Read Nalca RASUL 5 Bible Online

RASUL 5 - Nalca bible

RASUL 5

¹Bok onoʾ nimi ben hnon alja si nera Ananias alameknya bek ulumok. Alab, alaʾ gel Sapira geb dara, sikja soko bok, yok nang ek rupiah dekerek.

²Ananias bera, alja gel geneba ella ubok bok, alja soko rupiah dekoka dobok dara, rupiah era bokoka darasam era, Imik Neyung yuba lenaʾ gak nang ek bo elegel bilisuk.

³Dara, Petrus bedya Ananias bek, ”Anda ganya ek bisaʾ dubnya Satan weklul aboka, globol lolamakanya, anja soko dekelam rupiah era darasam era ansamba dolamaakanya, Geisinya bek sondaʾ lelelam ara hekasa ulam do?

⁴Anja anam yok nim ek rupiah deknenggom dara, soko era anjinya unggulumo de? Anasa wera onoʾ seleb rupiah deklam dara, rupiah era anjinya nok anam unggulumla de? Anasa wera hekasa anda unuwoka sondaʾ lebnamna senewoka orowek ganya sunuwoka ulam do? Anasa wera, anda nim ak sonda lebnenggulam bok, Imik Neyung ak sonda lelam,” hyok.

⁵Dara, bera alak Petrus bedya wenyan yuba kel yabok sab-sab, sokok sam gololonga malyingginiboka, dibaʾ somogok. Dara, nimi nidyaʾ ban unuwal an yuba kemek dara, hyak ganya loka dasuk.

⁶Dara, nimi gobenya wene nang yeiniboka, Ananias somogok ak beʾ gobuka boksom adya kemek dara, bo goboka dil bilimek.

⁷Wera seleb ousa so winilya jam anaso dok dara, Ananias alaʾ gel Sapira gera, unuwal anya nera elgom umok jok, wekel yeilimok.

⁸Dara, Petrus bedya Ananias alaʾ gel ak, ”Anja nenya eb, anab, ugunja soko rupiah dekoka dorum dara, dorum rupiah era al nenyek ok de?” aboka heimok dara, ”Yo, al donumnya nera alan bo yeilimla an,” hyok.

⁹Wera danyek, Petrus bedya Ananias alaʾ gel ak, ”Ugunda hekasa anja nenya eb Imik Neyung Geisinya bek sunuwananam aboka gegerum do? Wera anasa kendelom, anja nenya somogamla anyek bo soko lokol bilimak nim era, seleb e pik sindamak yanggak anasa, ambabya neikik bo binenjak,” hyok.

¹⁰Wera al wene sab-sab, Ananias al gel gera malyingginiboka Petrus bedya yan damak sam somogok. Dara, gobenya nang era, ek wekel yek bok adya gel gera seleb somogokaʾ ak eibek dara, bo goboka alja nenya diyimek ak neik berem dil byik.

¹¹Dara, nimi nidyaʾ Imik Neyung yuba donaʾ nim eb, salyaʾ nim eb, ban unuwal an yuba kemek dara, hyak ganya loka dasuk.

¹²Dara, yuba lenaʾ gak nang adya nimi gangganek yokaʾ-yokaʾ lok so beknaʾ ab, senenggomaʾ lok so ununaʾ gong gong anyek, unura yabalamek. Wera Imik Neyung yuba dolomek nim era ganya hnonok uboka Salomo pik sindamak sam mamagoka yuba dolomek.

¹³Dara, nimi nidyaʾ ara Imik Neyung yuba dolomek nim ek, perob senewoka gigilimek bok, longolomek dara, salyaʾ nim era, lok anasa makal yanggumek.

¹⁴Bok, Imik Neyung ak dib senelemek nim era, sobaʾ nauba danggiga balamok. Nera gelewa anaba, nengmab anaba, nauba danggiga balamok.

¹⁵Dara, yokaʾ-yokaʾ hyak senenggomaʾ anaba dib dangalamok wek adya, nimi neiklamna nim era ekla manaʾ ak dubuk gom, esonaʾ yanganaʾ ak gom, mayiwoka pikik nimi yabalamna ak bo beil balamek. Wera, Petrus be yabelya dara, alja ganya yamaʾ edya hnon nim ek dara, bebegeisilya dara, merewanok senewoka unulumek.

¹⁶Dara, Yerusalem moka heik berem ulumok heik nim gong era, sikja neiknaʾ nang boboka nauba mamaklemek. Dara, neiklamna nim eb, bisaʾ gologosin nim eb, hwebsinok aboka bo yalamek dara, nidyaʾ meriyiwoka hwelesik.

¹⁷Wera ban unubgiga balamek adya, Yahudi yuba wa gakaʾ dubnya beb, alak sikja aralamek nang nidyaʾ eb, nera Saduki nim edya, men Imik Neyung yuba domek nim ek hmana leboka yok so unuwanob senemek.

¹⁸Dara, yuba lenaʾ gak nang era, henga geregoka, nauba gasa henga gereksin ek sam beiyisik.

¹⁹Bok, inimnek enyek, Wenelesilnya bedya lero edya yeiniboka, henga gereksin e pik sereknaʾ nidyaʾ bakoka, yuba len nang nidyaʾ eboka beiyek bo yibilisuukanya, sikenek lebsuk ara,

²⁰”Ugunda Imik Neyung e eremek sam biniboka, ban wen embengaʾ un pik yuba nidyaʾ anyek, nimi yok nim ek lelelulum e,” aboka orugosuk.

²¹Wera Imik Neyung yuba domek nim era, Imik Neyung lero adya sikenek unuwanalum asuk anyek dib senewoka, sikda hyak lugunaʾ nong enyek, Imik Neyung ek sam biniboka, nimi yok nang ek yuba lel eleklesik. Dara, Yahudi yuba wa gakaʾ dubnya beb, alak aralamek nang eb, yeilimek dara, Yahudi nang yuba sanaʾ gak nang hyak nidyaʾ sabnob aboka youmek. Dara, sikda Imik Neyung yuba len nang ek henga geregobaʾ anyek, henga loboka bo yoululum aboka, orugomek.

²²Bok, henga loboka bo yoululum aboka orugesik nang era, henga gereksin ek sam nimi henga lobnob aboka bilimek enyek, Imik Neyung yuba len nang era anyagan ara unaʾ orok dengamek eiyimek dara, losaawoka yuba san nang ek bindiwoka wenyamek,

²³”Nunda heng gereksin ek bilimab dara, e weilik ara, nimi diri welemak nang era, pe diri uboka, pika nidyaʾ ara gasa darawoka seregemak bok, pika baklemab enyek, oulyang demok ebyakab,” hyek.

²⁴Dara, Imik Neyung ek keeboka diri ulumek nang dubnya beb, Yahudi yuba wa gakaʾ dub nang eb, unuwal aro bilimek enyek, seleb kemek dara, sikja ganya eboka, angoo hekaʾ hnon danamla do senewoka loka dasuk.

²⁵Bok, ben hnon sikenek yeiniboka, ”Wera kendululum e! Ugunja henga geregoka gasa ek beiblum nang era, wera Imik Neyung ek sam uboka, nim ak yuba lel eleklesak,” al yeilimok.

²⁶Dara, diri ulumek nang dubnya beb, alak aralamek nang eb biniboka, Imik Neyung yuba doboka lelemek nim ek onsok bo yeilisik. Bok, sikda dukaʾ lolom-lolom anaʾ loboka, or namenaʾ bo yeilimek. Nera yeiriwoka henga goubuka ul yabibya dara, nimi nauba ulumak nim edya nuk girik adya obsijek aboka gelelenga namenaʾ bo yeilimek.

²⁷Dara, yuba lenaʾ gak nang era, Yahudi yuba sanaʾ gak nang ek, yuba wa gakaʾ dubnya adya heiblul aboka bo yeilisik.

²⁸Dara, Yahudi dubnya bedya, Yesus adya yuba doboka lelemek nang ek, ”Nunda seleb ugunuk Yesus adya si sibuka nimi yok nang ek neknaʾ ara hyak mem aboka nauba dukaʾ lolosub anano? Bok wen nunja mem amoubnya nek blekoka nauba unululum. Ugunda Yerusalem heikek gokgobok nidyaʾ Yesus alja si sibuka nimi yok nang ek neklelumukanya, wera onoʾ Yesus ara Yahudi dub nang edya obek aboka nuk gaka kilisulum,” aboka lemok.

²⁹Bok Petrus beb, onoʾ yok yuba lenaʾ gak nang eb dadya dara, ”Nunda nuk dara, nim adya le, Imik Neyung adya le, lelemaknya nera, Imik Neyung aljinya nok kelemnamab.

³⁰Nunja neyung yabo youmaʾ nang sikja Imik Neyung bedya, ugunja henga goubuka galak bokoka oblumnya bek, somoknaʾ ak ab ara bukiyimok.

³¹Dara, nimi Israeli nimi ganya dangawoka malya unaʾ memelemnesilaʾ dobnokaʾ aboka, Imik Neyung adya Yesus ak imik weliyiwoka, alja sirik soruk sam bukiyiwoka, onoʾ nimi diri bo usinaʾ damok hnon, nimi blebsinaʾ damok hnon alak elegemok.

³²Anasa nu hnon, Imik Neyung adya alja yuba pe keboka unulumak nang ak, Geisinya eleklesil Geisinya anyek hnon, ban unumok ak eillilimoub anyek, damok nang ulumab,” hyek.

³³Dara Yahudi nang era, ban wenyaboka lemek anyek kemek dara, sikda hyak yu ganya boboka, yuba len nang ek obnemab aboka ulumek.

³⁴Bok, Yahudi nang yuba sanaʾ gak nang gangganek ara, Parisinya, nimi si Gamaliel ulumok. Alda hyak Yahudi nang Imik Neyung yuba neksinya uboka, nimi nidyaʾ ara alak pe keboka, alda dubnya so ulumok. Dara, benedya sekoka, na yuba sabnamna anasa, Yesus adya yuba len nang era seʾ beiyek bo bululum aboka orugusuk.

³⁵Dara, alda Yahudi Imik Neyung yuba dub nang ek, ”Hem yab Israeli nang o, ugunja ban Yesus adya yuba doboka lelemak nang ek unululum anyek, ugunja pe seiniwanalum.

³⁶Anasa wera, youmaʾ dara, nimi si Teudas bera, alda nara senenggomnya aboka gigibdangoka, nim alak diriga biniboka neikaʾ ulumek nim era hiboka dara, denga yuba odaraʾ badya nim ulumek. Bok, al nong ak obek dara, wera alja yuba dolomek nim era doluwoka, bokgokdangoka, alja yuba lelemok anaba gobdo dengaro lomok.

³⁷Ban nen seleb dara, onoʾ nimi si momnya dolosik salek, nimi si Yudas be Galilea mok ebnya bera, nara dubnya abdangoka ulumok. Dara, alja yokaʾ-yokaʾ unulumok adya perob senewoka nimi nauba alak mamagel balamek. Bok, al nong anaba obek sum era, alja yuba keboka alab neikaʾ ulumek nim era doluwoka bokdangoka dengamek.

³⁸Anasa, wen ban unuwonumnya nenyek sunuwoka, ban nim enyek, sikenek yokaʾ-yokaʾ salyaʾ ununggom, mem. Or sikaʾ yok ulunok aboka weneweisin. Sikja leboka nim ek nekoka, unulumakaʾ anara, nim adya ganya doboka unulumeija dara, denghenemla.

³⁹Bok, sikja unulumak nidyaʾ ara Imik Neyung ak ab lanalamlya dara, wera ugunja sikenek yokaʾ-yokaʾ ununaʾ okna ubnesil. Nauba so ara, ugunda Imik Neyung ak isaʾ nenebdangoka mala boboka oldanaʾ danalum,” hyok.

⁴⁰Gamaliel bedya ban wenyaboka wenewosuk dara, Yahudi nang edya henga gereksin dub nang era, dib aboka perob hyek. Dara, sikda Yesus adya yuba lenaʾ gak nang ek, ek wekel yoululum aboka ebiniboka, legebnaʾ deboka legewoka, ”Wera ugunda Yesus si adya nimi yok nang ek nekdo yabanaʾ ara lobnelum,” aboka wenyaboka lebgogosik seleb dara, sikenek henga losik.

⁴¹Dara, yuba doboka lelemek nang era, Yesus si amba leboka olosak, yokaʾ unulusak ara, perob aboka eiya daboka, yuba sanaʾ gak nang ek ab goboka bilimek.

⁴²Dara li sobaʾ, Imik Neyung ek ab, nimi yuba dolomek nim ek ab, Yesus adya perob yuba lero, Kristus ara Imik Neyung adya nimi blebsinaʾ dubnya eleganesin amok ara, wera an elegosuk aboka, yok nang ek yuba sobaʾ nekdo yabalemek.