Read Nalca RASUL 21 Bible Online

RASUL 21 - Nalca bible

RASUL 21

¹Wera Epesus heikek Imik Neyung yuba dolomekaʾ dub nang enya, angoo aboka gibdanggogomoubaʾ seleb dara, sikenek loboka almanagoka balamoubnya nera, Kos mek dubuk heikek bilimouba. Wera ampum ara, Rodos mek dubuk heikek byuba. Anyeganyeb dara mek dub pik buka balamoubnya nera, mek ekla bunaʾ mal balamla ak Patara sam byuba.

²Patara mok eb uboka dara, Fenesia moka bununaʾ aboka ul yabok mek ekla bunaʾ enyegan an bukuka balamoubnya nera,

³mek dubuk sokok Siprus mok era, nunja waneng ek gek sam eibuba bok, nunda nera piboka Siria moka byuba. Wera nu bukumouba mek ekla bunaʾ era, alja bonaʾ bomok ara heikek yokoka beibnemok anasa, Tirus heikek an yinggyuba.

⁴Wera Tirus heikek ara nunda mek ekla bunaʾ ak ab sokok sam yingginiboka anyagan yuba doro diriga ban nang eiyimouba dara, sikeneblaboka li sekbadya neikaʾ ulumouba. Dara, Tirus heikek an yuba domek nang edya, sikenek Imik Neyung Geisinya adya lesuk anyek eiyiwoka Paulus bek, ”Anda Yerusalem heikek ara mem banggom, lobnelam,” aboka lelemek.

⁵Bok anyagan ulumouba salek enyek, Yerusalem heikek ban salek era oka dok dara, Tirus nang era anyagan loboka, nunda lanawoka balamouba dara, sikja gelewa mab ab, nidyaʾ nuk arawoka bobsiknya nera heik gokgobok sam bo bokol bisik. Wera mek gwan berem mek ekla bunaʾ ak byuba dara, nunda nidyaʾ sikeneb komo lumugoka heng uboka molomouba.

⁶Wera nunda sikeneb soruka salawoka gibildalamoub ara, nunda mek ekla bunaʾ ak welewoub dara, sikda ek lo byik.

⁷Dara nunda Tirus heikek ab bindibigemoubaʾ ara, Ptolemais heikek byuba. Wera nunda Ptolemais heikek ara yuba dib senewoka ulumek nang eb gibdangamouba dara, anyaganara li hnonok mabuba.

⁸Wera onoʾ ampum ara lanawoka balamoubaʾ ara, Kaisarea heikek lanal byuba. Kaisarea heikek ek ara, Kaisarea heikek lanal byuba. Kaisarea heikek ek ara, Imik Neyung yuba lennya Pilipus bedya ek biniboka neikaʾ mamouba. Pilipus bera alda Yerusalem heik ab, Imik Neyung yuba lelemnelum aboka, sekbadya nang sekiyisuk sum enyek, al hnon sikiyemeknya.

⁹Pilipus bedya ek alja dombadya gelmab dara, ununumnaʾ lelemek.

¹⁰Nunda Kaisarea heikek li wen ul yabuba salek enyek, Imik Neyung adya alja yuba ununumnaʾ lelemoknya alja si nera Agabus bera, Yudea sokok ab ara, seʾ yeilimok.

¹¹Alda nuk sam yeiniboka, Paulus bedya gouka noronaʾ ek domok. Dara, Paulus bek ab dobok gouka noronaʾ adya, alja yan eb, soruk ab norobdangoka lebokja, ”Imik Neyung Geisinya bedya nak wenyanel ara, Ban gouka noronaʾ damnya bera, Yerusalem heikek ab, Yahudi nim edya henga goubijekanya, Yahudi gom nim edya sorukuk eleganamak,” wenyaboka lemok.

¹²Wera Agabus bedya wenyaboka lelemokaʾ anyek, nub Kaisarea nim eb kebuba dara, nunja onoʾ Paulus bek, alda Yerusalem heikek banaʾ loblulul aboka, alak dukaʾ lolowoka lemouba.

¹³Bok Paulus bedya lebok ara, ”Ugunda nenera hekasa engelelum adya, nadya ganya soldol meneklenulum do? lemok. Nara Yerusalem heikek ab salawoka henga gereganenok aboka ok bununaʾ aboka unggulumna. Alda Wenelesilnya Yesus si amba leboka somogonun aboka ulumna,” hyok.

¹⁴Nunja mem aboka lelemoubnya nera, Paulus bera kesinaʾ lobsuk dara, nunja Paulus bek Yerusalem heikek banaʾ loblom anaʾ ara lobuba. Alda nunja dara, or Imik Neyung adya alja senelenya donok Paulus bek unuwolul aboka lemouba.

¹⁵Nunda Kaisarea heikek li wen uboka, nunja bonaʾ pe liboka beibgogobuba dara, wera Yerusalem heikek binobaʾ aboka lanabuba.

¹⁶Wera nunda Manason bedya ek biniboka, mabnemoubaʾ anasa, Kaisarea heikek ab dara, nimi wene nang diriga ban nang nublaboka neikaʾ lanawoka byuba. (Manason bera alda Siprus nang bok, alda seleb youmaʾ ek Yesus yuba doboka diriga balamoknya ulumok).

¹⁷Nunda wera Yerusalem heikek nongok byuba dara, anyagan Imik Neyung mab era, nuk perob senewoka sikja ek sam doro diyisik.

¹⁸Ampum ara nunda Paulus beblaboka, Yakobus bedya ek eibdangoka ubnobaʾ aboka kemel byuba dara, wera Imik Neyung yuba dam nang era, nidyaʾ Yakobus bedya ek ok gobdo ulumek.

¹⁹Wera Paulus sikenek seleb gibsuk dara, alda sikenek Imik Neyung al Paulus be pik uboka, yok sokok Yahudi gom nim ek sam yokaʾ-yokaʾ perobaʾ unulusukaʾ anyek laga nekesuk.

²⁰Paulus bedya ban wenyaboka nekesuk anyek seleb kemek dara, perob aboka sikda nidyaʾ Imik Neyung ak giblemek. Danyek onoʾ sikja Paulus bek, ”Hem Paulus o, Yahudi nimi yokaʾ nong ara deng sal-salyaʾ anyek Yesus ak dib senelemak. Sikda Musa bedya unuwanalum an yub ek perob senewoka ganya oloklemek nang bok, Yesus ak dib senemek.

²¹Dara wenera, sik Yahudi nim edya kelemak dara, hem Paulus anja Yahudi nimi bok yok sokok ulumak nim ek, Musa bedya momnya domok yuba loblulum aboka neklesil alamak ara, sikda seleb kelemak. Anja adya sikja mabo bokaʾ garanaʾ loboka, yok Yahudi nim edya unulumakaʾ digum ara lobnok aboka neklesilimaʾ ara, sikda kelemak,” hyek.

²²”Anasa Yahudi nang bok, Imik Neyung yuba dib senerob nang era, wera anyagan yalam dara, sikda ella ubnenjak. Anasa wera hekaʾ hubnemab do?

²³Anasa wera nunja lebnemabnya donok anda pe kebnelam. Anyagan ara wen nimi dombadya nang besa lemek nang ulumak.

²⁴Wenyek dara, Paulus o, anda dombadya nang danyeb neikaʾ anja nong era mek elekdangoka geisa nenebdangoka sikja honga gobsinok aboka, anja siksamba rupiah deknelam. Anadya wera anak lelenjak yub era sondaʾ lelemak, Musa bedya momnya domok yub ek keboka unululadya ok senewagenok bar,” hyek.

²⁵”Bok Yahudi nimi gom bok Yesus dib senemek nim era, nunja seleb yuba saboka, anyek unuwanamab aboka, sikenek sam momnya donaʾ pik lemobja, Ugunda nim ugumaʾ ak beillilimeijaʾ denaʾ denggom, pam enenga wining enenga salyaʾ denggom, somogalya pam wining salyaʾ denggom, gela salyaʾ salawoka yokaʾ unggom mem, aboka momnya doboka beiyimouba,” hyek.

²⁶Ampum soʾ ara wera danyek Paulus beb, dombadya yok nang ek dara, ganya geisa nenebdangoka ubek. Seleb dara, sik Imik Neyung ek wekoka, liga wene badya dara, geisa unaʾ ek elekgogowanamabakanya, Imik Neyung ak pam oboka giboka uka daboka unuwanasak ak nekemek.

²⁷Wera onoʾ liga wen yenebok dara, Asia mok eb Yahudi nang adya, Paulus ben Imik Neyung ek ulumok ak eiyimek. Dara, Yahudi nang edya nimi hnoum doluboka, Paulus bek salawoka domeekanya,

²⁸wenyamek, ”Wei Israeli nim o, aral yousululum o. Wera benedya nidyaʾ yok-yok mok soko biniboka, nunja mok nang ek malya nenesinaʾ damoka neklesilnya bera an. Hnonda Musa bedya unuwanalum an yub ek blekoka, onoʾ Wenelesilnya bedya ek malya e aboka bleklelanya bera alan. Anya onoʾ Yunani nang en Paulus bedya Imik Neyung adya geisa ek an aboka bo yalamla anasa, malya ullilimla hnon,” aboka lelemek.

²⁹Yahudi nang edya Paulus bek wenyaboka lelemeknya nera, Trofimus benyek Epesus heik ab ara Paulus beblaboka neikaʾ ulurek eiyimek anasa, Yahudi nang senemeknya nera, Paulus bedya wera Trofimus bera Imik Neyung e lomok bo yeilimla gom aboka lemek.

³⁰Wera Yerusalem heik ara doluwoka hyene mane ab menegoka, nimi nidyaʾ bik-bika aknel yabalemek. Sikda Paulus bek soruka salawoka Imik Neyung ek ab gliboka bo gomek. Dara, al wene sab-sab enyek, Imik Neyung bedya e nera pika seregemok.

³¹Yahudi nang adya Paulus bek obnobaʾ aboka dulumek dara, onoʾ wene salek enyek, Roma yin bonaʾ dubnya bek Yerusalem heikek ara, wenera nimi doluwoka oldalamla aboka wenyal bilimok.

³²Wera senenggom yin bonaʾ dubnya bedya hyak berra aboka yin wenebadya nang eboka bobsuk dara, doluwoka oldalamek oulyang ak sam byik. Wera yin bonaʾ dubnya beb, yok oldan nang eb, seleb yakaʾ eibek dara, nimi nidyaʾ Paulus bek olomekaʾ ara lomek.

³³Dara, senenggom yin bonaʾ dubnya bera Paulus be berem biniboka onoʾ gasa henga penya adya, henga gouboka, ubgogowoka dara, Paulus bek sam, ”Anda heknya do?” aboka heiboka, onoʾ ”Anda hek malya unaʾ ek unulum do?” aboka heimok.

³⁴Bok ban salek enyek anyagan ulumek nim edya dara, ”Paulus ben an hnon unulamla,” alamek dara, onoʾ hnon yok nim edya dara, ”Anyek hnon unulamla,” aboka lelemek. Wera sabsobuk-sabsobuk abdangoka lelemek adya, yin bonaʾ dubnya bera damok ara anyek senewoka elgom anasa, al adya dara, Paulus bek doboka bobmunukanya, yina bonaʾ nang ulumek ek bo bululum aboka orugosuk.

³⁵Wera sikda yin bonaʾ nang edya Paulus bera doboka bobek dara, e pik moromnaʾ ak bo welek bok, nimi nauba adya obnob aboka saboka olomek anasa, yin bonaʾ nang edya al nong ak leiliwoka bo welemek.

³⁶Dara, nimi nauba Paulus bek obnobaʾ aboka longomek nang edya eimik dobgiga yeiniboka, Paulus bek ”Oblulum, oblulum o,” alsinil yalamek.

³⁷Dara wera, Paulus bera yin bonaʾ nang adya sikja gasa ek bo weknunaʾ ul yabok salek, Paulus bedya senenggom yin bonaʾ dubnya bek, ”Or nara anablaboka mek yuba sabnenam gom?” aboka heimok. Dara yin bonaʾ dubnya bedya, ”Anda Yunani yub ara ellaʾ salalam gom?” aboka heimok.

³⁸”Wera anda Mesir nang ak adya, eijanok so ban nimi denga yubaʾ linbadya nang malya damok lanalamak nang eboka, hwalek sam bolosulumukanya, dub lunulumnya de?” hyok.

³⁹Paulus bedya lebok ara, ”Nara Yahudi nang yokaʾ nong ulumna. Nara Kilikia sokok perob heik Tarsus heik yokaʾanya ulumna. Anasa, nimi nauba ulumak ak an nara yuba sabnun bar, or henelom,” hyok.

⁴⁰Wera yin bonaʾ dubnya bedya Paulus bek, ”Or, yuba sabnelam,” hyok dara, e moromnaʾ ak sekoka, nimi yok nang ek yok nang ek yuba sanaʾ mem aboka sorok moub-moub aboka usuk. Dara, nimi nidyaʾ ara yuba sanaʾ loboka gelegemek dara, Paulus bera sikenek Ibrani yub adya sab einimok.