Read Nalca RASUL 4 Bible Online

RASUL 4 - Nalca bible

RASUL 4

¹Wera, Petrus beb Yohanes be, nimi yok nim ek anam yuba salarek salek, Yahudi Imik Neyung yuba donaʾ gak nang eb, Imik Neyung ek keeboka diri ulumek nang dubnya eb, Saduki nim eb, Petrus Yohanes ak yeilimek.

²Sikda Petrus Yohanes adya, Yesus ara somoknaʾ damok al seleb suboka embengaʾ welewok aboka lelerek adya, nimi seleb somogamna nimi suboka welewanamak ak nekerek anasa, hyak yu ganya bomek.

³Dara, sikenek doboka henga geregoka, seleb sin dangoka iniwanamok anasa, Petrus Yohanes ara, gasa ek doronggoka, anyagan maboka gwelegemok.

⁴Bok, nimi nauba, sikja lelesirek yuba kemek nang era, dib senemek. Dara, sik Imik Neyung yuba dib senemek nim era, hiboka denga salyaʾ lambadya nang (lima ribu orang) dangamok.

⁵Wera ampum so gwelegok dara, Yahudi dub nang eb, Imik Neyung yuba wa gakaʾ nang eb, sikja yuba neksin nang eb, Yerusalem heikek yuba sabnobaʾ aboka longomek.

⁶Dara, sikda Yahudi nang Imik Neyung yuba wa gakaʾ dubnya Hanas beb, Kayafas beb, Yohanes be hnon, Aleksander beb, Hanas al nang yilaʾ nidyaʾ ara, mamagomek.

⁷Dara, Petrus beb Yohanes beb, ban mamagomek ak beil yeilisik dara, dub nang adya sikenek heib einisik. ”Ugunda hek migib ek gologoka, heknyek si sibuka unurum do?” aboka heisik.

⁸Petrus Imik Neyung Geisinya adya deknewoka ulumoknya bedya sikenek, ”Wei, ugunda Israeli dub nang uboka, Imik Neyung yuba dam nang o,

⁹nuk sumen anyagan yana lelewanasulum ara yokaʾ embengaʾ alda nonga heimoknya bek pe ununumukanya, hekaʾ adya meremokaʾ anyek, heilisulum dara, ban ella danalum.

¹⁰Neyung yab dub nang ugumbabya hnon, onoʾ Israeli sokok nimi nidyaʾ hnon, ella danalum. Ban heimokaʾ anyek embengaʾ seklelanya benera si ara, Yesus Kristus Nazaret mok ebnya bedya migib adya, ugunja hogunguk hyak eikaʾ sekla. Ugunja seleb oboka gal ak glablum dara, somogok bok, Imik Neyung adya somoknaʾ ak ab suboka bukiyimoknya bedya migib adya ubla ara, ella ubnalum.

¹¹Onoʾ hnon, Yesus adya eimik unuwanamla aboka, youmaʾ Imik Neyung bukuk sam momnya dobok ara, E sonaʾ nang edya malya girik aboka bobegek bok, alda hyak onoʾ perob men youbuka un girika dok, hyok.

¹²Anasa, sokok anyagan ara, yok si nedya hnon embengaʾ blebsulul aboka Imik Neyung adya nim ek lebnenggusuk. Yesus si adya ok nimi blebnesil aboka lesuk,” hyok.

¹³Dara, nimi nauba henga gereksin ek yuba sabnobaʾ aboka longomek nim era, Petrus beb Yohanes beb, sikja asaʾ nong anyek yuba saboka, sikda sekolah hnon nauba donaʾ orok bok, nauba pe lelerek eiyimek dara, hyak loka nauba dasuk. Dara wera, sik penya dara, Yesus yuba doro diriga balarek nang era alan senewoka, bekoka ella dangamek.

¹⁴Bok, Yahudi dub nang edya dara, nonga heimokaʾ anyek, eikaʾ meremoknya bera, Petrus beb, Yohanes beb, neikaʾ oka seklemok anasa, yuba gomaʾ dangoka yuba sabnamenggom dangasuk.

¹⁵Anasa, Petrus Yohanes ak, beiyek seʾ goboka bururuk aboka orugeisik dara, sikda beiyek birik. Wera danyek, Yahudi nang yuba sanaʾ gak nang edya saldalamek.

¹⁶Dara sikda wenyabdangamek, ”Wera, penya nang ek an hekaʾ hubnemab do? Nimi nidyaʾ Yerusalem heik an ulumak nim edya dara, lokso ara beknaʾ dibaʾ sik penya nang adya ok unurong ara, seleb ella ubak bar. Nera malya unurong aboka bobnenewoka sanaʾ okna dabsil.

¹⁷Sikja unulurak ara, nauba dangoka yok nim ek oboka lelewesilyek anasa, wera ugunda Yesus si sibuka hyak lebnenggunurum henemab,” aboka samek.

¹⁸Seleb dara, dub nang edya Petrus Yohanes wera onoʾ yorurum aboka heng gereksin ek bo wekoka, ”Wera, ugunda Yesus si sibuka yokaʾ-yokaʾ unuwoka nimi yok nang ek neksin ara hyak lobnerum,” aboka lesik.

¹⁹Bok, Petrus Yohanes adya dara, lebdekja, ”Har nerek perob so, ugun dub nang yuba kenaʾ anyek perob gom, Imik Neyung yub ak kenaʾ anyek perob gom, aboka seiniwanalum.

²⁰Nunda seleb eiyinum kenum anyek lelenam ara, hyak lobnenggunusinim,” arek.

²¹Dara, dub nang ara, Petrus Yohanes ak hnonok sibin anaba damok eboka eibnenggumeekanya, nimi nidyaʾ ara heimoknya hwemok ak eiyiwoka Imik Neyung bek gigilemekaʾ anasa, dub nang edya dara, wera Yesus si sibuka unulurum ara wen lobnerum aboka, hyak webluwoka lobonggomek.

²²Dara, nonga heimokaʾ anyek Petrus Yohanes adya hwereknya bera gibnaʾ ara denga hnonok uboka ebdobnya mek badya anaso dangamok bok, meremok.

²³Petrus beb, Yohanes beb, seleb henga lob lobsik dara, ek biniboka yok yuba domek nim ek, sikenek Yahudi yuba wa gakaʾ dub nang eb, yuba dam nang eb dadya, ugunda wen yokaʾ-yokaʾ unuwanggunurum mem aboka lemekaʾ nidyaʾ ara, sikja hemyab ek nekdo bilirek.

²⁴Dara, sikja hemyab edya dub nang edya ban wenyamekaʾ kemek dara, sikda nidyaʾ hnonok ganya boboka Imik Neyung ak heng uboka molowoka lemekja, ”Senenggom Wenelesilimnya o, anja adya im ab, soko ab, senenggomaʾ mek gwan eb, nidyaʾ yokaʾ-yokaʾ anyagan ulumla ab dara, anja ok nidyaʾ uyilum,” aboka mololomek.

²⁵Onoʾ anya, ”Imik Neyung anja Geisinya adya, nunja neyung Daud be, anja wa wenya bek ab seleb lelumja, Yok soko yok soko nim era hekasa yu sen-sen alamak do? Soko me nidyaʾ ara salyaʾ danalanya nek bok anasa, hekasa orowek gegewoka sunulumak do?

²⁶Wenelesilnya, alja nimi blebiyiwanesilaʾ dubnya Kristus beb, sikenek sokok sam dub nang nidyaʾ obdanob aboka gegelemak. Dub nang nidyaʾ adya neikaʾ hiboka, sikenek mala weboka obdanob aboka gegelemak, ara Daud bedya lemok adya lelum,” aboka lelemek.

²⁷”Aldib, wen ara Herodes beb, Pontus Pilatus beb, Wenelesilimnya o, yok soko yok soko nim eb, heik enyegan ulumak Israeli nim eb, seleb mamagoka, sikda anja geisa me Yesus bek anja nimi blebsinaʾ dubnya sekiyilumnya bemba, mala weboka obdanob aboka samek.

²⁸Imik Neyung o, sikda yokaʾ-yokaʾ unuwanamla aboka orowek men senelumnya nenyek ok unumek. Anja migib lomok uboka, anja ganya edya ok unuwanamna senelumnya nok unumek.

²⁹Anasa Wenelesilimnya o, wenyok sikda nuk wellublesak anyek kendesilom. Onoʾ nuk anja wa wen nang enyek, anja yub enyek lok orok anyek asaʾ ganya boboka leb giriganobaʾ aboka, or unuwanalum aboka nuk migibaʾ elegeisilom.

³⁰Anja geisa me Yesus si adya uboka, neiknaʾ nimi hweboka, yokaʾ-yokaʾ lok so beknaʾ senenggomaʾ lok so anyek unuwanobaʾ aboka anja arasinaʾ ara nuk elegeisilom,” wenyaboka molomek.

³¹Wenyaboka Imik Neyung ak seleb mololgogol yabek dara, sik longomek e nera warawoka lobok. Dara, sikda nidyaʾ ara Imik Neyung Geisinya adya deknewoka, asaʾ nong anyek, Imik Neyung yuba nim ek lero yabalamek.

³²Nimi nidyaʾ men Imik Neyung ak dib senemek nim era, ganya hnonok hiboka, neik nong unaʾ ok ulumek. Nimi ben hnon bonaʾ yokaʾ-yokaʾ nidyaʾ bobna dara, nabeyok gelelenga borunun ganya bonggulumek. Yokaʾ-yokaʾ nidyaʾ, sikenek ulumokaʾ ara neikaʾ bokoka pe bolomek.

³³Dara, Yesus yuba lenaʾ gak nang era, hyak senenggom migibaʾ gologoka, Yesus ara seleb somogoka onoʾ embengaʾ suboka bukoka welewok aboka, yuba lero yabalemek. Dara, Wenelesilnya bedya wanaʾ uboka eleksinaʾ adya nauba aralasuk.

³⁴Ban unulumek adya sik gangganek sam ara, nimi ben hnon bonaʾ garanaʾ ara unggulumek. Dara, sikja soko gom, ulumna e gom, e ab, soko ab, rupiah dekoka, rupiah seleb dobna dara,

³⁵rupiah era bobnadya yuba lenaʾ gak nang ek bo elegel yalamek. Dara rupiah era, benyek dobso senen geknewan nang ek bokoldalamek.

³⁶Dara, Yusuf beneba neikso unulumok. Alda alja yokok soko era, yok nang ek rupiah deklulum aboka, rupiah seleb dobna dara, rupiah era Imik Neyung yuba lenaʾ gak nang ek bo elegel bilisuk. Ban unumoknya Yusuf bera Lewi nang yilaʾ Siprus mok ebnya. Men Imik Neyung yuba lenaʾ gak nang edya alak Barnabas aboka si silimek. Nunja yub edya dara, ganya heksinaʾanya alamab.