Read Nalca RASUL 26 Bible Online

RASUL 26 - Nalca bible

RASUL 26

¹Wera danyek Agripa bedya Paulus bek, ”Wenera anda yuba saboka sekdanalam anasa, or wenyaldal yabalom,” hyok. Dara, wen Paulus bedya soruk eb weininggoka leb einimok.

²Lebokaʾ ara, ”Neyung Agripa senenggom dubnya anja saram nongok an, Yahudi nim adya sondaʾ anasa miniwoka lelenyaknya nenyek, an nong ok an laga poboka yuba garabdanamna adya, nara hyak eiya dabnel.

³Bok hyak dib nong so ara, Agripa dubnya anda Yahudi nang edya sikja yokaʾ-yokaʾ nidyaʾ unulumak ara, anda nidyaʾ ella ululam. Anasa wera, nara Paulus bedya lebnamna yub enyek, neyung anda pe siklewoka bukwenewoka kebnelam,” hyok.

⁴”Nara gobenya wenyek moruwoka, wera hekaʾ huboka ulumsa an, sikda Yahudi nimi en nidyaʾ ella ulunyak. Nara anam gobenya ulumsa dara, nadya soko yokaʾ ak uboka, onoʾ Yerusalem heik nong ek, hekaʾ huboka ulumsa ara, sikda ella ulunyak.

⁵Dara, sikda Yahudi nim en youmaʾ ekaʾ moruwoka ella ulunyek. Anasa, Yahudi nang perob senewaseng bok dara, wera nara youmaʾ ek moruwoka Parisi nanga dangoka nunja Imik Neyung yuba pe doboka Imik Neyung yub adya yokaʾ-yokaʾ mem hyok ara, hyak pe keboka unulamsa anyek, sikda Yahudi nim edya anaba, aldib Paulus bera unulumok aboka laga lebneseng.

⁶Wen nara anyagan yana lelewanenok aboka seknanya nera, nunja neyung yabo youmaʾ nang ek, Imik Neyung adya sikenek eimik eleganesin amoknya nenyek, dib senemsa adya yana lelelenyak.

⁷Wera al Imik Neyung adya perobaʾ eleganesin wenyamoknya nenyek dib senelamna amba, Yahudi nang era nak malya nenelenyak.

⁸Ugunda Yahudi nang ak dara, Imik Neyung ara somogamna nim en embengaʾ bukullilisil bok anasa, hekasa ugunda unuwanggunumso senelelum do?” hyok.

⁹”Nababya youmaʾ dara, nadyaʾ yokaʾ-yokaʾ unulamsa ara, Nazaret mok ebnya Yesus alameknya bek blekoka lololonun senewoka yeiriwoka unulamsa.

¹⁰Dara al nenyek, nadya Yerusalem heik ab unulamsa. Yahudi yuba wa gakaʾ dub nang ek ab migib soruk doboka, nimi munaʾ Imik Neyung mab ek henga gouboka gasa ek beillilisisa. Dara onoʾ, yuba dolomek nang ek or obnamab al yaben dara, nara moroma kwelemsa.

¹¹Dara onoʾ, nadya Yahudi nim edya yuba don ek pik nauba li sobaʾ doluwoka lobaʾ gunuwanok aboka sunulusisa. Dara, nara hyak nauba yu ganya boboka, Yesus yuba dolomek nang ek obsunun senewoka doblesisa ara, hyak yok mok heikek anaba yeiriwoka doblesisa,” hyok.

¹²”Dara al onnya nenesa, hnon sum enyek obsunun senewoka Yerusalem heik ab uboka Yahudi yuba wa gakaʾ dub nang ek ab, nim on momnya donaʾ doboka bobsa dara, Damsyik heikek obsunun aboka bilimsa.

¹³Dara, neyung hyak perob dubnya o, anam yubyek dukdukanek pik hnomunga balasebok, imik ab sam alak hyak senenggom dilinaʾ enyek, henga sirik ara mek so alda hyak senenggom ak, nak yebnyok. Wera dilinaʾ en era, nak onoʾ neikaʾ balamoub nang eb nuk yebgolusuk.

¹⁴Wera nunda nidyaʾ balamoub nang en, dilinaʾ lok amba sokok malyinggilimouba. Dara, nak Ibrani yub adya nak youbol yabonyok kebdasa ara, Saulus o, Saulus o, hekasa anda nak sobaʾ lobaʾ nenewoka olonelem do? Saulus o, anda nak lobaʾ nenelenelem ara, wa wen sapi ek gamaʾ adya hleboka yaklamak dara, pik gwabom aboka oldalamla sok, oldalalam, anyok.

¹⁵Wera danyek nadya, Neyung, anda heknya do? aboka heibsa dara, Wenelesilnya nak lebnyok ara, Nara Yesus anja olonelemnya benyaʾ, anyok.

¹⁶Anda bukoka seklom. Nadyaʾ nong anyek abdanya nera, unuwanyaakanya an nong ak aabdangoka, nadya weblom aboka an nong ak sekiyiwagen. Anasa wera, anda sumen nak ab eiblamaʾ hnon, eimik nadya eleganenggenaʾ hnon, lero yabalamnalam.

¹⁷An nong ak, nadya Yahudi nim ek ab hnon, yok soko nim ek ab hnon, bleblemnenggen. Dara, nadya yok soko nim ek bokol bininggen.

¹⁸Anja adya nimi yok soko nang edya sikja henga baknesilimeekanya, onoʾ sikenek gunaʾ ak ab ara doboka bo yeiniboka, dilinaʾ ak sam bo weknesilim. Anja adya, Satan migib adya lobaʾ nenelesilaʾ ak ab ara doboka, Imik Neyung migib arasinaʾ ak sam dangiyiwanesilim. Wera danyek, sikja malya unaʾ an memelesil, onoʾ sikda nak dib senenyekaʾ adya, Imik Neyung amba munaʾ gobdo un nimi danamak, anyok,” hyok.

¹⁹”Anasa neyung dubnya o, nadya ban Imik Neyung ak ab heng eiyiwoka domsa anyek, dib senewoka bleknenggumsa.

²⁰Anasa wera, nara hyak yeiriwoka nimi yok nim ek, ugunja ganya dangawoka, onoʾ ugunja nong enyek, Imik Neyung ak dib ganya ologoka lebnalumukanya, ugunja ununaʾ adya, ganya dib dangamoub an beknaʾ era amalemnelum, aboka neklesisa. Wera lendara eibsa dara, Damsyik heik ab leb einiwoka, onoʾ eimik era Yerusalem heikek uboka, Yudea sokok ab ara, Yahudi nimi gom nim ulumak nim ek hnon, lero yabalamsa,” hyok.

²¹”Anasa wera nenesa leboka, Yahudi nang edya nak Imik Neyung e eremek ab henga gouboka, nak dib obnenob aboka dulunyek.

²²Bok Imik Neyung adya nak sobaʾ arawoka, wera nara sumen anyagan mek nang ek hnon, hnonda nauba nang ek hnon, ugun gangganek an sekoka, wera laga lel yibin an. Nadya nidyaʾ wenyaboka lelesinya nenera, yoknya nek lenggulusin. Alda ununumnaʾ len nang edya, hnon Musa bedya unuwanamla ak alameknya nenyek gigimoknya nek ok lelemna.

²³Wenyaboka lelemeknya nera, Imik Neyung alda Kristus nimi blebsinaʾ dubnya sokok sam eleganesin amoknya bera, seleb gwekoka somogok dara, alda men youboka embengaʾ dangeinimoknya dangoka, wera dilinaʾ yuba laga nenewoka lelemok. Yahudi nimi yokaʾ ak hnon, Yahudi gom nim ek hnon, dilinaʾ yuba laga nenewoka lelemok,” hyok.

²⁴Paulus bedya anam wenyaboka yuba garawoka leldalamok salek enyek, Festus bedya Paulus bek dobmoruwoka lemok ara, ”Paulus o, anda hyak serema salawajok an. Anja yokaʾ-yokaʾ nauba ella dangalalam an adya, anda serema salawajok an,” aboka lemok.

²⁵Bok Paulus bedya Festus bek, ”Neyung dubnya perobnya o, nera serema salanenaʾ orok. Nadya leboka salamna yuba mousaʾ salamna era, ganya lobaʾ gologoka lenggulumna. Alda hyak dib nong lelemna,” hyok.

²⁶”Dara, Agripa dubnya beneba, nera aldib lelemla senewoka ella ulunel. Wera anasa, nara alja hogung ak ara asaʾ ganya boboka lelemna. Ban nidyaʾ lelenanya nera, hyak doknowoka unuwanggumok anasa, hnonok mekaʾ sirigaʾ anaba, alda eibnenggumoknya nera unggulumla senelamna.

²⁷Wera neyung perob dubnya Agripa o, neyung o, anda youmaʾ ununumnaʾ lelemek nang edya men lelemek yub enyek dib senelelam de? Nadya dara, neyung anda dib senelelamaʾ ara ella ulumna,” hyok.

²⁸Danyek Agripa bedya Paulus bek lemok ara, ”Anja nak wene sab-sab Imik Neyung yuba doboka ganya dangawanamla senelenelem de?” hyok.

²⁹Bok Paulus bedya lebokaʾ ara, ”Nara Imik Neyung ak heng uboka mololamnya dara, or wene salek gom, mandewanamso gom anaba, na ulumna sok ugumba danasom ara, alda wera henga gobenyek heng enyek hnonok unuwanggunumso bok, na ulumna sok danasom aboka mololamna,” hyok.

³⁰Wera danyek, Festus dubnya bera sekemookanya, Agripa mok soko damnya bek, alja gel Bernike geb, anyagan nidyaʾ longomek nang eb, sikda nidyaʾ sekemek.

³¹Wera sikda beiyik goboka yibilemek dara, sik moumen leldalamekja, ”Benyek dara, henga geregoka oboka gasa ek beiyiwoka dibneseng malya unaʾ hnon, meknewoka unaʾ orok bar,” alamek.

³²Dara Agripa bedya Festus bek, ”Paulus benyek dara, alja Kaisar dubnya bedya saramek sam yana lelewanenulum anaʾ orok dara, alak henga lobneseng bok ulumla,” hyok.