ salamna nang ek bo yeilimek dara, sikda meremeekanya, bisaʾ gologosinaʾ ara goboka dengaboka baldolomek.

¹³Hnon Yahudi nang bok nimi salyaʾ hwelesik nang era, yok mok sokok biniboka, nimi bisaʾ gologosinaʾ yakoka hwero yabalamek. Dara, ban hwelesik nang era, Yesus si sibuka nimi hwebsunuwanamab aboka ulumek. Dara, sikja nimi hwebnesin danyek lelemek ara, ”Paulus bedya lero yalamla yub anyek, ban Yesus si sibuka bisaʾ anak dib yakgen anasa, goboka bilom,” aboka lelemek.

¹⁴Yahudi yuba wa gakaʾ dubnya alja si Skewa bedya, alja mab era sekbadya nang uboka, ban wenyaboka lero hwero yabalamek.

¹⁵Bok yaklemek bisaʾ edya sikenek lebsuk, ”Nara Yesus ara ella ulumnakanya, onoʾ Paulus beneba ella ulunabok, ugunuk dara, ugunda hek nang do?” hyok.

¹⁶Dara, bisaʾ gologomeknya bedya hyak yu asaʾ anyek sakdo dorogoka si saboka sikenek hmenga nenellilisuk anyek, sikda bisaʾ adya si buluk dubaʾ gebman, nong baneng akleng ara poboka sikja nong ok ab dengaboka desukaʾ adya nong baneng gobek.

¹⁷Nimi nidyaʾ Yahudi nimi yokaʾ ab, Yahudi gom nim eb, Epesus heikek ulumek nimi nidyaʾ ara, ban unuweisil an yuba kemek dara, sikda hyak ganya loka dasuk. Wera danyek, Wenelesilnya Yesus si ara imik nenewoka gibgiga balamek.

¹⁸Dara onoʾ nimi nauba Yesus ak men dib senemek nang era, nimi hnoum yeiniboka youmaʾ sikja unulumek malya unaʾ laga lero balamek.

¹⁹Dara onoʾ neikso, hnon nang era, men ger donaʾ buku hnon, bisaʾ molowoka nimi guma guksin buku bolomek ara, nimi hnoum beiyiwoka laga uka dalamek. Dara wera, ban uka dalamek buku enyek, alja rupiah dekemek anyek, nidyaʾ hiboka einiwaneseng dara, sikja nauba deknaʾ denga penya gobdo danasobok, nidyaʾ uka damek.

²⁰Wera ban unulumek adya, Wenelesilnya bedya yub era hyak nauba neikaʾ ok oboka lelewoka, onoʾ migib danggiga balamok.

²¹Yokaʾ-yokaʾ nidyaʾ seleb unuru dakdomok dara, Paulus bera Makedonia moka binyekanya, onoʾ Akhaya mok eb ara, Yerusalem heikek binimna senen ganya bobok. ”Wera seleb ono sam byukuk ab dara, onoʾ nara wen Roma binimna,” hyok.

²²Dara wenyek, Paulus bera alda anam Asia moka ulumookanya, Makedonia sam ara alak aralerek nang ek ara, Timotius beb Erastus beb danyek, ugunuk binirum aboka bokol bilisuk.

²³Wera ban salek enyek, Yesus pik amba leboka, Epesus heikek ara senenggom yuba damoka lanamok.

²⁴Epesus heikek ara, nimi si Demetrius bedya, Artemis bek gibnaʾ e sunuwoka, perak adya mek e gong memelemok adya, nidyaʾ welemek nang amba deknaʾ nauba lanalamok.

²⁵Anasa wera Demetrius bedya, alja wa welemek nang eb, rupiah donaʾ yokaʾ memelemek nang gong eb, neikaʾ ak mamagoka, alja sikenek wenyasukja, ”Hemyab o, nunda anyagan nunja welemab wa nedya rupiah pe dolomab ara ella ululum,” hyok.

²⁶”Wera ugunja heng yokaʾ edya eiyiwoka, onoʾ okoka kelelum dara, Paulus benyaʾ alamaknya bedya unulamla ara ugunda ella. Paulus bedya lelemla ara, nunja memelemabaʾ nimi perob senelemakaʾ anyek dara, nim adya ok ganya doboka sunuwoka memelemaknya nera, neyung aboka gibnesengnya dibaʾ gomaʾ alasil. Anasa alja dara, wera alja lelemla yub adya nera Epesus heikek ok gom, alda Asia mok soko nidyaʾ anaba, nimi gong ganya gliboka bo balasil ara ugunda eiyilum.

²⁷Anasa hyak lok so ara, nunja weboka memelemab anyek, eimik era si malya danasil ak ulumla. Wera nenyek ok gom, Artemis bisaʾ dub gel gedya alja e nenyek, al nong ak anaba perob senelemaknya nenyek malya gebnamak ak ulusil. Dara, Artemis bek Asia soko nang nidyaʾ alak giboka, onoʾ soko nang nidyaʾ alak giblemak bok, lobijek anasa lemna,” hyok.

²⁸Wera Demetrius bedya ban wenyaboka lelemok anyek kel yabek dara, sikda hyak yu nong anasa yeiriwoka ebngalogoka lelemekja, ”Epesus nang edya Artemis bisaʾ dubnya bera hyak senenggomnya ulumla,” aboka lelemek.

²⁹Ban unumok yuba Epesus heik ara, neikaʾ ok oboka lelemok. Wera ban uboka unulumek adya sikda yeiriwoka, Gayus beb, Aristarkus beb, sikda Makedonia nim bok, Paulus beblaboka neikaʾ pika yalamek nang ek, sikenek salawoka sununaʾ kemelemek e digum hnoum bo bilimek.

³⁰Dara ban unulumek sum enyek, Paulus beneba sikenek lebsunun senewoka bunun senemok enyek, Epesus heikek sam Imik Neyung yuba doro diriga ban nang adya, anda banggom aboka lelemek anasa lomok.

³¹Dara onoʾ Asia moka soko dam nang edya anaba, sik neikaʾ Paulus beb ganya hemyabo nenebdangoka ulumek nang edya anaba, sununaʾ kemelemak e dukduk nongok Paulus bera weklyek aboka, wenyaro bululum aboka nimi yok nang ak orugosik.

³²Dara ban unulumek salek enyek, longomek nim era, salyaʾ doluwoka obdangdo balamek. Dara, sikda damok ara anasa longomabaʾ ara okoka elgom adya, hnonda anyek lero balamek dara, yok nim era nenyek lero balamek.

³³Nimi Yahudi nang edya Aleksander benyek hyak nimi hnoum nonogoka wekoka bo balamek anasa, nimi yok nang edya dara, alak mala gakaʾanya senemek. Wera danyek Aleksander bedya na yuba sabnamna anasa, ugunda yuba sanaʾ loboka gelegolulum aboka soruka moub-moub aboka usuk.

³⁴Bok, sikda Aleksander bera Yahudi nanga yokaʾ nong ak okoka eiyimek dara, penya jam anaso hyak yeiriwoka neikebok bii aboka lelemekja, ”Epesus nang edya bisaʾ dubnya Artemis bera senenggomnya ulumla,” aboka lelemek.

³⁵Bok, Epesus heik momnya dolomoknya bedya, ”Mem, salyaʾ iriri aboka lelelum ara mem,” aboka eimik namenaʾ nenemok. Dara al adya lelemok ara, ”Ugunda Epesus nang o, Epesus heik nong anyek, hyak senenggom bisaʾ dubnya alja e ab, onoʾ alja imik ab sam yinggilimok sununaʾ girik ab, ugunda meewoka bo ululumaʾ ara, soko nang nidyaʾ ella ulumak.

³⁶Wera ban nenyek yok nang adya nenegomaʾ henggunumak anasa, nera nauba lelelum ara loboka, ugunja ganya doboka meknewoka unuwomunuk, mem.

³⁷Dara, ugunja ban bo yeililum nang danara, ugunja bisaʾ dubnya bek malya aboka derewoka, alja ek wekoka hoga donggulumek bok, bo yeililum an.

³⁸Anasa Demetrius beb, alja wa weboka un nang eb, nimi yok nang adya, nuk malya ubsak senelemak dara, yana lelesin e nera al nidyaʾ nang amba pika bak loboka, onoʾ mok soko dub nang enebabya, or yuba sal yeiniboka unulunok senelemak anasa, yuba bo yeiniboka unuwanamak.

³⁹Bok wenyek dara, ugun gangganek an yok-yok ganya hnon ulusilya dara, wera nera pe longowoka yuba pe saboka meewanesom.

⁴⁰Dara onoʾ hong lelemok ara, nunda sumen an Epesus heikek an senenggom yuba lanawal anyek, nimi yok nang edya salyaʾ lelem mamagoka malya ub menegolum hesijek. Nuk heibsija dara anasa, anaʾ okna anasa, lobnob,” hyok.

⁴¹Ban wenyabgogomok dara, ”Wera or balalulum,” hyok.