Read Nalca RASUL 3 Bible Online

RASUL 3 - Nalca bible

RASUL 3

¹Dara, onoʾ yok sum enyek, sinik jam tiga anaso dara, nimi mololomek salek seleb dok anasa, Petrus beb, Yohanes beb, molowanomaʾ aboka Imik Neyung ek sam wele balarek.

²Wera, Imik Neyung ek senenggom pik sindamak ara, perob nong pik aboka si silimekaʾ ak sam ara, nimi ben hnon anam beiyimek salek eb ara moruwoka nonga nidyaʾ heimoknya bek bulumok. Dara, bera Imik Neyung yuba dol yanggeija nim ek rupiah mololamlya enyek, eleklenokaʾ aboka sobaʾ jaboka pikik sam bo beil yalamek.

³Wera Petrus beb Yohanes beb, Imik Neyung ek sam wekel barek ak eibsuk dara, sikenek rupiah hnon eleganenurum aboka molosuk.

⁴Dara, Petrus beb, Yohanes beneba, benyek keebdarek dara, Petrus bedya, ”Anda nuk kendesilom,” hyok.

⁵Dara, sikenek yokaʾ hnon eleganenerek ak dobnamna senewoka sikenek ngekluboka ganya wemok.

⁶Bok, Petrus bedya heimoknya bek, ”Rupiah yokaʾ-yokaʾ ara nak hnon unaʾ orok anasa, wera alda nak dan yokaʾ don hnonok ulumlaʾ anyek eleganenggen. Yesus Kristus Nazaretnya bedya si sibuka, anda sekoka yabalom,” wenyaboka hwemok.

⁷Dara onoʾ, Petrus bedya hwemoknya bedya sirik soruk salawoka gliboka sekiyimok. Dara, wene sab-sab enyek, benedya alja yan heng gongolyaʾ migib nong dangoka meremok.

⁸Wera, heimoknya bera sakdo dorogoka sekoka, onoʾ yibeinimok. Dara onoʾ, alda Petrus beb, Yohanes beblaboka sikeneb neikaʾ Imik Neyung eremek wekoka, yana ingiwoka merewoka sakdo dorogoka seleb merewanaʾ anasa perob aboka Imik Neyung ak giboka lero yabalemok.

⁹Dara, heimok bok meremoknya bedya yana ingi yibiniboka, Imik Neyung gibdo yabalemok ak eiyimek dara,

¹⁰wera sikda nimi nidyaʾ Imik Neyung ek perob pik sindamak sam heimokaʾ anyek moldo bulumokaʾ eillilimeknya benyek okoka eiyimek. Dara, nimi nauba ara hekak alak unumok anyek, hyak loka nauba dasuk.

¹¹Dara, nonga heimokaʾ anyek meremoknya bera, Petrus Yohanes ak anam salabmosuk salek enyek, nimi nidyaʾ loka daboka sik winilya ara Salomo pik sereknaʾ ak ulumekaʾ ak sam, nimi nauba bik-bika yeiniboka longol yeilimek.

¹²Wera, Petrus bera nimi nauba eiyimok dara, sikenek, ”Wei ugunda Israeli nim o, ugunda hekasa ban unumlaʾ ak loka dasil do? Ugunda hekasa nuk ngekellublesulum do? Ban nonga heiboknya bera nunja migib edya gom, nunda hyak pe ulunam adya gom, yan ingi yabalamla senelum de.

¹³Orok, Abraham beb, Ishak beb, Yakub beb, nunja neyung yabo sikja giblemeknya Imik Neyung bedya, ban unumla adya alja me Yesus imik nenewal. Al Yesus anyek, ugunja dub nang ek oblulum aboka doboka elegel bililum. Pilatus bedya henga lobnunaʾ aboka ulumok bok, ugunja alja saramek ab wekdo dorogolum.

¹⁴Ugunda alda geisa uboka hyak perob ok ululanya wekdo dorogoka, nim osuk anasa henga geregemeknya benyek lob loblom aboka, Pilatus bek dukaʾ lolom-lolom alalum.

¹⁵Alda nim embengaʾ unaʾ dubnya bek, ugunja dara, seleb oblum bok, Imik Neyung adya seleb somoknaʾ ak ab suboka bukiyimok. Unumoknya nera, nunja henga yokaʾ adya okoka kaboka eiyimoub nang nunda an.

¹⁶Dara, ban eiyiboka seleb ella ululumnya benyek, Yesus si adya, Yesus si ak dib senenaʾ adya merewal. Aldib, alda seleb migib uboka eikaʾ nong dalaʾ ara, Yesus ab alja migib ek dib senenaʾ nong adya ok ubla. Yesus ak dib senenaʾ adya, ban benera, hemyab o, ugunja hogung ak sam laga eikaʾ merewal,” hyok.

¹⁷”Wei hemyab o, anasa wera, ugunub ugunja dub nang eb, Yesus ak unulum ara, elgom adya unulum anyek, wera nara ella ubsin.

¹⁸Dara, ban unuwoka gigiwanamokaʾ anasa, Imik Neyung adya orowek ununumnaʾ lelemek nang pik moruwoka, nimi blebsinaʾ dubnya Kristus bera eimik oka nauba gweknamla aboka lemokaʾ ara, wera ban adya gigiwok.

¹⁹Wera anasa, ugunja malya unaʾ Imik Neyung adya lublul aboka, ugunja malya unaʾ ak ab ganya dangawoka saaboka, Imik Neyung ak yoululum.

²⁰Dara, Wenelesilnya bedya, ugunja ganya angawoka perobaʾ nenewanasilekanya, ugunja blebsinaʾ dubnya ak ugunuk bilom aboka orugolul aboka, ganya dangawanalum. Wenelesilnya bedya orowek, Kristus ara al ugunja blebsinaʾ dubnya dolul aboka sekiyimok anasa, unuwanalum,” hyok.

²¹Petrus bedya onoʾ wenyasuk, ”Ban Yesus ara, youmaʾ Imik Neyung adya geisa ununumnaʾ lelemek nang edya lelemek sok, yokaʾ-yokaʾ nidyaʾ Imik Neyung adya meewanggumlya salek, imik heik ulumlya ara, meewanamlya salek ok laga danamla.

²²Anasa, Musa bedya men lebokaʾ ara, Ugunja Wenelesilnya Imik Neyung ara, ugun gangganek ab, alda ugunja meneng mok nim ek, na anaso ununumnaʾ lenya sekiyiwanamla. Dara ugunda hekaʾ ak nidyaʾ lelemlya ara, pe kelemnelum.

²³Wera anasa, ben hnon ban senenggom ununumnaʾ lenya bedya yuba pe kebnenggunulanya bera, alja heik nimi hogunguk ab garawoka orok nenewanamla, wenyaboka Musa bedya lebok.

²⁴Youmaʾ ununumnaʾ lelemek nang era, Samuel bek ab moruwoka ara, yok nang gong ununumnaʾ lelemek nanga nidyaʾ ara, wen unulamla eillililumaʾ anyek, eimik unuwanamla aboka lelemek.

²⁵Ununumnaʾ lelemek nang edya Imik Neyung adya unuwanamna aboka lemokaʾ anyek lelemekaʾ ara, ugunsamba hnon ulumla. Imik Neyung adya ugunja neyung yab ek lebokaʾ ara ugunuk hnon lesuk. Abraham bek Imik Neyung adya lebokja, ”An nang yilaʾ pik moruwoka, yok-yok soko nimi nidyaʾ ak binimla,” wenyamoknya nera, hnonda al ugunsamba lesuk.

²⁶Wera anasa leboka, Imik Neyung adya alja me Yesus sekiyiwoka, binilam aboka, ugunuk men youlul aboka, orugomok. Ugunda nidyaʾ malya unaʾ ganya dangiyiwoka ugunuk perobaʾ neniyiwousululaʾ aboka, youlul aboka orugomok,” wenyaboka Petrus bedya lebok.